Hesekiel 5:13 - AHYERƐLƐ KRONGRON

¹³ “Sɔ yeɛ me yaafɛlɛ ne kɔyɔ bɛ nwo adwuma koyie ɔ, m’ahone kohu bɛ so maa m’ahone kɔtɔ nzue nu. Na sɛ m’ahone hu bɛ so a, yeɛ bekonwu ye kyɛ me, AWURADE, me nungunɛhwenɛ nu yeɛ mahã ɔ.

Hesekiel 5:13 Iomraidhean Croise

Yesaya 1:21

Kuro bɔ né odi nahorɛ ne, nea kyɛbɔ wasi wakakyi gyanderaniɛ ɔ! Ye bɔ ahaa né pɛpɛɛpɛyɛlɛ wayi ye nu tɛkyɛ ne, bɔ ahaa né ɔte tenenee kuro ne, afei de kodiawufoɛ yeɛ bɛwɔ nu ɔ!

Yesaya 1:24

Yiti AWURADE, Asafo AWURADE, Yisrael Tuminiɛ ne, ɔnwa nyoo: Aa, bɛ bɔ bekyi me ne, ngɔfɛ bɛ so yaa piri paa, yeɛ ngɔtɔ me pɔfoɛ mɔ bɛ so wereɛ!

Yesaya 59:17

Ofikyɛ ɔfale tenenee wurale kyɛ buralɛ bɔ ɔkata bɛ hue so ɔ, yeɛ ɔfale ngoalelɛ buralɛ kyerɛ wurale ye ti; ɔfale wereɛtɔlɛ ataadeɛ wurale, na ɔfale nungunɛhwenɛ herale kyɛ ɛtena.

Yesaya 9:7

Ye ahennie, yeɛ ye asomdwee kɔhɔ so kɔtrɛ bɔ olle ayieleɛ ɔ; ɔkɔtena Dawide ahennie bia ne aso, okoli ye ahennie ne aso, na ɔkɔfa pɛpɛɛpɛyɛlɛ ne tenenee koli bia ne maa okotindim kogyina, ofi kekesaala ye maa okoodwu afebɔɔ. Asafo AWURADE ye nungunɛhwenɛ sonongo ne yeɛ ɔkɔyɔ ɛhe ɔ.

Yeremia 14:12

Sɛ bɛyɔ akɔngyere a, mengotie bɛ sufrɛ. Yeɛ sɛ bɛbɔ naen yeralɛ afɔleɛ ne aburoo afɔleɛ po a, mengole bɛ mengɔto nu. Na mmom ngɔfa ngrandɛ, ɛhɔen ne ewue anwonyerɛ ngohũhũ bɛ pasapasa.”

Yeremia 15:9

Braa bɔ wawo nzoo ne, wayɛ hodwoo, ye nye so aburu ye, ye anyelasoɛ atu amini wɔ aberɛ bɔ aleɛ onnya ɔssane ɔ, bagua ye nyunu ase basopa ye; na bɛ ngaa nemɔ, ngɔmaa bɛkɔtotɔ ngrandɛ noa wɔ bɛ pɔfoɛ mɔ anyunu, AWURADE noa dwirɛ ɛne.

Yeremia 25:12

Na ɔkɔwa kyɛ, afoɛ aburasoo ne asi ne, Babilɔn hene ne sɔ maen ne bɔ ɔte Kaldeafoɛ b’aseɛ ne, ngɔhwe bɛ so, ɔnate b’amumuyɛɛ ti, na ngɔma aseɛ ne kɔyɛ kurofoen afebɔɔ, AWURADE noa dwirɛ ɛne.

Awuye 4:11

AWURADE ala ye ɛyaafɛlɛ ali wayie, wama ye ahone ahu kandinga paa. Yeɛ wasɔ see wɔ Sion, maa wayera ye fapem nemɔ.

Awuye 4:22

Ao Sion awa brasua, w’amumuyɛɛ ne nwo akatuaa wawa ayieleɛ, na ɔngɔfa wɔ ngɔhɔ nnurehyelɛ nu ko. Nakoso wɔ, Edom awa brasua de, okootua w’amumuyɛɛ so kerɛ, na ɔkɔma wɔ bɔne kɔla ali.

Hesekiel 13:15

Fasue ne, yeɛ mmenia bɔ bahã ye nwo ewure ne, sɔ yeɛ me yaafɛlɛ ne kɔyɔ bɛ nwo adwuma koyie ɔ. Na ngose ɛmɔ kyɛ, Fasue ne nne berɛ ko, yeɛ bɛ bɔ bɛhane ye nwo ewure ne koso bɛnne berɛ ko,

Hesekiel 14:21

“AWURADE Nyameɛ nwa nyoo: Nzaade me ndɛenbualɛ suronyisuronyi nna, bɔ bɛ ole ngrandɛ, ɛhɔen, awerɔm ngaka aboyaa ne ewue anwonyerɛ ne, sɛ meprapra megua Yerusalem so mekũkũ so mmenia ne ngaka mefi so ɛ?

Hesekiel 16:42

Na m’ahone bɔ wahu wɔ so paa ne, sɔ yeɛ ɔkɔmaa ɔkɔtɔ nzue nu ɔ. Ngɔyakyi wɔ nwo nungunɛhwenɛ ne, na me kunu kodwo bɔ mengɔfɛ yaa ko ɔ.

Hesekiel 16:63

amaa ɔnate so sɛ mefa wɔ bɔne bɔ ayɔ amukoraa mekyɛ wɔ a, akaye, ná wayɛ wɔ nya, na w’animguaseɛ ne ati ɛngɔtɛ wɔ noa nu ko, AWURADE Nyameɛ noa dwirɛ ɛne.”

Hesekiel 17:21

Ye koɛhonɛfoɛ bɔ bɛkɔnwati ne amukoraa, bɛkɔtotɔ ngrandɛ noa, na bɛ bɔ bekonya bɛ ti bekodidi nu ne, bɛkɔbɔ bɛ bɛkɔsande bɛkɔhɔ nekaa bɔ mvrama bɔ kɔ biala, amaa ɔnate so ɛmɔanwu kyɛ me, AWURADE, yeɛ mahã sɔ ɔ.”

Hesekiel 20:21

Nakoso mmaa nemɔ yɛle me nwo lɔen; banni m’ahyɛdeɛ so, yeɛ me mmeraa ne bɔ sona di so a onya ngoa ne, ye koso banni so; na m’afofingyẽa ne koso, beguale bɛ nwo fiɛ. Yiti ngane kyɛ: Ngɔma m’ahone kohu bɛ so, na ngɔma me yaafɛlɛ ne kɔyɔ bɛ nwo adwuma koyie wɔ ɛserɛ ne aso.

Hesekiel 20:8

Nakoso bɛyɛle me nwo lɔen, bɔ bandɛ me so ɔ. Bɛ nu biala wangyi akyiwadeɛ nningyein bɔ ye nye gye ye nwo ne wangua, yeɛ banyakyi Misraim mmosoen sɔnenɛ. Yiti ngane kyɛ ngɔma m’ahone kohu bɛ so, bɔ me yaafɛlɛ ne kɔyɔ bɛ nwo adwuma koyie ɔ, wɔ Misraim aseɛ so.

Hesekiel 21:17

Me koso ngɔbɔ me sa nu, ná afei mama m’ahone atɔ nzue nu. Me, AWURADE, me yeɛ mahã ɔ.”

Hesekiel 21:22

Ye sa famaa ne anu serewagualɛ ne, waye Yerusalem. Wahyɛ kyɛ behũhũ mmenia, ɔ́bɔ ese, wayɔ nikyee bɔ bɛfa bebubu pambim ɔ, bɔ bɛfa betua kuro ɔ, ɔne atweleɛ mɔ bɔ begyina so betua kuro ɔ.

Hesekiel 23:25

Ngɔhwe wɔ nwo nungunɛ maa bɛ ne wɔ koli ye anyeborolɛ so. Bɛkɔpepɛ wɔ bonyi ne wɔ so, na wɔ nu mmenia bɔ baha ne, bɛkɔtotɔ ngrandɛ noa. Bɛkɔhyehye wɔ mma mmienzua ne wɔ mma mmrasua bɛkɔhɔ, na wɔ nu mmenia bɔ baha ne, bɛkɔfa see bɛkɔyera bɛ.

Hesekiel 24:13

Nu naakye ne gyi berɛ ma w’adwaman bra ne. Ahaa mepena kyɛ mete wɔ nwo mefi w’adwaman bra ne anwo, nakoso amma wɔ nwo ande wamvi wɔ nyanzoen bra ne anwo, yiti wɔ nwo ngɔte ngofi wɔ nwo fiɛ ne anwo ko, kɔpem kyɛ ngɔhwe wɔ so maa m’ahone bɔ wahu wɔ so ne ɔkɔtɔ nzue nu ɔ

Hesekiel 43:8

Begyinane bɛ simbini bepingyele me simbini deɛ nwo, yeɛ begyinane b’aponnwaa bepingyele m’aponnwaa deɛ nwo, bɔ fasue mbaen yeɛ ɔwɔ me ne bɛ y’afia ɔ. Bafa b’akyiwadeɛ yɔleɛ ne bagua me dumaa krongron ne anwo fiɛ, maa ɔnate so mvɛle yaa ngukuni bɛ.

Hesekiel 6:10

Na bekonwu kyɛ me ole AWURADE; na edwirɛ bɔ mahã, kyɛ ngɔprapra sɔ musue he ngogua bɛ so ne, manga ye mbaen.”

Hesekiel 6:12

Bɔ ɔwɔ dedeede ne, ewue anwonyerɛ yeɛ okohũ ye ɔ; bɔ opingye ne, ngrandɛ noa yeɛ ɔkɔtɔ ɔ; na bɔ waha bɔ mamaa wanya ye ti wadidi nu ne, ɛhɔen yeɛ ɔkɔmaa okowu ɔ. Sɔ yeɛ me yaafɛlɛ ne kɔyɔ bɛ nwo adwuma koyie ɔ.

Hesekiel 7:3

Kekesaala ye de, ayieleɛ yeɛ wato wɔ ɔ, ngɔma me yaafɛlɛ ne kɔwa wɔ so; ngobua wɔ ndɛen kyɛbɔ wɔ yɔleɛ te ɔ, na ngɔhwe wɔ so wɔ w’akyiwadeɛ yɔleɛ amukoraa nwo.

Hesekiel 7:8

Ɔngɔhyɛ biala, ngɔma m’ahone bɔ wahu ne kɔwa wɔ so, ngɔfɛ wɔ so yaa, ngobua wɔ ndɛen kyɛbɔ wɔ yɔleɛ te ɔ, na ngɔhwe wɔ so wɔ w’akyiwadeɛ yɔleɛ amukoraa nwo.

Daniel 11:36

“Ɛhene ne kɔyɔ bɔ okuro ɔ; ɔkɔmoma ye nwo so kɔyɛ ye nwo konguronn kohyire kyɛ ɔtra nyameɛ biala, na ɔkɔhã edwirɛ nwanwa kotia nyameɛ mɔ nu Nyameɛ ne, na okonya ngɔsoɛ koodwu kyɛ ahonehulɛ ne kɔwa nu ɔ, ofikyɛ bɔ bahyehyɛ bato berɛ ne, ɔkɔwa nu.

Daniel 9:2

ye ahennie afoɛ bɔ oli moa ne anu, me, Daniel, mbɛnzɛmbɛnzɛle ngrataa nemɔ anu nwuni afoɛ aburasoo bɔ odi kyɛ ɔpɛ nu koraka né Yerusalem abɔ, bɔ ɔte AWURADE dwirɛ bɔ ɔlale ye ali hyirele ngɔmhyɛlɛniɛ Yeremia ne.

Hosea 10:10

Mepena kyɛ metwe bɛ so, na maen maen mɔ bɛkɔboa bɛ noa, bekodwɔso bekotia bɛ, ɔnate b’amumuyɛɛ mmɔhoɛ ne ati.

Sakaria 6:8

Na ɔteane nu sele me kyɛ, “Nea, bɛ bɔ bɛ́kɔ sorɔ dɔ maen ne anu ne, bama me Sunzum kunu adwo ye fɔnwoo wɔ sorɔ dɔ maen ne anu.”

Deuteronomi 28:63

Na kyɛbɔ AWURADE nye gyele kyɛ ɔkɔmaa okosi ɛmɔ yé, ná ɛmɔata pee nen, sɔ ala yeɛ ɔkɔyɛ AWURADE fɛ kyɛ okohũhũ ɛmɔ, ná wama ɛmɔ boso anua ɔ. Na okotu ɛmɔ kofi aseɛ bɔ ɛkwaafa tena so ne aso.

Deuteronomi 32:36

Amba, AWURADE kobua ye mmenia be, okonwu ye ngoaa anwumvoin, mmerɛ bɔ okonwu kyɛ b’anwoserɛ ayie, bɔ ebiala nne berɛ bɔ waha, bɔ ɔte akoaa anaa dehyeɛ ɔ.