Luka 15:22 - AHYERƐLƐ KRONGRON

²² Yeɛ ye baba ne sele ye ngoaa nemɔ kyɛ, ‘Ɛmɔhã bɛ nwo bɛɛfa ataadeɛ paa beewura ye; ɛ́mɔfa pɛteaa bewura, ná ɛ́mɔfa mbaboa bewura ye;

Luka 15:22 Iomraidhean Croise

Gyenesise 41:42

Yeɛ Faro yele ye nzɔanoɛ pɛteaa fili ye sa, ɔfa wurale Yosef, ɔfale kende herale ye, na ɔfale sikaa kɔkorɛ atweaban yale ye.

Ɛseta 3:10

Yeɛ Nana Ahasuro yele ye nzɔanoɛ pɛteaa fili ye sa, na ɔfa mane Agaginiɛ Hamedata ɔwa Haman bɔ ɔpɔ Yudafoɛ ne.

Ɛseta 8:2

Afei Nana Ahasuro ye nzɔanoɛ pɛteaa bɔ ole fili Haman berɛ ne, ɔye fili ye bɔbɔ ye sa, na ɔfa mane Modekae. Na Ɛseta bɔle Modekae panyi wɔ Haman awuro ne aso.

Edwein 132:16

Ye asɔfo mɔ, ngɔfa ngoalelɛ ngɔhera bɛ, na ye teneneefoɛ bɛkɔfa ahurusi bɛkɔbɔ ese.

Edwein 132:9

Ma w’asɔfo mɔ bɛfa tenenee bɛhera, ná ma w’anwoteefoɛ mɔ bɛfa ahurusi bɛbɔ ese.

Edwein 18:33

Ɔma me gya boso yɛ nyera kyɛ kɛtɛbɔɔ, na ɔmaa megyina pindinn wɔ mmokaa so.

Edwein 45:13

Ɛhene awa brasua ne, ɔwɔ ye animnyam nu, na owura ataadeɛ bɔ bafa esikaa kɔkorɛ batuatua nu ɔ.

Edwein Nu Dwein 7:1

O, dehyeɛ awa brasua, wɔ gya ne mbaboa yɛ nyemene! Wɔ sɔ ne, ye aporɛ so te kyɛ agudeɛ, ɔte dwumvoɛ paa ye sa noa adwuma.

Yesaya 61:10

Ngoli ahurusi piri paa wɔ AWURADE nu, me Nyameɛ nu yeɛ me kra di ahurusi ɔ; ofikyɛ wafa ngoalelɛ ataadeɛ wawura me, wafa tenenee tena wahera me, kyɛbɔ atɔmvorɛ biaa fa abotire siesie ye nwo ɔ, kyɛbɔ atɔmvorɛ braa fa ye mbembenanneɛ siesie ye nwo ɔ.

Luka 15:21

Na ɔwa ne sele ye kyɛ, ‘Baba, mayɔ nyameɛso ne wɔ nyunu bɔne, na memvata kyɛ ɛkɔfrɛ me ɛwa ko ɔ.’

Luka 15:23

ná ɛ́mɔfa nandwie akrɔngrɔma bɔ walɔ ɔ bɛbra beehu ye, ná ɛ́mɔma yɛgye yɛ nye;

Romanfoɛ 13:14

Na mmom ɛ́mɔfa Awurade Yesu Kristo akodeɛ ne bewura, yeɛ nnɛma ɛmɔdi anwoɔnaen akɔnnɔ si bɛyɔ ye apɛdeɛ bɛma ye.

Romanfoɛ 3:22

Nyameɛ nate sona gyidie bɔ ɔwɔ Yesu Kristo nu so yeɛ ɔfa siesie ye ne kuro sona afia ɔ, ɔnate kyɛ Nyameɛ nyɛ nyeyemuɛ.

Romanfoɛ 8:15

Ofikyɛ ɛmɔannya ngoaayɛlɛ sunzum bɔ ɔkɔmaa ɛmɔkosa bekosuro ɔ; na mmom baayɛlɛ Sunzum yeɛ ɛmɔanya ɔ, bɔ ɔmaa yɛtea nu kyɛ: “Abba! Baba!”

Galatiafoɛ 3:27

Na ɛmɔ amukoraa bɔ babɔ ɛmɔ asu wɔ Kristo nu ne, ɛmɔafa Kristo bahera.

Ɛfesofoɛ 6:15

ná ɛ́mɔfa asomdwee nzɛmba ne nwo mmɔdenbɔlɛ bɛyɛ mbaboa bewura.

Deuteronomi 33:25

Mesrɛ kyɛ, bɔ ogyigyi wɔ pambim si ne, ɔ́yɛ buralɛ ne kɔɔbere, na kyɛbɔ wɔ ngoa tendenn te ne, sɔ ala yeɛ wɔ nwo waenbɔlɛ kɔyɛ ɔ.

Nyekyire 19:8

Na bɛfale nwera paa bɔ ɔte fufue, bɔ ye nwo te ɔ bɛmane braa ne kyɛ ɔfa hera.” Na nwera paa ne ole anwoteefoɛ bɛ tenenee.”

Nyekyire 2:17

Bɔ ole asoɛ ne, maa otie bɔ Sunzum ne kã kyire asɔre nemɔ ne: Bɔ odi ngonim ne, ngɔma ye mvealeɛ nu mana ne bie maa okoli, na ngɔma ye nyɔboɛ fufue, na nyɔboɛ ne aso yeɛ bahyerɛ dumaa foforɛ bɔ ebiala nze bagua ɔ, sana sona bɔ onya ye ne angome.’

Nyekyire 3:18

Yiti metu wɔ foɛ kyɛ, tɔ nningyein hemɔ fi me berɛ: sikaa kɔkorɛ bɔ bafa see bate ye nwo ɔ, amaa ɔnate so anya sikaa; ataadeɛ fufue bɔ ekowura bɔ ɔngɔma w’animguaseɛ adagya ne nwo ngɔla berɛ ɔ, yeɛ anyeɛ ayire bɔ ɛkɔfa kogua wɔ nye so, bɔ ɔkɔmaa ekonwu nikye ɔ.

Nyekyire 6:11

Yeɛ bɛmane bɛ nu ko biala ataadeɛ fufue, na besele bɛ kyɛ bɛnwondɛ mmerɛ kãa bie bieku, ma oodwu kyɛ bɛ mmango asomvoɛ ne b’eliɛma mɔ bɔ bekohũhũ bɛ kyɛ bɛ koso ala ne bɛ somaa ɔkɔsõ ɔ.

Nyekyire 7:9

Na ɛhe asi ne, nneane, na nwuni ɛlɔen kandinga bɔ sona biala ngɔhora bɛ ka ɔ, bɔ befi maen maen, mmusua kure, mmenia ne edwudwolɛ amukoraa nu, kyɛ begyigyi ahennie bia ne nyunu ne Boaen Ba ne nyunu, bɔ bewurawura ndaadeɛ fufue, ná betiratira ɛberɛ ɔ.