Hesekiel 14:6 - AHYERƐLƐ KRONGRON

⁶ “Yiti kã kyire Yisrael awuro ama kyɛ, AWURADE Nyameɛ nwa nyoo: Ɛ́mɔsakyera ɛmɔ adwene ná ɛ́mɔyakyi ɛmɔ mmosoen nemɔ si lilɛ; ná ɛ́mɔhwe ɛmɔ nwo befi ɛmɔ akyiwadeɛ amukoraa anwo.

Hesekiel 14:6 Iomraidhean Croise

2 Aberɛso Dwirɛ 29:6

Ofikyɛ yɛ nana mɔ banni nahorɛ bamma AWURADE, yeɛ bayɔ bɔ ɔte bɔne wɔ AWURADE yɛ Nyameɛ nyunu ɔ. Bapo AWURADE, baye bɛ nye bafi nekaa bɔ AWURADE te ne, na bakakyi bɛ si bama ye.

Yesaya 2:20

Sɔ kyẽa ne, mmenia b’ɛdwetɛ amoen ne bɛ sikaa kɔkorɛ amoen bɔ bayɔ bama bɛ nwo, bɔ bɛsɔne bɛ ne, bekogyi bekogua bɛkɔma mmurokuruwa ne mbena.

Yesaya 30:22

Na w’amoen mɔ bɔ bafa ɛdwetɛ baboro bɛ nwo, ɔne bɔ bafa sikaa kɔkorɛ baboro bɛ nwo ne, ɛkɔfa efiɛ kɔhã bɛ, ekofindi bɛ kogua kyɛ manzaa asiaa, na ekose bɛ kyɛ, “Ɛ́mɔfi me so bɛhɔ!”

Yeremia 13:27

Manwu w’agyaasɛkyelɛ ne, wɔ ehurolɛ nu ndeateamuɛ ne, w’animguaseɛ gyandera ne, yeɛ w’akyiwadeɛ yɔleɛ wɔ eburo mmokaa nemɔ aso ne. Ao Yerusalem, wɔ yaakɔ! Ɔkwaadwu kyinzu koraka né wɔ nwo ate.

Hesekiel 14:4

Yiti dwudwo kyire bɛ ná se bɛ kyɛ, AWURADE Nyameɛ nwa nyoo: Ebiala bɔ ofi Yisrael awuro ama nu, bɔ ɔkɔ ngɔmhyɛlɛniɛ berɛ, wɔ aberɛ bɔ ɔma ye ahone bata ye mmosoen mɔ nwo, ná ɔfa amumuyɛɛ bɔ ɔte ye sundidua ɔto ye nyunu ne, me AWURADE, kyɛbɔ ye mmosoen mɔ bɛ somaa te ne, me bɔbɔ ngɔma ye mmuayɛɛ.

Hesekiel 16:63

amaa ɔnate so sɛ mefa wɔ bɔne bɔ ayɔ amukoraa mekyɛ wɔ a, akaye, ná wayɛ wɔ nya, na w’animguaseɛ ne ati ɛngɔtɛ wɔ noa nu ko, AWURADE Nyameɛ noa dwirɛ ɛne.”

Hesekiel 18:30

“Yiti Yisrael awuro ama, ngobua ɛmɔ nu biala ye atee bɔ ɔnate so ɔ nwo ndɛen, AWURADE Nyameɛ noa dwirɛ ɛne. Ɛ́mɔsakyera ɛmɔ adwene, ná ɛmɔhwe ɛmɔ nwo béfi ɛmɔ mmeraatolɛ amukoraa nwo, ná amumuyɛɛ wanyɛ ɛmɔ so sundidua.

Hesekiel 8:16

Afei ɔfale me wale AWURADE awuro ne akunu dɔ. Na AWURADE asɔneyɛɛ sua anoa nu berɛ, abrannaa ne ne afɔleɛ bokyea ne b’afia berɛ, na nwuni mmienzua kɔyɛ aburanyɔ ne nnu wɔ berɛ. Né bɛ si kyire AWURADE asɔneyɛɛ sua ne; yeɛ né bɛ nyunu kyire eyia afiteleɛ bɔ bɛsɔne eyia, bɔ bɛ nye kyire eyia afiteleɛ ɔ.

Hesekiel 8:6

Yeɛ osa sele me kyɛ, “Sona awa, aso enwu bɔ bɛyɔ ye? Enwu akyiwadeɛ mbiri mbiri bɔ Yisraelfoɛ bɛyɔ ye wa, kyɛ bɛfa betu me befi me nekaa krongron ne anu maa mekɔ dededede ye? Na ekosa konwu akyiwadeɛ mbiri mbiri bieku.”

Hosea 14:8

Ao Efraim, nzikyɛ yeɛ me ne mmosoen yɛle ye yɛyɔ bieku ɔ? Me yeɛ mema ye mmuayɛɛ, ná menea ye so ɔ; nde kyɛ ɛframmire monɛ bɔ ye nyaa mboro ɔ, na me so yeɛ enya wɔ mmakaammaa ɔ.

Sefania 3:11

“Sɔ mmerɛ ne, w’animguaseɛ yɔleɛ amukoraa bɔ ɛfa tole me mmeraa ne, ngɔye ngofi berɛ, na bɛ bɔ bedi anwomasoɛ nu ahurusi ne, ngotu bɛ bo ngofi wɔ nu, na ɛngɔyɛ ahandaen ko wɔ me bokaa krongron ne aso.

Sakaria 1:4

Nnɛma ɛmɔyɛ kyɛ ɛmɔ nana mɔ, bɔ ngɔmhyɛlɛfoɛ bɔ belili moa nemɔ bɔle edwirɛ ne dawure behyirele bɛ kyɛ, ‘Asafo AWURADE nwa nyoo: Ɛmɔhwe ɛmɔ nwo befi ɛmɔ bɔne atee ne ɛmɔ bɔne yɔleɛ nwo,’ ne. Nakoso bandie, yeɛ bandɛ me so, AWURADE noa dwirɛ ɛne.

Asomafoɛ 17:30

Mmerɛ bɔ né mmenia bennya bennwuni Nyameɛ yé nen, obuli ye nye guale so; nakoso kekesaala ye de, ɔhyɛ ebiala bɔ ɔwɔ nekaa biala ɔ kyɛ ɔsakyera ye adwene,

Asomafoɛ 26:20

Na nnili moa ngane edwirɛ ne wɔ Damasko, afei Yerusalem, ɔne Yudea maen ne anu mukoraa, ɔne Amaenmaensofoɛ nu; kyɛ bɛsakyera b’adwene bɛbra Nyameɛ berɛ na bɛbɔ bra bɔ okyire kyɛ basakyera b’adwene ɔ.

Asomafoɛ 3:19

Sɔ ati ɛmɔsakyera ɛmɔ adwene na ɛmɔbra Nyameɛ berɛ, na ɔkɔfa ɛmɔ bɔne kɔhyɛ ɛmɔ.

Romanfoɛ 6:21

Daa bra bɔ ɛmɔbɔle ne, bɔ ɛnɛ ɔyɛ ɛmɔ nya ye, nzikyɛ mvasoɛ yeɛ ɛmɔnya befili nu ɔ? Sɔ nningyein nemɔ, b’ayieleɛ te ewue.

1 Samuel 7:3

Afei Samuel sele Yisrael awuro ama amukoraati kyɛ, “Sɛ ɛmɔ ahone nu paa yeɛ ɛmɔsa bɛba AWURADE berɛ a, nzaade ɔsɛ kyɛ ɛmɔye Amaenmaensofoɛ nyameɛ mɔ ne mmosoen Astarote befi ɛmɔ nu begyi begua. Ɔsɛ kyɛ ɛmɔtu ɛmɔ nwo besie berɛ bɔkɔɔ bɛma AWURADE, ná ɛmɔso ye ngome, na okole ɛmɔ kofi Filistifoɛ sa nu.”