Hosea 14:2 - AHYERƐLƐ KRONGRON

² Ɛ́mɔpena edwirɛ mɔ bɔ ɛmɔkɔhã ɔ, ná ɛ́mɔsa bɛbra AWURADE berɛ; ɛmɔhã behyire ye kyɛ, “Kyikyi amumuyɛɛ amukoraa; nwu yɛ anwumvoin de yɛ, na yɛkɔfa yɛ noa dwirɛ yɛkɔyɛ nandwie nyii yɛkɔbɔ afɔleɛ yɛkɔma wɔ.”

Hosea 14:2 Iomraidhean Croise

2 Samuel 12:13

Yeɛ Dawide sele Natan kyɛ, “Yieee! Mayɔ bɔne matia AWURADE.” Na Natan buale Dawide kyɛ, “AWURADE afa wɔ bɔne wahyɛ wɔ, engowu.

2 Samuel 24:10

Dawide maa bɛhale mmenia ne beyiele nen, nziɛ ye, ye tiboa buale ye fɔ. Na Dawide fa tole AWURADE nyunu kyɛ, “Bɔ mayɔ ye, mayɔ bɔne paa. Nakoso AWURADE, mesrɛ wɔ ala, fa w’akoaa amumuyɛɛ kyɛ ye, ofikyɛ mali ngwaseasɛm paa.”

YOB NWOMAA NE 7:21

Me mmeraatolɛ ne, nzu ati yeɛ ɛmva ngyɛ me ɔ? M’amumuyɛɛ ne, nzu ati yeɛ ɛnyakyi ma ɔnga ɔ? Ɔngɔhyɛ biala, ngɔɔla nnɛterɛ nu, ɛkɔpena me, nakoso né nne berɛ ko.”

Edwein 119:108

Ao AWURADE, de m’ayɛyelɛ afɔleɛ ne to nu, ná kyirekyire me wɔ nhyehyɛleɛ ne.

Edwein 50:14

Fa asennaa yɛ afɔleɛ bɔ ma AWURADE, ná tua w’aboadeɛ ma Anwuro Anwuroniɛ ne.

Edwein 51:16

Ofikyɛ nna afɔleɛ yeɛ wɔ nye gye ye nwo ɔ. Sɛ mebɔ naen yeralɛ afɔleɛ a, wɔ nye ngɔgye ye nwo.

Edwein 51:17

Afɔleɛ bɔ Nyameɛ nye gye ye nwo ole ahone bɔ wabrɛ ye nwo ase ɔ; ao Nyameɛ, ahone bɔ wabrɛ ye nwo ase, ná ye wora abɔ de, ɛngɔpo.

Yesaya 44:22

Makyikyi wɔ mmeraatolɛ ne mafi berɛ kyɛ munungum kabii, ɔne wɔ bɔne mafi berɛ kyɛ munungum. Sa bra me berɛ, ofikyɛ maapɔ wɔ male wɔ.

Yesaya 6:7

Ɔfa hane me noa, na osele kyɛ, “Tie, sɔ nikyee ye ahã wɔ noa; baye w’amumuyɛɛ ne bafi wɔ so, na bate wɔ nwo bafi wɔ bɔne nwo.”

Yeremia 3:12

Kɔ sorɔ dɔ, ná kɔbɔ sɔ dwirɛ ne dawure kyɛ, ‘AWURADE nwa nyoo: Sa bra, asoserɛniɛ Yisrael. Mengɔfɛ wɔ so yaa, ofikyɛ mese anwumvoin, yiti mengɔfɛ yaa afebɔɔ, AWURADE noa dwirɛ ɛne.

Hosea 12:7

Kanaan tira ngondombo tonyi, na okuro aminɛlilɛ.

Hosea 5:5

Yisrael anwomasoɛ di adanzeɛ tia ye. Yiti Yisrael ne Efraim bekosoti wɔ b’amumuyɛɛ nu; Yuda koso ɔne bɛ yeɛ bekosoti ɔ.

Hosea 6:6

Ofikyɛ anwumvoinnwunɛ yeɛ mépena ɔ, na nna afɔleɛbɔlɛ ɔ; na Nyameɛ nwo nimdeɛ mmom yeɛ mekuro metra naen yeralɛ afɔleɛ mɔ ɔ.

Yoel 2:17

Asɔfo nemɔ, bɔ bɛ yeɛ bɛte AWURADE somvoɛ mɔ ne, odi kyɛ besu wɔ abrannaa ne, ɔne afɔleɛ bokyea ne b’afia, ná bɛkã kyɛ, “Ao AWURADE, nwu wɔ maen anwumvoin, nnɛma w’agyapadeɛ yɛ nikyee bɔ bebu ye animtia, maen maen mɔ noa nu ngorohoɛ dwirɛ. Nzu ati yeɛ bɛkekã ye wɔ maen maen mɔ nu kyɛ, ‘Bɛ Nyameɛ ne, ɔwɔ nisua?’ ɔ.”

Yona 2:9

Nakoso ngɔfa asennaa komviɛ ngɔbɔ afɔleɛ ngɔma wɔ. Ngotua m’aboadeɛ bɔ maboa ne. AWURADE berɛ yeɛ ngoalelɛ fi ɔ!”

Sakaria 3:4

Na abɔfo ne sele bɛ bɔ begyigyi ye nyunu berɛ ne kyɛ, “Ɛ́mɔpuropuro ye nwo ndaadeɛ fiɛ ne!” Na afei osele Yosua kyɛ, “Tie, maprapra w’amumuyɛɛ ne mafi wɔ so, na ngɔfa ndaadeɛ nyemenenyemene ngowura wɔ.”

Mateo 7:11

Na ɛmɔ po bɔ ɛmɔte bɔnefoɛ ɔ, sɛ ɛmɔse kyɛbɔ ɛmɔma ɛmɔ mma mɔ nningyein paa a, nzaade ɛmɔ Baba bɔ ɔwɔ nyameɛso ne, ɔkɔyɛ sɛɛ bɔ ɔngɔfa nningyein paa ngɔma bɛ bɔ bebisa ye ɔ?

Luka 11:13

Na sɛ ɛmɔ po bɔ ɛmɔte bɔnefoɛ ɔ ɛmɔse kyɛbɔ ɛmɔma ɛmɔ mma mɔ nningyein paa a, ɔkɔyɛ sɛɛ bɔ ɛmɔ Baba bɔ ɔwɔ nyameɛso ne ɔngɔfa Sunzum Krongron ngɔma bɛ bɔ bebisa ye ɔ?”

Luka 18:13

“Nakoso ɛtoɔdidelɛniɛ ne de, oogyinane nziɛ nziɛ, na wanguro kyɛ ɔkɔma ye nye so kɔnea nyameɛso po ɔ, na mmom ɔfale ye sa guale ye ahone so hane kyɛ, ‘O Nyameɛ, nde bɔnefoɛ, na nwu me anwumvoin!’

Yohane 1:29

Aleɛ hyene ne, Yohane nwuni Yesu kyɛ ɔba ye berɛ ɔ, na ɔhane kyɛ, “Ɛ́mɔnea, Nyameɛ Boaen Ba ne, bɔ ɔye wiase bɔne fi berɛ ne!

Romanfoɛ 11:27

Na apam bɔ me ne bɛ yɛkɔyɛ hɔ ɛne, mmerɛ bɔ ngɔye bɛ bɔne ngofi berɛ ne.”

2 Timoteo 1:9

Ye yeɛ oolele yɛ ná ɔfale ɛfrɛlɛ krongron frɛle yɛ ɔ, nna kyɛ yɛ nnwumaa ti ɔ; na mmom kyɛbɔ ye bɔbɔ ye nhyehyɛleɛ ne adom bɔ wafa walo yɛ wɔ Kristo Yesu nu fi tetetete ne ɔte ne.

Tito 2:14

Ye yeɛ ɔfale ye ngoa tole berɛ mane yɛ ɔ, kyɛbɔ okole yɛ kofi amumuyɛɛ amukoraa nu, ná wate yɛ nwo wafa yɛ wayɛ ye bɔbɔ ye mmenia sonongo bɔ bɛbɔ nnwumaa paa nwo mmɔden ɔ.

Hebrifoɛ 10:4

ofikyɛ nandwie nyii mogya ne mbɔngye mogya ngora ngyikyi bɔne.

Hebrifoɛ 13:15

Yiti mmerɛ biala ɛ́mɔma yɛ́fa ayɛyelɛ yɛyɛ afɔleɛ yɛfa Yesu so yɛma Nyameɛ, na ɛhe te yɛ noa afɔleɛ bɔ yɛfa yɛhyɛ ye dumaa animnyam ɔ.

1 Petro 2:5

na ɛmɔ koso, ɛmɔte kyɛ ngoa nyɔboɛ mɔ, na ɛ́mɔma bɛ́fa ɛmɔ bési sunzum nu sua ma ɛmɔyɛ asɔfokure krongron, amaa ɛmɔafa Yesu Kristo so babɔ sunzum nu afɔleɛ bɔ ɔsɔ Nyameɛ nye ɔ.

1 Petro 2:9

Nakoso ɛmɔ de, ɛmɔte mmenia bɔ baneanea nu baye ɛmɔ ɔ, nnehyeɛ asɔfokure, maen krongron, maen bɔ wafa ye wayɛ ye deɛ ɔ, kyɛ ɛmɔɔbɔ bɔ ɔfrɛle ɛmɔ fili awosii nu wale ye kanea bɔ ɔyɛ nwanwa ne anu ne, ye ayɛyelɛ ne dawure.

1 Yohane 1:7

Nakoso sɛ yɛnate kanea nu, kyɛbɔ ye koso ɔwɔ kanea nu ne a, né yɛ ne yɛ nwo yɛ nwo yatira abiɛngoɛ, na Ɔwa Yesu Kristo mogya ne te yɛ nwo fi bɔne mukoraa nu.

1 Yohane 3:5

Ɛmɔse kyɛ ɔwale kyɛ ɔbaasoa yɛ bɔne kɔ; na ye de bɔne nne ye nwo.