Hosea 14:3 - AHYERƐLƐ KRONGRON

³ Asiria ngɔpepɛ ngole yɛ, yɛngɔtenatena mbɔngɔ so, yeɛ yɛngɔhã ngohyire yɛ sa noa nnwumaa ko kyɛ, ‘Ɛmɔte yɛ nyameɛ mɔ’, ofikyɛ wɔ nu yeɛ ayisiaaniɛ onya anwumvoinnwunɛ ɔ.

Hosea 14:3 Iomraidhean Croise

2 Aberɛso Dwirɛ 16:7

Sɔ mmerɛ ne, Hanani bɔ ɔte sona bɔ ɔse ase ne, ɔhɔle Yuda hene Asa berɛ oosele ye kyɛ, “Ɔnate kyɛ afa wɔ nwo ato Siria hene so, na amva wɔ nwo ando AWURADE wɔ Nyameɛ so ne ati, ngonim bɔ ahaa ekoli ye wɔ Siria hene koɛhonɛfoɛ nemɔ aso ne, wabɔ wɔ.

Edwein 10:14

Nakoso enwu ye. Amba, wɔ nye tua amaneɛ ne aworabɔlɛ bɔ ɔba ɔ, maa yiti ɛkɔhwe ye so wɔ ye nwo. Sona bɔ ɔyɛ anwumvo ne, ɔfa ye nwo wura wɔ sa; wɔ yeɛ ɛte ayisiaaniɛ bokafoɛ ɔ.

Edwein 146:3

Nnɛma ɛmɔfa ɛmɔ wora bewura ahemvo mɔ nu, yeɛ nnɛma ɛmɔfa wora bewura adasa mmaa bɔ mmokalɛ biala mvi bɛ berɛ mma ɔ, bɛ nu.

Edwein 146:9

AWURADE yeɛ ɔbɔ ɛwɔfoɛ mɔ nwo waen ɔ; ɔnea nyisiaafoɛ ne akunafoɛ, nakoso bɔnefoɛ atee de, ɔmaa ɔyɛ basaa.

Edwein 33:17

Sɛ ɛfa wɔ nye to pɔngɔ so wɔ koɛ nu a, ɔte mbaen; ye anwoserɛ kandinga ne ngɔhora ngɔpepɛ ngole wɔ.

Edwein 68:5

Ayisiaafoɛ baba ne akunafoɛ neafoɛ, ye ole Nyameɛ bɔ ɔwɔ ye atenaleɛ krongron nu ne.

Yesaya 1:29

Na eluii mɔ bɔ ɛmɔsɔne bɛ, bɔ ɛmɔ nye gye ye nwo ne, sɔ nikyee ne kɔyɛ ɛmɔ nya; yeɛ ɔkɔyɛ ɛmɔ fɛre kyɛ ɛmɔaye turo mɔ basie berɛ bɛsɔne (ɛmɔ nyameɛ mɔ wɔ nu) ɔ.

Yesaya 2:20

Sɔ kyẽa ne, mmenia b’ɛdwetɛ amoen ne bɛ sikaa kɔkorɛ amoen bɔ bayɔ bama bɛ nwo, bɔ bɛsɔne bɛ ne, bekogyi bekogua bɛkɔma mmurokuruwa ne mbena.

Yesaya 27:9

Yiti ɔnate ɛhe aso, okokyikyi Yakob amumuyɛɛ kofi berɛ, na ye bɔne bɔ baye bafi berɛ ne, so mmaa mukoraa bɔ okosu ɛhe: Okobubu afɔleɛ bokyea nyɔboɛ ne amukoraa, okofurofuro bɛ koti bɛ muhumuhu kyɛ nnɛterɛ, bɔ Asera dosii ne ɛyɛɛ bokyea biala ngogyinagyina berɛ ko ɔ.

Yesaya 30:16

na mmom ɛmɔhane kyɛ, “Daabi, yɛkɔtena mbɔngɔ so yɛkɔnwati yɛkɔhɔ.” Amba, ɛnwatilɛ ala yeɛ ɛmɔkɔnwati ɔ! (Ɛmɔnwa:) “Mbɔngɔ bɔ bɛ nwo yɛ nyera ɔ yeɛ yɛkɔtena so yɛkɔhɔ ɔ.” Na ɔnate sɔ ati, bɛ bɔ bɛfoa ɛmɔ ne, bɛ nwo kɔyɛ nyera.

Yesaya 30:2

Besi nu bɛkɔ Misraim bɔ bemmisa me bennwu m’adwene ɔ, kyɛ bɛkɔ Faro berɛ maa ɔbɔ bɛ nwo waen, kyɛ bɛkwaapena Misraim fɔnwoo nu bewura.

Yesaya 31:1

Bɛ yaakɔ, bɛ bɔ bɛkɔ Misraim bɛkɔpena mmokalɛ, bɔ bɛfa bɛ nye bɛto mbɔngɔ so, bɔ ɔnate teaseɛnam mɔ bɛ somaa ti bɛfa bɛ wora bewura bɛ nu, bɔ ɔnate pɔngɔhanɛfoɛ mɔ b’anwoserɛ ti bɛfa bɛ wora bewura bɛ nu, nakoso bɛmva bɛ nwo bɛndo Yisrael Krongronniɛ ne so ɔ, anaakyɛ bɛmbena AWURADE si atee ɔ.

Yesaya 31:3

Misraimfoɛ bɛte mmenia oo, na bɛtte Nyameɛ; bɛ mbɔngɔ nemɔ bɛte anwoɔnaen, na bɛtte sunzum. Sɛ AWURADE tengyɛ ye sa a, bokafoɛ ne kosoti, yeɛ bɔ bokafoɛ ne boka ye ne koso, okofi ase, na bɛ mukoraa bekowu bɛkɔbɔ nu.

Yesaya 36:8

Yiti bra ná ɛne me mene Asiria hene bɛyɛ nhyehyɛleɛ. Sɛ ekonya mbɔngɔ mɔ nwo pɔngɔhanɛfoɛ a, ahaa ngɔma wɔ mbɔngɔ apee nyɔ.

Yeremia 49:11

Yakyi wɔ nyisiaa nemɔ berɛ, na ngɔmaa bɛkɔtena ngoa nu; na odi kyɛ wɔ kunafoɛ nemɔ, bɛfa bɛ wora bewura me nu.”

Hesekiel 36:25

Ngɔfa nzue gyengɔgyengɔ ngɔpete ɛmɔ nwo, na ɛmɔ nwo kɔte kofi ɛmɔ nwo bɔ ɔnde ne amukoraa nwo, na ngɔte ɛmɔ nwo ngofi ɛmɔ mmosoen amukoraa nwo.

Hesekiel 37:23

Bɛngɔfa bɛ mmosoen ne b’akyiwadeɛ nningyein anaa bɛ mmeraatolɛ biala bengogua bɛ nwo fiɛ ko. Na mmom ngɔpepɛ ngole bɛ ngofi bɛ makyebu amukoraa bɔ bali bafa bayɛ bɔne ne anwo; ngɔte bɛ nwo, na bɛkɔyɛ me maen, ná me wora mayɛ bɛ Nyameɛ.

Hosea 12:1

Efraim li mvrama si, na ogu eyia afiteleɛ mvrama so daa biala. Ɔma ye anoanupɛlɛ ne basabasayɔlɛ ɔkɔ so yɛ pee, bɛ ne Asiria bɛyɛ apam, na bɛsoa ngoo bɛkɔ Misraim.

Hosea 13:2

Afei de, bɛkɔ so bɛyɔ bɔne, na behuro bɛ dwetɛ bɛfa bɛyɔ amoen bɛma bɛ nwo, amoen mɔ bɔ bɛ bɔbɔ bafa ɛdwetɛ bali adwii bayɔ, bɔ ye mukoraa te dwumvoɛ sa noa adwuma ɔ. Bɛkã bɛfa bɛ nwo kyɛ, “Bɛ bɔ bɛbɔ afɔleɛ ne, odi kyɛ bɛfe nandwie nyii akrɔngrɔma nemɔ noa.”

Hosea 14:8

Ao Efraim, nzikyɛ yeɛ me ne mmosoen yɛle ye yɛyɔ bieku ɔ? Me yeɛ mema ye mmuayɛɛ, ná menea ye so ɔ; nde kyɛ ɛframmire monɛ bɔ ye nyaa mboro ɔ, na me so yeɛ enya wɔ mmakaammaa ɔ.

Hosea 2:17

Ofikyɛ ngɔye Baal mɔ dumaa ngofi ye noa nu, na bɛngɔbɔ bɛ dumaa bɛngɔkaye bɛ ko.

Hosea 4:12

Me maen kɔ bɛ mmakaa berɛ abisa, na bɛ pɔmaa yeɛ ɔye bɛ musue ɔ, ofikyɛ gyanderabɔlɛ sunzum amaa bali makyebu, na bafi bɛ Nyameɛ nwo baabɔ gyandera.

Hosea 5:13

Mmerɛ bɔ Efraim nwuni ye anwonyerɛ, ná Yuda nwuni ye kena ne yeɛ Efraim hɔle Asiria ɔ, na ɔsomane maa bɛhɔle Nana Yarebo berɛ. Nakoso wangora wanza ɛmɔ anwonyerɛ, yeɛ wangora wamma ɛmɔ kena ne wangɔ.

Hosea 7:11

Efraim te kyɛ abubure kwaseaa bɔ olle adwene ɔ; bɛpena mmokalɛ befi Misraim berɛ, yeɛ bɛkɔ Asiria berɛ.

Hosea 8:6

Ofikyɛ ye koso ofi Yisrael: dwumvoɛ yeɛ ɔyɔle ɔ, yiti nna Nyameɛ ɔ. Samaria nandwie ba ne, bekobubu ye nu pasapasa.

Hosea 8:9

Ofikyɛ baapena mmokalɛ wɔ Asiria, eburo afunum bɔ ye ngome okyinikyini ɔ. Efraim abɔ bɛ bɔ bekuro ye ɔ mɔ paa.

Yona 2:10

Yeɛ AWURADE dwudwo hyirele tiré ne, na ɔɔfele Yona tole etii so.

Sakaria 13:2

“Sɔ kyẽa ne, ngonunu mmosoen dumaa boso ngofi aseɛ ne aso, bɔ ɔnate so bɛngɔkaye bɛ ko ɔ; yeɛ ngotu ngɔmhyɛlɛfoɛ ne sunzum tɛɛ bo ngofi aseɛ ne aso, Asafo AWURADE noa dwirɛ ɛne.

Yohane 14:18

“Mengɔyakyi ɛmɔ nyisiaafoɛ, ngɔwa ɛmɔ berɛ.

Deuteronomi 17:16

Nakoso sona bɔ okoli hene ne de, ɔnzɛ kyɛ ɔma ye mbɔngɔ mɔ sone pee, yeɛ ɔnzɛ kyɛ ɔma mmenia ne sá kɔ Misraim kyɛ ɔkwaapena mbɔngɔ pee, ofikyɛ AWURADE aha ahyire ɛmɔ kyɛ, ‘Ɔnzɛ kyɛ ɛmɔsa bɛ si bɛfa sɔ atee ne aso ko.’