Hosea 12:6 - AHYERƐLƐ KRONGRON

⁶ “Yiti sa kɔ wɔ Nyameɛ berɛ, sɔ ɔdɔ ne pɛpɛɛpɛyɛlɛ nu yé, ná fa wɔ wora wura Nyameɛ nu daa.”

Hosea 12:6 Iomraidhean Croise

Gyenesise 49:18

Ao AWURADE, wɔ ngoalelɛ yeɛ menea ye ate ɔ.

Edwein 123:2

Amba, kyɛbɔ ngoaa bɛ nye la bɔ bɛ mene ɔfa ma bɛ so, ɔne kyɛbɔ afaneɛ ye nye la bɔ ye mene brasua ɔfa ma ye so ne, sɔ ala yeɛ yɛ nye la AWURADE yɛ Nyameɛ so ɔ, kɔpem kyɛ okonwu yɛ anwumvoin ɔ.

Edwein 27:14

Ma wɔ nye ɔla AWURADE so, gyina pindinn ná ma wɔ hue yɛ se; nahorɛ nu, ma wɔ nye ɔla AWURADE so!

Edwein 37:7

Yɛ konn wɔ AWURADE nyunu, ná to wɔ bo ase nwondɛ ye. Sona bɔ ɔnate ye bɔbɔ ye atee so onya ye nwo, yeɛ sona bɔ ɔdwene nikyee tɛɛ nwo, ná ɔyɔ ne, nnɛma ye nwo adwenedwene tɔ wɔ so.

Ɛksadɔso 3:15

Nyameɛ sa sele Mose kyɛ, “Kã kyire Yisraelfoɛ kyɛ, ‘AWURADE ɛmɔ nana mɔ Nyameɛ ne, Abraham Nyameɛ ne, Yisake Nyameɛ ne, Yakob Nyameɛ ne yeɛ wasoma me ɛmɔ berɛ ɔ.’ Me dumaa bɔ ɔwɔ berɛ afebɔɔ hɔ ɛne, na ɛhe yeɛ aworɛ ndoatoasoɛ mukoraa bɛkɔfa bɛkɔfrɛ me ɔ.

Anyandera 1:23

Metwi ɛmɔ nyunu a, ɔsɛ kyɛ ɛmɔtie, ngɔhã m’ahone nu dwirɛ ngohyire ɛmɔ, na ngɔmaa ɛmɔkonwu me ti anu dwirɛ.

Anyandera 21:3

Tenenee bra ne pɛpɛɛpɛyɛlɛ, ɔsɔ AWURADE nye tra afɔleɛbɔlɛ.

Yesaya 1:16

Ɛ́mɔnwunzi ɛmɔ nwo, ɛ́mɔpete ɛmɔ nwo, ɛ́mɔye ɛmɔ bɔne yɔleɛ ne béfi me nye so, ɛ́mɔyakyi bɔne yɔlɛ.

Yesaya 30:18

Ye sɔ ne ati, AWURADE ɔnwondɛ kyɛ ɔkɔlo ɛmɔ ɔ, na waboaboa ye nwo kyɛ okonwu ɛmɔ anwumvoin ɔ, ofikyɛ AWURADE te pɛpɛɛpɛyɛlɛ Nyameɛ, na ebiala bɔ ɔfa ye wora wura ye nu ne, onya saleɛ.

Yesaya 31:6

O Yisraelfoɛ, ɛmɔsa bɛbra bɔ ɛmɔayɛ ye nwo lɔen piri paa ne berɛ.

Yesaya 40:31

nakoso bɛ bɔ bɛnwondɛ AWURADE ne de, bekonya anwoserɛ foforɛ; bɛkɔfa ndaa bekotu kyɛ kɔleɛ, bekotu amirika, na bɛngɔfɛ, bɛkɔnate, na bɛ nwo ngɔyɛ bɛ bɛtɛɛ.

Yesaya 58:6

“Aso nna akɔngyere he yeɛ ɔsɔ me nye ɔ: kyɛ ɛmɔkɔsangye nzɛmmɔne ngɔnzɔngɔnzɔ, kyɛ ɛmɔkɔsangye mmenia kɔnnua nyamaa, kyɛ ɛmɔkɔma bɛ bɔ ɛmɔhyɛ bɛ so ɔ bekonya bɛ fawɔnwodi, ɔne kyɛ ɛmɔkobubu kɔnnua biala ɔ?

Yesaya 8:17

AWURADE bɔ waye ye nye wato buro wafea Yakob boso ama ne, ngɔfa me wora ngowura ye nu, ngɔpena ye si atee.

Yeremia 22:15

Sida bɔ afa ayɛ wɔ nwo buru ne nnu ne ati, ɛdwene kyɛ ɛte hene anaa? Aso wɔ baba wannidi wanno? Aso wammua ndɛen turoloo wammɔ bra bɔ ɔtengyɛ ɔ? Na ye sɔ ti, oyiele ye yé.

Hesekiel 18:30

“Yiti Yisrael awuro ama, ngobua ɛmɔ nu biala ye atee bɔ ɔnate so ɔ nwo ndɛen, AWURADE Nyameɛ noa dwirɛ ɛne. Ɛ́mɔsakyera ɛmɔ adwene, ná ɛmɔhwe ɛmɔ nwo béfi ɛmɔ mmeraatolɛ amukoraa nwo, ná amumuyɛɛ wanyɛ ɛmɔ so sundidua.

Hosea 10:12

Ɛmɔlua tenenee bɛ́ma ɛmɔ nwo, ɛ́mɔbu ye wɔ anwumvoinnwunɛ nu, ɛ́mɔso ɛmɔ hɔayeɛ too ne. Ofikyɛ mmerɛ aso kyɛ ɛmɔpena AWURADE si atee ɔ, kɔpem kyɛ ɔkɔwa kɔɔtɔ tenenee nzue kogua ɛmɔ so ɔ.

Hosea 14:1

Ao Yisrael, sa bra AWURADE wɔ Nyameɛ berɛ, ofikyɛ w’amumuyɛɛ amaa afi ase.

Hosea 4:1

Yisraelfoɛ, ɛ́mɔtie AWURADE noa dwirɛ; ofikyɛ AWURADE ne aseɛ ne aso ama banya dwirɛ, ɔnate kyɛ nahorɛlilɛ, anwumvoinnwunɛ, ɔne Nyameɛ nwo nimdeɛ biala nne aseɛ ne aso.

Yoel 2:12

“Na afei, odi kyɛ ɛmɔfa ɛmɔ ahone amukoraa ne akɔngyere ne esuɛ ne aworabɔlɛlilɛ besa bɛba me berɛ,” AWURADE noa dwirɛ ɛne.

Yoel 2:13

Ɛ́mɔsunzua ɛmɔ ahone nu, na nna ɛmɔ ndaadeɛ nu ɔ, ná ɛ́mɔsa bɛbra AWURADE ɛmɔ Nyameɛ berɛ. Ofikyɛ ɔdo mmenia na ɔse anwumvoin; ye ahone nhu ndɛ, ye ɔdɔ bɔ onni ngasi ne ɔsone, na ɔsesã ye adwene ɔtwe bɔne nwo asohwenɛ sa.

Amose 4:13

Ofikyɛ tie, bɔ ɔhyehyɛle mmokaa mɔ, ná ɔbɔle mvrama ne, ye bɔ ɔye ye ti anu adwene kyire adasa mmaa, ɔma ngyerɛmɔ kakyi awosii, ná otiatia aseɛ ye aso asɔneyɛɛ mɔ so ne, ye dumaa ole AWURADE, Asafo Nyameɛ.

Amose 5:24

Na mmom odi kyɛ ɛmɔma ndɛenbualɛ turoloo tengyɛ kyɛ asue, ná tenenee ɔsẽ kyɛ asue piri.

Mika 6:8

Ao kuro sona, wala bɔ ɔte paa ɔ ali wahyire wɔ, nzikyɛ yeɛ AWURADE pena fi wɔ berɛ ɔ? Bɔ ɔpena ala ole kyɛ ɛkɔyɔ bɔ ɔtengyɛ, ekonwu anwumvoin, ɔne kyɛ ɛne wɔ Nyameɛ bɛkɔnate anwobrɛaseɛ nu ɔ.

Mika 7:7

Yiti me de, AWURADE yeɛ me nye la ye so ɔ; ngɔfa me wora ngowura me ngoalelɛ Nyameɛ nu; me Nyameɛ kotie me.

Habakuku 2:3

Ofikyɛ nyekyire ne, ɔ́nwondɛ mmerɛ bɔ bahyehyɛ bato berɛ bama ye ɔ; ɔpe ndɛen kyɛ ɔkɔwa nu ɔ, na ɔngɔyɛ ngyɛkyerɛ. Sɛ ɔyɛ ngyɛkyerɛ po a, nwondɛ; ofikyɛ ɔkɔwa nu amba, ɔngɔyɛ ngyɛkyerɛ.

Sefania 3:8

“Yiti odi kyɛ ɛmɔnea me ate maa okodwu kyẽa bɔ ngodwɔso ngɔɔbɔ kwaadu ne, ofikyɛ ɔte me nhyehyɛleɛ kyɛ ngɔboaboa maen maen mɔ noa, kyɛ ngɔboaboa ahennie mɔ noa, ná ngɔma me yaafɛlɛ ne m’ahonehulɛ amukoraa kɔwa bɛ so ɔ; ofikyɛ me nungunɛ see ne, ɔkɔyera aseɛ amukoraa motoo,” AWURADE noa dwirɛ ɛne.

Sakaria 1:3

Yiti se bɛ kyɛ, Asafo AWURADE nwa nyoo: Ɛmɔsa bɛbra me berɛ, Asafo AWURADE noa dwirɛ ɛne, na me koso ngosa ngɔwa ɛmɔ berɛ, Asafo AWURADE noa dwirɛ ɛne.

Sakaria 7:9

“Asafo AWURADE nwa nyoo: Ɛ́mɔbua ndɛen turoloo, ná ebiala ɔla anwumvoinnwunɛ ne adɔeɛ ali ohyire obiɛngo;

Sakaria 8:16

Ɛhemɔ yeɛ odi kyɛ ɛmɔyɔ ɔ: Odi kyɛ ebiala kã nahorɛ kyire obiɛngo; nekaa bɔ ɛmɔdi dwirɛ ne, odi kyɛ ɛmɔbua ndɛen turoloo bɔ ɔfa asomdwee ba ɔ;

Asomafoɛ 2:38

Na Petro buale bɛ kyɛ, “Ɛ́mɔsakyera ɛmɔ adwene ná ɛ́mɔma bɛbɔ ɛmɔ nu biala asu wɔ Yesu Kristo dumaa nu, ma ɛ́mɔnya bɔnefakyɛ; na ɛmɔkonya Sunzum Krongron akyɛdeɛ ne.

Asomafoɛ 26:20

Na nnili moa ngane edwirɛ ne wɔ Damasko, afei Yerusalem, ɔne Yudea maen ne anu mukoraa, ɔne Amaenmaensofoɛ nu; kyɛ bɛsakyera b’adwene bɛbra Nyameɛ berɛ na bɛbɔ bra bɔ okyire kyɛ basakyera b’adwene ɔ.

Yakobo 1:27

Nyameɛsom bɔ ye nwo te bɔ efiɛ nne ye nwo wɔ Baba Nyameɛ nyunu ɛhe: kyɛ ɛkɔɔnea nyisiaa ne akunafoɛ wɔ b’amaneɛnwunɛ nu, ɔne kyɛ ɛkɔhwe wɔ nwo kofi wiase bra basabasa nu ɔ.

Yakobo 2:13

Ofikyɛ anwumvoinnwunɛ nne ndɛenbualɛ nu mma bɔ wannwu anwumvoin ɔ; na anwumvoinnwunɛ hoahoa ye nwo di ndɛenbualɛ so ngonim.