Lewitikɔso 5:5 - AHYERƐLƐ KRONGRON

⁵ Sɛ ebie nwu kyɛ odi ɛhemɔ biala nwo fɔ a, odi kyɛ ɔka sɔ bɔne bɔ wayɔ ne wɔ badwa nu,

Lewitikɔso 5:5 Iomraidhean Croise

YOB NWOMAA NE 33:27

Na sɔ sona ne to dwein kyire mmenia kyɛ, ‘Nyɔle bɔne, nyɔle bɔ ɔtte mayee ɔ, nakoso wandua me so kerɛ kyɛbɔ ɔfata ɔ.

Edwein 32:5

Afei ngane me bɔne ngyirele wɔ, na mangata m’amumuyɛɛ so. Ngane kyɛ, “Ngɔhã me mmeraatolɛ ngohyire AWURADE,” na ɛfale me bɔne nwo foɛlilɛ hyɛle me. Sela

Anyandera 28:13

Ebiala bɔ ɔkata ye mmeraatolɛ so ne, ongoyie ye yé, nakoso bɔ ɔkã, ná ɔyakyi ye yɔlɛ ne, bekonwu ye anwumvoin.

Yeremia 3:13

Wɔ de, de w’amumuyɛɛ to nu, kyɛ ayɛ AWURADE wɔ Nyameɛ nwo lɔen, afa wɔ ɔdɔ ama ɛwɔfoɛ mɔ wɔ bakaa monɛ biala abo, na ɛmɔandie me noa dwirɛ, AWURADE noa dwirɛ ɛne.

Daniel 9:4

Mmɔle mbaeɛ ngyirele AWURADE me Nyameɛ, na nne ndole nu ngane ye pefee kyɛ, “O AWURADE, Nyameɛ piri bɔ ye nwo yɛ suro, bɔ odi apam ne ɔdɔ bɔ onni ngasi ɔ so ma bɛ bɔ bekuro ye dwirɛ ɔne bɛ bɔ bedi ye mmeraa dwirɛ so ɔ;

Lewitikɔso 16:21

Afei odi kyɛ Aarɔn fa ye sa munyɔ gua abɔngye bɔ ɔte ngoa nu ne ye ti afia, ná ɔka Yisraelfoɛ amumuyɛɛ amukoraa, bɛ mmeraatolɛ amukoraa ɔne bɛ bɔne amukoraa gua abɔngye ne aso, ná ɔprapra ye mukoraati gua ye so. Odi kyɛ ɔyakyi abɔngye ne ma bienzua bie bɔ bafa sɔ adwuma ne bawura ye sa maa berɛ ne ala ɔkɔyakyi kaka ne eburo maa ɔkɔ.

Lewitikɔso 26:40

“Nakoso sɛ bɛka b’amumuyɛɛ ɔne bɛ nana mɔ amumuyɛɛ: kyɛ bɛyɛle ɛlɔen betiale me, na afei bɛtoale so bedwɔso betiale me,

Lewitikɔso 5:13

Yiti ɔsɔfo ne kɔpata kɔma ye wɔ bɔne bɔ wayɔ wɔ ɛhemɔ biala nu ɔ, na Nyameɛ kɔfa ye bɔne kɔhyɛ ye. Afɔleɛ ne ngaa ne koso kɔyɛ ɔsɔfo ne deɛ, kyɛ aburoo afɔleɛ ne ala.

Numeri 5:7

na odi kyɛ sɔ sona ne ka bɔne bɔ wayɔ ne. Odi kyɛ ɔfa nikyee si ye gya nu otua kerɛ; ósa fa nnu nu ngyɛmuɛ ko boka so ná ɔfa ma sona bɔ wayɔ ye tɛɛ ne.

Romanfoɛ 10:10

Ɔnate kyɛ, sona fa ye ahone yeɛ ode di ɔkɔ tenenee nu ɔ; na ye noa yeɛ ɔfa kã ye pefee onya daa ngoa ɔ.

Yosua 7:19

Na Yosua sele Akan kyɛ, “Mma, fa animnyam ma AWURADE Yisrael Nyameɛ, ná ka nahorɛ wɔ ye nyunu. Nikyee bɔ ayɔ ne, ka kyire me kekesaala ye. Nnɛfa fea me.”