Kolosefoɛ 3:12 - AHYERƐLƐ KRONGRON

¹² Ɛmɔte mmenia bɔ Nyameɛ aneanea nu waye ɛmɔ ɔ, anwoteefoɛ ne adɔfo, yiti ɛ́mɔfa anwumvoinnwunɛ, paayɛlɛ, awiɛmvoɛ yɔbea ɔne anwobrɛaseɛ ne aboterɛ bɛbɔ ɛmɔ bra.

Kolosefoɛ 3:12 Iomraidhean Croise

Yesaya 42:1

Nea, me somvoɛ bɔ ngyi ye si pindinn ne ɛhe, ye bɔ maneanea nu maye ye, bɔ me kra nye gye ye nwo ne; mafa me Sunzum magua ye so, na ye yeɛ okobua maen maen mɔ ndɛen turoloo ɔ.

Yesaya 45:4

Me somvoɛ Yakob ne Yisrael bɔ maneanea nu maye ye ne ati yeɛ mabɔ wɔ dumaa mafrɛ wɔ ɔ; na mabɔ wɔ abodin, ɔwɔ nu kyɛ ɛnze me de.

Yesaya 63:15

To wɔ nye fi nyameɛso nea, to wɔ nye fi wɔ krongron ne w’animnyam atenaleɛ berɛ nea. Wɔ nungunɛ ne w’anwoserɛ ne, ɔwɔ nisua? Wɔ kunu tetelɛ ne w’anwumvoinnwunɛ ne, aye afi me nwo anaa?

Yesaya 65:22

Bengosi sua ngɔma sona foforɛ ngɔtena nu ko, yeɛ bengolua ngɔma sona foforɛ ngoli nu aleɛ. Na kyɛbɔ bakaa si nyi kyɛ ne, sɔ ala yeɛ me maen kɔyɛ ɔ, na me mmenia bɔ mapa nu maye bɛ ne, bekodidi bɛ sa noa adwuma nwo bɛkɔhyɛ.

Yesaya 65:9

Ngɔye bosofoɛ mɔ ngofi Yakob nu, yeɛ ngɔye bɛ bɔ me mmokaa nemɔ kɔɔyɛ bɛ deɛ ɔ ngofi Yuda; bɛ bɔ maneanea nu maye bɛ ne yeɛ ɔkɔyɛ bɛ deɛ ɔ, na berɛ yeɛ me somvoɛ mɔ bɛkɔtena ɔ.

Yeremia 31:20

Aso Efraim, ɔte mma bɔ ɔla m’ahone nwo ɔ? Aso ɔte baa bɔ me nye gye ye nwo ɔ? Mmerɛ pee bɔ metwi ye nyunu ne, yeɛ mekɔ so mekaye ye ɔ. Yiti me kunu tete me ma ye, amba, ngonwu ye anwumvoin, AWURADE noa dwirɛ ɛne.

Yeremia 31:3

AWURADE yele ye nwo ali hyirele me fili dedeede kyɛ, amba, ɔdɔ bɔ ɔwɔ berɛ afebɔɔ yeɛ mafa mahuro wɔ dwirɛ ɔ, maye m’ahone nu yeɛ mahwe wɔ mapingye ɔ.

Hesekiel 16:8

“Na mmerɛ bɔ mebaapɛ nu wɔ nwo berɛ bieku ná nwuni wɔ nen, tie, né adwu ehurolɛ mmerɛ so; na ndrɛtrɛle me tena nu mva ngatale wɔ nwo bɔ ɔla so ne, na me ne wɔ yɛyɛle apam bɔ mvale ndaen mvoale so ɔ, na ɛɛyɛle me deɛ, AWURADE Nyameɛ noa dwirɛ ɛne.

Mateo 24:22

Na sɛ bande sɔ ngyẽa ne aso a, ahaa bengole sona biala ngoa; nakoso ɔnate bɛ bɔ baneanea nu baye bɛ ne ati, bɛkɔte sɔ ngyẽa ne aso.

Mateo 24:24

Ɔnate kyɛ, kristo ngondombofoɛ ne ngɔmhyɛlɛfoɛ ngondombofoɛ kodwɔso, na bɛkɔyɔ nzɛngyerɛnneɛ ne anwanwadeɛ mbiri mbiri, bɔ ɔkɔhora kɔwa kyɛ, bɛkɔlakalaka bɛ bɔ Nyameɛ aneanea nu waye bɛ ne po.

Mateo 24:31

Na ɔkɔsoma ye abɔfo mɔ maa bɛkɔfa totorobɛndohulɛ akomvi piri bɛkɔwa, na bɛkɔboaboa bɛ bɔ waneanea nu waye bɛ nemɔ noa bekofi mvrama nna nemɔ anu, kofi anwuro noa koodwu ye noa.

Marko 13:20

Na sɛ Awurade ande sɔ ngyẽa ne aso a, ahaa ongole sona biala ngoa; nakoso ɔnate bɛ bɔ waneanea nu waye bɛ, bɔ ɔsale nu yele bɛ ne ati, wate ngyẽa ne aso.

Marko 13:22

Ɔnate kyɛ, kristo ngondombofoɛ ne ngɔmhyɛlɛfoɛ ngondombofoɛ kodwɔso, na bɛkɔyɔ nzɛngyerɛnneɛ ne anwanwadeɛ mɔ, na sɛ ɔkɔyɛ yee a, bɛkɔlakalaka bɛ bɔ Nyameɛ aneanea nu waye bɛ ne po.

Marko 13:27

Na ɔkɔsoma ye abɔfo mɔ maa bɛkɔɔboaboa bɛ bɔ waneanea nu waye bɛ nemɔ bekofi mvrama nna nemɔ anu, kofi aseɛ noa koodwu anwuro noa.

Luka 1:78

ɔnate yɛ Nyameɛ anwumvoinnwunɛ bɔ ɔma ye kunu tete ye ne anu. Na ye sɔ ati yeɛ alehyeleɛ bɔ ofi anwuro ɔ wapukye wɔ yɛ so ye,

Luka 18:7

Na bɛ bɔ Nyameɛ aneanea nu waye bɛ, bɔ besu bɛfrɛ ye eyia ne kɔngɔen ne, sɛ ɔto ye bo ase ɔkyɛ kãa wɔ bɛ nwo a, aso ongoli bɛ dwirɛ ngɔma bɛ anaa?

Romanfoɛ 1:7

Mekyerɛ mebrɛ ɛmɔ amukoraa bɔ Nyameɛ kuro ɛmɔ dwirɛ bɔ ɛmɔwɔ Rome, bɔ wafrɛ ɛmɔ kyɛ ɛmɔɔyɛ anwoteefoɛ ɔ. Adom ne asomdwee bɔ ofi yɛ Baba Nyameɛ ne Awurade Yesu Kristo berɛ ɔyɛ ɛmɔ deɛ.

Romanfoɛ 13:14

Na mmom ɛ́mɔfa Awurade Yesu Kristo akodeɛ ne bewura, yeɛ nnɛma ɛmɔdi anwoɔnaen akɔnnɔ si bɛyɔ ye apɛdeɛ bɛma ye.

Romanfoɛ 9:11

Ɔwɔ nu kyɛ né bennya bɛwwole bɛ de, na wawa kyɛ po bɛyɔ paa anaa tɛɛ biala ɔ. Nakoso kyɛbɔ ɔkɔyɛ na Nyameɛ nhyehyɛleɛ, bɔ oggyi nnwumaa so, na mmom ogyi bɛ nu ko frɛlɛ so kɔwa nu ne ati,

1 Korintofoɛ 13:4

Ɔdɔ le aboterɛ, na ye ti anu yɛ mmerɛ; ɔdɔ de, ɔtte ahoɔyea, ongyire ye nwo, na ɔmmoma ye nwo so.

2 Korintofoɛ 6:6

anwotelɛ bra nu, nimdeɛ nu, animia nu, paayɛlɛ nu, Sunzum Krongron nu, ɔdɔ kaenn nu,

Galatiafoɛ 5:6

Ofikyɛ sɛ yɛne Kristo Yesu yɛ ko de a, bienzuapɛlɛ oo, nna bienzuapɛlɛ oo, ye nwo nhia, na mmom gyidie bɔ ɔnate ɔdɔ so yɔ adwuma yeɛ ohia ɔ.

Ɛfesofoɛ 1:4

kyɛbɔ ɔneaneane nu yele yɛ wɔ ɔdɔ nu, Kristo nu koraka yeɛ bɛbaahyɛ wiase bo, kyɛ yɛyɛ krongron bɔ ngekalewa biala nne yɛ nwo wɔ ye nyunu ne.

Ɛfesofoɛ 4:2

anwobrɛaseɛ ne awiɛmvoɛyɛlɛ amukoraati nu, aboterɛ nu, ná ɛmɔhurohuro ebiala dwirɛ kyɛbɔ ebiala te ɔ wɔ ɔdɔ nu;

Ɛfesofoɛ 4:24

ná ɛ́mɔfa sona sue foforɛ bɔ Nyameɛ bɔle ye kyɛ ye sɛso wɔ nahorɛ tenenee ne anwotelɛ nu ne bewura.

Ɛfesofoɛ 4:32

Ɛmɔhurohuro ɛmɔ nwo dwirɛ, ɛ́mɔnwu ɛmɔ nwo anwumvoin, ná ɛ́mɔfa bɛhyehyɛ ɛmɔ nwo, kyɛbɔ Nyameɛ nate Kristo so wafa wahyɛ ɛmɔ ne.

Filipifoɛ 1:8

Nyameɛ di me adanzeɛ, kyɛ Kristo Yesu nu ɔdɔ yeɛ ngyi so bɔ me wora dɔ ɛmɔ amukoraa ɔ.

Kolosefoɛ 3:10

na ɛmɔanya sona sue foforɛ, na ye bɔ ɔbɔle yɛ ne, ogu so ɔyɛ yɛ foforɛ ba nimdeɛ nu maa ye sɛso yɛ kyɛ ye bɔbɔ ne ala.

1 Tɛsalonikafoɛ 5:15

Ɛ́mɔnea yé ná ebiala amva bɔne andua bɔne kerɛ, na mmom ɛ́mɔnea kyɛ daa biala ɛmɔkɔyɔ paa bɛkɔmoma ɛmɔ nwo ne mmenia amukoraa.

2 Timoteo 1:9

Ye yeɛ oolele yɛ ná ɔfale ɛfrɛlɛ krongron frɛle yɛ ɔ, nna kyɛ yɛ nnwumaa ti ɔ; na mmom kyɛbɔ ye bɔbɔ ye nhyehyɛleɛ ne adom bɔ wafa walo yɛ wɔ Kristo Yesu nu fi tetetete ne ɔte ne.

2 Timoteo 2:10

Yiti ɔnate mmenia bɔ baneanea nu baye bɛ ne ati, memia me nye menwu amaneɛ mukoraa, amaa ɔnate so bɛ koso banya ngoalelɛ bɔ ɔwɔ Kristo Yesu nu ne ɔne animnyam afebɔɔ ne.

Tito 1:1

Pɔɔlo, bɔ nde Nyameɛ akoaa ne Yesu Kristo somafoɛ mema bɛ bɔ Nyameɛ aneanea nu waye bɛ ɔ bɛ gyidie ɔne nahorɛ ne nwo nimdeɛ bɔ ɔma nyamesom paa ɔ,

1 Petro 1:2

bɛ bɔ Baba Nyameɛ waneanea nu waye bɛ fi tetetete, bɔ ɔnate Sunzum Krongron so wate bɛ nwo wama Yesu Kristo nwo sotie ɔne ye mogya nu anwopetenɛ ne: Adom ne asomdwee mmorosoɛ ɔyɛ ɛmɔ deɛ.

2 Petro 1:10

Yiti aliɛmaa mɔ, ɛ́mɔbɔ mmɔden bétira ɛfrɛlɛ bɔ bafrɛ ɛmɔ ne, ɔne ɛnealɛ bɔ baneanea nu baye ɛmɔ ne anu yé, ofikyɛ sɛ ɛmɔyɔ ɛhemɔ a, ɛmɔngofi ase le.

1 Yohane 4:19

Yɛkuro ye dwirɛ, ofikyɛ ye yeɛ olili moa hurole yɛ dwirɛ ɔ.

2 Yohane 1:13

Eliɛmaa brasua bɔ baneanea nu baye ye ne, ye mma mɔ bébisa ɛmɔ ahye.

Nyekyire 17:14

Bɛkɔfa koɛ bɛkɔteta Boaen Ba ne, na Boaen Ba ne koli bɛ so ngonim; ofikyɛ ɔte meneɛ mɔ nu Meneɛ ne ahemvo mɔ nu Hene; na bɛ bɔ bɛboka ye so ne, wafrɛ bɛ, waneanea nu waye bɛ, na bedi nahorɛ.”