Filipifoɛ 4:8 - AHYERƐLƐ KRONGRON

⁸ Afei aliɛmaa mɔ, medwura edwirɛ ne kyɛ, nikyee biala bɔ ɔte nahorɛ, bɔ ɔte animnyam, bɔ ɔtengyɛ, bɔ ye nwo te, bɔ ɔyɛ nyemene, bɔ ole dumaa paa; sɛ bra paa bie wɔ berɛ a, sɛ ayɛyelɛ bie wɔ berɛ a, sɔ nningyein nemɔ yeɛ ɔsɛ kyɛ ɛmɔdwenedwene bɛ nwo ɔ.

Filipifoɛ 4:8 Iomraidhean Croise

Gyenesise 18:19

Mapa nu maye ye, kyɛ ɔ́hyɛ ye mma ne ye boso ama bɔ bɛkɔwa nziɛ ye ma bɛnate AWURADE atee so, ma bɛyɔ bɔ ɔtengyɛ, ɔne bɔ ɔte pɛpɛɛpɛ ɔ; amaa ɔnate so AWURADE ama ɛbɔ bɔ wahyɛ Abraham ne awa nu.”

2 Samuel 1:23

“Sɔɔlo ne Yonatan, anwonyemenefoɛ bɔ mmenia kuro bɛ dwirɛ ɔ! Bɛ ngoa nu oo, bɛ wue nu oo, b’afia andete. Né bɛ nwo yɛ nyera tra kɔleɛ, bɛ nwo yɛ se tra gyata.

2 Samuel 23:3

Yisrael Nyameɛ adwudwo, Yisrael Nyɔbotaen ne sele me kyɛ, ‘Sona bɔ ɔfa pɛpɛɛpɛyɛlɛ da mmenia noa ne, bɔ ɔfa Nyameɛ surolɛ da bɛ noa ne,

Edwein 82:2

“Kyinzu koraa yeɛ ɛmɔkobua ndɛengyea, ná ɛmɔayɛ nyeyemuɛ bagyina bɔnefoɛ si maa waadwu ɔ. Sela

Anyandera 11:1

Tonyi bɔ bawura nu te AWURADE akyiwadeɛ, nakoso ye nye sɔ asusudeɛ nyɔboɛ bɔ ɔkã nahorɛ ɔ.

Anyandera 12:4

Braa paa ɔte ohu abotire, nakoso nyanzoen braa de, ɔte kyɛ kokoram wɔ ohu mmowue nu.

Anyandera 16:11

Nahorɛ asusudeɛ ne nahorɛ tonyi te AWURADE deɛ, yeɛ kariboɔ amukoraa bɔ ɔwɔ kotoku ne anu ne, ɔte ye sa noa adwuma.

Anyandera 20:7

Teneneeniɛ ye bra te sannwuu, na ye mma konya saleɛ wɔ ye si.

Anyandera 31:10

Braa paa, nwa yeɛ okonya ɔ? Odi mu tra agudeɛ bɔkɔɔ.

Anyandera 31:29

“Mmrasua pee bɛte mmrasua bɔ begya bɛ ɔ, nakoso wɔ de, ɛpɛ bɛ mukoraa.”

Anyandera 31:31

Adwuma bɔ wayɔ ne, ɛ́mɔbɔ ye aba so, bɔ wayɔ ne, ɛ́mɔma onya ye nwo animnyam wɔ badwa nu.

Edwein Nu Dwein 5:16

Ye noa dwudwolɛ yɛ fɛ paa, ye nwo nekaa biala yɛ nyemene. Ao Yerusalem ndaluwa, me kurofoɛ ne, me damvo ne, ye ɛne.

Yesaya 26:7

Teneneeniɛ atee tengyɛ, ɛma teneneeniɛ atimbire da so yɔɔ.

Mateo 22:16

Na bɛsomane b’asuafoɛ mɔ ne Herodefoɛ maa bɛwale ye berɛ beebisale ye kyɛ, “Kyerɛkyerɛniɛ, yɛse kyɛ ɛte nahorɛniɛ, na ekyirekyire Nyameɛ atee ne turoloo, ɛnyɛ nyeyemuɛ; ofikyɛ ɛmva wɔ nye ndo mmenia bɛ dibea.

Marko 6:20

ɔnate kyɛ né Herode suro Yohane, ofikyɛ onwuni kyɛ Yohane te teneneeniɛ ne krongronniɛ. Yiti ɔbɔle Yohane nwo waen. Né Yohane noa dwirɛ ma Herode ye ti anu yɛ ye basaa; nakoso né okuro kyɛ otie ye noa dwirɛ ɔ.

Luka 16:15

Yiti Yesu sele bɛ kyɛ, “Ɛmɔte mmenia bɔ ɛmɔbu bɛ nwo kyɛ bɛtengyɛ wɔ mmenia nyunu, nakoso Nyameɛ yeɛ ɔse ɛmɔ ti anu ɔ. Ofikyɛ, bɔ ɔmoma ye nwo so wɔ mmenia nu ne, ɔte akyiwadeɛ wɔ Nyameɛ nyunu.

Luka 2:25

Na sɔ mmerɛ ne, né biaa bie bɔ bɛfrɛ ye Simeon ɔ ɔwɔ Yerusalem. Né ɔtengyɛ, yeɛ osuro Nyameɛ, na né ɔ́nwondɛ Yisrael aworakyekyerɛ ne, yeɛ afei né Sunzum Krongron wɔ ye so.

Luka 23:50

Na tie, biaa bie bɔ bɛfrɛ ye Yosef bɔ ofi Yudafoɛ kuro Arimatea so, bɔ ɔte badwafoɛ nemɔ anu ko, bɔ ɔte sona paa ná ɔtengyɛ ɔ,

Yohane 7:18

Ebiala bɔ ɔbɔ ye ti anu dwudwo ne, ɔpena ye bɔbɔ ye animnyam; nakoso bɔ ɔpena animnyam ma bɔ ɔsomane ye nen, ye ole nahorɛniɛ ne, na ngondombo biala nne ye nu.

Asomafoɛ 10:22

Na bɛbɔle b’amaneɛ kyɛ, “Asraafoɛ ɛyaa so panyi Kɔneleo yeɛ ɔsomane yɛ ɔ. Ɔte sona paa, nyamesuroniɛ, na Yuda maen ne amukoraa bɔ ye dumaa paa. Na Nyameɛ abɔfo aye ahyire ye kyɛ ɔto ye sa frɛ wɔ ma ɛbra ye awuro, na otie wɔ noa dwirɛ.”

Asomafoɛ 22:12

“Né biaa bie bɔ bɛfrɛ ye Anania, bɔ ɔte nyamesuroniɛ paa kyɛbɔ yɛ mmeraa si te ɔ wɔ kuro berɛ. Yudafoɛ mukoraa bɔ ye dumaa paa.

Asomafoɛ 6:3

Yiti aliɛmaa mɔ, ɛmɔye ɛmɔ nu mmienzua nzoo bɔ ebiala bu bɛ, nworɛfoɛ bɔ Sunzum Krongron ayi bɛ tɛkyɛ, na yɛfa bɛ yɛsie sɔ adwuma he noa,

Romanfoɛ 13:13

Ɛ́mɔma yɛbɔ bra paa bɔ ɔfata alehyeleɛ ɔ, na nna kyɛ anigye mmorosoɛ ne nzaabolɛ nu, nna adwamanbɔlɛ ne ahohwie nu, ngondii ne anyeboroborolɛ nu.

Romanfoɛ 13:3

Bɛ bɔ bɛ yɔleɛ te paa ne, maen mbanyi nwo nyɛ suro mma bɛ, na mmom bɛ nwo yɛ suro ma bɛ bɔ benni dwirɛ paa ɔ. Aso enguro kyɛ ekosuro bɔ tumi wura ye sa anaa? Nzaade di dwirɛ paa, na ɔkɔkamvo wɔ.

Romanfoɛ 14:18

Na sona bɔ ɔso Kristo wɔ atee sɔ ne aso ne, ɔsɔ Nyameɛ nye, na mmenia bu ye.

Romanfoɛ 2:29

Na mmom Yudaniɛ kaenn ole sona bɔ ɔte Yudaniɛ wɔ ahone nu ɔ; ɔte sunzum nu nikye, na ɔtte anwoɔnaen nu nikye. Nna kuro sona, na mmom Nyameɛ yeɛ ɔye sɔ sona ne ayɛ ɔ.

1 Korintofoɛ 4:5

Yiti nnɛma ɛmɔbua ndɛen koraka ná mmerɛ ne wadwu, koraka né Awurade awa, na ye yeɛ ɔkɔye mvealeɛ nu dwirɛ bɔ ɔwɔ awosii nu kofite ɔ, ná wasa mmenia ti anu nzusuleɛ wagua dwaaso. Na afei ebiala konya ɛkamvolɛ bɔ ɔfata ye ɔ kofi Nyameɛ berɛ.

2 Korintofoɛ 13:7

Na yɛsrɛ Nyameɛ kyɛ ɛmɔngɔyɔ bɔne. Yɛngyire kyɛ yɛ de yɛsɔ anyeɛ oo, daabi! na mmom ɛmɔ de yɛpena kyɛ ɛmɔyɔ bɔ ɔtengyɛ ɔ, ɔwɔ nu kyɛ ebie a yayɛ kyɛ bɛbɔ babɔ ase wɔ gyidie nu ne.

2 Korintofoɛ 6:8

Bedi yɛ ni ná basa bagua yɛ nyunu ase, bɛkã yɛ nwo dwirɛ tɛɛ ná basa baye yɛ ayɛ; yɛkã nahorɛ nakoso bɛnwa yɛte nnakannaka,

2 Korintofoɛ 8:18

Na yɛ́soma ye ne aliɛmaa bɔ ɔnate nzɛmbahanɛ mmɔdenbɔlɛ ti bɛkamvo ye wɔ asɔre ne amukoraa nu ne.

2 Korintofoɛ 8:21

Ofikyɛ yafa yasie yɛ nye so kyɛ yɛtoto nikyee biala pɛpɛɛpɛ, nna Awurade ngome nyunu, na kuro sona koso nyunu.

Galatiafoɛ 5:22

Nakoso Sunzum ne de, ɔma ɔdɔ, anigye, asomdwee, aboterɛ, adɔeɛyɛlɛ, paayɛlɛ, gyidie,

Ɛfesofoɛ 4:25

Yiti ɛ́mɔyakyi ngondombopɛlɛ, ná ebiala li nahorɛ ohyire obiɛngo; ofikyɛ yɛte yɛ nwo yɛ nwo akwaa.

Ɛfesofoɛ 5:9

ofikyɛ kanea mmaa bɔ osu ne, ɔda ali wɔ bra paa ne tenenee ne nahorɛ amukoraa nu;

Ɛfesofoɛ 6:14

Yiti ɛ́mɔgyina pindinn, ɛ́mɔfa nahorɛ bɛyɛ abɔsoɛ bɛbɔ ɛmɔ yaase, ná ɛ́mɔfa tenenee bɛyɛ buralɛ bɛkata ɛmɔ hue so,

Deuteronomi 16:20

Fa wɔ nye sie pɛpɛɛpɛyɛlɛ ngome so, na ɔnate so ekonya ngoa, ná atena aseɛ bɔ AWURADE wɔ Nyameɛ ɔ́fa ma wɔ ne aso.

Filipifoɛ 3:1

Aliɛmaa mɔ, bɔ ɔpɛ ye bo ɔ, ɛ́mɔma ɛmɔ nye gye wɔ Awurade nu. Ɔnha me kyɛ ngosa ngɔhyerɛ nikyee komapɛ ne ala ngɔbrɛ ɛmɔ ɔ, na ye sɔ te paa ma ɛmɔ.

Kolosefoɛ 4:5

Bɛ bɔ bɛnne yɛ fekue ne anu ne, ɛ́mɔnate nworɛ nu wɔ bɛ nu, na nnɛma ɛmɔsɛkye ɛmɔ mmerɛ mbaen.

1 Tɛsalonikafoɛ 4:12

amaa ɛmɔabɔ bɛ bra kyɛbɔ ɔfata wɔ ewiasefoɛ nu, ná nikye fee anhia ɛmɔ.

1 Timoteo 2:2

ahemvo ne bɛ bɔ tumi wura bɛ sa amukoraati, amaa ɔnate so yatena ase konn, ná yɛ so anu atɔ yɛ, nyamesom paa ne anidie brabɔlɛ amukoraa nu.

1 Timoteo 3:11

Sɔ ala yeɛ ɔsɛ kyɛ bɛ ye mɔ koso bɛyɛ mmenia bɔ bɛ nyunu le animnyam ɔ, bɔ bɛmmɔ nzekure, na mmom bɛ nwo dwo, ná bedi nahorɛ wɔ nikyee biala nu ɔ.

1 Timoteo 3:4

Ɔsɛ kyɛ ɔyɛ sona bɔ ɔkora bu ye bɔbɔ ye awuro yé, ná ɔtete ye mma maa bebu ye wɔ atee biala so ɔ.

1 Timoteo 4:12

Nnɛma ebiala bu wɔ animtia kyɛ ɛte aberandeɛ ɔ, na mmom ma agyidifoɛ bɛyɛ nhwɛsoɛ wɔ edwudwolɛ nu, brabɔlɛ nu, ɔdɔ nu, gyidie nu ne anwotelɛ nu.

1 Timoteo 5:10

bɔ bedi ye ne ye nnwumaa paa nwo adanzeɛ: kyɛ watete mmaa, kyɛ waso ɛwɔfoɛ mɔ, kyɛ wanwunzi anwoteefoɛ gya bo, kyɛ waboka bɛ bɔ bɛwɔ anwokyere nu, ɔne kyɛ watu ye nwo wasie berɛ wama nnwumaa paa mukoraa ɔ.

1 Timoteo 5:2

yɛ mmrasua mbanyi nemɔ kyɛ wɔ maame mɔ; yeɛ yɛ ndaluwa nemɔ kyɛ eliɛma mmrasua wɔ anwotelɛ amukoraa nu.

Tito 1:8

na mmom ɔsɛ kyɛ ɔma ye nye gye ɛwɔfoɛsolɛ nwo, okuro bɔ ɔte paa, ɔte ebie bɔ ye adwene nu pi, ɔtengyɛ, ye nwo te, ná ole anwohyɛsoɛ ɔ;

Tito 2:14

Ye yeɛ ɔfale ye ngoa tole berɛ mane yɛ ɔ, kyɛbɔ okole yɛ kofi amumuyɛɛ amukoraa nu, ná wate yɛ nwo wafa yɛ wayɛ ye bɔbɔ ye mmenia sonongo bɔ bɛbɔ nnwumaa paa nwo mmɔden ɔ.

Tito 2:2

Kyirekyire ngɔkoraa nemɔ ma bɛ nye la berɛ, bɛyɛ mmenia bɔ bɛfata anidie ɔ, benya anwohyɛsoɛ, begyina pindinn wɔ gyidie nu, ɔdɔ nu ne animia nu.

Tito 2:7

Na nningyein mukoraa nu, tu wɔ nwo sie berɛ yɛ yɔleɛ paa nwo nhwɛsoɛ: Wɔ ngyerɛkyerɛ nu, da nahorɛlilɛ ne ahoneserɛ ali,

Tito 3:14

Ma yɛ mmenia besua nnwumaa paa nwo mmɔdenbɔlɛ, ná bɛ́fa bɛ́boka bɛ bɔ behia mmokalɛ paa ɔ; na mmom ɔnzɛ kyɛ bɛyɛ foen bɔ mvasoɛ nne bɛ so ɔ.

Hebrifoɛ 11:2

Ofikyɛ, ɔnate gyidie so yeɛ daa ama mɔ sɔle Nyameɛ nye ɔ.

Hebrifoɛ 13:18

Ɛmɔhɔ so bɛbɔ mbaeɛ bɛma yɛ; ofikyɛ yɛde yɛdi kyɛ yɛ tiboa mmua yɛ foɛ, na yɛkuro kyɛ daa yɛdi dwirɛ paa wɔ yɛ brabɔlɛ nu.

Yakobo 1:27

Nyameɛsom bɔ ye nwo te bɔ efiɛ nne ye nwo wɔ Baba Nyameɛ nyunu ɛhe: kyɛ ɛkɔɔnea nyisiaa ne akunafoɛ wɔ b’amaneɛnwunɛ nu, ɔne kyɛ ɛkɔhwe wɔ nwo kofi wiase bra basabasa nu ɔ.

Yakobo 3:17

Nakoso nworɛ bɔ ofi anwuro ne de, bɔ oli moa ɔ, ye nwo te, okuro asomdwee, ye nwo dwo, ye so yɛ mmerɛ, anwumvoinnwunɛ ne bra paa ayi ye tɛkyɛ, na nyeyemuɛ anaa nyaatwom nne nu.

1 Petro 1:22

Asoɛmmerɛlɛ bɔ ɛmɔayɛ bama nahorɛ ne ne ati, wamaa ɛmɔate ɛmɔ kra nwo, na ɛhe amaa ɛmɔahurohuro ɛmɔ nwo dwirɛ wɔ nahorɛ nu, yiti ɔsɛ kyɛ ɛmɔfi ɛmɔ ahone nu bekurokuro ɛmɔ nwo dwirɛ.

1 Petro 2:12

Ɔwɔ nu kyɛ Amaenmaensofoɛ nemɔ bɛkekã ɛmɔ nwo dwirɛ kyɛ ɛmɔte bɔnefoɛ de, nakoso ɛ́mɔma ɛmɔ bra yɛ sannwuu wɔ bɛ nu, amaa banwu ɛmɔ bra paa ne, ná bahyɛ Nyameɛ animnyam wɔ kyẽa bɔ ɔkɔwa ne.

1 Petro 4:8

Bɔ ɔtra so ɔ, ɛmɔhurohuro ɛmɔ nwo dwirɛ nahorɛ nu, ofikyɛ ɔdɔ kata bɔne pee so.

2 Petro 3:1

Aliɛmaa mɔ, ɛhe te me krataa bɔ ɔtɔ so nyɔ bɔ mekyerɛ mebrɛ ɛmɔ ɔ. Na bɛ nu yeɛ mékayekaye ɛmɔ metwe ɛmɔ adwene bɔ nu te ne mesie so,

1 Yohane 3:18

Me ngwadaa mɔ, nnɛmɔma yɛfa yɛ noa mbaen anaa temverema fɛɛ yɛkuro mmenia dwirɛ, na mmom ɛ́mɔma yɛyɔ ye wɔ yɔleɛ nu ne nahorɛ nu.

1 Yohane 3:3

Na ebiala bɔ ole sɔ anyelasoɛ ne wɔ Kristo nu ne, ɔte ye nwo kyɛbɔ Kristo nwo te ne.

1 Yohane 4:1

Aliɛmaa mɔ, nna sunzum biala yeɛ ɔsɛ kyɛ ɛmɔde ye bedi ɔ, na mmom ɛmɔso sunzum nemɔ bɛnea sɛ aso bɛte Nyameɛ deɛ anaa; ofikyɛ ngondombo ngɔmhyɛlɛfoɛ pee badwɔso wɔ wiase.

Rutu 3:11

Afei, mma, nnɛsuro. Nikyee bɔ ekobisa biala, ngɔyɔ ngɔma wɔ, ofikyɛ kuro wa ama mukoraa se ye kyɛ ɛte brasua bɔ wɔ suban te paa ɔ.