Hesekiel 1:13 - AHYERƐLƐ KRONGRON

¹³ Abɔdeɛ ateasefoɛ nemɔ bɛ sue ne, besoma see bɔ wasɔ gonn ɔ, besoma kanea bɔ ɔkɔ ye nyunu ne ye si wɔ abɔdeɛ ateasefoɛ nemɔ b’afia ɔ. Né see ne ta, na agralaa tete fili see ne anu.

Hesekiel 1:13 Iomraidhean Croise

Gyenesise 15:17

Mmerɛ bɔ eyia tɔle ná awosii wale nen, mvum nu, foonoo bɔ otu nwosina, ɔne see bɔ ogye wuronyiwuronyi wale bɛɛfale naen bue bue nemɔ afia.

Edwein 104:4

Ɛfa mvrama yɛ wɔ bɔfoɛ mɔ, yeɛ ɛfa see wuronyiwuronyi yɛ wɔ somvoɛ mɔ.

Hesekiel 1:7

Né bɛ gya nemɔ tengyɛ fɔngɔnn, na bɛ gya kunu te kyɛ nandwie ba deɛ ne ala; na né bɛ nwo ta te kyɛ kɔɔbere bɔ bahwi ye nwo nahanaha ɔ.

Hesekiel 10:2

Na osele biaa bɔ ɔhera nwera ne kyɛ, “Kango mɔ bɔ bɛwɔ kɛrubim nemɔ abo ne, kɔworo b’afia; fura see gonn bɔ ɔwɔ kɛrubim nemɔ b’afia ne, ná to pete kuro ne aso.” Na ɔworole nu bɔ me nye tua ɔ.

Daniel 7:9

Na ngu so bɔ menea ne, nwuni kyɛ bafa ahennie bia mɔ baasiesie berɛ, na Bɔ Ɔwɔ Berɛ Fi Tetetete ne ɔɔtenane ase, ye tena ne te fufue kyɛ nwera, yeɛ ye ti nwiaa te horaenn kyɛ gyese; ye bia ne te see bɔ ogye wuronyiwuronyi ɔ, na ye bia kɔba nemɔ, bɛte see bɔ ɔsɔ ɔ.

Mateo 28:3

Né ye nwo ta te kyɛ agralaa, na ye ataadeɛ ne te fufue kyɛ asukɔtwea.

2 Tɛsalonika 1:7

ná ɔkɔma ɛmɔ bɔ ɛmɔwɔ amaneɛ nu ne, ɛmɔ ne yɛ yɛkonya nwomelelɛ, kyẽa bɔ bɛkɔla Awurade Yesu ne ye abɔfoɛ anwoserɛfoɛ ali bekofi nyameɛso, wɔ see wuronyiwuronyi nu ne,

Nyekyire 10:1

Afei nwuni abɔfo foforɛ anwoserɛniɛ bie kyɛ ofi nyameɛso odwu ba ase; né wafa munungum wahera, nyangondoen wɔ ye ti so, ye nyunu te kyɛ eyia, na ye gya te kyɛ see bonima.

Nyekyire 18:1

Na ɛhemɔ asi ne, nwuni abɔfo foforɛ kyɛ ofi nyameɛso odwu ba ɔ. Né ole tumi piri, na ye animnyam tale aseɛ so.

Nyekyire 4:5

Na agralaa ne komviɛ ahoroɔ ne nu bobɔlɛ kurudududu fili ahennie bia ne anu wale. Na see nganea nzoo bɔ bɛte Nyameɛ Sunzum nzoo ne, né begye wɔ ahennie bia ne anyunu berɛ.