Filipifoɛ 1:17 - AHYERƐLƐ KRONGRON

¹⁷ nakoso ebiemɔ de, bɛkã Kristo nwo nzɛmba ne ngondii so, bɛnga ye nahorɛ nu, na bɛdwene kyɛ bɛyɔ sɔ a bɛkɔma me nwo kɔhyere me wɔ me kukunu nna ye anu.

Filipifoɛ 1:17 Iomraidhean Croise

Luka 21:14

Yiti odi kyɛ ɛmɔfa he bɛto ɛmɔ ti anu, ná ɛmɔandwenedwene bɔ ɛmɔkɔfa bɛkɔye ɛmɔ noa ɔ nwo koraka;

Asomafoɛ 22:1

“Aliɛmaa mɔ ne ngya mɔ, ɛ́mɔtie edwirɛ bɔ mekã mefa mesa me nwo mekyire ɛmɔ ye.”

Asomafoɛ 26:1

Na Agripa sele Pɔɔlo kyɛ, “Atee wɔ berɛ kyɛ ekyire wɔ noa dwirɛ ɔ.” Yeɛ Pɔɔlo tengyɛle ye sa yele ye noa kyɛ,

Asomafoɛ 26:24

Na Pɔɔlo wɔ so bɔ ɔye ye noa nen, Festo teane ye kyɛ, “Pɔɔlo, w’adwene nyɛ adwuma! Wɔ nwomaa sualɛ pembe ne abɔ afa wɔ ti anu!”

Romanfoɛ 2:8

Yiti Nyameɛ kɔfɛ bɛ bɔ bɛte pɛsɛmangomenya ná bɛyɛ nahorɛ ne nwo asoserɛ, ná afei bedi bɔne si ne aso yaa piri paa, ná wamaa banwu amaneɛ.

Filipifoɛ 1:18

Onhia po! Atee biala so, kyɛ bɛpati bɛyɔ oo, anaakyɛ bɛyɔ ye nahorɛ nu oo, Kristo nwo dwirɛ komapɛ ne ala yeɛ bɛkã ɔ; na ɛhe maa medi ahurusi, amba, ngɔhɔ so ngoli ahurusi.

Filipifoɛ 1:7

Ɛmɔla m’ahone nwo, yiti ɔte paa kyɛ medwene ɛmɔ amukoraa nwo sɔ ɔ. Ofikyɛ ɛmɔ amukoraa ɛmɔ ne me yanya kyɛfa wɔ adom ne anu, me kuku nu nnaa nu, ɔne mmerɛ bɔ ngyinane pindinn mane nzɛmba ne, ná nzili so ngane ne.

Filipifoɛ 2:3

Nnɛma ɛmɔfa pɛsɛmangomenya anaa nduhoɛ bɛyɔ nikyee biala, na mmom ɔsɛ kyɛ ɛmɔfa anwobrɛaseɛ adwene bebu ɛmɔ mmango mɔ bɛtra ɛmɔ bɔbɔ ɛmɔ nwo.

1 Timoteo 2:7

Na ɛhe ati yeɛ batu me basie berɛ bayɛ me nzɛmbahanɛniɛ ne somafoɛ ɔ, (mekã nahorɛ [wɔ Kristo nu], na membɛ ngondombo), nde Amaenmaensofoɛ nu kyerɛkyerɛniɛ wɔ gyidie ne nahorɛ nu.

2 Timoteo 2:9

nzɛmba ne bɔ yiti yeɛ menwu amaneɛ ná babɔ me panwu kyɛ wudiniɛ ne; nakoso Nyameɛ dwirɛ ne de, bɛbbɔle ye panwu.

2 Timoteo 4:16

Na mmerɛ bɔ né meye me noa bɔ oli moa mefa mesa me nwo ne, ebiala wammangyina me si; bɛ mukoraa bɛyakyili me nu bɛhɔle. Na mesrɛ kyɛ nnɛmaa benya ye nwo asohwenɛ.