Kolosefoɛ 3:16 - AHYERƐLƐ KRONGRON

¹⁶ Ɛ́mɔma Kristo dwirɛ ne oyi ɛmɔ nu tɛkyɛ, ɛmɔhyirehyire ná ɛ́mɔfa nworɛ mukoraa betutu ɛmɔ nwo foɛ. Ɛ́mɔto sangoo dwein, ayɛyelɛ dwein, ɔne sunzum nu dwein bɔ ɔte ahone nu asennaa bɛ́ma Nyameɛ.

Kolosefoɛ 3:16 Iomraidhean Croise

1 Ahemvo 3:28

Yisrael amukoraa tele ndɛen bɔ Nana Solomon buale ne, na ye nwo yɛle bɛ nwanwa, ofikyɛ benwuni kyɛ Nyameɛ nworɛ wɔ ye nu bɔ ɔfa bua ndɛen turoloo ɔ.

1 Aberɛso Dwirɛ 25:7

Bɛ ne bɛ nwo ama, bɔ batete bɛ wɔ AWURADE nwo dweintolɛ nu, bɔ bɛ mukoraa bɛse edwein to paa ne, bɛ somaa te ɛyaa nyɔ aburawɔtwɛ ne mmɔtwɛ.

Nehemia 12:46

Ofikyɛ ofi tete, fi Dawide ne Asafe aberɛ so, edweintolɛfoɛ nemɔ bele sona bɔ ɔla bɛ noa ɔ, bɔ odi bɛ nyunu maa bɛto dwein bɛye Nyameɛ ayɛ ná bɛda ye ase ɔ.

YOB NWOMAA NE 23:12

Ye mmeraa bɔ wahyɛ ne, mmmuli so, na ye noa dwirɛ ne, ye nwo hia me maa mafa masie me ti anu.

Edwein 119:11

Mafa wɔ dwirɛ ne masie me ti anu, amaa ɔnate so manyɔ bɔne mandia wɔ.

Edwein 119:54

Awuro bɔ mayɛ ɛwɔfoɛ maatena nu ne, w’ahyɛdeɛ yeɛ ɔte me dwein ɔ.

Edwein 138:1

Ao AWURADE, ngɔfa m’ahone amukoraa ngɔla wɔ ase; nyameɛ mɔ anyunu yeɛ meto wɔ nwo ayɛyelɛ dwein ɔ.

Edwein 28:7

AWURADE te m’anwoserɛ ne m’akokyɛm, ye yeɛ me nye la ye so ɔ; yiti ɔboka me, na me nye gye. Ngɔfa me dweintolɛ ngɔla ye ase.

Edwein 32:7

Wɔ yeɛ ɛte m’afealeɛ ɔ, wɔ yeɛ ɛbɔ me nwo waen fi amaneɛ nu ɔ; ɛfa wɔ ngoalelɛ dwein ɛpɛ me nwo yia. Sela

Edwein 71:23

Me noa kɔbɔ ese koli ahurusi mmerɛ bɔ meto wɔ nwo ayɛyelɛ dwein ɔ, yeɛ me kra bɔ apepɛ ale ye ne koso, ɔkɔyɔ sɔ ala.

Anyandera 14:8

Badwemma ye nworɛ ne, ɔmaa ɔdwene bɔ ɔyɔ ɔ nwo, nakoso ngwaseafoɛ bɛ gyiminɛ te nnakannaka.

Anyandera 18:1

Sona bɔ ɔpena ye ngome ye yeeyɛlɛ ne, ɔpena ye ngome ye deɛ, na onne nzusuleɛ paa biala ndo nu.

Edwein Nu Dwein 1:1

Edwein nu dwein bɔ ɔte Solomon deɛ ne.

Yesaya 10:2

kyɛ bɛfa bebua ehiafoɛ ndɛengyea, kyɛ bɛfa bedi me mmenia bɔ bɛyɛ anwumvo ɔ aminɛ, bɔ ɔnate so bɛfa akunafoɛ mmrasua bɛkakyi bɛ koɛ nu nzesadeɛ, ɔne kyɛ bedi nyisiaa aminɛ ɔ.

Yesaya 26:1

Sɔ kyẽa ne, bɛkɔto sɔ dwein he wɔ Yuda aseɛ so: “Yɛle kuro bɔ ye nwo yɛ se ɔ, wafa ngoalelɛ wayɛ yɛ nwo fasue ne ɛwaen.

Yesaya 30:29

Ɛmɔkɔto dwein bɔ ɔte kyɛ aluolue krongron dwein bɔ ɛmɔto ye kɔngɔen ne; na ɛmɔ nye kɔgye kyɛbɔ ɛmɔhu aweɛn besi nu bɛkɔ AWURADE bokaa ne aso, Yisrael Nyɔbotaen ne aso ɔ.

Yesaya 5:1

Maa ndo me dɔfo nwo dwein, me dɔfo dwein bɔ ɔfa ye bobe boo nwo ɔ: Né me dɔfo ne ole bobe boo wɔ bokaa bie bɔ ɔkye aleɛ ɔ so.

Yeremia 15:16

Nwuni wɔ dwirɛ ne, na ɔyɛle m’aleɛ, wɔ dwirɛ ne yɛle me anika, na ɔma m’ahone tɔle me kunu ofikyɛ wɔ, AWURADE Asafo Nyameɛ, wɔ dumaa yeɛ ɔla me so ɔ.

Mateo 26:30

Afei bɛtole ayɛyelɛ dwein, na befili berɛ bɛhɔle Olive Bokaa ne aso.

Luka 2:51

Na ɔne bɛ besa bɛhɔle Nasarɛte, na ɔbrɛle ye nwo ase mane bɛ. Na ye maame fale edwirɛ hemɔ amukoraa siele ye ti anu.

Yohane 15:7

Sɛ ɛmɔtena me nu, ná me dwirɛ tena ɛmɔ nu a, ɛmɔkobisa bɔ ɛmɔkuro biala, na ɔkɔyɛ berɛ kɔma ɛmɔ.

Romanfoɛ 10:17

Né nzaade, gyidie nate edwirɛ ne tielɛ nu yeɛ ɔba ɔ, na bɔ bɛte ne, ɔnate Kristo dwirɛ ne aso yeɛ ɔba ɔ.

Romanfoɛ 15:14

Aliɛmaa mɔ, me bɔbɔ mede meto nu kyɛ paayɛlɛ ali ɛmɔ ti, kyɛ ɛmɔle nimdeɛ amukoraa, na ɛmɔkora betutu ɛmɔ nwo foɛ.

1 Korintofoɛ 14:15

Yiti ngɔyɛ ye sɛ? Ngɔfa sunzum ne ngɔbɔ mbaeɛ, ná mafa m’adwene koso mabɔ mbaeɛ. Ngɔfa sunzum ne ngɔto dwein ná mafa m’adwene koso mato dwein.

1 Korintofoɛ 14:26

Aliɛmaa mɔ, mekyire sɛɛ koraa? Sɛ ɛmɔyia nu a, ebie le edwein to, ebie le ngyerɛkyerɛ kyire, ebie le edwudwolɛ ahoroɔ kã, ebie le nyekyire, ebie le edwudwolɛ ahoroɔ nwo ngyerɛaseɛ. Ɛmɔma ebiala yɔ ye deɛ bɔ ɔma ngɔsoɛ ɔ.

Ɛfesofoɛ 1:17

kyɛ y’Awurade Yesu Kristo Nyameɛ, bɔ ɔte animnyam Baba ne, ɔ́ma ɛmɔ nworɛ ne nyekyire sunzum wɔ ye nwo nimdeɛ nu,

Ɛfesofoɛ 5:17

Yiti nnɛma ɛmɔyɛ mmenia bɔ adwene nne bɛ ti anu ɔ, na mmom ɛ́mɔyɛ mmenia bɔ bɛte Awurade apɛdeɛ bo ɔ.

Ɛfesofoɛ 5:19

Ɛ́mɔfa sangoo dwein, ayɛyelɛ dwein ne sunzum nu dwein bedwudwo behyirehyire ɛmɔ nwo; ná ɛ́mɔfa ɛmɔ ahone amukoraa bɛto Awurade nwo dwein;

Ɛfesofoɛ 5:26

kyɛbɔ ɔkɔfa nzue ebialɛ nu kɔte ye nwo wɔ edwirɛ ne anu kɔyɛ ye krongron ɔ,

Kolosefoɛ 1:28

Ye yeɛ yɛbɔ ye nwo dawure ɔ, na yɛbɔ kuro sona biala kɔkɔ, yɛfa nworɛ mukoraa yɛkyirekyire sona biala, amaa ɔnate so yafa sona biala yawa Kristo nyunu wɔ pɛpɛɛpɛyɛlɛ nu.

Kolosefoɛ 1:9

Ɔnate ɛhe ati, ofi kyẽa bɔ yɛtele sɔ dwirɛ ne ɔ, yɛyyakyili ɛmɔ nwo mbaeɛbɔlɛ le. Na yɛsrɛ kyɛ ɔma ɛmɔnya ye apɛdeɛ nwo nimdeɛ mmorosoɛ wɔ sunzum nu nworɛ ne ndeaseɛ amukoraa nu.

Kolosefoɛ 4:6

Ɛ́mɔma ɛmɔ noa dwudwolɛ yɛ fɛ kyɛ ngyee, amaa ɛmɔanwu mmuayɛɛ paa bɔ ɔsɛ kyɛ ɛmɔfa bebua ebiala ɔ.

1 Tɛsalonikafoɛ 1:8

Ofikyɛ, nna Awurade nwo dwirɛ ne ngome yeɛ wafi ɛmɔ berɛ waadwu Makedonia ne Akaia ɔ; na mmom ɛmɔ gyidie wɔ Nyameɛ nu nwo dwirɛ koso watrɛ wahɔ nekaa biala, yiti onhia kyɛ yɛkɔhã ye nwo dwirɛ ko.

1 Tɛsalonikafoɛ 4:18

Yiti ɛ́mɔfa edwirɛ hemɔ bɛ́kyekye ɛmɔ wora.

2 Tɛsalonika 3:15

Nakoso nnɛma ɛmɔbu ye kyɛ ɔte ɛmɔ pɔfoɛ, na mmom ɛ́mɔbɔ ye kɔkɔ kyɛ aliɛmaa.

1 Timoteo 6:17

Dwudwo kyire sikafoɛ bɔ bɛwɔ wiase, kyɛ nnɛmaa bɛmoma bɛ nwo so, anaakyɛ nnɛmaa bɛfa bɛ nye bɛto anwonyadeɛ bɔ ɔpɛ nu kɔ ɔ so; na mmom ɔsɛ kyɛ bɛfa bɛ nye bɛto Nyameɛ bɔ ɔma yɛ nningyein amukoraa mmorosoɛ ma yɛ nye gye ne aso.

2 Timoteo 3:15

ɔne kyɛbɔ ofi wɔ ngwadaa nu yeɛ anwu Ahyerɛlɛ Krongron ne kyɛ ɔkora maa enwu nworɛ bɔ ɔnate Yesu Kristo nu gyidie so ɔfa wɔ kɔ ngoalelɛ nu ɔ.

Tito 3:6

Na ɛhe yeɛ ɔnate yɛ Ngoadefoɛ Yesu Kristo so ohwie guale yɛ so mmorosoɛ ɔ,

Yakobo 1:5

Na sɛ ɛmɔ nu bie tɔ sii nworɛ nu a, maa obisa Nyameɛ bɔ ɔye ye kunu fa ma mmenia, bɔ ɔmva animguaseɛ mmata ye nwo ne, na ɔkɔfa kɔma ye.

Yakobo 3:17

Nakoso nworɛ bɔ ofi anwuro ne de, bɔ oli moa ɔ, ye nwo te, okuro asomdwee, ye nwo dwo, ye so yɛ mmerɛ, anwumvoinnwunɛ ne bra paa ayi ye tɛkyɛ, na nyeyemuɛ anaa nyaatwom nne nu.

Yakobo 5:13

Ɛmɔ nu bie onwu amaneɛ anaa? Maa ɔbɔ mbaeɛ. Ebie nye agye anaa? Maa ɔto ayɛyelɛ dwein.

1 Yohane 2:14

Ngya mɔ, mahyerɛ he mabrɛ ɛmɔ, ofikyɛ ɛmɔse bɔ né ɔwɔ berɛ ahyɛaseɛ ne. Mmerandeɛ mɔ koso mahyerɛ he mabrɛ ɛmɔ, ofikyɛ ɛmɔatindim, Nyameɛ dwirɛ ne te ɛmɔ nu, na ɛmɔali bɔnefoɛ ne so ngonim.

1 Yohane 2:24

Yiti ɛ́mɔma edwirɛ bɔ ɛmɔate bafi ahyɛaseɛ ne ɔtena ɛmɔ nu. Na sɛ bɔ ɛmɔate bafi ahyɛaseɛ ne tena ɛmɔ nu a, ɛmɔ koso ɛmɔkɔtena Baa ne ne Baba ne nu daa.

1 Yohane 2:27

Nakoso ɛmɔ de, ngoo bɔ wafa wapopa ɛmɔ ne, ɔte ɛmɔ nu, yiti onhia kyɛ ebie kohyirehyire ɛmɔ ɔ. Na sɔ ngoopalɛ ne ala kyirekyire ɛmɔ nikyee biala, ɔkã nahorɛ, ɔmbɛ ngondombo, na kyɛbɔ wahyirehyire ɛmɔ ne, ɛmɔli so.

2 Yohane 1:2

ɔnate nahorɛ ne bɔ ɔte yɛ nu ná ɔne yɛ kɔtena afebɔɔ ne ati.

Nyekyire 14:3

Na bɛtole edwein foforɛ bie wɔ ahennie bia ne ne abɔdeɛ teasefoɛ nna ne ne mbanyi nemɔ nyunu. Na ebiala angora anzua sɔ dwein ne, sana apee sɔ alaa ɛyaa ko ne aburanna ne nna ne bɔ bale bɛ ngoa bafi aseɛ so ne angome.

Nyekyire 15:3

Né bɛto Nyameɛ akoaa Mose dwein ne Boaen Ba ne dwein kyɛ, “Tuminiɛ Awurade Nyameɛ, wɔ nnwumaa te mbiri mbri na ɔyɛ nwanwa. Maen maen mɔ Hene, w’atee tengyɛ, na ɔte nahorɛ.

Nyekyire 19:10

Yeɛ mvale me nyunu mmutuli ase wɔ ye gya bo kyɛ mesɔne ye, nakoso osele me kyɛ, “Nea, nnɛyɔ sɔ! Ofikyɛ me koso nde ebiɛngo akoaa, wɔ ne eliɛma mɔ bɔ betira Yesu adanzeɛ ne anu ne. Sɔne Nyameɛ! Ofikyɛ Yesu adanzeɛ ne, ye ole ngɔmhyɛlɛ sunzum ne.”

Nyekyire 5:9

Na bɛtole dwein foforɛ bie kyɛ, “Ɛfata kyɛ ede nwomaa bɔ babobɔ ne ná ebukye ye nzɔanoɛ nemɔ ɔ; ofikyɛ behuni wɔ, na afa wɔ mogya atɔ adasa mmaa ama Nyameɛ afi mmusua kure ne edwudwolɛ ne mmenia ne maen biala nu,