Hesekiel 13:22 - AHYERƐLƐ KRONGRON

²² Ɛmɔafa ɛmɔ nnakannaka ne bama teneneefoɛ bɛ wora abɔ, ɔwɔ nu kyɛ me de mmvale aworabɔlɛ nndole bɛ so. Ɛmɔsi bɔnefoɛ adua, kyɛbɔ ɔkɔyɛ bɔ ɔngɔhwe ye nwo ngofi ye bɔne atee so ngonya ngoa ɔ.

Hesekiel 13:22 Iomraidhean Croise

Yesaya 28:15

Ofikyɛ ɛmɔnwa, “Yɛne ewue ayɛ apam, yɛne ɛborɔ yayɛ nhyehyɛleɛ, sɛ mbire bɔ ye noa yɛ yea tra so ne ɔbaapɛ nu a, ongonya yɛ ngofi yɛ, ofikyɛ yafa kanda yayɛ yɛ afealeɛ, yeɛ yafa nnakannaka yabɔ yɛ nwo waen.”

Yeremia 23:14

Yeɛ Yerusalem ngɔmhyɛlɛfoɛ nwo koso, manwu nikyee bie bɔ ɔte anwodwiri ɔ: bɛsɛkye agyaa, yeɛ bɛpɛ ngondombo; bɛhyɛ bɔnefoɛ nguraen, maa ɔnate so ebiala ɔnzakyera mvi ye bɔne nwo; bɛ mukoraa bayɛ me nye so kyɛ Sodom; na nu ama koso bayɛ kyɛ Gomora.

Yeremia 23:17

Bɛkɔ so bɛkã bekyire bɛ bɔ bebu me animtia ne kyɛ AWURADE nwa nyoo, ‘Ɛmɔkonya asomdwee’; na bɛkã bekyire ebiala bɔ odi ye ti piri ɔyɛ asoserɛ ne kyɛ, ‘Musue biala ngɔto ɛmɔ.’ ”

Yeremia 23:9

Ɔnate me ngɔmhyɛlɛfoɛ nemɔ ati, m’adwene ayɛ me basaa wɔ me nu, me mmowue nu amukoraa wosowoso me. Mayɛ kyɛ akɔnomnzaniɛ, kyɛ ebie bɔ nzaa abia ye ɔ, ɔnate AWURADE ɔne ye dwirɛ krongron ne ati.

Yeremia 28:16

Yiti AWURADE nwa nyoo, ‘Tie, ngɔye wɔ ngofi aseɛ ye aso. Afoɛ he ala yeɛ ekowu ɔ, ofikyɛ ahã ɛlɔenyɛlɛ dwirɛ atia AWURADE.’”

Yeremia 29:31

“Mmenia amukoraa bɔ bahye bɛ nnure bahɔ ne, soma maa beese bɛ kyɛ, ‘Bɔ AWURADE kã fa Nehelamniɛ Semaya nwo ole kyɛ: Ɔnate kyɛ Semaya wahyɛ ngɔm wahyire ɛmɔ wɔ aberɛ bɔ nnzomane ye, ná wamaa ɛmɔale ngondombo bali ne ati,

Yeremia 29:32

yiti AWURADE nwa nyoo: Tie, ngɔhwe Nehelamniɛ Semaya ne ye bosofoɛ bɛ so. Ongonya ye nwoniɛ bɔ ɔkɔtena maen he anu, bɔ okonwu nikye paa bɔ mebaayɔ mema me maen ɔ, AWURADE noa dwirɛ ɛne; ofikyɛ wahã ɛlɔenyɛlɛ dwirɛ watia AWURADE.’ ”

Yeremia 34:16

Nakoso ɛmɔsesane ɛmɔ adwene bɛfale efiɛ bɛhane me dumaa, na ebiala osa ɔɔhyele ye kanganiɛ bienzua anaa brasua, bɔ wamaa wafa ye nwo wali kyɛbɔ né ye nye la so ne, na ɛmɔsa bɛfale bɛ bɛwale ngoaasolɛ nu maa bɛɛyɛle ɛmɔ nganga ne afaneɛ mɔ.

Yeremia 34:22

Ɛ́mɔtie, ngɔfa ahyɛdeɛ ngɔma, na ngosa ngɔfa bɛ ngɔwa kuro ye aso, AWURADE noa dwirɛ ɛne’. Bɛkɔfa koɛ bɛkɔteta kuro ye, bekoli so ngonim, na bɛkɔto nu see bɛkɔyera ye. Na ngɔma Yuda nguro nemɔ bɛkɔyɛ kurofoen bɔ sona fee ɔnne so ɔ.

Yeremia 4:10

Yeɛ ngane kyɛ, “Aa, AWURADE Nyameɛ, ye de, amba alakalaka maen ye ne Yerusalem, ofikyɛ ɛhane kyɛ, ‘Okoyie ɛmɔ yé’, wɔ aberɛ bɔ ngrandɛ la bɛ komvi ɔ.”

Yeremia 6:14

Bande bɛ nye bammia me maen ye ngena mɔ. Na bɛnwa, ‘Asomdwee oo, asomdwee oo,’ wɔ aberɛ bɔ asomdwee nne berɛ ɔ.

Yeremia 8:11

Bande bɛ nye bammia me maen ngena mɔ. Na bɛnwa, ‘Asomdwee oo, asomdwee oo,’ wɔ aberɛ bɔ asomdwee nne berɛ ɔ.

Hesekiel 13:16

mekyire Yisrael ngɔmhyɛlɛfoɛ bɔ bɛhyɛ Yerusalem nwo ngɔm, kyɛ banya ye nwo asomdwee nyekyire, wɔ aberɛ bɔ asomdwee biala nne berɛ ɔ, AWURADE Nyameɛ noa dwirɛ ɛne.

Hesekiel 18:21

“Nakoso sɛ bɔnefoɛ twe ye nwo fi ye bɔne amukoraa bɔ wayɔ ɔ nwo, ná odi m’ahyɛdeɛ mukoraa so, ná ɔyɔ bɔ ɔte paa ne bɔ ɔtengyɛ a, nahorɛ nu, okonya ngoa, na ongowu.

Hesekiel 18:27

Nakoso sɛ bɔnefoɛ twe ye nwo fi ye bɔne bɔ wayɔ ɔ nwo ɔkɔyɔ bɔ ɔte paa ne bɔ ɔtengyɛ a, okole ye kra ngoa.

Hesekiel 9:4

Na AWURADE sele ye kyɛ, “Kohyini Yerusalem kuro ne anu, na mmenia bɔ ɔnate akyiwadeɛ bra mukoraa bɔ ɔkɔ so wɔ kuro ne anu ti bedi aworabɔlɛ ne yealɛ ne, hyɛ bɛ nzorɛ wɔ bɛ nwoma so.”

Amose 5:12

Ofikyɛ mese ɛmɔ mmeraatolɛ worawora ne, ɔne ɛmɔ bɔne mbiri mbiri ne. Ɛmɔ bɔ ɛmɔteetee teneneefoɛ, ná ɛmɔde fea-ase-ma, ná ɛmɔbua bɛ bɔ bɛyɛ anwumvo ɔ ndɛengyea wɔ nekaa bɔ bedi dwirɛ ɔ.