Lewitikɔso 4:3 - AHYERƐLƐ KRONGRON

³ sɛ ɔsɔfo bɔ bapopa ye ngoo yeɛ ɔyɔ bɔne, ná ɔnate so ɔfa foɛbualɛ ba maen ne aso a, ɔnate bɔne bɔ wayɔ ne ati, odi kyɛ ɔfa nandwie nyii akrɔngrɔma bɔ ollili nnɛen biala ɔ ɔbɔ bɔne nwo afɔleɛ ma AWURADE.

Lewitikɔso 4:3 Iomraidhean Croise

2 Aberɛso Dwirɛ 29:21

Bɛfale ɛhemɔ yeɛ bɛhɔle ɔ: nandwie nyii nzoo, mmoaen nyii nzoo, mmoaen akrɔngrɔma nzoo; yeɛ afei mbɔngye nyii nzoo bɔ bɛfa bɛbɔ ahennie ne anwo, nekaa krongron ne, ɔne Yuda maen nwo bɔne nwo afɔleɛ ɔ. Ɔfale ahyɛdeɛ mane asɔfo nemɔ, bɔ bɛ yeɛ bɛte Aarɔn boso ama nemɔ, kyɛ bɛfa sɔ ngaka nemɔ bɛbɔ afɔleɛ wɔ AWURADE bokyea ne aso.

Ɛsra 8:35

Sɔ mmerɛ ne, bɛ bɔ befili nnurehyelɛ nu besa bɛwale ne, bɛbobɔle naen yeralɛ afɔleɛ bɛmane Yisrael Nyameɛ. Begyinane Yisrael amukoraa gya nu bɛfale ɛhemɔ bɛbɔle afɔleɛ: nandwie nyii buru ne nyɔ, mmoaen nyii aburahona ne nzia, yeɛ mmoaen mmaa aburasoo ne nzoo. Besa bɛfale mbɔngye buru ne nyɔ bɛbɔle bɔne nwo afɔleɛ. Bɛfale ye mukoraa bɛbɔle naen yeralɛ afɔleɛ bɛmane AWURADE.

Ɛksadɔso 29:14

Nakoso nandwie naen ne, ye nwomaa ne ye fure nu nningyein de, fa see yera bɛ wɔ asikyeleɛ ne asi dɔ. Ɔte bɔne nwo afɔleɛ.

Ɛksadɔso 29:21

Afei fa afɔleɛ bokyea ne aso mogya ne bie, ɔne ɛpopalɛ ngoo ne, ná fa pete Aarɔn nwo ne ye ndaadeɛ nu, ɔne ye mma nemɔ nwo ne bɛ ndaadeɛ nu. Na ɛhe kɔma Aarɔn ne ye ndaadeɛ kɔyɛ krongron, ná ye mma mɔ ne bɛ ndaadeɛ koso ayɛ krongron.

Ɛksadɔso 29:7

Fa ɛpopalɛ ngoo ne, hwie gua ye ti so, ná fa popa ye ti so.

Ɛksadɔso 30:10

Afoɛ biala, ɔsɛ kyɛ Aarɔn bɔ bɔne nwo afɔleɛ wɔ ye mmɛen nemɔ aso. Ɔkɔfa bɔne nwo mbata afɔleɛ mogya kɔpata komapɛ afoɛ biala, wɔ ɛmɔ aworɛ ndoatoasoɛ mukoraati nu. Ɔte krongron paa ma AWURADE.”

Hesekiel 40:39

Na abrannaa so berɛ anoa piri ne anu, né ɛpoen nyɔ gyigyi bue ko, yeɛ nyɔ koso begyigyi bue ko, bɔ so yeɛ beku naen yeralɛ afɔleɛ, bɔne nwo afɔleɛ ne foɛlilɛ afɔleɛ ngaka nemɔ ɔ.

Hesekiel 43:19

Lewifoɛ bɔ bɛte asɔfo bɔ bɛte Sadoke bosofoɛ ne, bɔ yeɛ bepingye me bɛbaso me ne, fa nandwie nyii akrɔngrɔma ko ma bɛ ma bɛbɔ bɔne nwo afɔleɛ, AWURADE Nyameɛ noa dwirɛ ɛne.

Hesekiel 44:27

na kyẽa bɔ ɔ́kɔ nekaa krongron berɛ, wɔ ye kunu dɔ aluo berɛ, kyɛ ɔkwaayɔ ɛsɔnenɛ adwuma wɔ nekaa krongron berɛ nen, odi kyɛ ɔfa ye bɔne nwo afɔleɛ ɔba, AWURADE Nyameɛ noa dwirɛ ɛne.

Lewitikɔso 1:10

“Akyɛdeɛ bɔ sona ne ɔbaafa bɔ naen yeralɛ afɔleɛ ne, sɛ ofi mmoaen kure anaa mbɔngye kure ne anu a, odi kyɛ ɔfa nyii bɔ ollili nnɛen biala ɔ.

Lewitikɔso 1:3

“Sɛ ye afɔleɛ ne te naen yeralɛ afɔleɛ bɔ ofi nandwie kure ne anu a, odi kyɛ ɔfa nyii bɔ ollili nnɛen biala ɔ; odi kyɛ ɔbɔ afɔleɛ ne wɔ ɛtena sua atenaleɛ anoa nu berɛ, amaa AWURADE ale ye ato nu.

Lewitikɔso 16:11

“Odi kyɛ Aarɔn fa nandwie nyii ne ɔbɔ bɔne nwo afɔleɛ ma ye nwo, ná ɔpata ma ye nwo ne ye awuro ama. Ɔsɛ kyɛ oku nandwie nyii ne ná ɔfa bɔ bɔne nwo afɔleɛ ma ye nwo.

Lewitikɔso 16:3

Sɛ Aarɔn ɔba nekaa krongron ne anu a, bɔ odi kyɛ ɔyɔ ɛhe: odi kyɛ ɔfa nandwie nyii akrɔngrɔma ko bɔ ɔfa bɔ bɔne nwo afɔleɛ ɔ ɔne boaen nyii bɔ ɔfa bɔ naen yeralɛ afɔleɛ.

Lewitikɔso 16:5

Odi kyɛ ode mbɔngye nyii nyɔ fi Yisrael maen berɛ bɔ ɔfa bɔ bɔne nwo afɔleɛ ɔ, ɔne boaen nyii ko bɔ ɔfa bɔ naen yeralɛ afɔleɛ ɔ.

Lewitikɔso 16:6

“Odi kyɛ Aarɔn fa nandwie nyii ne bɔ bɔne nwo afɔleɛ ma ye nwo, ná ɔpata ma ye bɔbɔ ye nwo, ɔne ye awuro ama.

Lewitikɔso 4:14

sɛ bɔne bɔ bayɔ ne batɔ dwaa a, odi kyɛ maen ne fa nandwie nyii akrɔngrɔma babɔ bɔne nwo afɔleɛ, na ɔsɛ kyɛ bɛfa bɛba ɛtena sua atenaleɛ anoa nu berɛ.

Lewitikɔso 4:23

ná sɛ bɛfa bɔne bɔ yeɛ wayɔ ne bɛto ye nyunu a, ɔsɛ kyɛ ɔfa abɔngye nyii bɔ ollili nnɛen biala ɔ ɔbabɔ afɔleɛ.

Lewitikɔso 4:28

ná sɛ bɛfa bɔne bɔ yeɛ wayɔ ne bɛto ye nyunu a, ɔsɛ kyɛ ɔfa abɔngye beleɛ bɔ ollili nnɛen biala ɔ ɔbabɔ afɔleɛ, ɔnate bɔne bɔ wayɔ ne ati.

Lewitikɔso 4:5

Odi kyɛ ɔsɔfo bɔ bapopa ye ngoo ne, ɔfa nandwie ne mogya ne bie ná ɔfa ba ɛtena sua atenaleɛ ne anu;

Lewitikɔso 5:6

ná ɔ́fa ye foɛlilɛ afɔleɛ ɔbrɛ AWURADE, ɔnate bɔne bɔ wayɔ ne ati. Odi kyɛ ɔfa boaen beleɛ anaa abɔngye beleɛ ɔbɔ foɛlilɛ afɔleɛ, na ɔsɔfo ne kɔsrɛ mbata kɔma ye, ɔnate ye bɔne ti.

Lewitikɔso 6:18

Aarɔn bosoniɛ baa bienzua biala, oli AWURADE afɔleɛ bɔ bɛbɔ ye see so bɛma AWURADE ne bie, kyɛbɔ bahyehyɛ bato berɛ daa wɔ ɛmɔ aworɛ ndoatoasoɛ amukoraati nu ne; sona anaa nikyee biala bɔ ɔkɔfa ye nwo kɔha sɔ afɔleɛ nemɔ ne, ɔkɔyɛ krongron.

Lewitikɔso 8:12

Ohwiele ɛpopalɛ ngoo ne bie guale Aarɔn ti afia na ɔpopale ye ngoo fa tele ye nwo.

Lewitikɔso 9:2

na osele Aarɔn kyɛ, “Fa nandwie nyii akrɔngrɔma bɔ bɔne nwo afɔleɛ ma AWURADE, ná fa boaen nyii bɔ naen yeralɛ afɔleɛ ma AWURADE. Onni kyɛ ngaka ne anu biala yɛ bɔ wali nnɛen ɔ.

Lewitikɔso 9:3

Na ka kyire Yisraelfoɛ kyɛ, ‘Ɛ́mɔfa abɔngye nyii bɛ́bɔ bɔne nwo afɔleɛ, ná ɛ́mɔfa nandwie akrɔngrɔma ne boaen akrɔngrɔma bɔ bali afoɛ ngoko ngoko, bɔ bellili nnɛen biala ɔ bɛ́bɔ naen yeralɛ afɔleɛ.

Numeri 16:22

Na Mose ne Aarɔn fale bɛ nyunu bebutubutuli ase, na besele kyɛ, “O Nyameɛ, anwoɔnaen amukoraa bɛ sunzum Nyameɛ, aso sona ko yɔ bɔne maa ɔnate so ɛfɛ maen ne amukoraa so yaa anaa?”

Numeri 8:8

Afei maa bɛfa nandwie nyii akrɔngrɔma ko, ɔne ye nwo aburoo afɔleɛ bɔ bafa esam paa bɔ bafa ngoo bafra ye ɔ, na odi kyɛ esa fa nandwie nyii akrɔngrɔma ko babɔ bɔne nwo afɔleɛ.

Romanfoɛ 8:3

Na bɔ mmeraa ne wangora wanyɔ, bɔ ɔnate kyɛ anwoɔnaen ne maa ɔyɛle mmerɛ ne ati, Nyameɛ ayɔ. Ɔsomane Ɔwa komapɛ ne maa ɔyɛle ye nwo kyɛ kuro sona, bɔ ole bɔne nwonaen ɔ, na ɔfa buale bɔne foɛ wɔ anwoɔnaen nu,

2 Korintofoɛ 5:21

Ofikyɛ bɔ wanyɔ bɔne ne, Nyameɛ maa fale ye kakyili bɔne mane yɛ, amaa ɔnate ye so yanya Nyameɛ tenenee ne bie.

Hebrifoɛ 5:3

Na ɔnate sɔ ne ati, nna mmenia bɛ bɔnefakyɛ afɔleɛ ngome yeɛ ɔbɔ ɔ; na mmom odi kyɛ ɔbɔ ye bɔbɔ ye deɛ koso.

Hebrifoɛ 9:12

na wawura Krongron nu Krongron ne anu berɛ komapɛ. Wamva mbɔngye ne nandwie mmaa mogya yeɛ ɔɔbɔle afɔleɛ ɔ, na mmom ye bɔbɔ ye mogya yeɛ ɔfa bɔle afɔleɛ nyane daa ngoa mane yɛ ɔ.