Hesekiel 12:4 - AHYERƐLƐ KRONGRON

⁴ Ye wɔ nningyein borɛ ne fite eyia kyɛ sona bɔ bahye ye nnure ɔ ye deɛ, bɔ bɛ nye tua ɔ. Tu fi berɛ kɔ nɔsoa, bɔ bɛ nye tua ɔ, kyɛbɔ mmenia bɔ bɛsesa bɛ bɛkɔ nnurehyelɛ nu ne bɛyɔ ne ala.

Hesekiel 12:4 Iomraidhean Croise

2 Ahemvo 25:4

Na Babilɔnfoɛ ɛlɔen ne bɛbɔngyele kuro berɛ fasue ne anu tokuro. Ɔwɔ nu kyɛ né Babilɔn ɛlɔen ne bapɛ kuro ne anwo bayia de, nakoso kɔngɔen, Nana Sedekia ne ye koɛhonɛfoɛ amukoraa bɛnwati bɛfale pambim bɔ ɔwɔ fasue bɔ ɔbɔ ye nwo nyɔ ne anu bɛhɔle. Pambim ne pingye Nana Sedekia turo ne. Bɛfale bɛ nye behyirele asue Yɔɔdan bɔnza ne anu dɔ.

Yeremia 39:4

Na ɔwale kyɛ, mmerɛ bɔ Yuda hene Sedekia ne koɛhonɛfoɛ nemɔ amukoraa benwuni bɛ ne, bɛnwatili. Bɛfale ɛhene turo ne anu bɛɛfale pambim bɔ ɔla fasue nyɔ nemɔ b’afia ne anu befili kuro berɛ kɔngɔen, na bɛfale bɛ nye behyirele aseɛ pralaa ne aso.

Yeremia 52:7

Na bɛbɔngyebɔngyele kuro berɛ fasue ne anu tokuro. Ɔwɔ nu kyɛ né Kaldeafoɛ bapɛ kuro ne anwo bayia de, nakoso kɔngɔen, koɛhonɛfoɛ nemɔ amukoraa bɛnwati bɛfale pambim bɔ ɔwɔ fasue bɔ ɔbɔ ye nwo nyɔ ne anu befili kuro berɛ bɛhɔle. Sɔ pambim ne, opingye ɛhene turo ne. Bɛfale bɛ nye behyirele asue Yɔɔdan bɔnza ne anu dɔ.

Hesekiel 12:12

Na panyi bɔ ɔla bɛ noa ne, ɔkɔma ye nningyein borɛ so kɔto ye kɔme anwo awosii nu, ná wasi nu wahɔ. Bɛkɔbɔngye fasue ne anu, ná bafa nu bahɔ. Ɔkɔfa nikyee komundu ye nyunu, amaa ɔnate so wamva ye nye wannwu aseɛ ne.

Hesekiel 12:5

Bɔngye fasue ne anu bɔ bɛ nye tua ɔ, ná fa nu fite.