Lewitikɔso 5:6 - AHYERƐLƐ KRONGRON

⁶ ná ɔ́fa ye foɛlilɛ afɔleɛ ɔbrɛ AWURADE, ɔnate bɔne bɔ wayɔ ne ati. Odi kyɛ ɔfa boaen beleɛ anaa abɔngye beleɛ ɔbɔ foɛlilɛ afɔleɛ, na ɔsɔfo ne kɔsrɛ mbata kɔma ye, ɔnate ye bɔne ti.

Lewitikɔso 5:6 Iomraidhean Croise

Hesekiel 40:39

Na abrannaa so berɛ anoa piri ne anu, né ɛpoen nyɔ gyigyi bue ko, yeɛ nyɔ koso begyigyi bue ko, bɔ so yeɛ beku naen yeralɛ afɔleɛ, bɔne nwo afɔleɛ ne foɛlilɛ afɔleɛ ngaka nemɔ ɔ.

Hesekiel 42:13

Yeɛ osele me kyɛ, “Sorɔ dɔ pumbu nemɔ ne ngwaen dɔ pumbu nemɔ bɔ bɛwɔ pato n’anyunu berɛ ne, bɛ ole pumbu krongron nemɔ. Berɛ yeɛ asɔfo mɔ bɔ bepingye AWURADE ne bekoli krongron nu krongron afɔleɛ nningyein ne ɔ; berɛ yeɛ bɛkɔfa krongron nu krongron nningyein ne bekogua ɔ: aleɛ afɔleɛ, bɔne nwo afɔleɛ ne foɛlilɛ afɔleɛ, ofikyɛ berɛ te krongron.

Hesekiel 44:27

na kyẽa bɔ ɔ́kɔ nekaa krongron berɛ, wɔ ye kunu dɔ aluo berɛ, kyɛ ɔkwaayɔ ɛsɔnenɛ adwuma wɔ nekaa krongron berɛ nen, odi kyɛ ɔfa ye bɔne nwo afɔleɛ ɔba, AWURADE Nyameɛ noa dwirɛ ɛne.

Lewitikɔso 4:20

Kyɛbɔ ɔfale bɔne nwo afɔleɛ nandwie nyii ne yɔle ne, sɔ ala yeɛ ɔsɛ kyɛ ɔfa sɔ nandwie ne ɔyɔ ɔ. Ɔsɔfo ne kɔpata kɔma bɛ, ná Nyameɛ kɔfa bɛ bɔne kɔhyɛ bɛ.

Lewitikɔso 4:28

ná sɛ bɛfa bɔne bɔ yeɛ wayɔ ne bɛto ye nyunu a, ɔsɛ kyɛ ɔfa abɔngye beleɛ bɔ ollili nnɛen biala ɔ ɔbabɔ afɔleɛ, ɔnate bɔne bɔ wayɔ ne ati.

Lewitikɔso 4:31

Na odi kyɛ ɔye ye loe ne amu, kyɛbɔ bɛye ɛloe befi asomdwee afɔleɛ nu ne, na ɔsɔfo ne ɔ́yera ye wɔ afɔleɛ bokyea ne aso maa ɔ́yɛ nikyee bɔ ɔbo AWURADE fona ɔ. Ɔsɔfo ne kɔpata kɔma ye, na Nyameɛ kɔfa ye bɔne kɔhyɛ ye.

Lewitikɔso 4:32

“Sɛ boaen yeɛ ɔfa babɔ bɔne nwo afɔleɛ a, odi kyɛ ɔfa beleɛ bɔ ollili nnɛen biala ɔ.

Lewitikɔso 4:35

Na odi kyɛ ɔye ye loe ne amukoraati, kyɛbɔ bɛye asomdwee afɔleɛ boaen nu loe ne, na odi kyɛ ɔsɔfo ne ɔfa gua afɔleɛ bɔ bafa babrɛ AWURADE ne aso, ná ɔyera ye wɔ afɔleɛ bokyea ne aso; na ɔsɔfo ne kɔpata kɔma ye wɔ bɔne bɔ wayɔ ne anwo, na Nyameɛ kɔfa ye bɔne kɔhyɛ ye.

Lewitikɔso 6:6

Na odi kyɛ ɔfa ye foɛlilɛ nwo afɔleɛ bɔ ɔfa ma AWURADE ne ɔbrɛ ɔsɔfo: mmoaen kure ne anu boaen nyii bɔ ollili nnɛen biala ɔ, kyɛbɔ ɛnea ye nyɔboɛ fata foɛlilɛ afɔleɛ ɔ.

Numeri 6:12

ná otu ye nwo sie berɛ ma AWURADE mmerɛ biala bɔ ɔtɛ te nasiriteniɛ ɔ. Odi kyɛ ɔfa boaen nyii akrɔngrɔma ko bɔ wali afoɛ ko ɔbabɔ foɛlilɛ afɔleɛ. Mmerɛ daa bɔ olili moa tuli ye nwo siele berɛ mane AWURADE ne de, wayera wagua, ofikyɛ efiɛ hane ye ti bɔ ɔyɛle ye krongron ne.