Lewitikɔso 3:5 - AHYERƐLƐ KRONGRON

⁵ Na odi kyɛ Aarɔn mma mmienzua nemɔ, bɛfa begua naen yeralɛ afɔleɛ bɔ ogua see so wɔ afɔleɛ bokyea so ne aso, ná bɛyera ye; ɔte afɔleɛ bɔ bɛbɔ ye see so bɛma AWURADE ná ɔbo ye fona ɔ.

Lewitikɔso 3:5 Iomraidhean Croise

1 Ahemvo 8:64

Sɔ kyẽa ne ala, Solomon tele AWURADE awuro ne anyunu aluo berɛ nwo, ɔne ye afia berɛ nwo maa ɔyɛle krongron, ofikyɛ berɛ yeɛ ɔbɔle naen yeralɛ afɔleɛ, aburoo afɔleɛ ne asomdwee afɔleɛ bɔ bɛfa ɛloe bɛbɔ nemɔ ɔ. Ɔbɔle afɔleɛ nemɔ wɔ berɛ, ofikyɛ kɔɔbere afɔleɛ bokyea bɔ né ɔwɔ AWURADE nyunu ne, ɔte kãa soma bɔ bɛhyehyɛ naen yeralɛ afɔleɛ ne, aburoo afɔleɛ ne ɔne asomdwee afɔleɛ bɔ bɛfa ɛloe bɛbɔ ne wɔ so a, ɔngɔ so ɔ.

2 Aberɛso Dwirɛ 35:14

Na ɛhe asi ne, besiesiele Abɔtra afɔleɛ ne bie bɛmane bɛ nwo ne asɔfo nemɔ, ofikyɛ asɔfo nemɔ bɔ bɛte Aarɔn boso ama ne, naen yeralɛ afɔleɛ nemɔ ne ɛloe ne, né bɛ nye aboro bɔ bɛfa bɛbɔ afɔleɛ toonn maa okodwu nɔsoa ɔ. Yiti Lewifoɛ nemɔ besiesiele Abɔtra ne bɛmane bɛ bɔbɔ bɛ nwo ne asɔfo nemɔ bɔ bɛ yeɛ bɛte Aarɔn boso ama ne.

Ɛksadɔso 29:13

Afei fa ɛloe bɔ wato wafa ye kunu nningyein nwo ne amukoraa, bɔ osinzesinze ye boɛ ne anwo ne, ye saa nyɔ nemɔ ɔne bɛ nwo loe ne, ná yera bɛ wɔ afɔleɛ bokyea ne aso.

Hesekiel 44:15

“Nakoso Lewifoɛ bɔ bɛte asɔfo, bɔ bɛte Sadoke boso ama, bɔ bɛyɔle me nekaa krongron ne anu adwuma, mmerɛ bɔ Yisraelfoɛ belili makyebu befili me nwo ne, bɛ de, bekopingye me bɛkɔso me, na bekogyina me nyunu bɛkɔfa ɛloe ne mogya bɛkɔbrɛ me, AWURADE Nyameɛ noa dwirɛ ɛne.

Hesekiel 44:7

Ye ole kyɛ, ɛmɔma amanvrafoɛ bɛba nu, ɛmɔma mmenia bɔ bɛte bɛmbɛ-bɛ-bienzuafoɛ wɔ ahone nu ne anwoɔnaen nu ɔ bɛba me nekaa krongron ne anu bɛbagua m’awuro ne anwo fiɛ, wɔ mmerɛ bɔ ɛmɔfa m’aleɛ, ɛloe ne mogya bɛbrɛ me ɔ. Na ɛmɔafa ɛmɔ akyiwadeɛ yɔleɛ ne amukoraa babu m’apam ne aso.

Lewitikɔso 1:13

Nakoso ye kunu nningyein ne ye gya ne de, ɔ́fa nzue ónwunzi bɛ nwo. Odi kyɛ ɔsɔfo ne, ɔfa ye mukoraati ɔyera ye wɔ afɔleɛ bokyea ne aso. Ɔte naen yeralɛ afɔleɛ; ɔte afɔleɛ bɔ bɛbɔ ye see so bɛma AWURADE ná ɔbo ye fona ɔ.

Lewitikɔso 1:17

Na odi kyɛ ɔsɔ ye ndaa nemɔ anu osua ye nu, bɔ koso ɔmma ye nu nde koraa ɔ. Afei ɔsɔfo ne ɔ́yera ye wɔ afɔleɛ bokyea ne aso wɔ eyein bɔ ogua see ne aso ne aso. Ɔte afɔleɛ bɔ bɛbɔ ye see so bɛma AWURADE ná ɔbo ye fona ɔ.

Lewitikɔso 1:9

Nakoso ye kunu nningyein ne ye gya nemɔ de, odi kyɛ bɛfa nzue benwunzi bɛ nwo. Ɔsɛ kyɛ ɔsɔfo ne yera ye mukoraati wɔ see ne aso fa yɛ naen yeralɛ afɔleɛ; ɔte afɔleɛ bɔ bɛbɔ ye see so bɛma AWURADE ná ɔbo ye fona ɔ.

Lewitikɔso 3:11

Na odi kyɛ ɔsɔfo ne ɔyera ye afɔleɛ bokyea ne aso maa ɔyɛ aleɛ bɔ bɛyera ye see so bɛma AWURADE ɔ.

Lewitikɔso 3:4

Odi kyɛ ɔfa ɛhemɔ koso boka so: ye saa nyɔ ne ɔne bɛ nwo loe bɔ ɔwɔ ye sisia nu ne, ɔne ye boɛ ne bie bɔ ɔkɔye kɔboka ye saa nemɔ aso ne.

Lewitikɔso 4:31

Na odi kyɛ ɔye ye loe ne amu, kyɛbɔ bɛye ɛloe befi asomdwee afɔleɛ nu ne, na ɔsɔfo ne ɔ́yera ye wɔ afɔleɛ bokyea ne aso maa ɔ́yɛ nikyee bɔ ɔbo AWURADE fona ɔ. Ɔsɔfo ne kɔpata kɔma ye, na Nyameɛ kɔfa ye bɔne kɔhyɛ ye.

Lewitikɔso 4:35

Na odi kyɛ ɔye ye loe ne amukoraati, kyɛbɔ bɛye asomdwee afɔleɛ boaen nu loe ne, na odi kyɛ ɔsɔfo ne ɔfa gua afɔleɛ bɔ bafa babrɛ AWURADE ne aso, ná ɔyera ye wɔ afɔleɛ bokyea ne aso; na ɔsɔfo ne kɔpata kɔma ye wɔ bɔne bɔ wayɔ ne anwo, na Nyameɛ kɔfa ye bɔne kɔhyɛ ye.

Lewitikɔso 6:12

Odi kyɛ ɔma see ne kɔ so gye wɔ afɔleɛ bokyea ne aso; onni kyɛ onnua ɔ. Ɔsɔfo ne ɔ́fa eyein gua nu ngyerɛmɔ biala, ɔ́hyehyɛ naen yeralɛ afɔleɛ ne wɔ so, ná ɔyera asomdwee afɔleɛ loe ne wɔ so.

Lewitikɔso 7:28

Na AWURADE sele Mose kyɛ,

Lewitikɔso 9:17

Ɔfale aburoo afɔleɛ ne wale. Ɔsale ye sa bum ko, ɔfa bokale ngyerɛmɔ naen yeralɛ afɔleɛ ne aso, na ɔyerale bɛ wɔ afɔleɛ bokyea ne aso.

Numeri 15:8

Sɛ ɛfa nandwie nyii bɔ naen yeralɛ afɔleɛ anaa afɔleɛ biala a, kyɛ ɛfa tua aboadeɛ oo, anaakyɛ ɛfa bɔ asomdwee afɔleɛ ma AWURADE oo,

Numeri 18:17

Nakoso nandwie bamuɛbaa, anaa boaen bamuɛbaa, anaa abɔngye bamuɛbaa de, nnɛpɔ bɛ; bɛte krongron. To bɛ mogya ne pete afɔleɛ bokyea ne aso, ná yera bɛ loe ne ma ɔyɛ afɔleɛ bɔ bɛfa see bɛyera ye, bɔ ɔbo AWURADE fona ɔ.

Numeri 28:12

Afei odi kyɛ ɛmɔfa esam paa olonka nza bɔ bafa ngoo bafra ye ɔ bɛbɔ aburoo afɔleɛ bɛboka nandwie nyii ko biala so. Asa koso, esam paa olonka nyɔ bɔ bafa ngoo bafra ye ne, ɛ́mɔfa bɛbɔ aburoo afɔleɛ bɛboka boaen nyii ko ne aso.

Numeri 28:3

Na se bɛ kyɛ, afɔleɛ bɔ bɛbɔ ye see so bɔ odi kyɛ ɛmɔbɔ bɛma AWURADE ne ɛhe: daa biala, ɛ́mɔfa mmoaen nyii nyɔ bɔ bali afoɛ ngoko, bɔ bellili nnɛen biala ɔ, bɛbɔ afɔleɛ.

1 Petro 2:5

na ɛmɔ koso, ɛmɔte kyɛ ngoa nyɔboɛ mɔ, na ɛ́mɔma bɛ́fa ɛmɔ bési sunzum nu sua ma ɛmɔyɛ asɔfokure krongron, amaa ɛmɔafa Yesu Kristo so babɔ sunzum nu afɔleɛ bɔ ɔsɔ Nyameɛ nye ɔ.