Lewitikɔso 2:14 - AHYERƐLƐ KRONGRON

¹⁴ “Sɛ ɛmɔfa aburoo bɔ bekoli moa bekobu ne bie bɛbɔ afɔleɛ bɛma AWURADE a, odi kyɛ ɛmɔfa aburoo monɛ bɔ bekoli moa bekobu ne bie, bɔ bahye ye see so ná basi ɔ.

Lewitikɔso 2:14 Iomraidhean Croise

Gyenesise 4:3

Nziɛ ye ne, Kein fale fieso nningyein ne bie ɔɔbɔle afɔleɛ mane AWURADE.

2 Ahemvo 4:42

Biaa bie fili Baal Salisa wale. Na aleɛ bɔ ofi fieso aleɛ bɔ bali moa bapɛ nu ne, ɔfa brɛle Nyameɛ sona ne. Ɔte ayuo paanoo aburanyɔ, yeɛ aburoo monɛ. Né ye mukoraa wɔ ye bɔtɔ nu. Elisa sele kyɛ, “Fa ma mmenia ne maa beli.”

Lewitikɔso 2:15

Ɛ́mɔfa ngoo bégua so, ná ɛ́mɔfa ɛyɛɛ koso bégua so; ɔte aburoo afɔleɛ.

Lewitikɔso 2:16

Ɔsɔfo ne kɔyera aburoo bɔ basi, ná bafa ngoo ne ɛyɛɛ ne amukoraa bafra ye ne bie kyɛ ngayeɛ nikye; ɔte afɔleɛ bɔ bɛbɔ ye see so bɛma AWURADE ɔ.

Lewitikɔso 22:29

Sɛ ɛmɔbɔ asennaa afɔleɛ bɛma AWURADE a, ɛ́mɔbɔ ye kyɛbɔ ɔkɔsɔ Nyameɛ nye ɔ.

Lewitikɔso 23:10

“Ka kyire Yisraelfoɛ kyɛ, Sɛ ɛmɔbadwu aseɛ bɔ méfa méma ɛmɔ ne aso, ná ɛmɔfa so aleɛ a, ɛ́mɔfa ɛmɔ aleɛ bɔ oli moa ne taperɛ ko bɛbrɛ ɔsɔfo.

Lewitikɔso 23:13

Na aburoo afɔleɛ bɔ ɔboka so ne, odi kyɛ bɛfa esam paa bɔ bafa ngoo bafra ye ɔ olonka nyɔ; ɔte afɔleɛ bɔ bɛbɔ bɛma see so bɛma AWURADE ná ɔbo ye fona ɔ. Anonneɛ afɔleɛ bɔ ɔboka so ne, odi kyɛ bɛfa bobe nzaa towaa ko ne bue.

Lewitikɔso 23:20

Ngaka nemɔ, ɔne paanoo bɔ bafa aleɛ bɔ bali moa bate yeɛ bato ne, odi kyɛ ɔsɔfo ne pagya bɛ fa bɔ ɛnwahanɛ afɔleɛ wɔ AWURADE nyunu, mmoaen nyɔ ne boka so. Bɛte krongron ma AWURADE, na bɛkɔyɛ ɔsɔfo ne deɛ.

Malaki 1:11

Ofikyɛ, ofi eyia fitelɛ kodwu ye tɔlɛ, me dumaa te piri wɔ maen maen mɔ nu, na bɛyera ɛyɛɛ bɛbɔ afɔleɛ bɛma me dumaa nekaa biala, yeɛ bɛbɔ afɔleɛ bɔ ye nwo te ɔ bɛma me; ofikyɛ me dumaa te piri wɔ maen maen mɔ nu, Asafo AWURADE noa dwirɛ ɛne.

Numeri 28:2

“Fa sɔ ahyɛdeɛ he ma Yisraelfoɛ kyɛ, M’afɔleɛ, aleɛ bɔ bɛbɔ ye see so bɛma me, bɔ ɔbo me fona ne, ɛ́mɔnea yé kyɛ ɛmɔkɔbɔ bɛkɔma me mmerɛ bɔ m’ahyɛ ne pɛpɛɛpɛ.

1 Korintofoɛ 15:20

Nakoso ɔte nahorɛ kyɛ batingye Kristo bafi ewue nu amaa wayɛ bɛ bɔ balela ne anu bakaa mmaa bɔ oli moa ɔ.

Deuteronomi 26:2

so mmakaammaa mukoraa bɔ ekoli moa kɔte ne, bɔ ekonya kofi aseɛ bɔ AWURADE wɔ Nyameɛ ɔ́fa ma wɔ ne aso ne, fa bie gua kɛndɛen nu, ná fa kɔ nekaa bɔ AWURADE wɔ Nyameɛ kɔneanea nu kɔye kosie berɛ kyɛ ɔ́ma ye dumaa da so ne.

Nyekyire 14:4

Ɛhemɔ ole bɛ bɔ bamva mmrasua bangua bɛ nwo fiɛ, ofikyɛ basie bɛ nwo krongron. Bɛ yeɛ bedi Boaen Ba ne si bɛkɔ nekaa biala bɔ ɔkɔ ɔ. Bɛ yeɛ bale bɛ ngoa bafi adasa mmaa nu, ná bayɛ bɛ fieso aleɛ bɔ oli moa bama Nyameɛ ne Boaen Ba ne ɔ.