Luka 3:11 - AHYERƐLƐ KRONGRON

¹¹ Na obuale bɛ kyɛ, “Sona bɔ ole ataadeɛ aguasoɛ nyɔ ne, maa ɔhyɛ nu ma bɔ olle bie ɔ bie; yeɛ bɔ ole aleɛ ne koso, maa ɔyɔ sɔ ala.”

Luka 3:11 Iomraidhean Croise

Hesekiel 18:7

ɔnhyɛ obiɛngo so; na mmom sɛ ebie fa nikyee si ye berɛ awowaa a, osa fa ye nikyee ma ye, ɔmva ebie nningyein patapaa so, na mmom ɔfa ye aleɛ ma bɔ ɛhɔen ku ye ɔ, ɔma bɔ ye nwo la so ɔ ɛtena,

Daniel 4:27

Yiti Nana, me foɛ bɔ mebaatu wɔ ye, de to nu: Bɔ bra bɔ ɔtengyɛ ɔ ná yakyi bɔne yɔlɛ; nwu bɛ bɔ bɛyɛ anwumvo ɔ anwumvoin, ná yakyi amumuyɛɛ yɔlɛ, amaa ɔnate so ebiaa né wɔ so anu atɔ wɔ ahyɛ.”

Mateo 25:40

Na Ɛhene ne kobua bɛ kyɛ, ‘Amba, mekã mekyire ɛmɔ kyɛ, kyɛ ɛmɔyɔ bɛmane nniɛma hemɔ anu kaaba ko po nen, me yeɛ ɛmɔyɔ bɛmane me ɔ!’

Luka 11:41

Odi kyɛ ɛmɔfa bɔ ɔwɔ nu ne bɛyɛ adɔeɛ, na tie, nikyee biala nwo kɔte kɔma ɛmɔ.

Luka 18:22

Na Yesu tele sɔ dwirɛ nen, osele ye kyɛ, “Waha wɔ nikyee ko: Tɔne bɔ ele ye amukoraa, ná kyɛ sikaa ne ma ehiafoɛ, na ekonya agyapadeɛ wɔ nyameɛso; na afei bra baali me si.”

Luka 19:8

Yeɛ Sakeo dwɔso gyinane, na osele Awurade kyɛ, “Ao, Awurade, mefa m’anwonyadeɛ bue mekyɛ ehiafoɛ; na sɛ mafa aminɛlilɛ so male ebie nikyee a, ngɔbɔ ye nwo pɛen nna ngotua ye kerɛ.”

Yohane 13:29

Ebiemɔ susuli kyɛ, Yudase yeɛ osie sikaabɔtɔ ne ati, yiti yeɛ ɔmaa Yesu sele ye kyɛ: Nningyein bɔ yɛkohia ye aluolue ne, kɔtɔ fa sie; anaakyɛ ɔɔyɛ ehiafoɛ adɔeɛ ɔ.

Asomafoɛ 10:2

Ɔte nyamesuroniɛ bɔ ɔne ye awuro ama mukoraati besuro Nyameɛ ɔ. Osa yɔle adɔeɛ pee mane Yudafoɛ ehiafoɛ, na né ɔtaa bɔ mbaeɛ kyire Nyameɛ.

Asomafoɛ 10:31

na osele me kyɛ, ‘Kɔneleo, Nyameɛ ate wɔ mbaeɛbɔlɛ, na ye wora offili w’adɔeɛ bɔ ayɔ ama ehiafoɛ ɔ.

Asomafoɛ 10:4

Ɔfale esuronyi neane abɔfo ne haa na ɔhane kyɛ, “Yɛ mene, nzikyɛ dwirɛ ɔ?” Na obuale ye kyɛ, “Wɔ mbaeɛ ne w’adɔeɛ bɔ ayɔ ama ehiafoɛ ne adwu Nyameɛ nyunu, na ye wora offili wɔ.

Ɛfesofoɛ 4:28

Nnɛma awueniɛ wua ko, na mmom ɔsɛ kyɛ ɔbɔ mmɔden ɔfa ye sa yɔ adwuma bɔ ɔfata ɔ; amaa wanya bie wafa waboka sona bɔ wahia ye ɔ.

1 Timoteo 6:17

Dwudwo kyire sikafoɛ bɔ bɛwɔ wiase, kyɛ nnɛmaa bɛmoma bɛ nwo so, anaakyɛ nnɛmaa bɛfa bɛ nye bɛto anwonyadeɛ bɔ ɔpɛ nu kɔ ɔ so; na mmom ɔsɛ kyɛ bɛfa bɛ nye bɛto Nyameɛ bɔ ɔma yɛ nningyein amukoraa mmorosoɛ ma yɛ nye gye ne aso.

1 Timoteo 6:18

Bɔ bɛ kɔkɔ kyɛ bɛ́yɔ bɔ ɔte paa ɔ, kyɛ bɛyɛ sikafoɛ wɔ nnwumaa paa nu, ná bɛye bɛ kunu bɛyɛ adɔeɛ,

Hebrifoɛ 6:10

Ofikyɛ Nyameɛ de, ɔtte asisie bɔ ɔkobu ye nye kogua ɛmɔ mmɔdenbɔlɛ, ɔne ɔdɔ bɔ ɔnate ye dumaa ti ɛmɔaye ye ali bahyire anwoteefoɛ, ná ɛmɔtɛyɔ ɔ.

Yakobo 1:27

Nyameɛsom bɔ ye nwo te bɔ efiɛ nne ye nwo wɔ Baba Nyameɛ nyunu ɛhe: kyɛ ɛkɔɔnea nyisiaa ne akunafoɛ wɔ b’amaneɛnwunɛ nu, ɔne kyɛ ɛkɔhwe wɔ nwo kofi wiase bra basabasa nu ɔ.

Yakobo 2:14

Nniɛma mɔ, sɛ ebie kã kyɛ ole gyidie, nakoso olle nnwumaa a, né mvasoɛ beni yeɛ ɔwɔ so ɔ? Sɔ gyidie ne, ɔkɔhora kole ye ngoa anaa?

1 Yohane 3:17

Nakoso sɛ ebie le wiase anwonyadeɛ, ná sɛ onwu kyɛ oliɛma nwo kyere ye, ná wannwu ye anwumvoin a, né Nyameɛ dɔ ne te ye nu sɛ?

1 Yohane 4:20

Na sɛ ebie kã kyɛ “Mekuro Nyameɛ dwirɛ”, nakoso ɔpɔ oliɛma a, né ɔte ngondomboniɛ, ofikyɛ sɛ ebie nguro oliɛma bɔ onwu ye ne dwirɛ a, ɔkɔyɛ sɛɛ ná wahora wahuro Nyameɛ bɔ onnwu ye ne dwirɛ?