Hesekiel 8:16 - AHYERƐLƐ KRONGRON

¹⁶ Afei ɔfale me wale AWURADE awuro ne akunu dɔ. Na AWURADE asɔneyɛɛ sua anoa nu berɛ, abrannaa ne ne afɔleɛ bokyea ne b’afia berɛ, na nwuni mmienzua kɔyɛ aburanyɔ ne nnu wɔ berɛ. Né bɛ si kyire AWURADE asɔneyɛɛ sua ne; yeɛ né bɛ nyunu kyire eyia afiteleɛ bɔ bɛsɔne eyia, bɔ bɛ nye kyire eyia afiteleɛ ɔ.

Hesekiel 8:16 Iomraidhean Croise

1 Ahemvo 8:29

amaa sɛ eyia oo, kɔngɔen oo, sua ye bɔ ɔte nekaa bɔ ahã kyɛ, ‘Me dumaa kɔla so’ ye, wɔ nye ali ye si; amaa ɔnate so, atie mbaeɛ bɔ w’akoaa kɔfa ye nye kohyire ɛwa kɔbɔ ɔ.

2 Ahemvo 16:14

Kɔɔbere afɔleɛ bokyea bɔ né ogyi AWURADE nyunu ne, Ahase ye fili AWURADE awuro ne anyunu. Ɔye fili ye afɔleɛ bokyea deɛ ne, ɔne AWURADE awuro ne b’afia, na ɔfa oosiele ye afɔleɛ bokyea deɛ ne ye sorɔ.

2 Ahemvo 21:5

Aluo nyɔ bɔ bɛwɔ AWURADE awuro berɛ ne, osisili afɔleɛ mmokyea mane ewienu abɔdeɛ ahoroɔ amukoraati wɔ berɛ.

2 Ahemvo 23:11

Mbɔngɔ mɔ bɔ Yuda ahemvo (biemɔ) batu bɛ basie berɛ bɛfa bɛsɔne eyia, wɔ AWURADE awuro ne anoa nu berɛ, wɔ sayɛɛ Natan Mɛlɛke sua ne anwo wɔ aluo berɛ ne, ɔyele bɛ fili berɛ, na ɔfale see yerale teaseɛnam mɔ bɔ bɛfa bɛsɔne eyia ne.

2 Ahemvo 23:5

Ahɔmeɛ mɔ bɔ Yuda ahemvo ahyɛ bɛ sɔfo maa bɛyera ɛyɛɛ wɔ asɔneyɛɛ nemɔ aso wɔ Yuda nguro ne nguro bɔ bapɛ Yerusalem nwo bayia nemɔ anu ne, ɔne bɛ bɔ né bɛyera ɛyɛɛ bɛma Baal, eyia, ɛsraen, nzramaa mɔ ne ewienu abɔdeɛ pembepembe amukoraa ne, ɔyele bɛ ali.

2 Aberɛso Dwirɛ 29:6

Ofikyɛ yɛ nana mɔ banni nahorɛ bamma AWURADE, yeɛ bayɔ bɔ ɔte bɔne wɔ AWURADE yɛ Nyameɛ nyunu ɔ. Bapo AWURADE, baye bɛ nye bafi nekaa bɔ AWURADE te ne, na bakakyi bɛ si bama ye.

2 Aberɛso Dwirɛ 7:7

AWURADE awuro n’anyunu aluo berɛ, ye afia berɛ ne, Solomon tele berɛ nwo maa ɔyɛle krongron, ofikyɛ berɛ yeɛ ɔbɔle naen yeralɛ afɔleɛ ne asomdwee afɔleɛ bɔ bɛfa ɛloe bɛbɔ nemɔ ɔ. Solomon bɔle afɔleɛ nemɔ wɔ berɛ, ofikyɛ kɔɔbere afɔleɛ bokyea bɔ osili ne, né naen yeralɛ afɔleɛ ne, aburoo afɔleɛ ɔne ɛloe nemɔ bɛngɔ so.

Yeremia 2:27

bɛkã bekyire bakaa kyɛ, ‘Me se ole wɔ,’ yeɛ bɛkã bekyire nyɔboɛ kyɛ, ‘Wɔ yeɛ ɛwole me ɔ.’ Ofikyɛ bɛ si yeɛ bakakyi bama me ɔ, na nna bɛ nyunu ɔ. Nakoso sɛ bɛkɔ amaneɛ nu a, bɛkã kyɛ, ‘Dwɔso pepɛ de yɛ e!’

Yeremia 32:33

Bɛ si mmom yeɛ bakakyi bama me ɔ, na nna bɛ nyunu ɔ. Ɔwɔ nu kyɛ mahɔ so madwudwo mahyire bɛ dee, nakoso bandie, yeɛ banne foɛtulɛ ne bando nu.

Yeremia 44:17

Na mmom yɛkɔhɔ so yɛkɔyɔ nikyee biala bɔ yahã kyɛ yɛkɔyɔ ɔ: yɛkɔyera ayirefona yɛkɔma nyameɛso hemmaa, ná yabɔ anonneɛ afɔleɛ yama ye kyɛbɔ yɛ ne yɛ nana mɔ, y’ahemvo mɔ ne y’atitire mɔ yɛyɔle ye wɔ Yuda nguro ne Yerusalem mmorɔnoɛ mɔ so ne; ofikyɛ sɔ mmerɛ ne, né yɛnya aleɛ pee yɛdi, yɛnya ngɔsoɛ, na yande edwirɛ tɛɛ biala.”

Yeremia 7:18

Ngwadaa bubu eyein, seɛ mɔ sɔ see, na mmrasua mɔ fete mɔle bɛfa bɛto taterɛ bɛma bosoen bɔ bɛfrɛ ye Nyameɛso Hemmaa ne; na behwie anonneɛ afɔleɛ bɛma mmosoen foforɛ mɔ bɛfa bewura me apue.

Yeremia 8:2

Bɛkɔfa bɛ bɛkɔsamo ɛhemɔ anyunu: eyia, ɛsraen ne nyameɛso abɔdeɛ amukoraa bɔ behurole bɛ dwirɛ, bɛsole bɛ, belili bɛ si, ná bɛhɔle bɛ berɛ abisa bɛsɔnene bɛ ne. Bɛngɔboaboa mmowue nemɔ anoa, yeɛ bengosie bɛ; bɛkɔyɛ kyɛ fofoɛ wɔ aseɛ so.

Hesekiel 10:3

Né kɛrubim nemɔ begyigyi awuro ne ngwaen wɔ mmerɛ bɔ biaa ne worole nu ne, na munungum yili awuro ne akunu berɛ tɛkyɛ.

Hesekiel 11:1

Afei Sunzum ne mane me so, na ɔfale me wale AWURADE awuro berɛ eyia afiteleɛ anoa piri bɔ ye nye kyire eyia afiteleɛ ne anyunu. Na nwuni mmienzua aburanyɔ ne nnu wɔ anoa piri ne anyunu berɛ, na nwuni Asure awa Yaasania ne Benaya awa Pelatia bɔ bɛte maen mbanyi ne kyɛ bɛboka bɛ so ɔ.

Hesekiel 23:35

Yiti AWURADE Nyameɛ nwa nyoo: Ɔnate kyɛ ama wɔ wora afi me, ná apo me ne ati, wɔ koso ekonya wɔ nyanzoen bra ne wɔ gyandera nwo asohwenɛ.”

Hesekiel 23:39

Ofikyɛ behuhuni bɛ mma bɛbɔle afɔleɛ bɛmane bɛ mmosoen nemɔ nen, sɔ kyẽa ne ala yeɛ bɛwale me nekaa krongron ne anu beeguale ye nwo fiɛ ɔ. Tie, bɔ bayɔ ye wɔ m’awuro hɔ ɛne.

Hesekiel 40:28

Afei ɔfale me fale ngwaen dɔ anoa piri ne anu hɔle ye kunu dɔ aluo berɛ, na osusuli ngwaen dɔ anoa piri nen; né ɔte kyɛbɔ esusu ko nemɔ a bɛte ne ala.

Hesekiel 40:6

Na afei ɔwale ɛpoen bɔ ye nye nea eyia afiteleɛ ne anwo, ɔfole ye atweleɛ ndiasoɛ ne aso, osusuli anoa n’aponnwaa ne, na né ye tɛtrɛtɛɛ te elemmire ne ko, yeɛ ye tɛtrɛtɛɛ ko ne koso te elemmire ne ko.

Hesekiel 43:5

Yeɛ Sunzum ne mane me so, na ɔfale me hɔle awuro ne kunu dɔ aluo berɛ; na yieee, AWURADE animnyam yili awuro ne anu tɛkyɛ.

Hesekiel 43:8

Begyinane bɛ simbini bepingyele me simbini deɛ nwo, yeɛ begyinane b’aponnwaa bepingyele m’aponnwaa deɛ nwo, bɔ fasue mbaen yeɛ ɔwɔ me ne bɛ y’afia ɔ. Bafa b’akyiwadeɛ yɔleɛ ne bagua me dumaa krongron ne anwo fiɛ, maa ɔnate so mvɛle yaa ngukuni bɛ.

Hesekiel 45:19

Ɔsɔfo ne, odi kyɛ ɔfa bɔne nwo afɔleɛ mogya ne bie kekã awuro berɛ aponnwaa nemɔ anwo, afɔleɛ bokyea ne bo kaa ndweasoɛ nna ne anwo, yeɛ anoa piri aponnwaa bɔ ɔwɔ ye kunu dɔ aluo berɛ ne anwo.

Hesekiel 46:1

AWURADE Nyameɛ nwa nyoo: Ye kunu dɔ aluo berɛ anoa piri bɔ ye nye kyire eyia afiteleɛ so ne, odi kyɛ bɛto nu elesia bɔ bɛfa bɛyɔ adwuma ne; nakoso afofikyẽa ne de, odi kyɛ bebukye; yeɛ ɛsraen foforɛ kyẽa ne koso, odi kyɛ bebukye.

Hesekiel 7:23

Yɔ ngɔnzɔngɔnzɔ, ofikyɛ awuelilɛ ayi aseɛ ne aso to, nzɛmmɔnelilɛ ayi kuro ne anu to.

Hesekiel 8:15

Yeɛ osele me kyɛ, “Sona awa, yeɛ anwu ye? Ekosa konwu akyiwadeɛ mbiri mbiri bɔ bɛtra ɛhemɔ ɔ.”

Yoel 2:17

Asɔfo nemɔ, bɔ bɛ yeɛ bɛte AWURADE somvoɛ mɔ ne, odi kyɛ besu wɔ abrannaa ne, ɔne afɔleɛ bokyea ne b’afia, ná bɛkã kyɛ, “Ao AWURADE, nwu wɔ maen anwumvoin, nnɛma w’agyapadeɛ yɛ nikyee bɔ bebu ye animtia, maen maen mɔ noa nu ngorohoɛ dwirɛ. Nzu ati yeɛ bɛkekã ye wɔ maen maen mɔ nu kyɛ, ‘Bɛ Nyameɛ ne, ɔwɔ nisua?’ ɔ.”

Deuteronomi 17:3

kyɛ waaso nyameɛ foforɛ biemɔ wakoto bɛ: kyɛ eyia oo, ɛsraen oo, anaa anwuro abɔdeɛ mɔ bɔ mabera ne oo,

Deuteronomi 4:19

Na sɛ ɛto wɔ nye anwuro ná enwu eyia, ɛsraen, nzramaa ne anwuro abɔdeɛ pembepembe mukoraati a, nnɛmaa ɔtwetwe wɔ maa egua ndwerɛ wɔ bɛ nyunu, ná anzɔne bɛ, ofikyɛ bɛte nningyein bɔ AWURADE wɔ Nyameɛ afa ama mmenia mukoraati bɔ bɛwɔ wiase nekaa biala ɔ.