Ɛksadɔso 6:7 - AHYERƐLƐ KRONGRON

⁷ Ngɔfa ɛmɔ ngɔyɛ me mmenia, ná me wora ngɔyɛ ɛmɔ Nyameɛ. Na ɛmɔkonwu ye kyɛ me ole AWURADE ɛmɔ Nyameɛ bɔ olele ɛmɔ fili Misraim amaneɛnwunɛ nu ne.

Ɛksadɔso 6:7 Iomraidhean Croise

Gyenesise 26:3

Tena aseɛ ye aso kyɛ ɛwɔfoɛ, na ngogyina wɔ si na mayira wɔ; ofikyɛ ngɔfa sɔ aseɛ ye mɔ amukoraa ngɔma wɔ ne wɔ bosofoɛ na mamaa bɔhyɛ bɔ nhyɛle ɛse Abraham ne awa nu.

Gyenesise 28:13

Ɛlaleɛ ne anu, né AWURADE gyi ye ti sorɔ, na osele kyɛ, “Me ole AWURADE, wɔ nana Abraham ye Nyameɛ bɔ ɔte Yisake koso ye Nyameɛ ne. Ngɔfa aseɛ he bɔ yeɛ ɛla so kekesaala ye ngɔma wɔ ne wɔ bosofoɛ.

1 Ahemvo 20:28

Nyameɛ sona bie hɔle Yisrael hene berɛ oosele ye kyɛ, “AWURADE nwa: Ɔnate kyɛ Siriafoɛ bahã kyɛ me AWURADE nde mmokaa so Nyameɛ na mmom nnde bɔnza nu Nyameɛ ne ati, yiti ngɔfa ɛlɔen kandinga he amukoraa ngowura wɔ sa, amaa ɛmɔanwu kyɛ me ole AWURADE.”

1 Ahemvo 8:60

amaa aseɛ ye aso mmenia amukoraa banwu kyɛ AWURADE, wɔ yeɛ ɛte Nyameɛ ɔ; na nyameɛ foforɛ biala nne berɛ ko.

Nehemia 1:10

Bɛte wɔ somvoɛ mɔ ne wɔ maen bɔ afa wɔ tumi piri ne w’anwoserɛ kandinga ne apepɛ ale bɛ ɔ.

Edwein 100:3

Ɛ́mɔnwu ye kyɛ AWURADE yeɛ ɔte Nyameɛ ɔ, ye yeɛ ɔbɔle yɛ ɔ, na yɛte ye deɛ; yɛte ye maen ne ye mmoaen bɔ ɔma bɛ aleɛ ɔ.

Edwein 81:6

“Nyele adesoa piri ne mvili ye bati so, ye sa yakyili kɛndɛen kukulɛ.

Ɛksadɔso 13:14

Na sɛ kyẽa bie ɛwa bisa wɔ kyɛ, “Ɛhe bo kyire sɛɛ’ a, wɔ koso abua ye kyɛ, ‘AWURADE nate ye tumi piri so yeɛ ɔyele yɛ fili Misraim ngoaasolɛ nu ɔ.

Ɛksadɔso 13:3

Na Mose sele mmenia ne kyɛ, “Ɛ́mɔkaye sɔ kyẽa he bɔ ɛmɔfili Misraim ɔ, bɔ ɛmɔfili ngoaasolɛ nu ne, ofikyɛ AWURADE nate tumi piri so yeɛ ɔyele ɛmɔ fili Misraim ɔ; yiti nnɛma ɛmɔdi paanoo harewaa biala.

Ɛksadɔso 14:18

Na sɛ ɔnate Faro ne ye teaseɛnam mɔ, ɔne ye pɔngɔhanɛfoɛ so mehyɛ me nwo animnyam a, Misraimfoɛ konwu ye kyɛ me ole AWURADE.”

Ɛksadɔso 14:4

Ngɔma Faro kobubu mmakaa kotua ye so. Ɔkɔpo bɛ so, nakoso ɔnate Faro ne ye lɔen amukoraa so ngɔhyɛ me nwo animnyam; na Misraimfoɛ konwu ye kyɛ me ole AWURADE.” Na sɔ ala yeɛ Yisraelfoɛ yɔle ɔ.

Ɛksadɔso 15:16

Ahunundetelɛ ne ɛserɛ atɔ bɛ so; ɔnate wɔ tumi asaa ne ati, bayɛ dinn kyɛ nyɔboɛ, kɔpem kyɛ, O AWURADE, wɔ mmenia kɔpɛ nu kɔhɔ ɔ, kɔpem kyɛ mmenia bɔ ale bɛ ne kɔpɛ nu kɔhɔ ɔ.

Ɛksadɔso 15:2

AWURADE te m’anwoserɛ ne me dwein, na wayɛ me ngoadefoɛ. Ɔte me Nyameɛ, na ngɔye ye ayɛ, me baba Nyameɛ ɛne, na ngɔma ye so.

Ɛksadɔso 16:12

“Mate Yisraelfoɛ bɛ komvi bɔ bɛpenepene ne. Yiti ka kyire bɛ kyɛ, ‘Nɔsoa ɛmɔkoli naen, ná ngyerɛmɔ wora ɛmɔali aleɛ ama ɛmɔ ko ayi; amaa ɔnate so ɛmɔanwu kyɛ me ole AWURADE ɛmɔ Nyameɛ ne.’ ”

Ɛksadɔso 16:6

Yiti Mose ne Aarɔn sele Yisraelfoɛ ne kyɛ, “Ɛnɛ nɔsoa, ɛmɔkonwu ye kyɛ AWURADE yeɛ ɔyele ɛmɔ fili Misraim aseɛ so ɔ.

Ɛksadɔso 2:11

Mose nyini ne, ɛlɛho bie ɔɔpasale oliɛma mɔ Hebrifoɛ nwo, na onwuni adwuma serɛ bɔ né bɛ́hyɛ bɛ maa bɛyɔ ɔ. Na onwuni kyɛ Misraimniɛ bie ɔ́bo oliɛma Hebrifoɛ nemɔ anu ko ɔ.

Ɛksadɔso 6:6

Yiti ka kyire Yisraelfoɛ kyɛ, “Me ole AWURADE, na ngɔye ɛmɔ ngofi Misraim amaneɛnwunɛ nu, ná male ɛmɔ mafi bɛ ngoaasolɛ nu. Na ɔnate tumi asaa ne asohwenɛ mbiri mbiri so yeɛ ngɔfa ngole ɛmɔ ɔ.

Ɛksadɔso 7:17

AWURADE nwa nyoo, ‘Bɔ ɔkɔmaa ekonwu ye kyɛ nde AWURADE ɛhe: Tie, ngɔfa pɔmaa bɔ otira me sa nu ne ngofĩ asue Naele nu, na nzue ne kɔkakyi mogya.

Yesaya 41:20

amaa ɔnate so mmenia anwu ye bate ye bo, ná badwene ye nwo banya ye nwo ndeaseɛ, kyɛ AWURADE tumi yeɛ wayɔ ɛhe ɔ, kyɛ Yisrael Krongronniɛ ne yeɛ ɔbɔle ye ɔ.

Yesaya 49:23

Ahemvo mɔ, bɛkɔyɛ wɔ baba mɔ bɔ bɛtete wɔ ɔ, yeɛ bɛ hemmaa mɔ kɔyɛ wɔ maame mɔ bɔ bɛma wɔ nyɔfone ɔ. Bɛkɔfa bɛ nyunu bekobutu ase bekobu ndwerɛ wɔ wɔ nyunu, ná batafe wɔ gya bo mvuture. Na afei ekonwu kyɛ me ole AWURADE, na bɛ bɔ bɛfa bɛ nye bɛto me so ne, bɛ nyunu ngogua ase.”

Yesaya 49:26

Bɛ bɔ bɛhyɛ wɔ so ne, ngɔfa bɛ bɔbɔ bɛ nwonaen maa bekoli, na bɛ bɔbɔ bɛ mogya kɔbo bɛ kyɛ nzaa. Na afei anwoɔnaen amukoraa konwu ye kyɛ me, AWURADE, me ole wɔ Ngoadefoɛ ne wɔ Defoɛ, Yakob ye Tuminiɛ ne.”

Yesaya 51:15

Ofikyɛ me ole AWURADE, wɔ Nyameɛ, bɔ ɔkã ɛpo nu ma ye asorɔkye bɔ wuruwuru ne, ye dumaa li Asafo AWURADE.

Yesaya 60:16

Ɛkɔno maen maen mɔ bɛ nyɔfonesue, yeɛ ekoli ahemvo mɔ b’anwonya, na ekonwu ye kyɛ me, AWURADE, me ole wɔ Ngoadefoɛ ne wɔ Defoɛ, Yakob ye Tuminiɛ ne.

Yesaya 63:8

Ofikyɛ ɔnwa: ‘Nahorɛ nu, bɛte me maen, mmaa bɔ bɛngɔpɛ ngondombo ɔ,’ na ɔyɛle bɛ Ngoadefoɛ.

Yeremia 30:22

Ɛmɔkɔyɛ me maen, ná me koso mayɛ ɛmɔ Nyameɛ.”

Yeremia 31:33

Nakoso apam bɔ me ne Yisrael awuro ama yɛkɔyɛ ɛhe: Sɔ mmerɛ ne asi ne, ngɔfa me mmeraa ngowura bɛ nu, na ngɔhyerɛ ye wɔ b’ahone nu; ngɔyɛ bɛ Nyameɛ, ná bɛ koso bayɛ me maen, AWURADE noa dwirɛ ɛne.

Hesekiel 20:19

Me ole AWURADE ɛmɔ Nyameɛ ne; ɛ́mɔli m’ahyɛdeɛ so, ná ɛmɔli me mmeraa so nahorɛ nu;

Hosea 1:10

Nakoso Yisraelfoɛ bɛ somaa kɔyɛ kyɛ mboanoa anweaa, bɔ bɛngora ye susu anaa bɛngora ye ka ɔ. Na nekaa bɔ bɛhã behyirele bɛ kyɛ, “Nna me maen ole ɛmɔ” nen, berɛ yeɛ bɛkɔhã bekohyire bɛ kyɛ, “Nyameɛ teasefoɛ mma ole ɛmɔ” ɔ.

Lewitikɔso 11:44

Ofikyɛ me ole AWURADE ɛmɔ Nyameɛ; yiti ɛ́mɔte ɛmɔ anwo, ná ɛ́mɔyɛ krongron ofikyɛ nde krongron. Nnɛma ɛmɔfa kaka biala bɔ ɔtwe ye nwo ase begua ɛmɔ nwo fiɛ.

Lewitikɔso 11:45

Ofikyɛ me ole AWURADE bɔ nyele ɛmɔ mvili Misraim aseɛ so mmale ne, bɔ me yeɛ nde ɛmɔ Nyameɛ ɔ; yiti ɛ́mɔyɛ krongron, ofikyɛ nde krongron.”

Sakaria 13:9

Na ngyɛmuɛ nza nu ko ne, ngɔfa bɛ ngɔfa see nu, ngɔpɔ bɛ nwo kyɛbɔ bɛpɔ ɛdwetɛ nwo ɔ, na ngohwi bɛ nwo kyɛbɔ betwi sikaa kɔkorɛ nwo ɔ. Bekosu bɛkɔfrɛ me dumaa, na me wora ngotie bɛ. Ngɔhã kyɛ, ‘Bɛte me maen’ na bɛ wora bɛkɔhã kyɛ, ‘AWURADE yeɛ ɔte me Nyameɛ ɔ.’ ”

Numeri 15:41

Me ole AWURADE ɛmɔ Nyameɛ bɔ nyele ɛmɔ mvili Misraim aseɛ so mmale ne, bɔ me yeɛ nde ɛmɔ Nyameɛ ɔ: Me ole AWURADE ɛmɔ Nyameɛ.”

Mateo 22:32

kyɛ ‘Me ole Abraham Nyameɛ, Yisake Nyameɛ ne Yakob Nyameɛ’? Nyameɛ ɔtte awufoɛ Nyameɛ, na mmom ɔte ateasefoɛ Nyameɛ.”

Romanfoɛ 8:31

Afei nzikyɛ yeɛ yɛkɔhã kɔfa ɛhemɔ nwo ɔ? Sɛ Nyameɛ gyi yɛ si a, nwa yeɛ ɔkɔho kotia yɛ ɔ.

Deuteronomi 14:2

Ofikyɛ ɛte maen krongron ma AWURADE wɔ Nyameɛ, na AWURADE aneanea nu waye wɔ wafi aseɛ so mmenia mukoraati nu kyɛ ɛyɛ ye bɔbɔ ye maen.

Deuteronomi 26:18

Ɛnɛ kyẽa ye, AWURADE aha afa wɔ nwo kyɛ, ɛkɔyɛ ye bɔbɔ ye maen, kyɛbɔ ɔhyɛle wɔ bɔ ne, yiti ɔsɛ kyɛ edi ye mmeraa dwirɛ mukoraati so.

Deuteronomi 29:12

kyɛ ɛ́fa wɔ nwo wura AWURADE wɔ Nyameɛ apam ne anu, apam bɔ ndaen foa so, bɔ AWURADE wɔ Nyameɛ ɔne wɔ bɛ́yɛ ye ɛnɛ kyẽa ye;

Deuteronomi 29:13

amaa ɔnate so ɛnɛ kyẽa ye wafa wɔ wayɛ ye maen, bɔ ye koso ɔte wɔ Nyameɛ ɔ, kyɛbɔ ɔhyɛle wɔ bɔ, ɔne kyɛ ɔtale ye nwo ndaen hyirele wɔ nana mɔ Abraham, Yisake ne Yakob nen.

Deuteronomi 29:5

Afoɛ aburanna bɔ mamaa ɛmɔanate ɛserɛ so ne, ɛmɔ ndena andete wanga ɛmɔ nwo, yeɛ wɔ mbaboa koso wandete;

Deuteronomi 4:20

Nakoso ɛmɔ de, AWURADE afa ɛmɔ, na waye ɛmɔ wafi buralɛ afaa hyerɛhyerɛ nu, mekyire Misraim, kyɛ ɛmɔɔyɛ ye bɔbɔ deinn ye deɛ, kyɛbɔ kekesaala ye ɛmɔte ye.

Deuteronomi 7:6

“Ofikyɛ ɛmɔte mmenia krongron bɛma AWURADE ɛmɔ Nyameɛ; na ɛmɔ yeɛ AWURADE ɛmɔ Nyameɛ waneanea aseɛ ye aso mmenia mukoraati nu waye ɛmɔ ɔ, kyɛ ɛ́mɔyɛ ye bɔbɔ ye mmenia bɔ ye ahone la bɛ nwo ɔ.

Hebrifoɛ 11:16

Nakoso afei, maen paa bɔ ɔte nyameɛso maen yeɛ bɛpena ɔ. Yiti ɔnyɛ Nyameɛ nya kyɛ bɛkɔfrɛ ye bɛ Nyameɛ ɔ, ofikyɛ wasiesie kuro bie wama bɛ.

1 Petro 2:10

Daa ne de, né ahaa ɛmɔtte maen, nakoso afei de, ɛmɔte Nyameɛ maen; daa ne de, né onnwuni ɛmɔ anwumvoin, nakoso afei de, wanwu ɛmɔ anwumvoin.

Nyekyire 21:3

Na ndele kyɛ komviɛ piri bie fi ahennie bia ne anu ɔkã kyɛ, “Tie, Nyameɛ ɛtena sua ne ɔwɔ adasa mmaa nu, na ɔkɔtena nu wɔ bɛ nu, bɛkɔyɛ ye maen, na Nyameɛ bɔbɔ ɔne bɛ kɔtena, [ná wayɛ bɛ Nyameɛ.]”

Nyekyire 21:7

Ebiala bɔ odi ngonim ne, okonya ɛhemɔ amukoraa, na ngɔyɛ ye Nyameɛ, ná ye koso wayɛ mma.