Lewitikɔso 16:13 - AHYERƐLƐ KRONGRON

¹³ Afei odi kyɛ ɔfa ɛyɛɛ ne ogua see ne aso wɔ AWURADE nyunu, amaa mbata bia bɔ ɔwɔ Adanzeɛ ne aso ne, ɛyɛɛ nwosina ne akata so, ná wanwu.

Lewitikɔso 16:13 Iomraidhean Croise

Ɛksadɔso 25:21

Fa mbata bia ne sie alaka ne aso anwuro, ná fa Adanzeɛ bɔ mebaafa mema wɔ ne to alaka ne anu.

Ɛksadɔso 28:43

Na mmerɛ biala, sɛ Aarɔn ne ye mma mmienzua mɔ bɛ́kɔ ɛtena sua atenaleɛ nu berɛ, anaakyɛ sɛ bépingye afɔleɛ bokyea ne nwo bɛkɔso wɔ nekaa krongron ne anu a, ɔsɛ kyɛ bɛfa bewura; ná bamvrɛfrɛ musue bamma bɛ nwo, ná banwu. Na ɛhe kɔyɛ ahyɛdeɛ afebɔɔ kɔma Aarɔn ne ye bosofoɛ bɔ bɛkɔwa ɔ.

Ɛksadɔso 30:1

“Si afɔleɛ bokyea bɔ bɛkɔyera ɛyɛɛ so ɔ; bɔsema yeɛ fa si ɔ.

Lewitikɔso 22:9

Asɔfo nemɔ beli m’ahyɛdeɛ so, amaa bangua me nekaa krongron ne anwo fiɛ, ná banni fɔ ná banwuwu: Me ole AWURADE bɔ mete bɛ nwo ɔ.

Numeri 16:18

Yiti ebiala fale ye see kulie, bɛfale see beguale nu, bɛfale ɛyɛɛ beguale so, na bɛ ne Mose ne Aarɔn beegyinane ɛtena sua atenaleɛ anoa nu berɛ.

Numeri 16:46

Yeɛ Mose sele Aarɔn kyɛ, “Fa wɔ see kulie ne, fa afɔleɛ bokyea ne anu see ne bie gua nu, fa ɛyɛɛ gua nu, ná fa kɔ maen ne berɛ ndɛndɛ kɔpata ma bɛ. Ofikyɛ AWURADE afɛ ɛyaa hahii; amaneɛ piri ne ahyɛ ye bo.”

Numeri 16:7

Ɛhema ɛ́mɔfa see begua bɛ nu, na ɛ́mɔfa ɛyɛɛ bégua so wɔ AWURADE nyunu. Na sona bɔ AWURADE kɔnea nu kɔye ye ne, ye yeɛ ɔte krongronniɛ ne ɔ. Ɛmɔ Lewifoɛ, ɛmɔduo boɛ!”

Numeri 4:15

Sɛ Aarɔn ne ye mma mɔ bɛkata nekaa krongron ne ɔne nekaa krongron ne anu nningyein anwo beyie, ná sɛ mmenia ne betu bɛ bo befi asikyeleɛ berɛ a, odi kyɛ Kohatefoɛ basoa sɔ nningyein nemɔ. Nakoso onni kyɛ bɛ nwo ka nningyein krongron ne, ná banwu. Ɛhemɔ ole ɛtena sua atenaleɛ ne anu nningyein mɔ bɔ ɔsɛ kyɛ Kohatefoɛ mɔ bɛsoa ɔ.

Numeri 4:20

Nakoso nnɛma Kohatefoɛ mɔ bɛkɔ nekaa krongron ne anu bɛkɔnea nningyein krongron nemɔ le, amaa banwuwu.”

Deuteronomi 33:10

Bekohyire Yakob wɔ nhyehyɛleɛ ne, ná bahyire Yisrael wɔ mmeraa ne; bɛkɔfa ayirefona bɛkɔwa wɔ nyunu, ná babɔ afɔleɛ mumua yeralɛ wɔ w’afɔleɛ bokyea ne aso.

Hebrifoɛ 7:25

Yiti ɔkora de bɛ bɔ bɛfa ye so bɛba Nyameɛ berɛ ne ngoa bɔkɔɔ; ofikyɛ ɔte ase afebɔɔ, na odi bɛ ti dwirɛ ma bɛ.

Hebrifoɛ 9:24

Ɔnate kyɛ, Kristo anwura nekaa krongron bɔ kuro sona sili, ná osa te nyameɛso deɛ paa ne nwo nhwɛsoɛ ne anu; na mmom wahɔ nyameɛso berɛ deinn, na kekesaala ye odi yɛ ti dwirɛ ma yɛ wɔ Nyameɛ nyunu.