Kolosefoɛ 3:5 - AHYERƐLƐ KRONGRON

⁵ Yiti ɛ́mɔhu aseɛ so suban bɔ ɔwɔ ɛmɔ nu ne: adwamanbɔlɛ, brabɔlɛ fiɛ, ahohwibra, akɔnnɔ bɔne bɔ ɔhyɛ sona so, ɔne anyeboroborolɛ; ofikyɛ anyeboroborolɛ te bosoensolɛ.

Kolosefoɛ 3:5 Iomraidhean Croise

Ɛksadɔso 37:22

Bɛ nyerɛen nemɔ, bɛ mmaen nemɔ, ɔne kanea bakaa ne, ɔfale sɔ sikaa kɔkorɛ kundunzii komapɛ bɔ bafa buralɛ baboro ne ala yeɛ ɔyɔle ɔ.

Mateo 15:19

Ofikyɛ ahone nu yeɛ adwenemmɔne, awuelilɛ, agyaasɛkyelɛ, adwamanbɔlɛ, awue, adanzewia ne musue dwirɛ fi ba ɔ.

Romanfoɛ 1:26

Ɔnate sɔ ati, Nyameɛ pole b’animguaseɛ akɔnnɔ bra ne mane bɛ. Bɛ mmrasua mɔ ne bɛ mmango mmrasua bɛlelale bɔ otia abɔdeɛ nu nhyehyɛleɛ ɔ.

Romanfoɛ 1:29

Sɔ bɔne hemɔ ayi bɛ ti anu tɛkyɛ, amumuyɛɛ, aborɛ, anyeboroborolɛ, ɛpɔen, anyeborolɛ, awuelilɛ, patapaa, nnakannaka, kanda, nzekure;

Romanfoɛ 6:13

Afei, nnɛma ɛmɔfa ɛmɔ nipadua akwaa biala bɛma bɔne ná wamva wanyɔ amumuyɛɛ, na mmom ɛ́mɔfa ɛmɔ nwo bɛ́ma Nyameɛ kyɛ bɛ bɔ befi ewue nu bahɔ ngoa nu ɔ. Ɛ́mɔfa ɛmɔ nwo amukoraa bɛ́ma ye, ná ɔfa yɔ tenenee nnwumaa.

Romanfoɛ 6:6

Yɛse kyɛ babɔ yɛ sona sue daa ne ne Kristo mmeamudua nu, kyɛbɔ yɛ bɔne nipadua ne kowu na yanyɛ bɔne ngoaa ko ɔ.

Romanfoɛ 7:23

Nakoso menwu mmeraa foforɛ bie wɔ me nwonaen akwaa nu, bɔ ɔko tia mmeraa bɔ ɔwɔ m’adwene nu ɔ, bɔ ɔkye me nnure ma bɔne mmeraa bɔ ɔwɔ me nwonaen akwaa nu ɔ.

Romanfoɛ 7:5

Mmerɛ bɔ né yɛwɔ anwoɔnaen nu ne de, yɛ bɔne akɔnnɔdeɛ bɔ mmeraa ne kanyane ye ne, ɔyɔle adwuma wɔ yɛ nwonaen akwaa nu osuli mmaa hɔle ewue.

Romanfoɛ 8:13

Ofikyɛ sɛ ɛmɔbɔ ɛmɔ bra kyɛbɔ anwoɔnaen ne kuro a, ɛmɔkowu. Nakoso sɛ ɛmɔfa Sunzum ne beku anwoɔnaen nnwumaa de a, ɛmɔkonya ngoa.

1 Korintofoɛ 5:1

Baahã ye susu amba kyɛ ɛmɔ nu biemɔ bɔ adwaman, bɔ ye sɛso nne ewiasefoɛ po nu ɔ, ofikyɛ ebie fa ye baba aye.

1 Korintofoɛ 6:11

Na sɔ yeɛ né ɛmɔ nu biemɔ bɛte ɔ, nakoso ɔnate Awurade Yesu Kristo dumaa ne yɛ Nyameɛ Sunzum ne ati, Nyameɛ abia ɛmɔ, wate ɛmɔ nwo, na wabua ɛmɔ be.

1 Korintofoɛ 6:13

“Bɛbɔle aleɛ bɛmane koɛ, yeɛ koɛ wora bɛbɔle ye bɛmane aleɛ.” Nakoso Nyameɛ kɔsɛkye bɛ munyɔ. Nipadua nne berɛ ma adwamanbɔlɛ, na mmom ɔwɔ berɛ ma Awurade, yeɛ Awurade koso wɔ berɛ ma nipadua.

1 Korintofoɛ 6:18

Ɛmɔyakyi adwamanbɔlɛ! Bɔne biala bɔ sona yɔ ne nga ye nipadua, nakoso sona bɔ ɔbɔ adwaman ne yɔ bɔne tia ye bɔbɔ ye nipadua.

2 Korintofoɛ 12:21

Ebiaa meba bieku a, me Nyameɛ kɔbrɛ me ase wɔ ɛmɔ nyunu maa ngoli ɛmɔ nu pee nwo aworabɔlɛ wɔ mmenia somaa bɔ daa bayɔ bɔne, ná kekesaala ye bɛtɛyɔ ná banzakyera b’adwene wɔ brabɔlɛ fiɛ, adwamanbɔlɛ ne ahuhubra nwo ti.

Galatiafoɛ 5:24

Na bɛ bɔ bɛte Kristo Yesu deɛ ne, babɔ anwoɔnaen ne ne ye akɔnnɔ, ɔne bɔ ɔhyɛ anwoɔnaen ne aso mmeamudua nu.

Ɛfesofoɛ 4:19

Bɛnze nyanzoen ko, bama ahohwibra ali bɛ ti, na bɛbɔ bra fiɛ bɔ nikye fee nzi bɛ ate ɔ.

Kolosefoɛ 2:11

Na ye nu koso yeɛ bapɛ ɛmɔ bienzua bɔ bamva bɛ sa yeɛ bɛpɛle ɔ; na bɔ ɔwɔ anwoɔnaen nipadua nu bɔ bapuro bagua berɛ ne, bapuro bagua wɔ Kristo bienzuapɛlɛ nu.

1 Tɛsalonikafoɛ 4:3

Nyameɛ apɛdeɛ ɛhe: kyɛ ɛmɔ nwo kɔte, ná ɛmɔkɔhwe ɛmɔ nwo bekofi adwamanbɔlɛ nwo,

1 Tɛsalonikafoɛ 4:5

na mmom ɔnzɛ kyɛ ɛmɔma akɔnnɔ tɛɛ hyɛ ɛmɔ so kyɛbɔ maen maen nufoɛ bɔ bɛnze Nyameɛ ɔ bɛyɔ ne.

1 Timoteo 6:10

Ofikyɛ bɔne amukoraa ndii ole sikanyeboro, bɔ ebiemɔ ali ye si bali makyebu bafi gyidie ne anwo, bɔ yiti bahwehwe aworabɔlɛ pee babrɛ bɛ nwo ɔ.

Hebrifoɛ 12:16

na ebiala anyɛ adwamanbɔlɛniɛ anaakyɛ bɔ nyamesuro nne ye nu kyɛ Yisɔ, bɔ ɔtɔnene ye bamuɛbaa dibea fa lele aleɛ talie komapɛ twe ne.

Hebrifoɛ 13:4

Odi kyɛ ebiala di agyaa ni, na nnɛma ebiala gua agyaa mba nwo fiɛ, ofikyɛ Nyameɛ kobua adwamanbɔlɛfoɛ ne agyaasɛkyelɛfoɛ ndɛen.

Hebrifoɛ 13:5

Ɛ́mɔye sikanyeboro befi ɛmɔ brabɔlɛ nu, ná ɛ́mɔma ɛmɔ nye sɔ bɔ ɛmɔanya ɔ; ofikyɛ ye bɔbɔ wahã kyɛ, “Mengoli wɔ ngasi, yeɛ mengɔye me sa wɔ wɔ bo le.”

Yakobo 4:1

Koɛ ne ngondii bɔ ɔwɔ ɛmɔ nu ne, nisua yeɛ ofi ba ɔ? Ɛmɔ akɔnnɔ bɔ ɔne ɛmɔ nwonaen akwaa mɔ bɛko ne, aso nna nu yeɛ ofi ba ɔ?

1 Petro 2:11

Adɔfo mɔ, mesrɛ ɛmɔ, ɛmɔte ɛwɔfoɛ ne amanvrafoɛ, yiti anwoɔnaen akɔnnɔ bɔ ɔko tia ɛmɔ kra ne, ɛmɔhwe ɛmɔ nwo befi ye nwo.

Nyekyire 21:8

Na bɛ bɔ bɛte serɛ, bɛ bɔ benne benni, akyiwadeɛyɔlɛfoɛ, awudifoɛ, adwamanbɔlɛfoɛ, ngonyaayelɛfoɛ, bosoensolɛfoɛ ne ngondombofoɛ amukoraa de, abura bɔ see ne sɔfe begye wɔ nu ne anu yeɛ ɔkɔyɛ bɛ bue deɛ ɔ, na ewue bɔ ɔtɔ so nyɔ ne ɛhe.”

Nyekyire 22:15

Na kuro ne asi dɔ yeɛ ngyea, ngonyaayelɛfoɛ, adwamanbɔlɛfoɛ, awudifoɛ, bosoensolɛfoɛ ne bɛ bɔ bekuro ngondombopɛlɛ ná bɛpɛ ɔ bɛ mukoraa bɛwɔ ɔ.