Lewitikɔso 26:43 - AHYERƐLƐ KRONGRON

⁴³ Na bɛkɔyakyi aseɛ ne berɛ maa okoli ye afofi afoɛ mɔ wɔ mmerɛ bɔ ɔla berɛ mbaen ɔ; bekole bɛkɔto nu kyɛ bedi fɔ, ɔnate kyɛ bɛpole me nhyehyɛleɛ, na m’ahyɛdeɛ nwo yɛle bɛ kra nya.

Lewitikɔso 26:43 Iomraidhean Croise

2 Aberɛso Dwirɛ 33:12

Na mmerɛ bɔ ɔwɔ amaneɛ nu ne, ɔsrɛle AWURADE ye Nyameɛ kyɛ onwu ye anwumvoin, na ɔbrɛle ye nwo ase paa wɔ ye nana mɔ bɛ Nyameɛ nyunu.

2 Aberɛso Dwirɛ 36:21

Ɛhe sili, amaa AWURADE dwirɛ bɔ ɔnate Yeremia so hane ne, wawa nu; amaa ɔnate so aseɛ ne wanya ate wali ye afofingyẽa. Ngyẽa amukoraa bɔ aseɛ ne lale berɛ mbaen ne, né odi afofikyẽa alaa kɔpem kyɛ afoɛ aburasoo sone ɔ.

YOB NWOMAA NE 5:17

“Sona bɔ Nyameɛ twi ye nyunu ne, onya saleɛ, yiti wɔ so bɔ Ɛdangama Nyameɛ ɔtwe ne, nnɛkã kyɛ ɛmbene so.

Edwein 119:67

Anzana ɛbaahwe me so ne, né mali makyebu, nakoso afei de, medi wɔ dwirɛ so.

Edwein 119:71

Ɔte paa ma me kyɛ ɛhwene me so ɔ, amaa ɔnate so masua w’ahyɛdeɛ ne.

Edwein 119:75

Ao AWURADE, mese kyɛ wɔ ndɛenbualɛ te turoloo, na ɛnate nahorɛlilɛ so ahwe me so.

Edwein 50:15

Sũ frɛ me wɔ w’amaneɛnwunɛ mmerɛ nu, na ngɔpepɛ ngole wɔ, amaa ɔnate so ahyɛ me animnyam.”

Edwein 50:17

Ofikyɛ ekyi kyɛ ngɔtea wɔ ɔ, yeɛ afa me dwirɛ ato ahameɛ.

Yesaya 26:16

O AWURADE, bɛpenane wɔ si atee wɔ b’amaneɛnwunɛ nu, besu bɛfrɛle wɔ wɔ mmerɛ bɔ né ɛtwe bɛ so ɔ.

Yeremia 31:19

Amba, nzale me si, na ye si ye, nzakyerale m’adwene. Na ye si ye bɔ me nye wale me nwo so ne, mvale me sa nguale m’ahone so; mvɛrele, na me nyunu guale ase, ofikyɛ mmɔle nyanzoen bra wɔ me mmerandeɛ nu.’

Daniel 9:14

Ye sɔ ne ati, AWURADE asiesie amaneɛ, na wamaa wato yɛ; ofikyɛ AWURADE yɛ Nyameɛ ne, ɔtengyɛ wɔ bɔ ɔyɔ ɔ amukoraa nu; nakoso yɛ de, yandie ye dwirɛ.

Lewitikɔso 26:11

Ngɔyɛ m’atenaleɛ wɔ ɛmɔ afia, na mengɔpɔ ɛmɔ.

Lewitikɔso 26:15

sɛ ɛmɔpo m’ahyɛdeɛ, ná ɛmɔtwi bɛfa me nhyehyɛleɛ so, ná ɛmɔanni me mmeraa dwirɛ amukoraa so, ná ɛmɔbu m’apam so a,

Lewitikɔso 26:30

Ngɔsɛkye ɛmɔ asɔneyɛɛ so nemɔ ná mabubu ɛmɔ ɛyɛɛ afɔleɛ bokyea nemɔ magua. Ngɔboaboa ɛmɔ fuin noa ngogua ɛmɔ mmosoen wuruwaa nemɔ aso. Na ngɔpɔ ɛmɔ.

Lewitikɔso 26:41

maa ɔnate so me koso ngɔle so ndwɔso ndiale bɛ, na mvale bɛ mmale bɛ pɔfoɛ mɔ aseɛ so; sɛ bɛbrɛ b’ahone bɔ wapini ne ase, ná bede bɛto nu kyɛ bedi fɔ a,

Amose 5:10

Bekyi bɔ ɔtengyɛtengyɛ mmenia wɔ nekaa bɔ bedi dwirɛ ɔ, bɛpɔ bɔ ɔkã nahorɛ ɔ.

Sakaria 11:8

Na bosome ko anu, nnuane mmoaenneafoɛ nza nemɔ bɛ boso mvili berɛ. Bɛ nwo yɛle me kra ahi, na me koso me nwo yɛle bɛ kra tɛ.

Yohane 7:7

Wiase ngora mbɔ ɛmɔ, nakoso me yeɛ ɔpɔ me ɔ, ofikyɛ medi adanzeɛ kyɛ ye yɔleɛ te bɔne.

Romanfoɛ 8:7

Ofikyɛ anwoɔnaen nu adwenedwene pɔ Nyameɛ, ɔngora mmerɛ ye nwo ase nwura Nyameɛ mmeraa bo, ɔngora nyɔ sɔ amba.

Deuteronomi 32:36

Amba, AWURADE kobua ye mmenia be, okonwu ye ngoaa anwumvoin, mmerɛ bɔ okonwu kyɛ b’anwoserɛ ayie, bɔ ebiala nne berɛ bɔ waha, bɔ ɔte akoaa anaa dehyeɛ ɔ.