Lewitikɔso 14:7 - AHYERƐLƐ KRONGRON

⁷ Na sona bɔ bɛ́te ye nwo béfi kwata anwonyerɛ nwo ne, odi kyɛ ɔsɔfo ne ɔfa mogya ne pete ye nwo pɛen nzoo. Afei odi kyɛ ɔfa to dwaa kyɛ sona ne nwo ate, ná ɔyakyi anomaa bɔ ɔte ngoa nu ne maa ɔkɔ buro.

Lewitikɔso 14:7 Iomraidhean Croise

2 Ahemvo 5:10

Yeɛ Elisa somane sona maa ɔɔhã hyirele ye kyɛ, “Kɔ na kobia asue Yɔɔdan nu pɛen nzoo, na wɔ nwonaen kosa kɔyɛ kyɛ ye daa ne ala, na wɔ nwo kɔte.”

2 Ahemvo 5:14

Yiti osili nu hɔle asue Yɔɔdan nu ɔɔtɔle nu pɛen nzoo, kyɛbɔ Nyameɛ sona ne hane ne ala. Na ye nwonaen sa tɔle so kyɛ akwadaa kaaba deɛ, na ye nwo tele.

Edwein 51:2

Nwunzi me nwo sannwuu fi m’amumuyɛɛ nwo, ná pete me nwo fi me bɔne nwo.

Edwein 51:7

Fa sufiɛ pete me nwo, na me nwo kofi; nwunzi me nwo, na me nwo kɔyɛ fufue kɔtra ewure.

Yesaya 52:15

sɔ ala yeɛ ɔkɔma maen maen mɔ bɛ nwo kodwiri bɛ ɔ; ɔnate ye ti ahemvo mɔ kɔtotɔ mmobo; ɔnate kyɛ, bɔ bɛhhã behhyirele bɛ ne, bekonwu ye; yeɛ bɔ bɛttele ne, bɛkɔte ye bo.

Hesekiel 36:25

Ngɔfa nzue gyengɔgyengɔ ngɔpete ɛmɔ nwo, na ɛmɔ nwo kɔte kofi ɛmɔ nwo bɔ ɔnde ne amukoraa nwo, na ngɔte ɛmɔ nwo ngofi ɛmɔ mmosoen amukoraa nwo.

Daniel 9:24

“Bahyɛ afoɛ aburasoo sɔ alaa nzoo bafa wɔ maen ne wɔ kuro krongron ne anwo, kyɛ bɛ́ma mmeraatolɛ ne ɔbra ayieleɛ, ná bétu bɔne bo, kyɛ bɛ́yɛ amumuyɛɛ nwo mbata, ná bɛ́ma tenenee afebɔɔ ɔbra ɔ, ná bɛ́ma nyekyire ne ne ngɔmhyɛlɛ ne ɔbra nu, ná bɛ́popa nekaa krongron paa ne ngoo.

Lewitikɔso 13:13

ye de odi kyɛ ɔsɔfo ne neanea ye nwo, ná sɛ anwonyerɛ ne ayɛ sona ne nwo amukoraa a, odi kyɛ ɔsɔfo ne fa to dwaa kyɛ ye nwo te; ɔnate kyɛ ye nwo amu aturu hyɛnn, ná ye nwo te.

Lewitikɔso 13:17

Odi kyɛ ɔsɔfo ne neanea ye nwo, na sɛ anwonyerɛ ne ayɛ hoyaa a, ye de odi kyɛ ɔsɔfo ne fa to dwaa kyɛ yarefoɛ ne, ye nwo te; ye nwo te.

Lewitikɔso 14:51

Odi kyɛ ɔfa bakaa bɔ bɛfrɛ ye sida ne, sufiɛ ne, adaabene ne ɔne anomaa bɔ ɔtɛte ngoa nu ne, ná ɔ́fa bɛ wura anomaa bɔ bahu ye ne mogya ne anu, ɔne mbombonzue ne anu, ná ɔfa ɔpete awuro berɛ pɛen nzoo.

Lewitikɔso 16:14

Odi kyɛ ɔfa nandwie nyii mogya ne bie, ná ɔfa ye sa mmɛseka bɔ nu fa pete mbata bia ne anyunu; ɔ́fa ye sa mmɛseka ne pete mogya ne pɛen nzoo.

Lewitikɔso 16:19

Odi kyɛ ɔfa ye sa mmɛseka pete mogya ne bie gua so pɛen nzoo, ná ɔte ye nwo ɔyɛ ye krongron fi Yisraelfoɛ nwo bɔ wagua fiɛ ne anwo.

Lewitikɔso 16:22

Yisraelfoɛ bɛ bɔne amukoraa, abɔngye ne kɔsoa kɔhɔ aseɛ bɔ kuro sona biala ɔtte so ɔ so; na odi kyɛ ɔkɔyakyi abɔngye ne wɔ eburo dɔ.

Lewitikɔso 4:17

na ɔsɛ kyɛ ɔsɔfo ne fa ye sa mmɛseka bɔ mogya ne anu na ɔpete ye pɛen nzoo, AWURADE nyunu wɔ ɛtena bɔ onwi sua ne anoa ne nyunu.

Lewitikɔso 4:6

odi kyɛ ɔsɔfo ne ɔfa ye sa mmɛseka ɔbɔ mogya ne anu ná ɔfa bie pete pɛen nzoo, AWURADE nyunu, wɔ nekaa krongron mbɛmuɛ tena ne anyunu.

Lewitikɔso 8:11

Ɔfale ngoo ne bie petene afɔleɛ bokyea ne anwo pɛen nzoo, na ɔpopale afɔleɛ bokyea ne ɔne ye ngukue amukoraa, ayaa ne ɔne ayaa nyinasoɛ ne ngoo, na ɔfa tele bɛ nwo.

Mika 7:19

Okosa konwu yɛ anwumvoin, okoli y’amumuyɛɛ so ngonim; na ekofindi bɛ bɔne amukoraa kogua ɛpo buma ne anu.

Numeri 19:12

Ye ɛlɛsa ne aso, ɔne ɛlɛsoo ne aso, odi kyɛ ɔfa sɔ nzue ne bie pete ye nwo ma ye nwo te. Nakoso sɛ wambete ye nwo ɛlɛsa ne aso ɔne ɛlɛsoo ne aso a, ye nwo ngɔte.

Yohane 19:34

Nakoso asraafoɛ nemɔ anu ko fale pealɛɛ wɔle ye mvenu, na berɛ ne ala, mogya ne nzue fili nu wale.

Hebrifoɛ 10:22

yiti ɛ́mɔma yɛfa nahorɛ ahone ne gyidie bɔ osi pi, ɔne ahone bɔ bate ye nwo bafi bɔne tiboa nu, ɔne nipadua bɔ bafa nzue gyengɔgyengɔ babia ye ɔ yɛhwe yɛpingye Nyameɛ.

Hebrifoɛ 12:24

Ɛmɔawa Yesu bɔ ɔte apam foforɛ ne anu ndamgyinaniɛ, ɔne mogya bɔ bɛfa bɛpetene bɔ ɔkã nningyein paa nwo dwirɛ tra Abel deɛ ne berɛ.

Hebrifoɛ 9:13

Na sɛ nandwie nyii mogya ne mbɔngye mogya ne nandwie ba nzoen bɔ bɛfa bɛpete mmenia bɔ efiɛ aha bɛ nwo ne, ɔkora ma bɛ nwo te anwoɔnaen nu de a,

Hebrifoɛ 9:19

Ofikyɛ, mmerɛ bɔ Mose kengale ahyɛdeɛ bɔ ɔwɔ mmeraa ne anu hyirele maen ne amukoraa yiele nen, ɔfale nandwie mmaa ne mbɔngye mogya frale nzue, na ɔfale sufiɛ ne adaabene bɔle nu fa petene mmeraa nwomaa ne, ɔne mmenia ne amukoraa bɛ so.

Hebrifoɛ 9:21

Sɔ ala koso yeɛ ɔfale mogya ne petene ɛtena sua ne, ɔne nningyein mukoraa bɔ bɛfa bɛsɔne Nyameɛ nwo ɔ.

Hebrifoɛ 9:26

Na sɛ ɔtte sɔ de a, ahaa ɔsɛ kyɛ Kristo taa nwu amaneɛ fite kyɛ Ɛdangama bɔle aleɛ ɔ. Nakoso waye ye nwo ali komapɛ wɔ mmerɛ bɔ ewiase kɔ ye ayieleɛ ye, na wafa ye bɔbɔ ye nwo wabɔ afɔleɛ wakyikyi bɔne.

1 Petro 1:2

bɛ bɔ Baba Nyameɛ waneanea nu waye bɛ fi tetetete, bɔ ɔnate Sunzum Krongron so wate bɛ nwo wama Yesu Kristo nwo sotie ɔne ye mogya nu anwopetenɛ ne: Adom ne asomdwee mmorosoɛ ɔyɛ ɛmɔ deɛ.

1 Yohane 5:6

Yesu Kristo yeɛ ole bɔ bafa nzue ne mogya bali ye walɛ ne nwo adanzeɛ ne. Nna nzue ngome, na mmom nzue ne mogya. Na Sunzum ne yeɛ odi adanzeɛ ɔ, ofikyɛ Sunzum ne ole nahorɛ ne.