Hesekiel 9:2 - AHYERƐLƐ KRONGRON

² Na nwuni mmienzua nzia bie; befili anwuro dɔ anoa piri bɔ ye nye kyire sorɔ dɔ atee ne aso ne anu bɛwale. Né bɛ nu biala tira ye kodiawu akodeɛ; né biaa bie bɔ ɔhera nwera ɔ ɔboka bɛ so, na né wafa nikyee bɔ bɛfa bɛkyerɛ ɔ wasĩ. Na bewurale nu beegyinane kɔɔbere afɔleɛ bokyea ne anwo berɛ.

Hesekiel 9:2 Iomraidhean Croise

2 Ahemvo 15:35

Nakoso asɔneyɛɛ nemɔ de wanzɛkye bɛ, na maen ne hɔle so bɛbɔle afɔleɛ bɛyerale ɛyɛɛ wɔ asɔneyɛɛ nemɔ aso. Pambim bɔ ɔwɔ AWURADE awuro ne sorɔ dɔ ne, osili.

2 Aberɛso Dwirɛ 27:3

Yotam sili AWURADE awuro berɛ sorɔ dɔ pambim ne, na fasue bɔ ɔwɔ Ofel bokaa ne aso ne, ɔtoale so.

2 Aberɛso Dwirɛ 4:1

Ɔyɔle kɔɔbere afɔleɛ bokyea bɔ ye tendenn te agyirɛ aburanyɔ, ye tɛtrɛtɛɛ te agyirɛ aburanyɔ, yeɛ ofi ye aseɛnwo bɔ ɔkwaadwu ye anwuro ne, ɔte agyirɛ buru ɔ.

Ɛksadɔso 40:29

Naen yeralɛ afɔleɛ bokyea ne, ɔfa siele nyianu ɛtena sua anoa nu berɛ, na ɔbɔle naen yeralɛ afɔleɛ ne aleɛ afɔleɛ wɔ so, kyɛbɔ AWURADE hyɛle ye (Mose) nen.

Yeremia 1:15

Ofikyɛ, tie, ngɔto me sa ngɔfrɛ sorɔ dɔ ahennie nemɔ bɛ mmusua ne amukoraa, AWURADE noa dwirɛ ɛne. Bɛkɔwa, na ebiala kɔfa ye ahennie bia koosie Yerusalem pambim ne noa, ɔne ye fasue ne amukoraa nwo kɔbra koyia, ɔne Yuda nguro amukoraa nwo.

Yeremia 25:9

yiti ɛ́mɔtie, ngɔsoma maa bɛkɔɔfa sorɔ dɔ mmusua amukoraa ne me somvoɛ Babilɔn hene Nebukadenesa bɛkɔwa, AWURADE noa dwirɛ ɛne, na ngɔfa bɛ ngɔwa maa bɛkɔho bekotia maen he, ɔne so ama, ɔne maen hemɔ amukoraa bɔ bapɛ ye nwo bayia ɔ. Ngohũhũ bɛ pasaa, ná mamaa bayɛ anwodwiri nikye, maen bɔ mmenia sobi bɛ noa gua bɛ so ɔ, ɔne kurofoen afebɔɔ.

Yeremia 26:10

Na Yuda mbanyi tele sɔ dwirɛ nemɔ nen, befili ahemvie berɛ bɛwale AWURADE awuro berɛ, na bɛtenatenane AWURADE awuro Anoa Foforɛ ne anu berɛ.

Yeremia 4:6

Ɛ́mɔfa frangaa bɛ́pena berɛ ma ye nye hyire Sion. Ɛ́mɔnwati bɛɛbɔ ɛmɔ nwo adwaa, nnɛma ɛmɔgyina berɛ, ofikyɛ mebaafa musue ne amaneɛ kandinga paa mefi sorɔ dɔ meba.

Hesekiel 10:2

Na osele biaa bɔ ɔhera nwera ne kyɛ, “Kango mɔ bɔ bɛwɔ kɛrubim nemɔ abo ne, kɔworo b’afia; fura see gonn bɔ ɔwɔ kɛrubim nemɔ b’afia ne, ná to pete kuro ne aso.” Na ɔworole nu bɔ me nye tua ɔ.

Hesekiel 8:3

Ɔtengyɛle nikyee bie bɔ ye sue te asaa ɔ, ɔfa sɔle me ti nwiaa nu, na Sunzum ne mane me so hɔle anwuro ne ase b’afia, na ɔfale me wale Yerusalem wɔ nyekyire bɔ ofi Nyameɛ berɛ ɔ nu. Ɔfale me wale asɔneyɛɛ sua ne akunu dɔ anoa piri bɔ ye nye kyire sorɔ dɔ ne anyunu berɛ, nekaa bɔ nungunɛhwenɛ amoen bɔ ɔtwetwe nungunɛ ba ne ogyi ne.

Hesekiel 9:11

Na yieee, biaa bɔ ɔhera nwera, bɔ nikyee bɔ bɛfa bɛkyerɛ ɔ osĩ ye ne, ɔwale ɔɔhane kyɛ, “Mayɔ kyɛbɔ ɛhyɛle me kyɛ nyɔ ne ala.”

Hesekiel 9:3

Na Yisrael Nyameɛ animnyam ne fili kɛrubim bɔ ɔwɔ so ne aso wale asɔneyɛɛ sua anoa ne anyunu berɛ, na ɔfrɛle biaa bɔ ɔhera nwera, bɔ wafa nikyee bɔ bɛfa bɛkyerɛ ɔ wasĩ ne.

Daniel 10:5

Ndole me nye anwuro nneane, na nwuni biaa bie bɔ ɔhera nwera bɔ wafa Yufase sikaa kɔkorɛ wayɛ abɔsoɛ ɔ.

Daniel 12:6

Na ko bisale biaa bɔ ɔhera nwera, bɔ ɔwɔ asue ne anye ne kyɛ, “Ɔkwaadwu kyinzu yeɛ sɔ anwanwadeɛ hemɔ bɛkɔwa ayieleɛ ɔ?”

Lewitikɔso 16:4

Odi kyɛ owura nwera ataadeɛ tendenn krongron ne, ná owura nwera pieto ɔfa kata ye nwo, ná ɔbɔ nwera abɔsoɛ ne, ná ɔbɔ nwera abotire ne; ɛhemɔ te ndaadeɛ krongron. Ɔsɛ kyɛ ɔfa nzue bia koraka né wawura ndaadeɛ nemɔ.

Amose 9:1

Nwuni AWURADE kyɛ ogyi afɔleɛ bokyea ne aso, na ɔhane kyɛ, “Bonima abotire ne, fa nikyee bɔ so maa aponnwaa nemɔ bɛwoso, ná dwiri gua bɛ mukoraa bɛ ti so, na ngɔfa ngrandɛ ngohũhũ bɛ bɔ baha ne’. Bɔ ɔkɔyɛ kyɛ ɔnwati biala, ɔngɔhora nwati, yeɛ bɔ okofi nu kofite biala, ongonya ye ti ngodidi nu.

Nyekyire 15:6

Na abɔfo nzoo nemɔ bɔ betiratira ɛhawo nzoo ne, befili asɔneyɛɛ sua ne anu befitele, bɔ né bewurawura nwera fufue hyɛnn, ná bafa sikaa kɔkorɛ abɔsoɛ babobɔ b’afia ɔ.