Hosea 4:14 - AHYERƐLƐ KRONGRON

¹⁴ Sɛ ɛmɔ mma mmrasua mɔ bɛbɔ gyandera, anaa sɛ ɛmɔ aye mɔ bɛsɛkye agyaa a, mengɔhwe bɛ so; ofikyɛ mmienzua nemɔ bɔbɔ deinn bɛkɔ gyanderafoɛ nemɔ nekaa, na bɛ ne asɔneyɛɛ so gyanderafoɛ yeɛ bɛbɔ afɔleɛ ɔ. Yiti maen bɔ nimdeɛ abɔ ye ne, ɔkɔbɔ.

Hosea 4:14 Iomraidhean Croise

1 Ahemvo 15:12

Asa pɛle asɔneyɛɛ so gyanderafoɛ mmienzua nemɔ asue fili maen ne anu, na mmosoen bɔ ye nana mɔ gyinane ne, ogyili bɛ mukoraa guale.

2 Ahemvo 23:7

Asɔneyɛɛ so gyanderafoɛ mmienzua nemɔ, bɛ sua mɔ bɔ bɛwɔ AWURADE awuro berɛ nekaa bɔ mmrasua nemɔ bɛnwo ndena bɛma bosoen Asera ne, Yosia bubuli bɛ guale.

Anyandera 28:5

Bɔnefoɛ nde pɛpɛɛpɛyɛlɛ bo, nakoso bɛ bɔ bɛpena AWURADE si atee ne de, bɛte ye mukoraa bo.

Yesaya 1:5

Nzu ati yeɛ ɛmɔkuro kyɛ mekɔ so mebo ɛmɔ ɔ? Nzu ati yeɛ ɛmɔtɛyɛ lɔen ye? Tire ne amukoraa nde apɔ, yeɛ ahone ne amukoraa ayɛ hodwoo.

Yesaya 27:11

Sɛ ye mmaen frɔmfrɔm nemɔ bewu a, bebubu begua, na mmrasua basesa bɛfa bɛyɛ eyein. Ofikyɛ bɛte maen bɔ ndeaseɛ abɔ bɛ ɔ; ye sɔ ne ati, bɔ ɔbɔle bɛ ne ngonwu bɛ anwumvoin, bɔ ɔnwone bɛ ne ɔngɔlo bɛ.

Yesaya 56:11

Amba, bɛte ngyea adifuu, na bɛnze ahoyire. Bɛte mmoaenneafoɛ bɔ nimdeɛ abɔ bɛ ɔ, bɛ mukoraa bali makyebu baafa bɛ bɔbɔ b’atee so, na bɛ nu biala ɔdwene ye ngome ye yeeyɛlɛ nwo.

Daniel 12:10

Bɛkɔte mmeni pee nwo bɛkɔyɛ bɛ nwo fitaa kɔma bɛ nwo kɔyɛ sannwuu; nakoso bɔnefoɛ de, bɔ ɔtte mayee yeɛ bɛkɔyɔ ɔ, na bɔnefoɛ nemɔ anu biala ngɔte ye bo; nakoso badwemmafoɛ de, bɛkɔte ye bo.

Hosea 14:9

Nwa yeɛ ɔse nworɛ bɔ ɔte edwirɛ hemɔ abo ɔ? Nwa yeɛ ye adwene nu pi bɔ ole bɛ nwo nimdeɛ ɔ? Ofikyɛ AWURADE atee tengyɛ, teneneefoɛ kɔfa so, nakoso mmeraatolɛfoɛ de, bekofi ase wɔ so.

Hosea 4:1

Yisraelfoɛ, ɛ́mɔtie AWURADE noa dwirɛ; ofikyɛ AWURADE ne aseɛ ne aso ama banya dwirɛ, ɔnate kyɛ nahorɛlilɛ, anwumvoinnwunɛ, ɔne Nyameɛ nwo nimdeɛ biala nne aseɛ ne aso.

Hosea 4:17

Efraim afa ye nwo wabɔ mmosoen, yiti po ye bra ma ye.

Hosea 5:4

Bɛ yɔleɛ mma bɛ ate mma benza bɛmma bɛ Nyameɛ berɛ; ofikyɛ gyanderabɔlɛ sunzum wɔ bɛ nu, na bɛnze AWURADE.

Amose 2:7

Bɛ yeɛ betiatia ehiafoɛ ti so bɛkã bɛ ti bewura nnɛterɛ nu, ná besisi mmenia bɔ bɛyɛ anwumvo ɔ; ebie ne ɔse bɛ ne afaneɛ ko bɛda bɛfa begua me dumaa krongron ne anwo fiɛ.

Amose 7:17

Yiti AWURADE nwa nyoo, ‘Ɛye kɔyɛ gyanderaniɛ wɔ kuro ne anu, na wɔ mma mmienzua ne wɔ mma mmrasua kɔtotɔ ngrandɛ noa, bɛkɔfa ɛwɛen bɛkɔto w’aseɛ nu bɛkɔhyɛ bɛkɔfa, ekowu wɔ aseɛ bɔ ye nwo agua fiɛ ɔ so, na amba, bɛkɔhye Yisrael nnure bekofi ye aseɛ so bɛkɔhɔ.’ ”

Numeri 25:3

Yisrael fale ye nwo wurale bosoen Baal Peɔ bo, yiti AWURADE fɛle Yisrael so yaa paa.

Yohane 8:43

Nzu ati yeɛ ɛmɔnde me dwirɛ bo ɔ? Ɔnate kyɛ ɛmɔngora bendie me dwirɛ.

Romanfoɛ 3:11

sona biala nne berɛ bɔ ole ndeaseɛ ɔ. Ebiala nne berɛ bɔ ɔpena Nyameɛ si atee ɔ.

1 Korintofoɛ 6:16

Gyamea ɛmɔnze kyɛ sona bɔ ɔkɔfa ye nwo kɔha adwamanbɔlɛniɛ ne, né ɔne ye bayɛ anwoɔnaen ko hɔ ɔ? Ofikyɛ Ahyerɛlɛ ne nwa, “Bɛ munyɔ bɛkɔyɛ anwoɔnaen ko.”

Ɛfesofoɛ 4:18

Bɛ de, awosii akata bɛ ndeaseɛ so, na ɔnate ndeaseɛ bɔ belle bie, ná bayɛ asoserɛ ne ati, ngoa bɔ Nyameɛ fa ma ne wabɔ bɛ.

Deuteronomi 23:17

“Nnɛma Yisrael brasua biala yɛ ye nwo asɔneyɛɛ so adwamanbɔlɛniɛ; yeɛ nnɛma Yisrael bienzua biala yɛ ye nwo asɔneyɛɛ so adwamanbɔlɛniɛ.

Hebrifoɛ 12:8

Nakoso sɛ Nyameɛ andea ɛmɔ kyɛbɔ ɔyɛ ye mma mukoraa ne a, né nzaade ɛmɔtte ye mma paapaa, na mmom ɛmɔte adwaman mmaa.