Hosea 6:4 - AHYERƐLƐ KRONGRON

⁴ Ao Efraim, nzikyɛ yeɛ mva nyɔ wɔ ɔ? Ao Yuda, nzikyɛ yeɛ mva nyɔ wɔ ɔ? Ɛmɔ nahorɛlilɛ te kyɛ ngyerɛmɔ munungum, na ɔte kyɛ bosue bɔ ɔpɛ nu kɔ ndɛndɛ ɔ.

Hosea 6:4 Iomraidhean Croise

Yeremia 3:10

Nakoso ɛhe amukoraa si ne, oliɛma brasua ngondomboniɛ Yuda wanza wamva ye ahone amukoraa wamma me berɛ, na mmom ɔyɔle sɔ wɔ nnakannaka atee so, AWURADE noa dwirɛ ɛne.”

Yeremia 3:19

“ ‘Ndwenene kyɛ ngɔmaa ɛkɔyɛ titire paa wɔ me mma mɔ anu, na ngɔma wɔ aseɛ bɔ ɔkye aleɛ ɔ, bɔ ɔte maen mɔ b’agyapadeɛ paa paa ɔ. Na né medwene kyɛ ɛkɔfrɛ me ‘Me Baba’ bɔ ɛngɔyakyi me si lilɛ ɔ.

Yeremia 34:15

Na ɛlɛsa ye, ɛmɔsakyerale ɛmɔ adwene bɛyɔle bɔ ɔte paa wɔ me nye so ɔ, kyɛ odi kyɛ ebiala ma obiɛngo nya ye fawɔnwodi. Na ɛmɔyɛle apam wɔ me nyunu wɔ awuro bɔ me dumaa la so ne anu.

Yeremia 5:23

Nakoso sɔ maen he, asoserɛ ne ɛlɔenyɛlɛ ali bɛ ti; bali makyebu bafa bɛ bɔbɔ b’atee so.

Yeremia 5:7

“Ɛhe de, ɔkɔyɛ sɛɛ né mafa wɔ bɔne mahyɛ wɔ? Wɔ mma mɔ bapo me, na bafa bɛ bɔ nna nyameɛ mɔ ahɔ ɔ bata ndaen. Mmane bɛ ko yili ne, bɛbɔle adwaman, na betuli bi bɛhɔle gyanderafoɛ awuro.

Yeremia 5:9

Aso onni kyɛ metwe bɛ so wɔ sɔ nningyein hemɔ nwo anaa? AWURADE noa dwirɛ ɛne. Na maen bɔ ɔte sɔa, onni kyɛ metɔ bɛ so wereɛ anaa?

Yeremia 9:7

Yiti bɔ Asafo AWURADE kã ɛhe: “Ngɔpɔ bɛ nwo ngoso bɛ ngɔnea, na me maen awa brasua ne ati, nzikyɛ koraa yeɛ nyɔ ɔ?

Hosea 11:8

Ao Efraim, ɔkɔyɛ sɛɛ né maye wɔ mama? Ao Yisrael, ɔkɔyɛ sɛɛ né maye me sa mafi wɔ bo? Ɔkɔyɛ sɛɛ né masɛkye wɔ kyɛ Adema? Ɔkɔyɛ sɛɛ né mabɔ wɔ tɔɔ kyɛ Seboyim? Me nyaa woso wɔ me kunu, ao, m’anwumvoinnwunɛ ayɛ piri paa.

Hosea 13:3

Yiti bɛkɔyɛ kyɛ ngyerɛmɔ munungum, kyɛ bosue bɔ ɔpɛ nu kɔ ndɛndɛ ɔ, kyɛ afafu bɔ mvrama bɔ ɔpɛ ye nwo ɔ, ɔbɔ ye fi nekaa bɔ bɛboro aburoo ɔ, kyɛ nwosina bɔ otu fa mboma nu kɔ ɔ.

Hosea 7:1

Mésa Yisrael anwonyerɛ a, né Efraim amumuyɛɛ ne Samaria bɔne yɔleɛ ɔ́da ali, ofikyɛ benni nahorɛ. Awueniɛ abɔ awura nu, na awerɔm awuefoɛ bɛbɔ apaa wɔ dwaaso.

Mateo 13:21

nakoso sɔ sona ne ondira ndii, na mmom ɔkora gyina mmerɛ kãa bie. Na sɛ ɔnate edwirɛ ne ati amaneɛnwunɛ anaa ndaneanyeɛ ba ye so a, berɛ ne ala ɔkakyi sundidua ma ye.

Maenbulɛfoɛ 3:12

Yisraelfoɛ sa yɔle bɔ ɔte bɔne wɔ AWURADE nyunu ɔ. Na AWURADE mane Moabo hene Eglon nyane anwoserɛ oolili Yisrael so ngonim, ofikyɛ Yisraelfoɛ yɔle bɔ ɔte bɔne wɔ AWURADE nyunu ɔ.