Hebrifoɛ 1:3 - AHYERƐLƐ KRONGRON

³ Ye yeɛ ɔte Nyameɛ animnyam hyireinn ne, ɔne ye sue kaenn, na ole ye tumi dwirɛ ne yeɛ otira nningyein mukoraa nu ɔ. Na ɔtele yɛ nwo fili yɛ bɔne nwo yiele nen, ɔɔtenane Tuminiɛ Nyameɛ sa famaa so wɔ nyameɛso.

Hebrifoɛ 1:3 Iomraidhean Croise

1 Aberɛso Dwirɛ 29:11

Ao AWURADE, ɛte piri, na tumi, animnyam, ngonimlilɛ ne ahennie nu animnyam te wɔ deɛ, ofikyɛ anwuro ne aseɛ so nningyein amukoraa bɛte wɔ deɛ. Ao AWURADE, ahennie ne te wɔ deɛ, na wɔ tumi te piri tra ebiala.

YOB NWOMAA NE 37:22

Animnyam bɔ ɔta kyɛ sikaa kɔkorɛ ne, sorɔ dɔ yeɛ ofi ba ɔ, na animnyam bɔ wapɛ Nyameɛ nwo wayia ne, ɔyɛ suro.

Edwein 110:1

AWURADE sele me mene kyɛ, “Tena me sa famaa so kɔpem kyɛ ngɔfa wɔ pɔfoɛ mɔ ngɔyɛ wɔ gya bo ndiasoɛ ɔ.”

Edwein 75:3

Sɛ aseɛ ɔne bɔ ɔwɔ so amukoraa bɛwoso a, me yeɛ mema ye bonima mɔ begyina pindinn ɔ. Sela

Nworɛ Dwirɛhanɛniɛ 8:4

Ɔnate kyɛ, ɛhene noa dwirɛ te tumi, na nwa yeɛ ɔkɔhora kobisa ye kyɛ, “Na nzu yeɛ ɛyɔ ye?”

Lewitikɔso 15:15

Na afei odi kyɛ ɔsɔfo ne fa nnomaa nemɔ ko bɔ bɔne nwo afɔleɛ ná ɔ́fa ko koso ɔbɔ naen yeralɛ afɔleɛ. Ɔsɔfo ne kogyina sona ne gya nu kɔpata kɔma ye wɔ Nyameɛ nyunu, ɔnate ye bienzua bɔ né ofiti ne ati.

Mika 5:4

Na ɔkɔfa AWURADE anwoserɛ kogyina berɛ kɔma ye mmoaen kure aleɛ, wɔ AWURADE ye Nyameɛ animnyam ahennie dumaa nu. Bɛ bo kotimu, ofikyɛ afei ɔkɔyɛ titire koodwu aseɛ so nekaa biala.

Mateo 22:24

“Kyerɛkyerɛniɛ, Mose hane kyɛ, ‘Sɛ bienzua bɔ wanwo ba owu a, odi kyɛ oliɛma bienzua gya kunaniɛ ne, ná ɔwo mmaa ma oliɛma ne.’

Marko 16:19

Na afei, Awurade Yesu dwudwo hyirele bɛ yiele nen, Nyameɛ fale ye hɔle nyameɛso, na ɔɔtenane Nyameɛ sa famaa so.

Yohane 1:14

Na Edwirɛ ne ɔɔyɛle anwoɔnaen, na ɔne yɛ ɛɛtenane, na yɛnwuni ye animnyam kyɛ Baba n’Awa bɔ ɔwole ye komapɛ twe n’animnyam, na adom ne nahorɛ ayi ye tɛkyɛ.

Yohane 1:29

Aleɛ hyene ne, Yohane nwuni Yesu kyɛ ɔba ye berɛ ɔ, na ɔhane kyɛ, “Ɛ́mɔnea, Nyameɛ Boaen Ba ne, bɔ ɔye wiase bɔne fi berɛ ne!

Yohane 1:4

Ye nu yeɛ ngoa wɔ ɔ; na ngoa ne te mmenia kanea.

Asomafoɛ 2:33

Yiti Nyameɛ mane ye so hɔle ye sa famaa so; na onyane Sunzum Krongron bɔhyɛ ne fili Baba ne berɛ, na ɛhe yeɛ wahwie wagua yɛ so bɔ ɛmɔnwu ye ná ɛmɔte ye.

Asomafoɛ 7:56

Na osele bɛ kyɛ, “Ɛmɔnea, menwu kyɛ anwuro abukye, na Sona Awa ne gyi Nyameɛ sa famaa so.”

Romanfoɛ 1:16

Na nzɛmba ne nwo nyɛ me nya, ofikyɛ ɔte Nyameɛ tumi bɔ ɔkɔ ngoalelɛ nu ma bɛ bɔ bede bedi amukoraa, Yudafoɛ yeɛ beli moa ɔ, yeɛ Amaenmaensofoɛ koso bɛtoa berɛ ɔ.

Romanfoɛ 8:34

Nwa yeɛ obua foɛ ɔ? Yesu Kristo bɔ owuli ná otingyele fili awufoɛ nu ne, bɔ ɔte Nyameɛ sa famaa so, bɔ ɔsrɛ ma yɛ ne.

2 Korintofoɛ 4:4

Bɛ yeɛ ewiase wa nyameɛ ama bɛ bɔ benne benni ne, b’adwene ali naakye, amaa Kristo bɔ ole Nyameɛ sue n’animnyam nzɛmba kanea ne, wanda bɛ so.

Kolosefoɛ 3:1

Yiti sɛ ɛmɔ ne Kristo banya batingye de a, ɛ́mɔpena nningyein bɔ ɔwɔ anwuro ne si atee, nekaa bɔ Kristo te Nyameɛ sa famaa so ne.

Tito 2:14

Ye yeɛ ɔfale ye ngoa tole berɛ mane yɛ ɔ, kyɛbɔ okole yɛ kofi amumuyɛɛ amukoraa nu, ná wate yɛ nwo wafa yɛ wayɛ ye bɔbɔ ye mmenia sonongo bɔ bɛbɔ nnwumaa paa nwo mmɔden ɔ.

Hebrifoɛ 1:13

Na abɔfo mɔ nu beni yeɛ Nyameɛ ahã ahyire ye le kyɛ, “Tena me sa famaa so kodwu kyɛ ngɔfa wɔ pɔfoɛ mɔ ngɔyɛ wɔ gya bo ndiasoɛ ɔ?”

Hebrifoɛ 10:12

Nakoso Yesu de, ɔbɔle bɔne nwo afɔleɛ komapɛ twe bɔ odi mu afebɔɔ yiele nen, ɔtenane Nyameɛ sa famaa so,

Hebrifoɛ 12:2

Ɛ́mɔma yɛnea Yesu bɔ ɔte yɛ gyidie ahyɛaseɛ ne ayieleɛ ne. Na ɔnate anigye bɔ né ɔla ye nyunu ne ati, omiane ye nye fale amaneɛ ne animguaseɛ wue nu wɔ mmeamudua ne aso, na waatena Nyameɛ ahennie bia ne famaa so.

Hebrifoɛ 4:14

Ɛmɔma yɛsɔ yɛ gyidie nu serɛ, ofikyɛ yɛle ɔsɔfo panyi paa, Nyameɛ Awa Yesu bɔ wafa ewienu wahɔ nyameɛso ɔ.

Hebrifoɛ 7:27

Ye de, ɔtte kyɛ asɔfo mbanyi paa hene mɔ, onhia kyɛ ɛlɛho biala odi moa bɔ ye bɔbɔ ye bɔne nwo afɔleɛ koraka na wabɔ maen deɛ, na mmom ɔfale ye nwo bɔle afɔleɛ pɛnko.

Hebrifoɛ 8:1

Edwirɛ bɔ yɛkã ne, porɛ bɔ ogyi so paa ɛhe: ɔsɔfo panyi paa sɔaa yeɛ yɛle ye ɔ, na ɔte Tuminiɛ n’ahennie bia ne famaa so wɔ nyameɛso.

Hebrifoɛ 9:16

Sɛ ebie yɔ nzamanzeɛ a, sana benwu ye pefee kyɛ sona bɔ ɔyɔle ne wawu;

Hebrifoɛ 9:26

Na sɛ ɔtte sɔ de a, ahaa ɔsɛ kyɛ Kristo taa nwu amaneɛ fite kyɛ Ɛdangama bɔle aleɛ ɔ. Nakoso waye ye nwo ali komapɛ wɔ mmerɛ bɔ ewiase kɔ ye ayieleɛ ye, na wafa ye bɔbɔ ye nwo wabɔ afɔleɛ wakyikyi bɔne.

1 Petro 1:21

Na ɔnate ye so yeɛ ɛmɔde Nyameɛ bɔ otingyele ye fili awufoɛ nu ná ɔhyɛle ye animnyam ne bedi ɔ, amaa ɔnate so ɛmɔanya gyidie ne anyelasoɛ wɔ Nyameɛ nu.

1 Petro 3:22

Ye yeɛ ɔhɔle nyameɛso ne, na ɔte Nyameɛ sa famaa so; na abɔfo mɔ ne anwoserɛ mɔ ne tumi mɔ babrɛ bɛ nwo ase bawura ye bo.

2 Petro 1:16

Amba, edwirɛ bɔ yahã yahyire ɛmɔ yafa y’Awurade Yesu Kristo tumi ne ye walɛ ne anwo ne, yamva kanda ɛhoaatolɛ so, na mmom yɛ bɔbɔ yɛte ye animnyam totohyia bɔ yɛnwuni ye ne nwo adanzefoɛ.

2 Petro 1:17

Ofikyɛ mmerɛ bɔ onyane anidie ne animnyam fili Baba Nyameɛ berɛ, ná komviɛ bie fili Animnyam Totohyia ne berɛ wale ye berɛ kyɛ, “Mma bɔ ɔla m’ahone nwo ná me nye gye ye nwo paa ne ɛhe” nen,

1 Yohane 1:7

Nakoso sɛ yɛnate kanea nu, kyɛbɔ ye koso ɔwɔ kanea nu ne a, né yɛ ne yɛ nwo yɛ nwo yatira abiɛngoɛ, na Ɔwa Yesu Kristo mogya ne te yɛ nwo fi bɔne mukoraa nu.

1 Yohane 3:5

Ɛmɔse kyɛ ɔwale kyɛ ɔbaasoa yɛ bɔne kɔ; na ye de bɔne nne ye nwo.

Yuda 1:25

Nyameɛ komapɛ bɔ ɔnate y’Awurade Yesu Kristo so ɔte yɛ Ngoadefoɛ ne, animnyam, ahennie, anwoserɛ ne tumi ɔyɛ ye deɛ daa, kekesaala ne afebɔɔ. Amen.

Nyekyire 3:21

Na bɔ odi ngonim ne, ngɔmaa ɔne me kɔtena m’ahennie bia so, kyɛbɔ me koso mali ngonim ná me ne me Baba yatena ye ahennie bia so ne.

Nyekyire 4:11

“Y’Awurade ne yɛ Nyameɛ, ɛfata kyɛ ede animnyam, anidie ne tumi, ofikyɛ wɔ yeɛ ɛbɔle nningyein amukoraati, wɔ pɛ ti yeɛ bɛwɔ berɛ ɔ, na wɔ pɛ ti yeɛ ɛbɔle bɛ ɔ.”