Hosea 2:20 - AHYERƐLƐ KRONGRON

²⁰ Ngɔbɔ wɔ asiwa ngɔma me nwo wɔ nahorɛlilɛ nu, na ekonwu AWURADE.

Hosea 2:20 Iomraidhean Croise

Gyenesise 9:10

na me ne abɔdeɛ biala bɔ ngoa wɔ ye nu bɔ ɔboka ɛmɔ so: nnomaa, nyɛmmoa, aseɛ so ngaka mukoraa bɔ bɛboka ɛmɔ so, ɔne ngaka mukoraa bɔ bɛ ne ɛmɔ fili ɛlɛen alaka ne anu befitele yeɛ yɛ́yɛ ɔ, mekyire aseɛ so ngaka mukoraa.

Yesaya 2:4

Okoli maen maen mɔ so, okosiesie mmenia pee b’afia, bɛkɔboro bɛ ngrandɛ bɛkɔfa bɛkɔbɔ kona, ná baboro bɛ pealɛɛ bafa babɔ asɔsɔaa. Maen bie ngɔhwe obiɛngo maen so ngrandɛ, na bengosua koɛhonɛ ko.

Yesaya 62:4

Bɛngɔfrɛ wɔ “Bɔ bapo ye ɔ” ko, yeɛ bɛngɔfrɛ w’aseɛ ne “Kurofoen” ko; na mmom bɛkɔfrɛ wɔ Hefesiba, yeɛ w’aseɛ ne koso bɛkɔfrɛ ye Bewela; ofikyɛ ɛla AWURADE ahone nwo, na okogya w’aseɛ ne.

Yeremia 24:7

Na ngɔma bɛ nimdeɛ bɔ ɔkɔmaa bekonwu me kyɛ me ole AWURADE ɔ. Bɛkɔyɛ me maen, ná me wora mayɛ bɛ Nyameɛ, ofikyɛ bɛkɔfa b’ahone amukoraa bekosa bɛkɔwa me berɛ.

Yeremia 30:10

“Yiti wɔ, me somvoɛ Yakob, nnɛsuro, AWURADE noa dwirɛ ɛne. Ao Yisrael, nnɛma wɔ kunu tete wɔ; ofikyɛ tie, ngɔpepɛ ngole wɔ ngofi dedeede, na wɔ boso ama mɔ, ngɔpepɛ ngole bɛ ngofi aseɛ bɔ bahye bɛ nnure bahɔ so ne aso. Yakob kosa kɔwa kɔɔtena asomdwee nu konn, na ebiala ngonwunanwuna ye.

Yeremia 32:41

Amba, ngoli bɛ nwo ahurusi kyɛ ngɔyɛ bɛ paa ɔ, na ngɔfa m’ahone amukoraa ne me kra amukoraa ngolua bɛ maa bɛ bo kotimu wɔ aseɛ he aso.

Yeremia 9:24

Na mmom ebiala bɔ ɔhoahoa ye nwo ne, odi kyɛ ɔhoahoa ye nwo kyɛ ole nimdeɛ, ná ɔse me kyɛ me ole AWURADE bɔ mefa ɔdɔ bɔ onni ngasi, ndɛenbualɛ turoloo ne nahorɛlilɛ yeɛ meyɛ me nningyein wɔ aseɛ ye aso ɔ. Na sɔ nningyein nemɔ yeɛ me nye gye bɛ nwo ɔ, AWURADE noa dwirɛ ɛne.”

Hesekiel 16:62

Ngɔmaa me ne wɔ y’apam ne kotindim, na ekonwu ye kyɛ me ole AWURADE;

Hesekiel 16:8

“Na mmerɛ bɔ mebaapɛ nu wɔ nwo berɛ bieku ná nwuni wɔ nen, tie, né adwu ehurolɛ mmerɛ so; na ndrɛtrɛle me tena nu mva ngatale wɔ nwo bɔ ɔla so ne, na me ne wɔ yɛyɛle apam bɔ mvale ndaen mvoale so ɔ, na ɛɛyɛle me deɛ, AWURADE Nyameɛ noa dwirɛ ɛne.

Hesekiel 34:25

“Me ne bɛ yɛkɔyɛ asomdwee apam, na ngotu ngaka aboyaa mɔ bo ngofi aseɛ ne aso, amaa ɔnate so batena ɛserɛ ne aso asomdwee nu, ná balela ɛhɔayeɛ nemɔ anu.

Hesekiel 34:27

Eburo mmakaa bekosu bɛ mma, yeɛ aseɛ kɔhye aleɛ, na bɛ so anu kɔtɔ bɛ wɔ b’aseɛ so. Na mmerɛ bɔ ngobubu bɛ kɔnnua nu, ná ngole bɛ ngofi bɛ bɔ bafa bɛ bayɛ nganga nemɔ bɛ sa nu ne, yeɛ bekonwu kyɛ me ole AWURADE ɔ.

Hesekiel 38:23

Yiti ngɔla me piri ne me krongronyɛlɛ ali. Na ngɔye me nwo ali ngɔma maen maen pee bekonwu me, na afei bekonwu kyɛ me ole AWURADE.

Hosea 13:4

Nakoso ofi Misraim aseɛ so, me ole AWURADE wɔ Nyameɛ; onni kyɛ ɛso nyameɛ biala, sana me, na defoɛ biala nne berɛ, sana me.

Hosea 2:19

Na ngɔbɔ wɔ asiwa ngɔma me nwo afebɔɔ; amba, ngɔbɔ wɔ asiwa ngɔma me nwo wɔ tenenee nu, pɛpɛɛpɛyɛlɛ nu, ɔdɔ ne anwumvoinnwunɛ nu.

Hosea 6:6

Ofikyɛ anwumvoinnwunɛ yeɛ mépena ɔ, na nna afɔleɛbɔlɛ ɔ; na Nyameɛ nwo nimdeɛ mmom yeɛ mekuro metra naen yeralɛ afɔleɛ mɔ ɔ.

Lewitikɔso 26:5

Ɛmɔkɔhɔ so bɛkɔboro aburoo alaa maa okoodwu mmerɛ bɔ ɛmɔte bobe ɔ, na ɛmɔkɔhɔ so bɛkɔte bobe alaa maa okoodwu mmerɛ bɔ ɛmɔdua aburoo ɔ. Ɛmɔkodidi maa ɛmɔ ko koyi, ná ɛmɔatena aseɛ ne aso asomdwee nu.

Lewitikɔso 26:6

Ngɔma maen ne konya asomdwee, na ɛmɔkɔla wɔ aberɛ bɔ ebiala ngonwunanwuna ɛmɔ ɔ; ngɔfoa ngaka bɔ bɛte awerɔm ɔ ngofi aseɛ ne aso, na koɛ biala ngɔhɔ so wɔ ɛmɔ aseɛ ne aso.

Mika 4:3

Okoli maen maen pee b’afia dwirɛ, na okohwi maen maen anwoserɛfoɛ bɔ bɛwɔ dedeede ɔ bɛ nyunu. Bɛkɔboro bɛ ngrandɛ bɛkɔfa bɛkɔbɔ kona, ná baboro bɛ pealɛɛ bafa babɔ asɔsɔaa. Maen bie ngɔhwe obiɛngo maen so ngrandɛ, yeɛ bengosua koɛhonɛ ko.

Sakaria 9:10

Ngonua teaseɛnam mɔ boso ngofi Efraim, ngonua mbɔngɔ boso ngofi Yerusalem, yeɛ ngonua koɛhonɛ agyaen boso. Ɔkɔhã asomdwee dwirɛ kohyire maen maen mɔ, ye ahennie kofi ɛpo kɔɔhã ɛpo, okofi asue ne kɔɔhã aseɛ noa dɔ.

Mateo 11:27

Me Baba afa nningyein amukoraa awura me sa; na ebiala nze Baa ne, sana Baba ne; yeɛ ebiala nze Baba ne, sana Baa ne ne ebiala bɔ Baa ne kuro kyɛ ɔda ye adi kyire ye ɔ.

Luka 10:22

“Me Baba afa nningyein amukoraa awura me sa; na ebiala nze kyɛbɔ Baa ne te ɔ, sana Baba ne. Yeɛ ebiala nze kyɛbɔ Baba ne te ɔ, sana Baa ne ne ebiala bɔ Baa ne kuro kyɛ ɔda ye adi kyire ye ɔ.”

Yohane 17:3

Na daa ngoa ne ɛhe: kyɛ bekonwu wɔ, nahorɛ Nyameɛ komapɛ ne, ɔne bɔ asoma ye ne, Yesu Kristo ne.

Yohane 8:55

Nakoso ɛmɔnze ye, na me de, mese ye. Na sɛ mekã kyɛ menze ye a, ngɔyɛ ngondomboniɛ kyɛ ɛmɔ ala. Nakoso mese ye, na medi ye dwirɛ so.

2 Korintofoɛ 4:6

Ofikyɛ Nyameɛ bɔ ɔmane kanea fili awosii nu tale ne, wata hyireinn wɔ y’ahone nu, kyɛ Nyameɛ animnyam nwo nimdeɛ kanea bɔ ɔwɔ Yesu Kristo nyunu ne.

Filipifoɛ 3:8

Amba, ɔnate m’Awurade Kristo Yesu nwo nimdeɛ mmorosoɛ ne ati, mebu nningyein amukoraa kyɛ bafi me sa. Ɔnate ye ti nningyein amukoraa afi me sa, nakoso mebu bɛ kyɛ fofoɛ so wura mbaen, amaa ɔnate so manya Kristo;

Kolosefoɛ 1:10

Na ɛhe kɔmaa ɛmɔkɔhora kɔbɔ bra bɔ ɔfata Awurade, ná ɔsɔ ye nye wɔ atee biala so. Na ɔkɔmaa ɛmɔkosu mmaa wɔ nnwumaa paa mukoraati nu, ná ɛmɔanyi Nyameɛ nimdeɛ nu.

2 Timoteo 1:12

Na ɔnate ɛhe ati yeɛ menwu amaneɛ hemɔ ye, nakoso ɔnyɛ me nya; ofikyɛ mese bɔ male ye mali ne, na mede medi kyɛ ɔkora ɔbɔ bɔ mafa mawura ye sa ne nwo waen maa okoodwu Kyẽa ne.

Hebrifoɛ 8:11

Na bɛ nu biala ngohyirehyire obiɛngo, anaa ɔngɔhã ngohyire oliɛma kyɛ ‘Nwu Awurade,’ ofikyɛ bɛ mukoraa, fite ngwadaa so kodwu mbanyi so bekonwu me.

1 Yohane 4:6

Yɛ de, yɛte Nyameɛ deɛ, na ebiala bɔ ɔse Nyameɛ ne, otie yɛ dwirɛ; nakoso bɔ ɔtte Nyameɛ deɛ ne de ondie yɛ dwirɛ. Na ɛhe yeɛ ɔmaa yɛnwu nahorɛ Sunzum ne ngondombo sunzum ɔ.

1 Yohane 5:20

Yɛsa yɛse kyɛ Nyameɛ Awa ne awa, na wabukye y’adwene nu maa yanwu nahorɛniɛ ne. Yɛne Ɔwa Yesu Kristo bɔ ɔte nahorɛniɛ ne atira abiɛngoɛ, na ye yeɛ ɔte nahorɛ Nyameɛ ne ɔne daa ngoa ne ɔ.