Hesekiel 14:7 - AHYERƐLƐ KRONGRON

⁷ Ofikyɛ ebiala bɔ ofi Yisrael awuro ama nu, anaa ɛwɔfoɛ biala bɔ waatena Yisrael, bɔ ɔba ngɔmhyɛlɛniɛ berɛ babisa me maa mekyire ye bɔ odi kyɛ ɔyɔ ɔ, wɔ aberɛ bɔ wahwe ye nwo wafi me nwo, wama ye ahone abata ye mmosoen mɔ nwo, ná wafa amumuyɛɛ bɔ ɔte ye sundidua wato ye nyunu ne, me AWURADE, me bɔbɔ ngɔma ye mmuayɛɛ.

Hesekiel 14:7 Iomraidhean Croise

Ɛksadɔso 12:48

Na sɛ ɛwɔfoɛ bie ɔne wɔ yeɛ bɛte ɔ, ná okuro kyɛ odi Abɔtra aluolue ne ɔye AWURADE ayɛ a, ye de maa bɛpɛ ye nwo ama mmienzua mukoraa bɛ bienzua, amaa wanya ye nwo ate wali bie. Ɛhe kɔmaa ɔkɔyɛ kyɛ maen ne anu niɛ; nakoso bɔ bɛppɛle ye bienzua ne de, ɔnzɛ kyɛ odi bie.

Ɛksadɔso 20:10

Nakoso kyẽa bɔ ɔtɔ so nzoo ne de, ɔte afofikyẽa ma AWURADE wɔ Nyameɛ. Nnɛyɔ adwuma biala sɔ kyẽa ne: wɔ oo, ɛwa bienzua oo, ɛwa brasua oo, w’akoaa oo, w’afaneɛ oo, w’ayɛmmoa oo, anaa ɛwɔfoɛ bɔ ɔte wɔ kuro ɔ.

Yesaya 63:17

O AWURADE, nzu ati yeɛ amaa yali w’atee nwo makyebu, bɔ yayɛ asoserɛ maa yiti yɛnzuro wɔ e? Sa bra, ɔnate wɔ ngoaa ti, w’agyapadeɛ mmusua kure nemɔ ati.

Yeremia 37:17

Afei Nana Sedekia somane maa bɛɛfale ye bɛwale ye nyunu. Na Nana bisale ye mvealeɛ nu wɔ ye awuro berɛ kyɛ, “Aso AWURADE ala edwirɛ bie ali wahyire wɔ anaa?” Yeɛ Yeremia buale kyɛ, “Yoo, edwirɛ wɔ berɛ.” Afei Yeremia toale so kyɛ, “Bɛkɔfa wɔ bekowura Babilɔn hene sa.”

Hesekiel 3:20

Yeɛ sɛ teneneeniɛ odi ye tenenee nwo makyebu ɔkɔyɔ amumuyɛɛ, ná mefa sundidua meto ye atee nu a, okowu. Na ɔnate kyɛ ammɔ ye kɔkɔ ne ati, okowu ye bɔne nu, na bɛngɔkaye ye tenenee bra bɔ ɔbɔle ne; nakoso ye mogya de, wɔ berɛ yeɛ ngobisa ngofi ɔ.

Hosea 4:14

Sɛ ɛmɔ mma mmrasua mɔ bɛbɔ gyandera, anaa sɛ ɛmɔ aye mɔ bɛsɛkye agyaa a, mengɔhwe bɛ so; ofikyɛ mmienzua nemɔ bɔbɔ deinn bɛkɔ gyanderafoɛ nemɔ nekaa, na bɛ ne asɔneyɛɛ so gyanderafoɛ yeɛ bɛbɔ afɔleɛ ɔ. Yiti maen bɔ nimdeɛ abɔ ye ne, ɔkɔbɔ.

Hosea 4:5

Yiti ekosoti eyia, na ngɔmhyɛlɛniɛ ne koso ɔne wɔ bekosoti kɔngɔen, na ngonua wɔ maame boso.

Hosea 9:10

Nwuni Yisrael kyɛ ɛserɛ so bobe mma. Nwuni ɛmɔ nana mɔ kyɛ bobe mma bɔ wali moa wasu wɔ ye sulɛ mmerɛ bɔ oli moa nu ɔ. Nakoso bedwuli Baal Peɔ nen, beguale bɛ nwo fiɛ bɛbɔle nyanzoen bra, na bɛ bɔbɔ bɛkakyili akyiwadeɛ te kyɛ nningyein bɔ né bekuro ne ala.

Lewitikɔso 16:29

“Odi kyɛ ɛhe yɛ ahyɛdeɛ ma ɛmɔ: bosome nzoo ne, ye kyẽa bɔ ɔtɔ so buru ne, odi kyɛ ɛmɔkye ɛhɔen; kuromani oo, ɛwɔfoɛ bɔ waatena ɛmɔ nu oo, nnɛma ebiala yɔ adwuma biala.

Lewitikɔso 20:2

“Sá ka kyire Yisraelfoɛ kyɛ: Yisraelniɛ biala anaa ɛwɔfoɛ biala bɔ ɔte Yisraelfoɛ maen nu, bɔ yeɛ ɔkɔfa ɔwa biala kɔbɔ afɔleɛ kɔma bosoen Moleke ne, odi kyɛ beku ye; aseɛ ne aso mmenia bɛ́boro ye nyɔboɛ béhu ye.

Lewitikɔso 24:22

Mmeraa bɔ bɛfa bedi kuromani ne, ye ala yeɛ ɔsɛ kyɛ bɛfa bedi ɛwɔfoɛ koso ɔ: ofikyɛ Me ole AWURADE ɛmɔ Nyameɛ.”

Numeri 15:15

Yisraelfoɛ de, ahyɛdeɛ komapɛ yeɛ ɔla berɛ ma ɛmɔ ne ɛwɔfoɛ bɔ baatena ɛmɔ nu ne ɔ; odi kyɛ ɔyɛ ahyɛdeɛ afebɔɔ wɔ ɛmɔ aworɛ ndoatoasoɛ nu. Odi kyɛ ɛmɔ ne ɛwɔfoɛ ne bɛyɛ pɛ wɔ AWURADE nyunu.

Numeri 15:29

Ɛ́mɔma mmeraa komapɛ ne ala yeɛ ɔla berɛ ma ebiala bɔ ɔkɔyɔ mvomsoɛ ɔ, kyɛ ɔte Yisrael maen baa oo, anaa ɛwɔfoɛ biala bɔ waatena ɛmɔ nu oo.

Deuteronomi 29:19

Na ebiala bɔ ɔkɔte apam ndaen he anu dwirɛ, ná ɔkɔdwene saleɛ kɔma ye nwo kyɛ, ‘Ɔwɔ nu kyɛ meyɛ asoserɛ de, nakoso ngonya asomdwee’ nen, (sɔ nikyee ne ma sona bɔ ɔtengyɛ ne bɔnefoɛ bewu bɛbɔ nu),

Yuda 1:19

Bɛ yeɛ bɛfa mbakyembakyemuɛ bɛba ɔ, Sunzum ne ɔnne bɛ nu, na bɛte mmenia bɔ bedi anwoɔnaen si ɔ.