Hesekiel 32:2 - AHYERƐLƐ KRONGRON

² Sona awa, bɔ Misraim hene Faro nwo awuye, ná se ye kyɛ, “Ebu wɔ nwo kyɛ ɛte maen maen mɔ nu gyata akrɔngrɔma, nakoso ɛte kyɛ bonzu bɔ ɔla ɛpo nu ɔ; ehuru totɔ wɔ w’asue nemɔ anu, ɛfa wɔ gya boro nzue ne, na ɛponda b’asue nemɔ.

Hesekiel 32:2 Iomraidhean Croise

Gyenesise 49:9

Yuda te gyata akrɔngrɔma, bɔ eku ngaka di ná esa bada wɔ boso ɔ. Okunduni, na obutuli berɛ kyɛ gyata, ɔte kyɛ gyata beleɛ; nwa yeɛ onzuro bɔ okotingye ye ɔ?

YOB NWOMAA NE 41:23

Ye nwonaen bɔ wabu wagua so ne, nu mia, ɔyɛ se kateree gua ye nwo, na ɔnwoso.

YOB NWOMAA NE 7:12

Aso nde ɛpo anaa ɛpo nu sasrabɔnzam, bɔ ɛma awɛmvoɛ bɛ nye li me si ɔ?

Anyandera 25:26

Teneneeniɛ bɔ ɔkɔma ye nwo ate kɔma bɔnefoɛ kɔsɛkye ye ne, ɔte kyɛ mbombonzue bɔ baponda ye, anaa abura nu nzue bɔ basɛkye ye ɔ.

Anyandera 28:15

Maen panyi bɔ ɔfa atianuserɛ di mmenia bɔ bɛyɛ anwumvo so ne, ɔte kyɛ gyata bɔ opo anaa kwabrafo bɔ ye nye aboro ɔ.

Anyandera 30:30

Gyata, bɔ ye nwo yɛ se tra ngaka amukoraati, bɔ ɔnnwati mvi ebiala nyunu ɔ,

Yesaya 27:1

Sɔ kyẽa ne, AWURADE kɔfa ye ngrandɛ serɛserɛ pirikua suronyisuronyi ne kɔhwe ɛlɛngyɛen suronyisuronyi, bɔ ɔte ewoo bɔ ye nwo yɛ nyera ne ye so. Ɔte ɛlɛngyɛen suronyisuronyi bɔ ɔbenzebenze ye nu ɔ, na AWURADE kosa kohũ sasrabɔnzam bɔ ɔwɔ ɛpo nu ne.

Yesaya 51:9

O AWURADE tumi, kanyane wɔ nwo, kanyane wɔ nwo, kyire w’anwoserɛ! Kanyane wɔ nwo kyɛbɔ ɛyɔle ye daa daa ne, kyɛbɔ ɛyɔle ye daa tetetete aworɛ ndoatoasoɛ nu ne. Aso nna wɔ yeɛ ɛpepɛle Rahabo nu ahuronzi ahuronzi ná ɛfale nikyee sinane ɛpo nu sasrabɔnzam ne ɔ?

Yeremia 4:7

Gyata bie afi ye sosorɛ bo wafite, na maen maen sɛkyelɛniɛ ne, waye ye ti ɔba; wafi ye atenaleɛ berɛ ɔba, kyɛ ɔbaabɔ wɔ maen ne; na wɔ nguro nemɔ kɔkakyi kurofoen, bɔ sona biala ngɔtena so ɔ.

Yeremia 46:7

Nwa yeɛ ɔ́ba kyɛ asue Naele, bɔ ye nzue bu fa so kyɛ asue mɔ ye?

Yeremia 46:8

Misraim ma ye nwo so kyɛ Naele, kyɛ asue mɔ bɔ bayi bebu bɛfa so ɔ. Ɔnwa: Ngoyi ngɔkata aseɛ so; ngɔsɛkye kuro ne, ɔne nu ama mɔ.

Yeremia 9:18

Ɛ́mɔma bɛyɛ ndɛndɛ besu yɛ, amaa ɔnate so yɛ nye aporo moen, ná yɛ nye so aporo nzue.

Hesekiel 26:17

Na bɛkɔbɔ wɔ nwo awuye bekose wɔ kyɛ, ‘O kuro piri bɔ ale dumaa ɔ, bɔ mmenia bɔ bɛkɔ ɛpo ɔ bɛɛtenane wɔ so ɔ, kuro bɔ né wɔ nwo yɛ se wɔ ɛpo so ɔ, ɛne wɔ nu ama, ɛmɔmane ɛmɔ nwo suronyi tɔle mmenia mukoraa bɔ bɛte berɛ ɔ so.

Hesekiel 27:2

“Afei wɔ, Sona awa, bɔ Tiro nwo awuye,

Hesekiel 27:32

Bɛ suɛ ne anu, bɛbɔ wɔ nwo awuye, na bɛbɔ wɔ nwo awuye kyɛ, ‘Kuro beni yeɛ né ɔte kyɛ Tiro bɔ afei de wayɛ pasaa wɔ ɛpo nu e?

Hesekiel 28:12

“Sona awa, bɔ Tiro hene nwo awuye, ná se ye kyɛ, AWURADE Nyameɛ nwa nyoo: Né ɛte sona bɔ odi mu paa nwo nhwɛsoɛ, bɔ nworɛ ayi wɔ ti anu tɛkyɛ, ná w’anwonyemene di mu paa ɔ.

Hesekiel 29:15

Ɔkɔyɛ bɔ wabrɛ ye nwo ase paa wɔ ahennie mɔ nu ɔ, na ɔngɔmoma ye nwo so ko le wɔ maen maen mɔ so. Na ngɔbrɛ bɛ ase bɔkɔɔ bɔ bengoli maen maen mɔ so ko ɔ.

Hesekiel 29:3

Dwudwo, ná se kyɛ, AWURADE Nyameɛ nwa nyoo, “Tie, meko metia wɔ, Misraim hene Faro, wɔ, sasrabɔnzam piri bɔ ɛla w’asue mɔ nu, bɔ ɛnwa: ‘M’asue Naele te me bɔbɔ me deɛ, na me bɔbɔ yeɛ nyɔ mane me nwo ɔ.’

Hesekiel 32:16

Awuye he yeɛ bɛkɔfa bekosu ye ɔ: Maen maen mmaa mmrasua mɔ bekosu ye; bekosu Misraim ne ye lɔen worawora ne amukoraa, AWURADE Nyameɛ noa dwirɛ ɛne.”

Hesekiel 32:18

“Sona awa, bɔ Misraim lɔen worawora ne ti so awuye, na bɛ ne maen maen atitire mɔ bɛ mma mmrasua nemɔ, gyi bɛ gua aseɛ bo dɔ maa bɛɛboka mmenia bɔ bahɔ ɛborɔ kumaa nu dɔ ne aso.

Hesekiel 34:18

Aso wanyɛ ɛmɔ anyesɔ kyɛ ɛmɔdidi nekaa bɔ berɛ ndire te paa ɔ, bɔ yeɛ ɛmɔfa ɛmɔ gya betiatia ɛmɔ ndire bɔ waha ne aso ɔ? Aso wanyɛ ɛmɔ anyesɔ kyɛ ɛmɔno nzue gyengɔgyengɔ ɔ, bɔ yeɛ ɛmɔfa ɛmɔ gya bɛponda bɔ waha ne ɔ?

Hesekiel 38:13

Na Hyeba ne Dedan, yeɛ Tasise dwadifoɛ ne ye nguraa nu ama mukoraa bekobisa wɔ kyɛ, ‘Awa kyɛ ɛbaafa koɛ nu nzesadeɛ hɔ ɔ? Aboaboa wɔ lɔen noa kyɛ ɛbaafẽ nningyein kɔ anaa, kyɛ ɛbaasesa ɛdwetɛ ne sikaa kɔkorɛ, nyɛmmoa ne nningyein, ná ɛfa koɛ nu nzesadeɛ pee ɛkɔ anaa?’

Numeri 24:9

Okunduni, na obutu berɛ kyɛ gyata, ɔte kyɛ gyata beleɛ; nwa yeɛ okotingye ye ɔ? Ebiala bɔ okoyira wɔ ne, Nyameɛ koyira ye, yeɛ ebiala bɔ ɔkɔnoma wɔ ne, Nyameɛ kɔnoma ye.”

Mateo 7:24

“Yiti ebiala bɔ ɔte me dwirɛ he ná odi so nen, ngɔfa ye ngɔtoto nworɛniɛ bie bɔ osili ye sua wɔ nyɔbotaen so ɔ nwo.