Lewitikɔso 2:3 - AHYERƐLƐ KRONGRON

³ Aburoo afɔleɛ ne ngaa ne kɔyɛ Aarɔn ne ye mma mmienzua mɔ deɛ; afɔleɛ bɔ bɛbɔ ye see so bɛma AWURADE ne, ɛhe yeɛ ɔte krongron paa ɔ.

Lewitikɔso 2:3 Iomraidhean Croise

Ɛsra 2:63

Na amrado ne sele bɛ kyɛ nnɛmaa bedi aleɛ krongron paa ne bie, kɔpem kyɛ ɔsɔfo bie kɔfa Yurim ne Tumim kobisa (konwu bɔ Nyameɛ kã fa bɛ nwo) ɔ.

Ɛksadɔso 29:37

Fa ɛlɛsoo pata wɔ afɔleɛ bokyea ne aso, te ye nwo, na afɔleɛ bokyea ne kɔyɛ krongron paa, na nikyee biala bɔ ye nwo kɔha afɔleɛ bokyea nen, ɔkɔyɛ krongron.

Hesekiel 44:29

Aleɛ afɔleɛ, bɔne nwo afɔleɛ ne foɛlilɛ afɔleɛ yeɛ bekoli ɔ; ɔne nikyee biala bɔ batu basie berɛ wɔ Yisrael yeɛ ɔkɔyɛ bɛ deɛ ɔ.

Hesekiel 46:20

Na osele me kyɛ, “Ɛwa yeɛ odi kyɛ asɔfo nemɔ bɛto mvomsoɛ nwo afɔleɛ ne bɔne nwo afɔleɛ ne ɔ, nekaa bɔ odi kyɛ bɛto aleɛ afɔleɛ ne ɔ, amaa ɔnate so bamva bamvite aluo berɛ pato nu berɛ bamma mmenia ne anyɛ krongron.

Lewitikɔso 10:15

Ye sɔ bɔ bɛfa bɛbɔ afɔleɛ ne, ɔne ye sa bɔ bɛnwaha ne de, odi kyɛ bɛfa bɛboka ɛloe bɔ bɛfa see bɛyera bɛbɔ afɔleɛ ne aso bɛba, ná bɛfa bɛbɔ ɛnwahanɛ afɔleɛ wɔ AWURADE nyunu, na ɔkɔyɛ wɔ ne wɔ mma mɔ deɛ afebɔɔ, kyɛbɔ AWURADE ahyɛ ne.”

Lewitikɔso 14:13

Odi kyɛ oku boaen akrɔngrɔma ne wɔ nekaa krongron berɛ, nekaa bɔ beku bɔne nwo afɔleɛ ɔne naen yeralɛ afɔleɛ ngaka ne, ofikyɛ foɛlilɛ afɔleɛ te kyɛ bɔne nwo afɔleɛ ne ala; ɔte ɔsɔfo ne deɛ na ɔte krongron paa.

Lewitikɔso 2:10

Aburoo afɔleɛ ne ngaa ne, ɔte Aarɔn ne ye mma mmienzua mɔ deɛ; afɔleɛ bɔ bɛbɔ ye see so bɛma AWURADE ne, ɛhe yeɛ ɔte krongron paa ɔ.

Lewitikɔso 21:22

Ye Nyameɛ aleɛ ne, bɔ ɔte krongron paa ɔne bɔ ɔte krongron ne, ɔkɔhora koli bie.

Lewitikɔso 5:13

Yiti ɔsɔfo ne kɔpata kɔma ye wɔ bɔne bɔ wayɔ wɔ ɛhemɔ biala nu ɔ, na Nyameɛ kɔfa ye bɔne kɔhyɛ ye. Afɔleɛ ne ngaa ne koso kɔyɛ ɔsɔfo ne deɛ, kyɛ aburoo afɔleɛ ne ala.

Lewitikɔso 6:26

Ɔsɔfo bɔ ɔkɔbɔ bɔne nwo afɔleɛ ne yeɛ ɔsɛ kyɛ odi ɔ; óli ye wɔ nekaa bɔ ɔte krongron ɔ, wɔ ɛtena sua atenaleɛ aluo berɛ.

Lewitikɔso 6:9

“Hyɛ Aarɔn ne ye mma mmienzua nemɔ kyɛ, ‘Naen yeralɛ afɔleɛ nwo nhyehyɛleɛ ɛhe: Odi kyɛ naen yeralɛ afɔleɛ ne, ɔda agyegyemvia wɔ afɔleɛ bokyea ne aso kɔngɔen ne amukoraa maa okodwu ngyerɛmɔ, ná odi kyɛ see ne kɔ so gye wɔ afɔleɛ bokyea ne aso.

Lewitikɔso 7:7

“Foɛlilɛ afɔleɛ ne, ɔte kyɛ bɔne nwo afɔleɛ ne ala, ofikyɛ bɛ nwo nhyehyɛleɛ te ko; naen ne te ɔsɔfo bɔ ɔkɔbɔ sɔ afɔleɛ ne deɛ.

Lewitikɔso 7:9

Aburoo afɔleɛ biala bɔ bato ye foonoo nu, ɔne bɔ bato ye turonzemaa nu, anaa kyɛnzee nu ne biala kɔyɛ ɔsɔfo bɔ ɔkɔbɔ afɔleɛ ne deɛ.

Numeri 18:9

Afɔleɛ krongron paa bɔ banyera bɛ wɔ see nu ne, ɛhe yeɛ ɔkɔyɛ wɔ kyɛfa ɔ: b’akyɛdeɛ biala bɔ bɛkɔfa bɛkɔbrɛ me kyɛ nikyee krongron paa ne, kyɛ ɔte aburoo afɔleɛ oo, bɔne nwo afɔleɛ oo, anaa foɛlilɛ afɔleɛ oo, ɔkɔyɛ wɔ ne wɔ mma mɔ deɛ.

1 Samuel 2:28

Nneaneane nu nyele ye mvili Yisrael mmusua kure amukoraa nu kyɛ ɔɔyɛ ɔsɔfo ma me, kyɛ ɔhɔ m’afɔleɛ bokyea nwo, ɔ́yera ɛyɛɛ, ná ówura ɔsɔfo ataadeɛ ógyina me nyunu. Na see so afɔleɛ mukoraa bɔ Yisraelfoɛ bɛbɔ bɛma me ne, mva nwurale wɔ nana abusua ne sa.