Hesekiel 20:1 - AHYERƐLƐ KRONGRON

¹ Afoɛ bɔ ɔtɔ so nzoo ne, bosome nnu ne anu, ye eleburu ne aso, Yisrael mbanyi nemɔ anu biemɔ wale AWURADE berɛ kyɛ bɛbaabisa ye bɔ odi kyɛ bɛyɔ ɔ, na bɛtenatenane me nyunu.

Hesekiel 20:1 Iomraidhean Croise

2 Ahemvo 3:13

Elisa sele Yisrael hene kyɛ, “Ɛpena nzu me dɔ? Kɔ ɛse ngɔmhyɛlɛfoɛ ne eni ngɔmhyɛlɛfoɛ nemɔ dɔ.” Nakoso Yisrael hene buale ye kyɛ, “Daabi, ɔyɛ me kyɛ AWURADE yeɛ waboa yɛ ahemvo nza ye yɛ noa kyɛ ɔbaafa yɛ wura Moabo sa ɔ.”

2 Ahemvo 6:32

Yiti ɔsomane sona kyɛ ɔhɔ Elisa berɛ. Né Elisa te ye awuro, bɔ né mbanyi mɔ tete ye nwo berɛ ɔ. Anzana bɔfoɛ ne baadwu berɛ ne, Elisa hã hyirele mbanyi nemɔ kyɛ, “Ɛmɔse kyɛ kodiawuniɛ ne, wasoma sona kyɛ ɔɔpɛ me ti ɔ? Sɛ bɔfoɛ ne badwu wa a, ɛmɔnea kyɛ ɛmɔkɔto anoa ne asi bɔ ongonya ate ngowura nu ɔ. Mete ye mene Yisrael hene ye gya bo so kyɛ oli ye si ɔba.”

Yesaya 29:13

Na AWURADE sele kyɛ, “Maen he, bɛfa bɛ noa mbaen yeɛ bɛtwe bepingye me ɔ, bɛ noa mbaen yeɛ bɛfa bedi me ni ɔ, nakoso b’ahone nu de, bembingye me koraa, na esurolɛ bɔ besuro me ne, ɔte kuro sona ahyɛdeɛ bɔ basua ye mbaen ɔ;

Yesaya 58:2

Hmmm, bɛpena me si atee daa biala, bekuro kyɛ benwu m’atee mɔ, kyɛ gyamea bɛte maen bie bɔ bɛyɔ bɔ ɔtengyɛ ɔ, bɔ bambo bɛ Nyameɛ ahyɛdeɛ ɔ. Bebisa ndɛen turoloo befi me berɛ, na bekuro kyɛ bekopingye Nyameɛ ɔ.

Yeremia 21:2

“Mesrɛ wɔ, bisa AWURADE noa dwirɛ ma yɛ, ofikyɛ Babilɔn hene Nebukadenesa ɔbaafa koɛ toa yɛ. Ebiaa AWURADE konwu yɛ anwumvoin kyɛbɔ ye anwanwadeɛ amukoraa te ne, amaa ɔnate so Nebukadenesa wayakyi yɛ wahɔ.”

Yeremia 37:17

Afei Nana Sedekia somane maa bɛɛfale ye bɛwale ye nyunu. Na Nana bisale ye mvealeɛ nu wɔ ye awuro berɛ kyɛ, “Aso AWURADE ala edwirɛ bie ali wahyire wɔ anaa?” Yeɛ Yeremia buale kyɛ, “Yoo, edwirɛ wɔ berɛ.” Afei Yeremia toale so kyɛ, “Bɛkɔfa wɔ bekowura Babilɔn hene sa.”

Hesekiel 1:2

Na kyẽa bɔ ɔtɔ so nnu wɔ bosome ne anu ne, (bɛhyele Nana Yehoakim nnure bɛhɔle ɔ, né ye afoɛ nnu ɛne),

Hesekiel 20:2

Na AWURADE lale ye dwirɛ ali hyirele me kyɛ,

Hesekiel 24:1

Na ɔwale kyɛ, ye afoɛ ngona ne anu, bosome buru ne anu, ye eleburu ne aso, AWURADE lale ye dwirɛ ali hyirele me bieku kyɛ,

Hesekiel 26:1

Na ɔwale kyɛ, ye afoɛ buru ne ko ne anu, kyẽa bɔ oli moa wɔ bosome ne anu ne, AWURADE lale ye dwirɛ ali hyirele me kyɛ,

Hesekiel 29:1

Afoɛ buru ne anu, bosome buru ne anu, ye eleburu ne nyɔ ne aso, AWURADE lale ye dwirɛ ali hyirele me kyɛ,

Hesekiel 29:17

Na ɔwale kyɛ, afoɛ aburanyɔ ne nzoo ne anu, bosome bɔ oli moa ne, ye kyẽa bɔ oli moa ne, AWURADE lale ye dwirɛ ali hyirele me kyɛ,

Hesekiel 30:20

Afoɛ buru ne ko ne anu, bosome bɔ oli moa ne anu, ye ɛlɛsoo ne aso, AWURADE lale ye dwirɛ ali hyirele me kyɛ,

Hesekiel 31:1

Afoɛ buru ne ko ne anu, bosome nza ne anu, ye kyẽa bɔ oli moa ne, AWURADE lale ye dwirɛ ali hyirele me kyɛ,

Hesekiel 32:1

Afoɛ buru ne nyɔ ne anu, bosome buru ne nyɔ ne anu, kyẽa bɔ oli moa ne, AWURADE lale ye dwirɛ ali hyirele me kyɛ,

Hesekiel 40:1

Bɛhyele yɛ nnure bɛhɔle ne, ye afoɛ aburanyɔ ne nnu ne anu, afoɛ n’ahyɛaseɛ bosome ne anu eleburu ne aso, bɛbɔle kuro ne ɔ, né ye afoɛ buru ne nna ɛne, sɔ kyẽa ne ala yeɛ AWURADE tumi wale me so ɔ, na ɔfale me wale berɛ.

Hesekiel 8:1

Afoɛ bɔ ɔtɔ so nzia ne, bosome bɔ ɔtɔ so nzia ne anu, ye elennu ne aso, né nde m’awuro bɔ Yuda mbanyi bɛtete me nyunu ɔ, na AWURADE Nyameɛ tumi wale me so wɔ berɛ.

Hesekiel 8:11

Né mmienzua aburasoo bɔ bɛte Yisrael mbanyi ɔ, bɔ Safan awa Yaasania boka bɛ so ɔ begyigyi mmosoen nemɔ anyunu berɛ. Né ebiala tira ye see kulie, na ɛyɛɛ nwosina ne dwɔsole munguu.

Mateo 22:16

Na bɛsomane b’asuafoɛ mɔ ne Herodefoɛ maa bɛwale ye berɛ beebisale ye kyɛ, “Kyerɛkyerɛniɛ, yɛse kyɛ ɛte nahorɛniɛ, na ekyirekyire Nyameɛ atee ne turoloo, ɛnyɛ nyeyemuɛ; ofikyɛ ɛmva wɔ nye ndo mmenia bɛ dibea.

Luka 10:39

Né Maata le aliɛma brasua bie bɔ bɛfrɛ ye Maria ɔ, na ɔɔtenane Yesu gya bo berɛ otiele ye ngyerɛkyerɛ.

Luka 2:46

Na ɔwale kyɛ, ye ɛlɛsa ne aso, beenwuni ye wɔ asɔneyɛɛ sua ne anu kyɛ ɔte akyerɛkyerɛfoɛ mɔ b’afia, bɔ ótie bɛ ná óbisabisa bɛ dwirɛ ɔ.

Luka 8:35

Yeɛ mmenia fite wale kyɛ bɛbaanea edwirɛ bɔ wasi ne; na bedwuli Yesu nwo berɛ nen, benwuni biaa bɔ sunzummɔne mɔ batu bafi ye nu ne, kyɛ ɔte Yesu gya bo berɛ, owura ataadeɛ, ná ye adwene wɔ berɛ ɔ, na besurole.

Asomafoɛ 22:3

“Nde Yudaniɛ, bɛwole me Taaso bɔ ɔwɔ Kilikia manzini nu. Bɛtetele me wɔ kuro ye anu, na Gamaliɛl yeɛ ohyirele me nikye ɔ. Ɔfale yɛ nana mɔ mmeraa ne hyirele me nikyee pɛpɛɛpɛ, na nduli me nwo nziele berɛ mane Nyameɛ kyɛbɔ ɛnɛ ye ɛmɔ amukoraa bɛyɔ ne.