Ɛksadɔso 34:7 - AHYERƐLƐ KRONGRON

⁷ bɔ ye dɔ bɔ onni ngasi wɔ berɛ ma mmenia apee apee, bɔ ɔfa amumuyɛɛ ne mmeraatolɛ ne bɔne kyɛ ɔ. Nakoso ɔmma sona bɔ odi fɔ ne ɔmva ye nwo tɔtorɔtɔɔ, na ɔprapra seɛ mɔ bɔne nwo asohwenɛ gua bɛ mma mɔ ne bɛ nnomaa mɔ so, maa okodwu aworɛ ndoatoasoɛ nza ne nna so.”

Ɛksadɔso 34:7 Iomraidhean Croise

Gyenesise 19:16

Nakoso né ɔtwetwe ye bo ase, yiti sɔ mmienzua nyɔ ne sosɔle ye ne ɔye ne ye mma mmrasua nyɔ nemɔ sa, na bɛfale ye befili kuro ne anu, ofikyɛ AWURADE nwuni ye anwumvoin.

1 Ahemvo 8:30

Sɛ w’akoaa ne wɔ maen Yisrael bɛfa bɛ nye bekyire sua ye bɛbɔ mbaeɛ a, tie bɛ sufrɛ wɔ nyameɛso, nekaa bɔ ɛte ne, ná fa bɛ bɔne kyɛ bɛ.

1 Ahemvo 8:32

ye de tie ye wɔ nyameɛso dɔ ná di dwirɛ ne. Bua wɔ ngoaa mɔ ndɛen. Bua bɔ wayɔ mvomsoɛ ne foɛ, ná ma ye musue ɔbɔ ye bɔbɔ ye ti so. Nakoso bɔ ɔtengyɛ ne, ɔnate kyɛ ye ndɛen yɛ fɛ ne ati, bua ye be.

2 Aberɛso Dwirɛ 30:9

Ofikyɛ sɛ ɛmɔsa bɛbadi AWURADE si a, bɛ bɔ bahye ɛmɔ aliɛma ne ɛmɔ mma mɔ nnure ne, bekonwu bɛ anwumvoin bɛkɔyakyi bɛ maa bekosa bɛkɔwa aseɛ ye aso. Ofikyɛ AWURADE ɛmɔ Nyameɛ ne, ɔdo mmenia na ɔse anwumvoin. Sɛ ɛmɔsa bɛba ye berɛ a, ongoli ɛmɔ ngasi.”

Nehemia 1:5

Na ngane kyɛ, “Ao AWURADE, nyameɛso Nyameɛ, Nyameɛ piri bɔ wɔ nwo yɛ suro bɔ edi apam so ná ɛye ɔdɔ bɔ onni ngasi ali kyire bɛ bɔ bekuro wɔ dwirɛ ná bedi wɔ mmeraa dwirɛ ne aso ne,

Nehemia 9:32

“Yiti afei, yɛ Nyameɛ bɔ ɛte piri bɔ wɔ nwo yɛ suro, bɔ edi apam so ná ekyire ɔdɔ bɔ onni ngasi ɔ, amaneɛ amukoraa bɔ wato yɛ ne y’ahemvo, yɛ mbanyi mɔ, y’asɔfo mɔ, yɛ ngɔmhyɛlɛfoɛ, yɛ nana mɔ, ɔne wɔ mmenia amukoraa, ofi Asiria ahemvo mɔ aberɛ so bɔ ɔbaadwu ɛnɛ ye, nnebu ye nikyee ba.

YOB NWOMAA NE 10:14

Ɛtetɛ me nea sɛ aso ngɔyɔ bɔne a, na ɛngɔfa me nwo ngɔhyɛ me wɔ me mvomsoɛ nwo.

Edwein 103:3

Ye yeɛ ɔfa w’amumuyɛɛ amukoraa kyɛ wɔ ɔ, ye yeɛ ɔsa w’anwonyerɛ amukoraa ɔ;

Edwein 109:14

Mesrɛ kyɛ AWURADE ɔkaye ye nana mɔ b’amumuyɛɛ wɔ ye nyunu, yeɛ nnɛmaa okyikyi oni bɔne fi berɛ.

Edwein 130:4

Nakoso wɔ de bɔnefakyɛ wɔ wɔ nu, amaa ɔnate so yasuro wɔ.

Edwein 136:10

Ye bɔ ohuhuni Misraimfoɛ bɛ bamuɛbaa mɔ ɔ, ofikyɛ ye ɔdɔ bɔ onni ngasi ne, ɔwɔ berɛ afebɔɔ;

Edwein 136:15

nakoso Faro ne ye lɔen de, ɔhane bɛ guale Ɛpo Kɔkorɛ ne anu, ofikyɛ ye ɔdɔ bɔ onni ngasi ne, ɔwɔ berɛ afebɔɔ;

Edwein 25:11

Ao AWURADE, wɔ dumaa ti, fa me bɔne kyɛ me, ofikyɛ ɔte piri.

Edwein 86:15

Nakoso, ao AWURADE, ɛte Nyameɛ bɔ ɛse anwumvoin ná ɛdo mmenia ɔ; w’ahone nhu ndɛ, na wɔ ɔdɔ bɔ onni ngasi ne wɔ nahorɛlilɛ ne, ɔsone.

Edwein 99:8

Ao AWURADE yɛ Nyameɛ, ebuale bɛ; ɛyɛle bɛ Nyameɛ bɔ ɛfa bɔne kyɛ ɔ, nakoso ɛyɛle bɛ bɔne so wereɛtɔlɛniɛ.

Ɛksadɔso 23:21

Suro ye ná tie ye dwirɛ. Nnɛtwi fa ye dwirɛ so, na ɔngɔfa ɛmɔ mmeraatolɛ ngɔhyɛ ɛmɔ, ofikyɛ me dumaa la ye so.

Ɛksadɔso 23:7

Nnɛto ebiɛngo soen, yeɛ nnɛku sona bɔ odi be ná ɔtengyɛ ɔ, ofikyɛ mengobua amumuyɛɛniɛ be.

Ɛksadɔso 33:19

Na AWURADE buale kyɛ, “Ngɔma me paayɛlɛ mukoraati kɔsẽ kɔpɛ nu wɔ wɔ nyunu, ná mabɔ me dumaa AWURADE ne wɔ wɔ nyunu. Ofikyɛ sona bɔ ngɔlo ye ne yeɛ ngɔlo ye ɔ, yeɛ bɔ ngonwu ye anwumvoin ne yeɛ ngonwu ye anwumvoin ɔ.

Ɛksadɔso 34:9

Na ɔhane kyɛ, “O AWURADE, sɛ alo me a, nzaade AWURADE, mesrɛ wɔ, boka yɛ so ɛne yɛ hɔ. Ɔwɔ nu kyɛ mmenia hemɔ bɛ so yɛ se de, nakoso fa yɛ amumuyɛɛ ne yɛ bɔne kyɛ yɛ, ná fa yɛ wura wɔ kunu.”

Yesaya 45:21

Ɛ́mɔdwudwo, ɛ́mɔbɔ ɛmɔ nguro; maa bɛbɔ nu bɛhɔ agyina! Nwa yeɛ ɔhane sɔ dwirɛ ne tole berɛ fili tetetete ɔ? Nwa yeɛ ofi daa tete ne ɔfa tole dwaa ɔ? Aso nna me, AWURADE ɔ? Nyameɛ biala nne berɛ, sana me ngome, nde Nyameɛ bɔ ɔtengyɛ bɔ ode ngoa ɔ, ebiala nne berɛ, sana me ngome.

Yeremia 30:11

Ofikyɛ ngyi wɔ si kyɛ ngɔpepɛ ngole wɔ, AWURADE noa dwirɛ ɛne; na maen maen amukoraa bɔ mabɔ wɔ masande maagua so ne, ngɔbɔ bɛ tɔɔ, nakoso wɔ de, mengɔbɔ wɔ tɔɔ. Na mmom ngɔhwe wɔ so kyɛbɔ ɔfata ɔ, na mengɔma ɛngɔfa wɔ nwo ngoli tɔtorɔtɔɔ.

Yeremia 32:18

wɔ bɔ ɛye wɔ ɔdɔ ali kyire mmenia apee apee, nakoso ɛprapra seɛ mɔ b’amumuyɛɛ nwo akatuaa gua bɛ mma mɔ so ɔ. Ao, Nyameɛ Piri, Tuminiɛ kandinga, ye dumaa ole Asafo AWURADE.

Yeremia 9:24

Na mmom ebiala bɔ ɔhoahoa ye nwo ne, odi kyɛ ɔhoahoa ye nwo kyɛ ole nimdeɛ, ná ɔse me kyɛ me ole AWURADE bɔ mefa ɔdɔ bɔ onni ngasi, ndɛenbualɛ turoloo ne nahorɛlilɛ yeɛ meyɛ me nningyein wɔ aseɛ ye aso ɔ. Na sɔ nningyein nemɔ yeɛ me nye gye bɛ nwo ɔ, AWURADE noa dwirɛ ɛne.”

Daniel 9:4

Mmɔle mbaeɛ ngyirele AWURADE me Nyameɛ, na nne ndole nu ngane ye pefee kyɛ, “O AWURADE, Nyameɛ piri bɔ ye nwo yɛ suro, bɔ odi apam ne ɔdɔ bɔ onni ngasi ɔ so ma bɛ bɔ bekuro ye dwirɛ ɔne bɛ bɔ bedi ye mmeraa dwirɛ so ɔ;

Daniel 9:9

O AWURADE yɛ Nyameɛ, yayɛ wɔ nwo lɔen, nakoso wɔ yeɛ ɛse anwumvoin ná ɛfa bɔne kyɛ ɔ.

Mika 6:11

Aso sona bɔ otira bɔne asusudeɛ, ɔne nnakannaka tonyi ne, aso odi kyɛ mebua ye be anaa?

Mika 7:18

Nwa yeɛ ɔte Nyameɛ kyɛ wɔ, bɔ ɔfa amumuyɛɛ kyɛ, bɔ obu ye nye gua ye agyapadeɛ ngaa bɛ mmeraatolɛ so ɔ? Ɔmma ye yaafɛlɛ ndena berɛ afebɔɔ, ofikyɛ ye nye gye anwumvoinnwunɛ nwo.

Nahum 1:6

Nwa yeɛ ɔkɔhora kogyina ye ahonehulɛ ne nyunu ɔ? Nwa yeɛ ɔkɔhora kogyina ye yaa noa hyerɛhyerɛ ne noa ɔ? Ye yaafɛlɛ ne hwie gua kyɛ see, na ɔma nyɔbotaen mɔ nu dwudwa.

Mateo 12:31

Ɛhe ati yeɛ mekã mekyire ɛmɔ kyɛ, bɛkɔfa bɔne ne musue dwirɛ amukoraa bɛkɔhyɛ mmenia, nakoso musue dwirɛ bɔ otia Sunzum ne de, bɛngɔfa ngɔhyɛ mmenia.

Mateo 6:12

Na fa yɛ mvomsoɛ kyɛ yɛ, kyɛbɔ yɛfa yɛkyɛ bɛ bɔ bɛfõ yɛ ne.

Luka 7:42

Bangora kerɛ ne tua, yiti ɔfa hyɛle bɛ munyɔ. Yiti kyire me bɛ nu horɛ bɔ okohuro biaa ne dwirɛ paa ɔ?”

Luka 7:48

Na osele braa ne kyɛ, “Bafa wɔ bɔne bahyɛ wɔ.”

Asomafoɛ 13:38

Ɔnate sɔ ne ati, aliɛmaa mɔ, yɛma ɛmɔnwu ye kyɛ ɔnate Yesu so yeɛ bɛbɔ bɔnefakyɛ dwirɛ ne dawure bekyire ɛmɔ ye;

Asomafoɛ 5:31

Ye yeɛ Nyameɛ mane ye so siele ye sa famaa so bɔle ye panyi, na ɔyɛle ye Ngoadefoɛ kyɛ ohyire Yisrael maen atee ma benya adwenesakyera na banya bɔnefakyɛ ɔ.

Ɛfesofoɛ 1:7

Ɔnate ye mogya ne aso yeɛ wale yɛ ɔ, bɔ ye ole yɛ mvomsoɛ fahyɛlɛ ne, kyɛbɔ ye adom mmorosoɛ ne te ne,

Ɛfesofoɛ 4:32

Ɛmɔhurohuro ɛmɔ nwo dwirɛ, ɛ́mɔnwu ɛmɔ nwo anwumvoin, ná ɛ́mɔfa bɛhyehyɛ ɛmɔ nwo, kyɛbɔ Nyameɛ nate Kristo so wafa wahyɛ ɛmɔ ne.

Deuteronomi 32:35

Wereɛtɔlɛ ne akatuaa te me deɛ, ɔngɔhyɛ biala, bekosoti; ofikyɛ b’amaneɛnwunɛ kyẽa ne apingye, na b’ayieleɛ ɔ́ba ndɛndɛ.

Deuteronomi 7:10

Nakoso bɛ bɔ bɛpɔ ye ne de, otua bɛ so kerɛ maa bɛ boso yera. Ɔngyɛ ye nwo koraa, na otua bɛ bɔ bɛpɔ ye ne so kerɛ maa bɛ boso yera.

Deuteronomi 7:9

Yiti ɔsɛ kyɛ enwu ye kyɛ, AWURADE wɔ Nyameɛ ne, ye ole Nyameɛ; Nyameɛ nahorɛlilɛniɛ bɔ odi ye adɔeɛ apam so ma mmenia bɔ bekuro ye dwirɛ ná bedi ye mmeraa dwirɛ so ɔ, kodwu aworɛ ndoatoasoɛ apee so.

Hebrifoɛ 12:29

ofikyɛ yɛ Nyameɛ ne te see bɔ ɔyera nikye ɔ.

Yosua 24:19

Nakoso Yosua sele maen ne kyɛ, “Ɛmɔngɔhora ngɔso AWURADE, ofikyɛ ɔte Nyameɛ bɔ ɔte krongron ɔ. Ɔte nungunɛ Nyameɛ; na ɔngɔfa ɛmɔ mmeraatolɛ ne ɛmɔ bɔne ngɔhyɛ ɛmɔ.

1 Yohane 1:9

Nakoso ɔnate kyɛ odi nahorɛ ná ɔtengyɛ ne ati, sɛ yɛkã yɛ bɔne yɛkyire ye a, ɔkɔfa kɔhyɛ yɛ ná wate yɛ nwo wafi bɔ ɔndengyɛ mukoraa nwo.

Nyekyire 20:15

Na ebiala bɔ bannwu kyɛ bahyerɛ ye dumaa wɔ ngoa nwomaa ne anu ne, begyili ye bɛtole see abura ne anu.

Nyekyire 21:8

Na bɛ bɔ bɛte serɛ, bɛ bɔ benne benni, akyiwadeɛyɔlɛfoɛ, awudifoɛ, adwamanbɔlɛfoɛ, ngonyaayelɛfoɛ, bosoensolɛfoɛ ne ngondombofoɛ amukoraa de, abura bɔ see ne sɔfe begye wɔ nu ne anu yeɛ ɔkɔyɛ bɛ bue deɛ ɔ, na ewue bɔ ɔtɔ so nyɔ ne ɛhe.”