Hesekiel 5:10 - AHYERƐLƐ KRONGRON

¹⁰ Yiti seɛ mɔ bekoli bɛ mma mmienzua mɔ naen wɔ wɔ nu, yeɛ mmaa mmienzua wora bekoli seɛ mɔ naen. Ngɔhwe wɔ so, na bɛ bɔ bekonya bɛ ti bekodidi nu ne amukoraa, ngɔto bɛ ngɔpete mvrama mukoraa nu.

Hesekiel 5:10 Iomraidhean Croise

2 Ahemvo 6:29

Yiti yɛhuni mma bienzua ne yɛtone ye yɛlili. Aleɛ hyene ne, nga ngyirele ye kyɛ, ‘Fa ɛwa bienzua ne maa yɛhu ye yɛto ye yɛli.’ Nakoso ye de, wafa ɔwa deɛ ne wafea.”

Nehemia 1:8

Kaye ahyɛdeɛ bɔ ɛfa mane wɔ somvoɛ Mose kyɛ, ‘Sɛ ɛmɔanni nahorɛ bamma me a, ngɔbɔ ɛmɔ ngɔsande ngɔhɔ maen maen nemɔ aso,

Edwein 44:11

Ayɛ yɛ kyɛ mmoaen bɔ bɛkwaahũ bɛ ɔ, na abɔ yɛ asande aagua maen maen mɔ so.

Yesaya 49:26

Bɛ bɔ bɛhyɛ wɔ so ne, ngɔfa bɛ bɔbɔ bɛ nwonaen maa bekoli, na bɛ bɔbɔ bɛ mogya kɔbo bɛ kyɛ nzaa. Na afei anwoɔnaen amukoraa konwu ye kyɛ me, AWURADE, me ole wɔ Ngoadefoɛ ne wɔ Defoɛ, Yakob ye Tuminiɛ ne.”

Yesaya 9:20

Befoti aleɛ wɔ famaa so, nakoso ɛhɔen tɛ ku bɛ, bedidi wɔ bɛ sa bɛen so, nakoso bɛ ko nyi, na ebiala keka ye bɔbɔ ye sa nwo naen di.

Yeremia 13:14

Na ngɔkekã bɛ ti ngɔbobɔ nu, seɛ mɔ ne mmaa mɔ po, AWURADE noa dwirɛ ɛne. Mengonwu bɛ anwumvoin, mengɔma bengonya bɛ ti bengodidi nu, yeɛ me kunu ngɔtete me ngɔma bɛ, na mmom ngohũhũ bɛ.’ ”

Yeremia 19:9

Ngɔmaa bɛkɔpɛ bɛ nwo bekoli bɛ mma mmienzua ne bɛ mma mmrasua mɔ naen. Na ebiala koli obiɛngo naen, ɔnate kuro ne bɔ batua ye, ɔne amaneɛ bɔ bɛ pɔfoɛ mɔ bɔ bɛpena bɛ beku bɛ ne, bamaa wato bɛ ne ati.’

Yeremia 44:12

Ngɔfa Yudafoɛ ngaa bɔ bayɛ b’adwene kyɛ bɛkɔ Misraim aseɛ so bɛkɔtena dɔ ne, ngɔhwe bɛ so, na bɛ mukoraa bekowuwu; bɛkɔtotɔ wɔ Misraim aseɛ so. Bɛkɔtotɔ ngrandɛ noa, na ɛhɔen kohũ bɛ maa bekowuwu, ofi kwahweabaa mɔ so bɔ ɔkwaadwu atitire mɔ so; bɛkɔtotɔ ngrandɛ noa, na ɛhɔen kohũ bɛ maa bekowuwu, na bɛkɔyɛ musue nikye, anwodwiri nikye, ɛnomalɛ nikye ne ngorohoɛ nikye.

Yeremia 49:32

Bɛ mbɔngɔ kɔyɛ koɛ nu nzesadeɛ, yeɛ bɛ nyɛmmoa kɔyɛ nikyee bɔ bɛfẽ bɛfa ɔ. Na bɛ bɔ bepiapia bɛ ti angyɛnu ne, ngɔbɔ bɛ ngɔsande ngogua nekaa amukoraa; ngɔmaa b’amaneɛnwunɛ kofi nekaa biala kɔɔto bɛ, AWURADE noa dwirɛ ɛne.

Yeremia 49:36

na ngɔfa mvrama nna ne ngofi nyameɛso ndweasoɛ nna ne aso ngɔwa Elam so, na ngɔbɔ bɛ ngɔsande ngoogua sɔ mvrama ne amukoraa so. Maen biala nne berɛ bɔ sɔ Elamfoɛ bɔ bafoa bɛ maa banwati ne, bɛ nu bie ngɔhɔ so ɔ.

Yeremia 50:17

Yisrael te mmoaen kure bɔ babɔ ye basande ɔ; gyata mɔ afoa ye maa wanwati wahɔ. Bɔ oli moa ɔ, Asiria hene ahu ye, na bɔ ɔpɛ ye bo ɔ, Babilɔn hene Nebukadenesa abubu ye mmowue nu.

Yeremia 9:16

Maen maen bɔ bɛ ne bɛ nana mɔ bɛttele bɛ nga le ne, so yeɛ ngɔbɔ bɛ ngɔsande ngɔhɔ ɔ; na ngɔsoma ngrandɛ maa okoli bɛ si kɔpem kyɛ ngonua bɛ boso ɔ.”

Awuye 2:20

Ao AWURADE, tie, ná dwene bɔ afa ɛhe ali ye ne anwo. Aso odi kyɛ mmrasua beku bɛ kunu mmaa bɛto bedi anaa, bɛ mma bɔ badodo bɛ ɔ? Aso odi kyɛ beku ɔsɔfo ne ngɔmhyɛlɛniɛ wɔ AWURADE nekaa krongron berɛ anaa?

Awuye 4:10

Mmrasua bɔ bɛ kunu tete bɛ ɔ, bafa bɛ sa batõ bɛ bɔbɔ bɛ kunu mmaa bafa bakakyi bɛ noa aleɛ, wɔ me maen awa brasua ye amaneɛnwunɛ mmerɛ ne anu.

Awuye 4:16

AWURADE ɛyaafɛlɛ ne abɔ bɛ asande; ɔngɔhɔ so ngɔnea bɛ so ko. Bammu asɔfo nemɔ bɛ dibea, na bamva anidie bamma mbanyi nemɔ.

Awuye 4:3

Ɛserɛ so ngyea mɔ po, bɛyeye bɛ nyɔfone bɛma bɛ mma mɔ bɛno; nakoso me maen awa brasua akakyi atianuserɛniɛ kyɛ ɛserɛ so soholi mɔ.

Hesekiel 12:14

Na mmenia mukoraa bɔ bapɛ ye nwo bayia bɔ bɛbɔ ye nwo waen, yeɛ ye koɛhonɛfoɛ amukoraa, ngɔbɔ bɛ ngɔsande nekaa bɔ mvrama bɔ kɔ biala, na ngɔhwe ngrandɛ ne ngɔfa ngɔfoa bɛ.

Hesekiel 12:15

Na sɛ mebɔ bɛ mesande maa bɛkɔ maen maen nemɔ nu, ná meto bɛ mepete aseɛ nemɔ aso a, ye de bekonwu kyɛ me ole AWURADE.

Hesekiel 17:21

Ye koɛhonɛfoɛ bɔ bɛkɔnwati ne amukoraa, bɛkɔtotɔ ngrandɛ noa, na bɛ bɔ bekonya bɛ ti bekodidi nu ne, bɛkɔbɔ bɛ bɛkɔsande bɛkɔhɔ nekaa bɔ mvrama bɔ kɔ biala, amaa ɔnate so ɛmɔanwu kyɛ me, AWURADE, yeɛ mahã sɔ ɔ.”

Hesekiel 20:23

Nza ndale ndaen ngyirele bɛ wɔ ɛserɛ ne aso, kyɛ ngɔbɔ bɛ ngɔsande ngɔhɔ maen maen mɔ nu, ná mato bɛ mapete aseɛ mɔ so;

Hesekiel 22:15

Ngɔbɔ wɔ ngɔsande ngɔhɔ maen maen mɔ nu, ná mato wɔ mapete aseɛ mɔ so; na ngokyikyi wɔ yɔleɛ fiɛ ne ngofi wɔ nu bɔkɔɔ.

Hesekiel 36:19

Mmɔle bɛ nzandele ngonguale maen maen mɔ nu, na ndole bɛ mbetene aseɛ mɔ so, na mmuale bɛ ndɛen kyɛbɔ bɛ bra ne bɛ yɔleɛ si te ɔ.

Hesekiel 5:12

Ewue anwonyerɛ ne ɛhɔen kohũhũ ngyɛmuɛ nza nu ko wɔ wɔ nu; ngyɛmuɛ nza nu ko koso bɛkɔtotɔ ngrandɛ noa wɔ wɔ fasue ne asi; yeɛ ngyɛmuɛ nza bɔ waha ne wora, ngɔbɔ bɛ ngɔpete mvrama mukoraa nu, na ngɔhwe ngrandɛ ngɔfoa bɛ.

Hesekiel 5:2

Nu ngyɛmuɛ nza nu ko ne, mmerɛ bɔ kuro ne tualɛ ne kɔwa ayieleɛ ne, fa see yera ye wɔ kuro n’afia berɛ. Ngyɛmuɛ nza nu ko wora, fa ngrandɛ pepɛ nu wɔ kuro ne anwo bra yia. Yeɛ ngyɛmuɛ nza bɔ waha ne koso, pete gua mvrama nu, na ngɔhwe ngrandɛ ngɔfa ngɔfoa bɛ.

Hesekiel 6:8

“Nakoso ngɔma ɛmɔ nu biemɔ konya bɛ ti bekodidi nu. Bɛkɔnwati bekofi ngrandɛ noa bɛkɔhɔ maen maen nemɔ anu, wɔ mmerɛ bɔ bɛkɔbɔ aya bɛkɔhɔ maen maen mɔ so ne.

Daniel 9:7

O AWURADE, wɔ yeɛ tenenee te wɔ deɛ; nakoso yɛ de, animguaseɛ yeɛ ɔte yɛ deɛ maa waadwu ɛnɛ ɔ: Yudafoɛ, Yerusalemfoɛ ne Yisraelfoɛ amukoraa bɔ bepingye wa ne bɛ bɔ bɛwɔ nziɛ nziɛ, wɔ aseɛ amukoraa bɔ atu bɛ aagua so ɔ, ɔnate nahorɛ bɔ banni bamma wɔ ne ati ɔ.

Lewitikɔso 26:29

Ɛmɔkohũhũ ɛmɔ mma mmienzua mɔ ɔne ɛmɔ mma mmrasua mɔ bekoli.

Lewitikɔso 26:33

Na ɛmɔ de, ngɔma ɛmɔ kɔbɔ aya bɛkɔhɔ maen maen mɔ so, na ngɔhwe ɛmɔ so ngrandɛ; ɛmɔ aseɛ nemɔ kɔsɛkye bɔkɔɔ, ná ɛmɔ nguro nemɔ koso kɔbɔ.

Amose 9:9

“Ofikyɛ tie, ngɔfa ahyɛdeɛ ngɔma, na ngohuhu Yisrael awuro ama so wɔ maen maen amukoraa nu, kyɛbɔ behuhu aburoo so wɔ huhuamoa nu ɔ, nakoso aburoo ne kaaba ko po ngɔtɔ ase.

Sakaria 2:6

Huuu, huuu! Ɛ́mɔnwati béfi sorɔ dɔ aseɛ ne aso oo, AWURADE noa dwirɛ ɛne; ofikyɛ mabɔ ɛmɔ masande kyɛ anwuro mvrama nna ne, AWURADE noa dwirɛ ɛne.

Sakaria 7:14

Na mvale mvrama bɔ ɔpɛ ye nwo ɔ mmɔle bɛ nzandele maen maen amukoraa bɔ bɛnze bɛ ɔ so. Na aseɛ bɔ bɛyakyili ye bɛ si ne ɔlale berɛ mbaen, bɔ sona biala wambɛ nu berɛ, kyɛ ɔkɔ oo, anaa ɔba oo, na aseɛ nyemenenyemene ne lale berɛ mbaen.”

Luka 21:24

Bɛkɔtotɔ ngrandɛ noa, bɛkɔhye bɛ nnure bɛkɔhɔ maen maen mukoraa so; na Amaenmaensofoɛ kotiatia Yerusalem so koodwu kyɛ Amaenmaensofoɛ nemɔ bɛ mmerɛ ne kɔwa nu ɔ.

Deuteronomi 28:64

“AWURADE kɔmaa ɛkɔbɔ aya wɔ maen maen mukoraati so, fite aseɛ ti kɔka ye ti; na berɛ yeɛ ɛkɔso nyameɛ foforɛ biemɔ bɔ bafa mmakaa ne nyɔboɛ bayɔ ɔ, bɔ wɔ anaa wɔ nana mɔ bɛnze bɛ ɔ.

Deuteronomi 32:26

Ngane kyɛ, “Ngɔmaa bɛkɔbɔ aya bɛkɔhɔ dedeede, ná mama bɛ nwo ngayeɛ afi mmenia ti anu koraa.”

Deuteronomi 4:27

AWURADE kɔbɔ ɛmɔ kɔsande kɔhɔ maen maen nemɔ aso, na ɛmɔ nu kãa bie yeɛ bekonya ngoa wɔ maen maen bɔ AWURADE kɔhwe ɛmɔ kɔhɔ so ne aso ɔ.