Hagae 1:6 - AHYERƐLƐ KRONGRON

⁶ Ɛmɔalua pee, nakoso kaaba bie yeɛ ɛmɔanya bafi nu ɔ; ɛmɔdidi, nakoso ɛmɔ ko nyi; ɛmɔno nzaa, nakoso ɔmmo ɛmɔ; ɛmɔkera ɛtena, nakoso ebiala nwo nyɛ ye hye; yeɛ bɔ ode akatuaa ne, ode gua bɔtɔ bɔ ye bo atofitofi ɔ nu.

Hagae 1:6 Iomraidhean Croise

2 Samuel 21:1

Mmerɛ bie, ɛhɔen piri bie wale toonn afoɛ nza wɔ Dawide aberɛ so. Dawide fa tole AWURADE nyunu, na AWURADE buale ye kyɛ, “Mogya nwo foɛlilɛ la Sɔɔlo ne ye awuro ama so, ɔnate kyɛ ohuhuni Gibeonfoɛ.”

1 Ahemvo 17:12

Nakoso braa ne buale kyɛ, “Kyɛ AWURADE wɔ Nyameɛ te ase ye, nnne aleɛ biala wɔ berɛ, sana esam me sa bum ko bɔ ɔwɔ kukue nu, yeɛ ngoo kaaba bie bɔ ɔwɔ towaa nu ɔ. Mebaapena eyein kãa mefa mekɔ awuro mekɔyɛ aleɛ maa me ne mma yɛdi. Sɛ yɛdi yɛyie a, ɛhɔen yeɛ okohu yɛ maa yɛkowu ɔ.”

Nehemia 5:2

Ofikyɛ bɛ nu biemɔ hane kyɛ, “Yɛ ne yɛ mma mmienzua ne yɛ mma mmrasua, yɛsone. Odi kyɛ yɛnya aleɛ yɛdi ná yanya ngoa.”

YOB NWOMAA NE 20:22

Ye anwonya mmorosoɛ ne asi ne po, ye nwo ngɔtɔ ye, na musue amukoraa kɔtoto ye.

YOB NWOMAA NE 20:28

Nzue koyi kɔfa ye awuro agyapadeɛ, okopia agyapadeɛ ne kɔhɔ wɔ Nyameɛ ɛyaafɛlɛ kyẽa ne.

Edwein 107:34

ɔkakyi aseɛ bɔ ɔkye aleɛ ɔ maa ɔyɛ ɛgyɛhyerɛ, ɔnate aseɛ ne aso ama bɛ bɔne ti.

Anyandera 11:24

Ebiemɔ bɛye bɛ kunu bɛyɔ paa paa, nakoso bɛkɔ so benya bɛ nwo, yeɛ ebiemɔ wora bɛfa bɛ nningyein bɛbɔ atianuserɛ, nakoso bɛkɔ so bedi hiaa.

Yesaya 5:10

Ofikyɛ bobe boo eka buru kɔma wɔ nzaa bua ko pɛ, yeɛ edua aburoo angora ko a, ekonya olonka buru.”

Yeremia 12:13

Balua atokoɔ, nakoso bate mmowue, bafɛ alaa, nakoso bannya ye nwo mvasoɛ biala. Ɔnate AWURADE yaa piri bɔ wafɛ ne ati, ɛmɔ fieso nningyein bɔ ɛmɔkonya ye ne, ɔkɔyɛ bɛ fɛre.”

Yeremia 14:4

Aseɛnwo ayɛ katerepee, ɔnate esue bɔ ɔndɔ ngua aseɛ ne aso ti; akuafoɛ nemɔ nyunu agua ase, na bɛkata bɛ ti so.

Yeremia 44:18

Nakoso ofi mmerɛ bɔ yɛyakyili kyɛ yɛyera ɛyɛɛ yɛma nyameɛso hemmaa, ɔne kyɛ yɛyakyili kyɛ yɛbɔ anonneɛ afɔleɛ yɛma ye ne, nikyee biala nwo ahia yɛ, yatotɔ ngrandɛ noa, na ɛhɔen ku yɛ maa yɛwuwu.”

Hosea 4:10

Bekodidi, nakoso bɛ ko ngoyi; bɛkɔbɔ gyandera, nakoso bɛngɔta pee, ofikyɛ bapo AWURADE.

Hosea 8:7

Ofikyɛ bedua mvrama, na mvrama bɔ ɔpɛ ye nwo ɔ yeɛ bɛkɔpɛ ɔ. Aburoo ne wambɛnzɛ, na ɔngɔfa mmaa. Sɛ ɔfa mmaa po a, ɛwɔfoɛ mɔ yeɛ bekoli ɔ.

Lewitikɔso 26:20

Ɛmɔkɔsɛkye ɛmɔ anwoserɛ mbaen: ɛmɔ aseɛ ngɔhye aleɛ, yeɛ aseɛ ne aso mmakaa ngosu mmaa.

Lewitikɔso 26:26

Ngɔma ɛhɔen kɔwa ɛmɔ aseɛ so; mmrasua buru yeɛ bɛkɔto ɛmɔ aleɛ wɔ bokyea komapɛ aso ɔ. Mmrasua nemɔ kosusu aleɛ ne mmaa mmaa bie yeɛ bɛkɔma ɛmɔ ɔ, yiti sɛ ɛmɔdi a, ɛmɔ ko ngoyi.

Hagae 1:10

Ɔnate sɔ ati, nyameɛso mma bosue ngua mma ɛmɔ ko, yeɛ aseɛ koso ngye aleɛ ko.

Hagae 1:5

Yiti Asafo AWURADE nwa nyoo: Bɔ ɔ́toto ɛmɔ ye, ɛmɔ bɔbɔ deinn ɛ́mɔfa bɛhɔ adwenedwene nu!

Hagae 1:7

“Asafo AWURADE nwa nyoo: Bɔ ɔ́toto ɛmɔ ye, ɛmɔ bɔbɔ deinn ɛ́mɔfa bɛhɔ adwenedwene nu!

Hagae 1:9

Né ɛmɔ nye la ate kyɛ ɛmɔkonya fieso nningyein pee, nakoso, ɛ́mɔnea, ɔyɛle aleɛ kaaba bie. Na ɛmɔfa bɛwale awuro nen, nhu nguale. Nzu ɔ? Bɔ Asafo AWURADE bisa hɔ ɛne. M’awuro ne bɔ wabubu wagua ne ati ɔ, wɔ aberɛ bɔ ɛmɔ de, ebiala nye aboro osi ye bɔbɔ ye awuro ɔ.

Hagae 2:16

ɛmɔ asetena nu te ɛmɔ sɛ? Sɛ ebie ba kyɛ ɔbaabu aburoo kɛndɛen aburanyɔ a, onya buru; sɛ ebie ba nekaa bɔ bekyi mmakaammaa nu bɛyɔ nzaa kyɛ ɔbaafa nzaa bua aburannu a, aburanyɔ yeɛ onya ɔ.

Hagae 2:17

Mvale fieso nningyein kesenɛ, asukuo ne asukɔtwea nzɛkyele ɛmɔ sa noa adwuma mukoraa; nakoso ɛmɔanza bamma me berɛ, AWURADE noa dwirɛ ɛne.

Sakaria 5:4

Ngɔsoma ye maa ɔkɔhɔ, Asafo AWURADE noa dwirɛ ɛne, na okowura awueniɛ n’awuro, yeɛ bɔ ɔfa me dumaa ta ndaen mbaen ɔ awuro; okosikye ye awuro berɛ, na ɔkɔyera awuro ne, nu mmakaa ne nu nyɔboɛ.”

Sakaria 8:10

Ofikyɛ, anzana sɔ mmerɛ ne baawa ne, né akatuaa biala nne berɛ mma sona, yeɛ né ebie koso nne berɛ mma kaka. Na sɛ né ebie ɔkɔ oo, anaa ɔba oo, pɔfoɛ ne ati, né olle asomdwee biala, ofikyɛ nganyane sona biala maa odwɔso tiale obiɛngo.

Malaki 2:2

Sɛ ɛmɔanyɛ sotie, yeɛ sɛ ɛmɔamva banzie ɛmɔ ahone nu kyɛ ɛmɔkɔfa animnyam bɛkɔma me dumaa a, ngɔprapra musue ngogua ɛmɔ so, na ngɔnoma ɛmɔ saleɛ ne, Asafo AWURADE noa dwirɛ ɛne; yoo, manoma bɛ dada, ofikyɛ ɛmɔmva benzie ɛmɔ ahone nu.

Deuteronomi 28:17

Musue kɔto wɔ kɛndɛen ne wɔ kukue.