Hesekiel 13:19 - AHYERƐLƐ KRONGRON

¹⁹ Ɔnate ayuo bɛ sa bum kãa bie, ɔne paanoo bue kãa bie ti, ɛmɔagua me nwo fiɛ wɔ me maen nyunu. Ɛmɔlakalaka me maen bɔ okuro nnakannaka tielɛ, na ɔnate so ɛmɔku mmenia bɔ bɛmvata ewue, yeɛ ɛmɔyakyi bɛ bɔ bɛfata ewue ɔ.

Hesekiel 13:19 Iomraidhean Croise

Anyandera 17:15

Ebiala bɔ obua bɔnefoɛ be, ɔne ebiala bɔ obua teneneeniɛ fɔ ne, AWURADE kyi bɛ munyɔ kɔkɔkɔkɔ.

Anyandera 19:27

Mma, ɛyakyi foɛtulɛ tielɛ a, ɛne nimdeɛ dwirɛ kɔbɔ nzahoɛ.

Anyandera 28:21

Mmenia nu nyeyemuɛ ɔtte mayee, nakoso aleɛ kaaba bie po ɔkora ma sona yɔ bɔne.

Yesaya 5:20

Bɛ yaakɔ! Bɛ bɔ bɛkã kyɛ bɔne te paa, ɔne kyɛ paa te bɔne ɔ; bɛ bɔ bɛfa awosii bɛyɛ kanea, ná bafa kanea bayɛ awosii ɔ; bɛ bɔ bɛnwa nikyee weewee te menemene, ná nikyee menemene koso yɛ wee ɔ!

Yesaya 56:11

Amba, bɛte ngyea adifuu, na bɛnze ahoyire. Bɛte mmoaenneafoɛ bɔ nimdeɛ abɔ bɛ ɔ, bɛ mukoraa bali makyebu baafa bɛ bɔbɔ b’atee so, na bɛ nu biala ɔdwene ye ngome ye yeeyɛlɛ nwo.

Yeremia 23:14

Yeɛ Yerusalem ngɔmhyɛlɛfoɛ nwo koso, manwu nikyee bie bɔ ɔte anwodwiri ɔ: bɛsɛkye agyaa, yeɛ bɛpɛ ngondombo; bɛhyɛ bɔnefoɛ nguraen, maa ɔnate so ebiala ɔnzakyera mvi ye bɔne nwo; bɛ mukoraa bayɛ me nye so kyɛ Sodom; na nu ama koso bayɛ kyɛ Gomora.

Yeremia 23:17

Bɛkɔ so bɛkã bekyire bɛ bɔ bebu me animtia ne kyɛ AWURADE nwa nyoo, ‘Ɛmɔkonya asomdwee’; na bɛkã bekyire ebiala bɔ odi ye ti piri ɔyɛ asoserɛ ne kyɛ, ‘Musue biala ngɔto ɛmɔ.’ ”

Hesekiel 13:20

Ye sɔ ne ati, AWURADE Nyameɛ nwa nyoo: Ɛ́mɔtie, ɛmɔ ngonyaa nzɛbɛ bɔ ɛmɔfa bediedie mmenia kra bɛkye bɛ kyɛ nnomaa ne, mekyi, na ngɔtete ngofi ɛmɔ sa. Na mmenia kra bɔ ɛmɔdiedie bɛ bɛkye ne, ngɔsangye bɛ maa bekotu bɛkɔhɔ kyɛ nnomaa.

Hesekiel 13:22

Ɛmɔafa ɛmɔ nnakannaka ne bama teneneefoɛ bɛ wora abɔ, ɔwɔ nu kyɛ me de mmvale aworabɔlɛ nndole bɛ so. Ɛmɔsi bɔnefoɛ adua, kyɛbɔ ɔkɔyɛ bɔ ɔngɔhwe ye nwo ngofi ye bɔne atee so ngonya ngoa ɔ.

Hesekiel 20:39

“Na ɛmɔ, Yisrael awuro ama, AWURADE Nyameɛ nwa nyoo: Sɛ ɛmɔngotie me dwirɛ de a, nzaade afei ɛmɔ nu biala ɔhɔ ɔɔso ye mmosoen. Nakoso ye si ye, nnɛma ɛmɔfa ɛmɔ akyɛdeɛ ne ɛmɔ mmosoen ne begua me dumaa krongron ne nwo fiɛ ko.

Hesekiel 22:25

Aseɛ bɔ so ngɔmhyɛlɛfoɛ bɛbɔ porɛ, bɛte kyɛ gyata bɔ wahye naen ná opo ɔtete ye nu ɔ. Beku mmenia, bede anwonya ne mbembenanneɛ, na bama so akunafoɛ mmrasua basone pee.

Hesekiel 22:26

Ye asɔfo mɔ babu me mmeraa so, bagua me nningyein krongron nemɔ anwo fiɛ; bɛmma nzonzoleɛ nna nningyein bɔ bɛte krongron ɔne bɔ bɛtte krongron ɔ b’afia; yeɛ bengyire nzonzoleɛ bɔ ɔla nikyee bɔ ye nwo te ɔ ɔne bɔ ye nwo nde ɔ b’afia, bɛmva m’afofingyẽa nemɔ bɛnyɛ huu, na bagua me nwo fiɛ wɔ bɛ nu.

Hesekiel 22:27

Ye mbanyi bɔ bɛwɔ ye nu ne, bɛte kyɛ mbataku bɔ bɛtete naen bɔ bahye ye ɔ nu ɔ. Bɛkã mogya begua, na beku mmenia maa ɔnate so benya anwonyadeɛ fiɛ.

Mika 3:11

Bɛ nu mbanyi mɔ bede fea-ase-ma bebua ndɛengyea, nu asɔfo mɔ koso bɛyɛ ngyerɛkyerɛ bede paa, yeɛ nu ngɔmhyɛlɛfoɛ nemɔ, bɛhyɛ ngɔm bede sikaa’. Nakoso bɛfa bɛ nwo bɛto AWURADE so bɛkã kyɛ, “Aso AWURADE oggyi yɛ si? Musue biala ngɔto yɛ.”

Mika 3:5

Ngɔmhyɛlɛfoɛ bɔ bɛma me maen di makyebu, bɔ ɛma bɛ aleɛ maa bedi a bɛkekã kyɛ, “Asomdwee oo, asomdwee oo”, nakoso sɛ ebie amma bɛ aleɛ maa banni a, bɛfa koɛ bɛtoa ye ne, bɔ AWURADE kã fa bɛ nwo ɛne.

Malaki 1:10

O, ɛmɔ nu nwa yeɛ ɔkɔɔtoto anoa nemɔ anu ɔ, amaa ɔnate so ɛmɔangɔ anzɔ m’afɔleɛ bokyea ne aso see mbaen. Me kunu ndwo wɔ ɛmɔ nwo, yeɛ mengole ɛmɔ sa nu afɔleɛ ne, Asafo AWURADE noa dwirɛ ɛne.

Romanfoɛ 14:15

Sɛ aleɛ bɔ edi ne ma ebiɛngo di aworabɔlɛ a, ye de né engyire ɔdɔ ko. Nnɛfa w’aleɛ bɔ edi ne sɛkye ebiɛngo bɔ Kristo wu mane ye ne.

Romanfoɛ 16:18

Ofikyɛ sɔ mmenia nemɔ bɛnzo y’Awurade Kristo, na mmom bɛso bɛ bɔbɔ bɛ ko. Na bɛfa bɛ noa dwirɛ fɛɛ ne anoanubobɔlɛ bɛlakalaka mmenia bɔ b’adwene te nganga ɔ.

1 Korintofoɛ 8:11

Na eliɛma bɔ ɔyɛ mmerɛ, bɔ Kristo wu mane ye ne, aso ɔnate wɔ nimdeɛ ti ɔsɛ kyɛ owu anaa?

1 Petro 5:2

ɛ́mɔnea Nyameɛ mmoaen kure bɔ owura ɛmɔ sa ne aso, bɔ nna nhyɛsoɛ so ɔ, na mmom kyɛ ɛmɔkofia ɛmɔ kunu bɛkɔnea bɛ so kyɛbɔ Nyameɛ pena ɔ; bɔ nna adifuu ti ɔ, na mmom kyɛ ofi ɛmɔ ahone nu ti ɔ;

1 Samuel 9:7

Na Sɔɔlo bisale somvoɛ ne kyɛ, “Sɛ yɛkɔ berɛ a, nzikyɛ yeɛ yɛkwaafa yɛma biaa ne ɔ? Aleɛ bɔ ɔwɔ yɛ bɔtɔ nu ne, wayie; na akyɛdeɛ biala nne berɛ bɔ yɛkonya ye yɛkɔma Nyameɛ sona ne ɔ. Nzikyɛ yeɛ yɛle ye wɔ berɛ ɔ?”