Hesekiel 5:15 - AHYERƐLƐ KRONGRON

¹⁵ Na sɛ mebua wɔ ndɛen wɔ ahonehulɛ ne anyeborolɛ so, ná metwe wɔ so serɛserɛ a, ɛkɔkakyi animguaseɛ, ngorohoɛ nikye, kɔkɔbɔlɛ ne edwirɛ nwanwa kɔma maen maen bɔ bapɛ wɔ nwo bayia nemɔ; me AWURADE, me yeɛ mahã ɔ.

Hesekiel 5:15 Iomraidhean Croise

1 Ahemvo 9:7

ye de ngɔpɛ Yisraelfoɛ asue ngofi aseɛ bɔ mafa mama bɛ ne aso, na sua bɔ mate ye nwo mafa me dumaa mato so ne, ngɔye me nye ngofi so. Na Yisrael kɔkakyi maen amukoraa bɛ noa nu anyandera ne ngorohoɛ dwirɛ.

2 Aberɛso Dwirɛ 29:8

Yiti AWURADE afɛ Yuda ne Yerusalem so yaa piri. Na bɔ wamaa wato bɛ ne, wamaa wayɛ ebiala suro ne nwanwa, na wamaa bayɛ ngorohoɛ nikye kyɛbɔ ɛmɔ bɔbɔ ɛmɔ nye tua ne.

Edwein 39:11

Ɛtwe adasa mmaa so, sɛ ɛtwe sona so wɔ ye bɔne nwo a, ɛsɛkye nikyee bɔ okuro ye paa ne, kyɛbɔ mvrɔlɔ sɛkye nikye ɔ; amba, sona biala te kyɛ nwomeɛ mbaen. Sela

Edwein 79:4

Yayɛ ngorohoɛ nikyee wɔ yɛ mmango mɔ nye so, bɛ bɔ bapɛ yɛ nwo bayia ne, bɛsere yɛ bɛkã yɛ anyinga.

Yesaya 26:9

Me kra wora dɔ wɔ kɔngɔen, amba, me sunzum bɔ ɔwɔ me nu ne, ɔpena wɔ paa, ofikyɛ sɛ wɔ ndɛenbualɛ wɔ aseɛ so a, ewiase ama besua bra bɔ ɔtengyɛ ɔ.

Yesaya 43:28

Yiti, magua nekaa krongron berɛ mbanyi nemɔ nyunu ase, maye Yakob mama kyɛ musue ɔto ye, yeɛ maye Yisrael mama kyɛ bɛgoro ye nwo.

Yeremia 23:40

Na ngɔprapra animguaseɛ bɔ olle ayieleɛ ɔne nyanzoen bɔ ye bo ngɔpɛ le, bɔ bɛ wora ngofi ye le ɔ, ngogua ɛmɔ so.’ ”

Yeremia 29:18

Ngɔfa ngrandɛ, ɛhɔen ne ewue anwonyerɛ ngogu bɛ so, na ngɔye me sa ngofi bɛ bo maa bɛkɔsesa bɛ bɛkɔhɔ aseɛ so ahennie amukoraa nu. Bɛkɔyɛ ɛnomalɛ nikye, anwodwiri nikye, esobilɛ nikye ne animguaseɛ nikye wɔ maen maen amukoraa bɔ mafoa bɛ mahɔ so nemɔ aso,

Awuye 2:15

Bɛ bɔ bɛpɛ nu amukoraa bɛbɔ bɛ sa nu bɛgoro wɔ nwo. Besobi bɛ noa bɛwoso bɛ ti begua Yerusalem awa brasua ne aso kyɛ, “Kuro bɔ bɛfrɛ ye: Kuro bɔ ye anwonyemene di mu, aseɛ amukoraa anika ne, aso ye ɛhe?”

Awuye 2:16

Wɔ pɔfoɛ mɔ amukoraa, batu bɛ noa bagua wɔ so. Besobi bɛ noa bɛnwose bɛ gye. Na bɛnwa, “Yasɛkye ye bɔkɔɔ. Amba, kyẽa bɔ yɛnea ye ate ne, ye ɛne; yɛ sa ahã ye, na yanwu ye!”

Hesekiel 11:9

Ngotu ɛmɔ ngofi kuro ne anu, ngɔfa ɛmɔ ngowura ɛwɔfoɛ mɔ sa, na ngobua ɛmɔ ndɛen.

Hesekiel 14:8

Ngotu me nye ngosie sɔ sona ne aso, ngɔfa ye ngɔkakyi sɛngyerɛnneɛ ne ngorohoɛ dwirɛ, ngotu ye ngofi me maen nu, ná ɛmɔanwu kyɛ me ole AWURADE.

Hesekiel 16:41

Bɛkɔto wɔ sua mɔ nu see, na bɛkɔhwe wɔ so bɔ mmrasua pee bɛ nye tua ɔ. Ngɔmaa ɛkɔyakyi gyanderabɔlɛ ne, na ɛngɔhyɛ nikyee ko.

Hesekiel 16:57

koraka yeɛ w’amumuyɛɛ ne nwo baala so ɔ? Nakoso kekesaala ye de, Siria mma mmrasua mɔ ne bɛ bɔ bapɛ ye nwo bayia amukoraa, yeɛ Filistifoɛ mma mmrasua bɔ bapɛ wɔ nwo bayia amukoraa ne, ɛte bɛ ngorohoɛ dwirɛ.

Hesekiel 22:4

Ɔnate wɔ mogya bɔ ahã agua ne ati, edi fɔ; na afa wɔ mmosoen bɔ ayɔ ne agua wɔ nwo fiɛ. Ama wɔ kyẽa ne apingye, na w’afoɛ nemɔ b’ayieleɛ ne adwu. Yiti, mamaa ayɛ nyanzoen nikyee wɔ maen maen mɔ bɛ nyunu, ɔne ngorohoɛ nikyee wɔ aseɛ amukoraa so.

Hesekiel 23:32

AWURADE Nyameɛ nwa nyoo: “Eliɛma brasua ye kulie bɔ nu te kuronn, ná osa trɛ ne, nu yeɛ ɛkɔno ɔ; na bɛkɔsere wɔ bɛkɔgoro wɔ nwo, ofikyɛ bɔ ɔwɔ nu ne, ɔsone pee.

Hesekiel 25:17

Ngɔfɛ yaa piri paa ngɔtɔ bɛ so wereɛ piri; na sɛ metɔ bɛ so wereɛ a, yeɛ bekonwu kyɛ me ole AWURADE ɔ.’ ”

Hesekiel 30:19

Sɔ yeɛ ngɔhwe Misraim so ɔ, na afei bekonwu kyɛ me ole AWURADE.”

Hesekiel 5:16

Na sɛ mema ɛhɔen ba bɛ so kyɛ agyaen suronyisuronyi, bɔ okohũhũ bɛ, bɔ ngɔto ngohũ ɛmɔ ne: ngɔma ɛmɔkɔhɔ so bekoli hɔen, na ngɔma nekaa bɔ ɛmɔnya b’aleɛ ɔ ye bo kɔpɛ.

Hesekiel 5:8

yiti AWURADE Nyameɛ nwa nyoo: Tie, me ne wɔ yɛkoli, na ngɔhwe wɔ so bɔ maen maen mɔ bɛ nye tua ɔ

Lewitikɔso 26:32

Ngɔsɛkye ɛmɔ aseɛ ne pasaa, maa ɛmɔ pɔfoɛ mɔ bɔ bekotu bɛkɔɔtena nu ne, ɔkɔyɛ bɛ nwanwa.

Nahum 1:2

Nyameɛ ɔtwe nungunɛ, na ɔte AWURADE bɔ ɔtɔ wereɛ ɔ. AWURADE tɔ wereɛ, na ye yaafɛlɛ te piri; AWURADE tɔ bɛ bɔ bekyi ye ɔ so wereɛ, na ye ahonehulɛ wɔ berɛ ma ye pɔfoɛ mɔ.

1 Korintofoɛ 10:11

Ɛhe amukoraa tole bɛ maa ɔyɛle kɔkɔbɔlɛ, na bɛhyerɛ bɛtole berɛ bɛfa betuli yɛ foɛ, yɛ bɔ wiase ayieleɛ mmerɛ ne wato yɛ ne.

Deuteronomi 28:37

Maen maen mukoraati bɔ AWURADE kɔfa wɔ kɔhɔ so ne, bɔ ɔkɔto wɔ ne kɔyɛ bɛ nwanwa, na ɛmɔkɔkakyi berɛ ama mɔ bɛ noa nu anyandera ne ngorohoɛ dwirɛ.

Deuteronomi 28:46

Na musue ne kɔkakyi nzɛngyerɛnneɛ ne anwanwadeɛ kotia wɔ ne wɔ bosofoɛ afebɔɔ.