Hosea 9:4 - AHYERƐLƐ KRONGRON

⁴ Bɛngɔbɔ anonneɛ afɔleɛ bɛngɔma AWURADE, yeɛ b’afɔleɛ mɔ ngɔsɔ ye nye. B’afɔleɛ kɔyɛ kyɛ ɛsɛenvoɛ aleɛ kɔma bɛ; ebiala bɔ okoli bie ne, ye nwo kogua fiɛ, ofikyɛ b’aleɛ ne, bɛ bɔbɔ yeɛ bekoli ɔ, na ɔngɔwa AWURADE awuro berɛ.

Hosea 9:4 Iomraidhean Croise

Ɛksadɔso 29:40

Fa ɛhe boka boaen akrɔngrɔma bɔ oli moa ne aso: esam paa olonka ko nu ngyɛmuɛ buru, bɔ bafa ngoo bɔ bahwi ɔ towaa ko ne bue bafra ɔ, ɔne bobe nzaa towaa ko ne bue bɔ ɛkɔfa kɔbɔ anonneɛ afɔleɛ ɔ.

Ɛksadɔso 40:23

Ɔfale paanoo ne totole so wɔ AWURADE nyunu, kyɛbɔ AWURADE hyɛle ye (Mose) nen.

Yesaya 57:6

Bɔnza nu nyɔboɛ torometorome nemɔ anu yeɛ ɔte wɔ kyɛfa ɔ, bɛ yeɛ bɛte w’agyapadeɛ ɔ, bɛ yeɛ abɔ wɔ anonneɛ afɔleɛ ne aburoo afɔleɛ ama bɛ ɔ. Aso me kunu kodwo wɔ sɔ nningyein nemɔ anwo anaa?

Yesaya 66:3

“Sona bɔ oku nandwie ne, ɔte kyɛ bɔ oku mmenia ɔ ala, bɔ ɔfa boaen bɔ afɔleɛ ne, ɔte kyɛ bɔ obu kyea kɔme anu ɔ, bɔ ɔbɔ aburoo afɔleɛ ne, ɔte kyɛ bɔ ɔfa prako mogya bɔ afɔleɛ ɔ, bɔ ɔyera ɛyɛɛ ne, ɔte kyɛ sona bɔ ɔsɔ amoen ɔ. Bɛ de, bali bɛ bɔbɔ bɛ ti piri, na b’akyiwadeɛ nemɔ yeɛ bɛ kra nye gye ye nwo ɔ.

Yeremia 16:7

Ebiala ngɔnea awufoɛ nemɔ anwo ngɔma ɛsɛenvoɛ nemɔ aleɛ maa bɛngɔfa bɛngɔkyekye bɛ wora, yeɛ ebiala ngɔnea bɛ se ne bɛ ni mɔ wue anwo ngɔma bɛ nzaa ma bɛngɔno bɛngɔkyekye bɛ wora.

Yeremia 6:20

Ɛyɛɛ bɔ bɛ ne ye fi Hyeba bɛba, yeɛ ayirefona bɔ bɛ ne ye fi dedeede maen bie aso bɛba ne, aso bɛ nwo le mvasoɛ ma me? Me nye ngye ɛmɔ ɛyeralɛ afɔleɛ nemɔ anwo, yeɛ ɛmɔ afɔleɛ mɔ koso bɛnzɔ me nye.

Hesekiel 24:17

Gua anwongokoɔ konn, yeɛ nnɛsũ sona bɔ wawu ne. Bɔ w’abotire, ná fa wɔ mbaboa wura. Nnɛfa nikyee kata wɔ noa, yeɛ nnɛdi ɛsɛenvoɛ aleɛ.”

Hesekiel 24:22

Na ɛmɔkɔyɔ bɔ mayɔ ne bie, ɛmɔngɔfa nikyee bɛngɔkata ɛmɔ noa, yeɛ ɛmɔngoli ɛsɛenvoɛ aleɛ.

Daniel 1:8

Nakoso Daniel yɛle ye adwene kyɛ ongoli Nana aleɛ ngɔno ye nzaa ne, ná ɔngɔfa ngogua ye nwo fiɛ. Yiti ɔsrɛle sayɛɛ panyi ne kyɛ ɔma ye ate, amaa ɔnate so wangua ye nwo fiɛ.

Hosea 3:4

Ofikyɛ Yisraelfoɛ kɔtena mmerɛ tendenn bɔ belle hene, bɔ belle dehyeɛ, bɔ bɛmmɔ afɔleɛ, bɔ belle amoen, bɔ belle asɔfo ataadeɛ ne abusua amoen ɔ,

Hosea 7:16

Besa bɛ si, nakoso bɛmma Anwuro Anwuroniɛ ne berɛ, bayɛ kyɛ nnakannaka agyaen, b’atitirefoɛ mɔ kɔtotɔ ngrandɛ noa; ɔnate bɛ noa dwirɛ mvamva ne ati, mmenia kɔfa ɛhe kɔgoro bɛ nwo wɔ Misraim aseɛ so.

Hosea 8:13

M’ayɛyelɛ afɔleɛ ne, bɛfa naen bɛbɔ, bedi, nakoso AWURADE onne bɛ ndo nu. Afei ɔkɔkaye b’amumuyɛɛ, ɔkɔhwe bɛ so wɔ bɛ bɔne nwo, na bekosa bɛkɔhɔ Misraim.

Yoel 1:13

Ɛmɔ, asɔfo mɔ, ɛ́mɔhera ɛsɛen tena ná ɛ́mɔbɔ awuye; ɛmɔ, afɔleɛ bokyea nwo somvoɛ mɔ, ɛ́mɔsu. Ɛmɔ, me Nyameɛ somvoɛ mɔ, ɛmɔbra nu, ɛ́mɔhera ɛsɛen tena kɔngɔen ne amukoraa, ofikyɛ bayakyi aleɛ afɔleɛ ne anonneɛ afɔleɛ bɔlɛ wɔ ɛmɔ Nyameɛ awuro.

Yoel 1:9

Bayakyi aleɛ afɔleɛ ne anonneɛ afɔleɛ bɔlɛ wɔ AWURADE awuro. Asɔfo bɔ bɛ yeɛ bɛte AWURADE somvoɛ mɔ ne, bedi aworabɔlɛ.

Yoel 2:14

Nwa yeɛ ɔse ɔ? Ebiaa okosa ye si kɔsesã ye adwene, ná wayakyi saleɛ wama ɛmɔ bɔ ɛmɔkɔfa bɛkɔbɔ aleɛ afɔleɛ ne anonneɛ afɔleɛ bɛkɔma AWURADE ɛmɔ Nyameɛ ɔ.

Lewitikɔso 17:11

Ofikyɛ anwoɔnaen biala, ye ngoa wɔ ye mogya nu; na mafa mogya mama ɛmɔ wɔ afɔleɛ bokyea ne aso kyɛ ɛ́mɔfa bɛ́yɛ mbata bɛ́ma ɛmɔ kra. Ngoa wɔ mogya nu, yiti mogya yeɛ odi kyɛ bɛfa bɛyɛ mbata ɔ.

Lewitikɔso 21:17

“Ka kyire Aarɔn kyɛ, Wɔ bosofoɛ nemɔ, wɔ b’aworɛ ndoatoasoɛ amukoraati nu, nnɛma bɛ nu biala bɔ wali nnɛen ɔba afɔleɛ bokyea ne anwo ɔbafa ye Nyameɛ aleɛ ɔma ye.

Lewitikɔso 21:21

Nnɛma ɔsɔfo Aarɔn bosoniɛ biala bɔ wali nnɛen ba afɔleɛ bokyea ne anwo kyɛ ɔbaabɔ see so afɔleɛ ma AWURADE; wali nnɛen ne ati, onni kyɛ ɔba afɔleɛ bokyea ne anwo kyɛ ɔfa ye Nyameɛ aleɛ ɔbrɛ ye ɔ.

Lewitikɔso 21:6

Odi kyɛ bɛyɛ krongron bɛma bɛ Nyameɛ, na ɔnzɛ kyɛ begua bɛ Nyameɛ dumaa nwo fiɛ; ofikyɛ afɔleɛ bɔ bɛbɔ ye see so bɛma AWURADE, bɔ ɔte bɛ Nyameɛ aleɛ ne, bɛ yeɛ bɛbɔ ɔ; yiti odi kyɛ bɛyɛ krongron.

Lewitikɔso 21:8

Odi kyɛ Yisraelniɛ biala nwu asɔfo mɔ kyɛ bɛte krongron, ofikyɛ bɛ yeɛ bɛbɔ aleɛ afɔleɛ bɛma wɔ Nyameɛ ɔ; nwu bɛ kyɛ bɛte krongron, ofikyɛ me AWURADE bɔ mete ɛmɔ nwo ne, nde krongron.

Amose 5:22

Ɔwɔ nu kyɛ ɛmɔbɔ naen yeralɛ afɔleɛ ne aleɛ afɔleɛ bɛma me, nakoso menne mendo nu; yeɛ ɛmɔ nandwie sayɛɛ asomdwee afɔleɛ ne, mengɔfa me nye mengɔnea.

Malaki 2:13

Nikyee bieku bɔ ɛmɔsa bɛyɔ ɛhe: ɛmɔfa ɛmoenporolɛ, esuɛ ne awuyebɔlɛ bɛkata AWURADE afɔleɛ bokyea ne aso; ofikyɛ onne afɔleɛ ne ndo nu ko, yeɛ ye nye nzɔ bɔ ofi ɛmɔ berɛ ne ko.

Numeri 19:11

Ebiala bɔ ye nwo kɔha sona fuin ne, ye nwo kogua fiɛ ɛlɛsoo.

Numeri 28:2

“Fa sɔ ahyɛdeɛ he ma Yisraelfoɛ kyɛ, M’afɔleɛ, aleɛ bɔ bɛbɔ ye see so bɛma me, bɔ ɔbo me fona ne, ɛ́mɔnea yé kyɛ ɛmɔkɔbɔ bɛkɔma me mmerɛ bɔ m’ahyɛ ne pɛpɛɛpɛ.

Numeri 4:7

Na paanoo krongron poen ne, odi kyɛ bɛfa ɛtena bibire bɛsɛ so, ná bɛ́fa ɛhemɔ bégua so: ndalie ne ɛyɛɛ kulie nemɔ, turonzemaa ne bua mɔ bɔ bɛkɔfa bekohwie afɔleɛ nzaa ɔ; odi kyɛ bɛfa daa biala paanoo ne koso bɛto so.

Yohane 6:51

Me ole ngoa paanoo bɔ ofi nyameɛso wale ase ne; na sɛ ebie di paanoo he bie a, ɔkɔtena ase daa; na paanoo bɔ ngɔfa ngɔma wiase ngoa ne, ye ole me nwonaen.”

Deuteronomi 26:14

Mmerɛ bɔ né médi aworabɔlɛ ne, manni bie; mmerɛ bɔ né me nwo nde ne, manye so; yeɛ mamva bie mammɔ afɔleɛ mamma awufoɛ. Matie AWURADE me Nyameɛ dwirɛ, na mayɔ bɔ ahyɛ me ne amukoraati.