Hesekiel 39:4 - AHYERƐLƐ KRONGRON

⁴ Ɛkɔtɔ wɔ Yisrael mmokaa so, ɛne wɔ lɔen amukoraa ne maen maen bɔ bɛboka wɔ so ne yeɛ ɛmɔkɔtotɔ ɔ. Na ngɔfa wɔ ngɔma nnomaa ahoroɔ bɔ bɛkye ngaka bedi, ɔne ngaka aboyaa maa bekoli.

Hesekiel 39:4 Iomraidhean Croise

Yesaya 14:24

Asafo AWURADE ata ndaen kyɛ, “Kyɛbɔ masusu ye nwo ne, sɔ ala yeɛ okosi ɔ, kyɛbɔ mayɛ m’adwene ne, sɔ ala yeɛ ɔkɔwa nu ɔ:

Yesaya 14:25

kyɛ ngɔsɛkye Asiria pasaa wɔ m’aseɛ so, yeɛ ngotiatia ye so wɔ me mmokaa nemɔ aso, ye kɔnnua ne kɔye kofi bɛ kɔme anu, na ye adesoa bɔ ɔla bɛ bati ne kɔye kofi berɛ.”

Yeremia 15:3

“Na ɛhawo ahoroɔ nna yeɛ ngɔprapra ngogua bɛ so ɔ, AWURADE noa dwirɛ ɛne. Bɛ ole ngrandɛ bɔ okohũhũ bɛ ɔ, ngyea bɔ bɛkɔtete bɛ naen ɔ, yeɛ ewienu nnomaa ne aseɛ so ngaka aboyaa bɔ bekohũhũ mmenia ná bɛkɔtete bɛ naen ɔ.

Yeremia 25:33

“Na bɛ bɔ AWURADE kohũhũ bɛ sɔ kyẽa ne, bɛkɔsamo berɛ kofi aseɛ noa kɔkã ye noa. Bengosu bɛ, bɛngɔboaboa bɛ noa, yeɛ bengosie bɛ, na bɛkɔkakyi fofoɛ wɔ aseɛ so.

Hesekiel 29:5

Ngofindi wɔ ngɔto ɛserɛ so, ɛne w’asue nemɔ anu tire amukoraa, ɛkɔɔtɔ aseɛ pralaa so, bɛngɔboaboa wɔ noa bengosie wɔ; na ngɔfa wɔ ngɔyɛ aleɛ ngɔma eburo ngaka ne ewienu nnomaa.

Hesekiel 33:27

Se bɛ kyɛ, AWURADE Nyameɛ nwa nyoo: Kyɛ nde ase ye, nahorɛ nu, bɛ bɔ bɛwɔ kurofoen nemɔ aso ne, bɛkɔtotɔ ngrandɛ noa; bɔ ɔwɔ eburo ne koso, ngɔfa ye ngɔma ngaka aboyaa maa bɛkɔhye ye bekoli; yeɛ bɛ bɔ bɛwɔ anwoserɛ afealeɛ mɔ nu, ɔne nyɔboɛ bɔ wasi sua ɔ mɔ nu koso, ewue anwonyerɛ yeɛ okohũ bɛ ɔ.

Hesekiel 35:8

Ngɔfa mmenia bɔ batotɔ ɔ ngoyi ye mmokaa nemɔ aso tɛkyɛ: na bɛ bɔ batotɔ ngrandɛ noa ne, wɔ pambaa nemɔ aso ne wɔ bɔnza nemɔ anu ɔne w’asue bɔnga mukoraa nu yeɛ bekogua ɔ.

Hesekiel 38:21

Na ngɔfrɛ ngrandɛ maa ɔkɔwa ye so wɔ me mmokaa ne amukoraa so, na ebiala kɔfa ngrandɛ kɔhɔ obiɛngo so, AWURADE Nyameɛ noa dwirɛ ɛne.

Hesekiel 39:5

Aseɛ pralaa so yeɛ ɛkɔtɔ ɔ, ofikyɛ me yeɛ mahã ɔ, AWURADE Nyameɛ noa dwirɛ ɛne.

Nahum 3:3

Pɔngɔhanɛfoɛ bɛko bɛkɔ bɛ nyunu, bɛ ngrandɛ te yerɛmyerɛm, yeɛ bɛ pealɛɛ te hyɛmhyɛm, bɛ bɔ batotɔ ɔ bɛte pee, efuin mɔ bahonhɔn bɛ bahɔ anwuro, efuin mɔ somaa bɔ bɛka a bennwu ye noa ɔ, na bɛfofo efuin mɔ so besoti.