Hesekiel 24:6 - AHYERƐLƐ KRONGRON

⁶ “Yiti AWURADE Nyameɛ nwa nyoo: ‘Awuelilɛ kuro, wɔ yaakɔ! Wɔ bɔ ɛte dadesɛn bɔ nu ali naakye, bɔ ye naakye ne omvi nu ɔ! Yeye naen porɛ porɛ ne fi nu ngoko ngoko, bɔ ɛngɔpa nu ngɔyakyi bie ɔ.

Hesekiel 24:6 Iomraidhean Croise

2 Samuel 8:2

Dawide lili Moabofoɛ koso so ngonim. Ɔmaa bɛlelale aseɛnwo berɛ fekue fekue nza. Ohuni fekue nyɔ, na ɔmane fekue ko nyane ye ti didili nu. Yiti Moabofoɛ bɛɛyɛle Dawide ngoaa bɔ né betua ɛtoɔ bɛma ye ɔ.

2 Ahemvo 21:16

Asa koso, Manase hane mogya bɔ odi be ɔ pee guale, kɔpem kyɛ ɔhane mogya guale Yerusalem nekaa biala ɔ. Asora bɔne bɔ ɔhwehwene Yuda hɔle nu maa ɔnate so bɛyɔle bɔ ɔte bɔne wɔ AWURADE nyunu ne.

2 Ahemvo 24:3

AWURADE yeɛ ɔhyɛle sɔ ɛhawo ne maa ɔwale Yuda so ɔ, kyɛ ɔfa ɔpɛ Yuda asue fi ye nyunu, ɔnate Manase bɔne amukoraa bɔ ɔyɔle ne ati,

2 Ahemvo 24:4

ɔne mogya bɔ odi be bɔ ɔhã guale ne ati. Ofikyɛ ɔhane mogya bɔ odi be ɔ guale wɔ Yerusalem nu amukoraa, na né AWURADE ayɛ ye adwene kyɛ ɔngɔfa sɔ bɔne ne ngɔhyɛ.

Yeremia 2:22

Ɔwɔ nu kyɛ ɛfa kondu bia, bɔ saminaen pee boka so ɔ, nakoso w’amumuyɛɛ te ngekalewa wɔ me nye so, AWURADE Nyameɛ noa dwirɛ ɛne.

Yeremia 6:29

Afaa ne, ogye wuronyiwuronyi, see ohuro sum ne; ye nwo pɔlɛ ne kɔ so mbaen, ofikyɛ bendu bɔnefoɛ nemɔ abo.

Hesekiel 11:11

Sɔ kuro he ngɔyɛ ɛmɔ turonzemaa, yeɛ ɛmɔngɔyɛ naen wɔ nu; na ngobua ɛmɔ ndɛen wɔ Yisrael wɛen so.

Hesekiel 11:3

Bɛ yeɛ bɛnwa: ‘Mmerɛ bɔ bɛfa besisi sua ne onnya oddwuli. Kuro he ole turonzemaa ne, yeɛ yɛ ole naen ne.’

Hesekiel 22:12

Mmenia wɔ wɔ nu bɔ bede fea-ase-ma beku mmenia ɔ. Ede nzihoɛ mbemanim, na esisi ebiɛngo enya wɔ nwo; nakoso me de, wɔ wora afi me, AWURADE Nyameɛ noa dwirɛ ɛne.

Hesekiel 22:2

Wɔ, Sona awa, ekobua ndɛen anaa, ekobua awuelilɛ kuro ne ndɛen anaa? Nzaade maa onwu ye akyiwadeɛ bra bɔ wabɔ amukoraa.

Hesekiel 22:27

Ye mbanyi bɔ bɛwɔ ye nu ne, bɛte kyɛ mbataku bɔ bɛtete naen bɔ bahye ye ɔ nu ɔ. Bɛkã mogya begua, na beku mmenia maa ɔnate so benya anwonyadeɛ fiɛ.

Hesekiel 22:3

Kã kyɛ, ‘AWURADE Nyameɛ nwa nyoo: Kuro bɔ ɔkã mogya gua wɔ ye nu ɔ, ye ayieleɛ mmerɛ adwu, kuro bɔ ogyina mmosoen mɔ ɔfa gua ye nwo fiɛ ɔ!

Hesekiel 24:3

Bu ɛlɔenyɛlɛ abusua ne anyandera, ná se bɛ kyɛ, AWURADE Nyameɛ nwa nyoo: Fa kukue ne sie see so, fa sie so, hwie nzue gua nu;

Hesekiel 24:9

Yiti AWURADE Nyameɛ nwa nyoo: Awuelilɛ kuro, wɔ yaakɔ! Me koso ngɔboaboa nwuaka ne noa maa ɔkɔhɔ anwuro.

Yoel 3:3

Bagua serewa bahyɛ me maen, bafa abɛɛmaa bale gyanderaniɛ, yeɛ batɔne abaayaa bale nzaa bano.

Obadia 1:11

Sɔ kyẽa ne, egyinane nekaa bie yele wɔ nye, sɔ kyẽa bɔ ɛwɔfoɛ mɔ sesale ye anwonyadeɛ bɛhɔle ne, bɔ amanvrafoɛ bewurale ye pambim mɔ nu, ná beguale serewa bɛhyɛle Yerusalem bɛfale ne, wɔ koso eli tole bɛ so.

Yona 1:7

Yeɛ besisele bɛ nwo bɛ nwo kyɛ, “Ɛmɔbra maa yɛgua serewa, amaa ɔnate so yanwu sona horɛ bɔ ye ti yeɛ sɔ musue he wato yɛ ye.” Yiti beguale serewa, na serewa ne yele Yona.

Mika 7:2

Mmeni paa boso amini afi aseɛ ye aso, na teneneeniɛ biala nne mmenia nu; bɛ mukoraa bɛtetɛ bɛpena mogya bɛkã begua, na ebiala sua oliɛma ngaen ɔpena ye ɔkye ye.

Nahum 3:1

Awuelilɛ kuro, wɔ yaakɔ oo! Ngondombo ne awerɔm awue yeɛ wayi ye to ɔ, apaabɔlɛ bo ɔngɔpɛ wɔ ye nu.

Nahum 3:10

Nakoso bɛhyele ye nnure bɛhɔle, na ɔhɔle ngoaasolɛ nu; ye ngwadaa mɔ koso, bɛtele bɛ ti bɛbɔle mane bɛ nu tetele nzɔkanzɔka wɔ borɔnoɛ biala ngwandaa; beguale serewa bɛfa bɛhyɛle ye animnyamfoɛ nemɔ bɛfale, na beguale ye atitirefoɛ nemɔ amukoraa ngɔnzɔngɔnzɔ.

Mateo 23:35

Ye sɔ ne ati, mogya tenenee amukoraa bɔ bahwie bagua aseɛ so, ofi teneneeniɛ Abel mogya so kodwu Barakia awa Sakaria, bɔ ɛmɔhuni ye wɔ nekaa krongron berɛ ne afɔleɛ bokyea ne b’afia ne, bɛ mogya ne nwo asotwe kɔwa ɛmɔ so.

Deuteronomi 23:13

Fa bakaa boka w’akodeɛ ne aso, amaa sɛ ɛkɔ bakaa so wɔ asikyeleɛ ne asi dɔ a, afa afu kumaa, na sɛ eyie a, akata so.

Yosua 10:22

Na Yosua sele kyɛ, “Ɛ́mɔye nyɔbotaen ne béfi nyɔboɛ bɔ wasi sua ne noa, ná ɛ́mɔye ahemvo nnu ne béfi nu bɛ́brɛ me.”

Nyekyire 17:6

Na nwuni kyɛ anwoteefoɛ mogya ne Yesu adanzefoɛ mogya wabo braa ne; na nwuni ye nen, ɔyɛle me nwanwa paa.

Nyekyire 18:24

Na ye nu yeɛ benwuni ngɔmhyɛlɛfoɛ ne anwoteefoɛ ne mmenia amukoraa bɔ bahũ bɛ wɔ aseɛ so ɔ bɛ mogya ɔ.”