Luka 1:17 - AHYERƐLƐ KRONGRON

¹⁷ Ɔkɔfa Elia sunzum ne ye tumi koli ye nyunu kɔkakyi seɛ mɔ b’adwene kɔwa mma mɔ so ɔne asoserɛfoɛ kɔhɔ teneneefoɛ nworɛ nwo, na okosiesie maen bɔ waboaboa ye nwo ɔ kɔma Awurade.”

Luka 1:17 Iomraidhean Croise

1 Ahemvo 17:1

Tisibeniɛ Elia bɔ ofi Tisibe bɔ ɔwɔ Gileade ne, osele Ahabo kyɛ, “AWURADE Yisrael Nyameɛ teasefoɛ bɔ yeɛ ngyi ye nyunu ne, kyɛbɔ ɔte ase ye de, mekã kyɛ, bosue anaa esue ngɔpe ase afoɛ ye mɔ anu, sana mafa me noa dwirɛ mama ye nwo ate koraka.”

1 Ahemvo 18:18

Elia buale kyɛ, “Nnhale Yisrael biala, na mmom wɔ ɛne wɔ baba abusuafoɛ yeɛ ɛmɔahã Yisrael ɔ. Ofikyɛ ɛmɔabu AWURADE mmeraa dwirɛ so, na ɛmɔaasɔne mmosoen Baal mɔ.

1 Ahemvo 21:20

Ahabo bisale Elia kyɛ, “Eh me pɔfoɛ, bɔ mayɔ ye, ama me bo ala so?” Na Elia buale kyɛ, “Yoo, mama wɔ bo ala so. Atu wɔ nwo asie berɛ kyɛ ɛkɔyɔ bɔ ɔte bɔne wɔ AWURADE nyunu ɔ. Ye sɔ ti,

2 Ahemvo 1:16

Na ɔhã hyirele Ahasia kyɛ, “AWURADE nwa nyoo, ‘Ɔnate kyɛ atu mmenia maa bahɔ Ekron bosoen Baal Sebubo berɛ abisa ne ati, yiti bɛen bɔ anwonyerɛ ahã wɔ ato so ye, engofi so ngodwɔso, na mmom ewue yeɛ ekowu ɔ! Nyameɛ biala ɔnne Yisrael bɔ ɛkɔhora kobisa wɔ ti kofi ye berɛ anaa?’ ”

1 Aberɛso Dwirɛ 29:18

Ao AWURADE, Abraham, Yisake, Yisrael ne yɛ nana mɔ Nyameɛ, adwene paa ne nhyehyɛleɛ paa bɔ ɔte sɔa ye, maa ɔtena wɔ mmenia bɛ ti anu daa. Maa beli nahorɛ bɛma wɔ daa.

2 Aberɛso Dwirɛ 29:36

Na Hesekia ne maen ne amukoraa bɛ nye gyele ɔnate bɔ Nyameɛ wayɔ wama maen ne ati. Ofikyɛ Nyameɛ aboka bɛ maa bayɔ ɛhe amukoraa ndɛndɛ.

Edwein 10:17

Ao AWURADE, etie anwobrɛaseɛniɛ ye abisadeɛ; ɛhyɛ ye nguraen, etie ye sufrɛ,

Edwein 111:10

AWURADE surolɛ te nworɛnwunɛ ye bohyɛlɛ; bɛ bɔ bɛyɔ sɔ ne, benya nimdeɛ paa. Odi kyɛ bɛye ye ayɛ afebɔɔ.

Edwein 78:8

Ɛhe kɔmaa bɛngɔyɛ kyɛ bɛ nana mɔ, bɔ né bɛte aworɛ ndoatoasoɛ asoserɛfoɛ bɔ bayɛ lɔen ɔ, aworɛ ndoatoasoɛ bɔ bamva bɛ nwo bando Nyameɛ so, bɔ bɛ sunzum wanni nahorɛ wamma Nyameɛ ɔ.

Yesaya 29:24

Bɛ bɔ bali sunzum nu makyebu ne, bekonya ndeaseɛ, na bɛ bɔ bɛpenepene bɛ komvi ne, bekosua ngyerɛkyerɛ.”

Amose 4:12

“Ao Yisrael, yiti bɔ ngɔfa ngɔyɔ wɔ ɛhe; ao Yisrael, ɔnate kyɛ ngɔfa ɛhe ngɔyɔ wɔ ne ati, boaboa wɔ nwo koyia wɔ Nyameɛ.”

Mateo 11:14

na sɛ ɛmɔkuro kyɛ ɛmɔde bɛto nu a, ye ole Elia bɔ ɔ́ba ne.

Mateo 14:4

Ɔnate kyɛ né Yohane ahã ahyire Herode kyɛ, “Mmeraa mma ate kyɛ egya ye ɔ.”

Mateo 3:3

Ye yeɛ ngɔmhyɛlɛniɛ Yesaya hane ye nwo dwirɛ kyɛ, “Ebie tea nu wɔ ɛserɛ so kyɛ, Ɛ́mɔsiesie Awurade atee, ná ɛ́mɔma ye atimbire tengyɛ.”

Mateo 3:4

Né Yohane wura afupɔngɔ nwiaa ataadeɛ, na né ɔbɔ nwomaa abɔsoɛ. Aleɛ bɔ né odi ole mmɛbɛ mbiri ne woɛ.

Luka 1:16

Na ɔkɔma Yisraelfoɛ pee bekosa bɛkɔwa Awurade bɛ Nyameɛ berɛ.

Luka 1:76

Na wɔ, akwadaa he, bɛkɔfrɛ wɔ Anwuro Anwuroniɛ ne, ye ngɔmhyɛlɛniɛ; ɔnate kyɛ ekoli Awurade nyunu moa ekosiesie ye atee nu,

Yohane 1:13

bɔ bamva mogya so, anaakyɛ anwoɔnaen apɛdeɛ so, anaakyɛ sona apɛdeɛ so, na mmom Nyameɛ nu yeɛ bɛwole bɛ ɔ.

Yohane 1:34

Me bɔbɔ manwu ye, na medi adanzeɛ kyɛ ye ole Nyameɛ Awa ne.”

Yohane 3:28

Ɛmɔ bɔbɔ bedi me adanzeɛ kyɛ ngane kyɛ, ‘Nna me ole Kristo ne, na mmom basoma me maa mali ye nyunu moa.’

Asomafoɛ 10:33

Ɛhe ati berɛ ne ala nzomane kyɛ bɛɛfa wɔ bɛbra, na wɔ koso ayɔ nikyee kyɛ awa ɔ. Yiti kekesaala ye, yɛ mukoraa yayia Nyameɛ nyunu wɔ wa, kyɛ yɛbaatie nikyee biala bɔ Awurade ahyɛ wɔ kyɛ ɛha hyire yɛ ɔ.”

Romanfoɛ 9:23

Afei koso ɔyɛle kyɛ ɔkɔla ye animnyam mmorosoɛ ne ali kohyire bɛ bɔ wanwu bɛ anwumvoin ne, ofikyɛ wasiesie bɛ wasie berɛ dada kyɛ bɛfata ye animnyam ne.

Kolosefoɛ 1:12

ná yafa asennaa yama Baba ne bɔ wamaa yafata kyɛ yɛnya kyɛfa wɔ anwoteefoɛ bɔ bɛwɔ kanea nu b’agyapadeɛ ne bie ɔ.

2 Timoteo 2:21

Na sɛ sona te ye nwo fi bɔ bɛmva anidie bɛmma ye ne anwo a, ɔkɔyɛ nikyee bɔ bɛfa anidie bɛma ye ɔ, bɔ bate ye nwo, bɔ ye mene fa yɛ nikyee a ɔyɛ yé ɔ, ná wasiesie ye nwo wama adwuma paa biala.

1 Petro 2:9

Nakoso ɛmɔ de, ɛmɔte mmenia bɔ baneanea nu baye ɛmɔ ɔ, nnehyeɛ asɔfokure, maen krongron, maen bɔ wafa ye wayɛ ye deɛ ɔ, kyɛ ɛmɔɔbɔ bɔ ɔfrɛle ɛmɔ fili awosii nu wale ye kanea bɔ ɔyɛ nwanwa ne anu ne, ye ayɛyelɛ ne dawure.

1 Yohane 2:28

Na afei me ngwadaa mɔ, ɛmɔhɔ so bɛtena ye nu, amaa sɛ ye walɛ ne dwu ná ɔye ye nwo ali a, yahora yasi y’ahone, na yamvɛre wɔ ye nyunu.

Nyekyire 20:4

Afei nwuni ahennie bia mɔ, na bɛmane bɛ bɔ bɛtete so nemɔ tumi kyɛ bebua ndɛen. Na bɛ bɔ ɔnate Kristo adanzeɛ ne Nyameɛ dwirɛ ne ati bɛpepɛle bɛ ti ne, nwuni bɛ kra mɔ. Bɛ de, banzɔne kaka ne anaa ye honi ne, yeɛ banne ye nzorɛhyɛlɛ ne wɔ bɛ nwoma so, anaa bɛ sa nwo. Benyane ngoa bieku, na bɛne Kristo belili hene afoɛ apee ko.

1 Samuel 7:5

Na Samuel sele kyɛ, “Ɛ́mɔma Yisraelfoɛ amukoraa béyia wɔ Misepa, na ngɔfa ɛmɔ mbaeɛ ngɔto AWURADE nyunu ngɔma ɛmɔ.”