Ɛksadɔso 34:6 - AHYERƐLƐ KRONGRON

⁶ AWURADE pɛle nu wɔ Mose nyunu, na AWURADE teane nu hane kyɛ, “AWURADE, AWURADE, Nyameɛ bɔ ɔse anwumvoin ná ɔdo mmenia ɔ, bɔ ye ahone nhu ndɛ, bɔ ye ɔdɔ bɔ onni ngasi ne nahorɛlilɛ sone ɔ,

Ɛksadɔso 34:6 Iomraidhean Croise

Gyenesise 24:27

kyɛ, “Animnyam hã AWURADE, me mene Abraham Nyameɛ bɔ wamma ye wora amvi ye paayɛlɛ ne ye nahorɛ bɔ odi ma me mene ɔ. Na me koso, AWURADE ayɛ me taataa wafa me wawa me mene abusuafoɛ awuro.”

2 Samuel 24:14

Yeɛ Dawide buale Gade kyɛ, “Yieee, edwirɛ piri paa yeɛ wato me e! Kyɛ kuro sona kɔhwe me so de, ye de ma AWURADE mmom ɔhwe yɛ so, ofikyɛ ye de, ye anwumvoinnwunɛ te piri.”

1 Ahemvo 19:11

Afei osele Elia kyɛ, “Kɔ bokaa ne aso kogyina AWURADE nyunu, ofikyɛ AWURADE baapɛ nu.” Afei mvrama kandinga bie tuli. Né mvrama ne noa yɛ se paa, yiti odwudwale mmokaa ne nyɔbotaen mɔ nu wɔ AWURADE nyunu, nakoso né AWURADE ɔnne mvrama ne anu. Mvrama ne asi ne, aseɛ wosole, nakoso né AWURADE ɔnne aseɛwosolɛ ne anu.

1 Ahemvo 8:30

Sɛ w’akoaa ne wɔ maen Yisrael bɛfa bɛ nye bekyire sua ye bɛbɔ mbaeɛ a, tie bɛ sufrɛ wɔ nyameɛso, nekaa bɔ ɛte ne, ná fa bɛ bɔne kyɛ bɛ.

2 Aberɛso Dwirɛ 30:9

Ofikyɛ sɛ ɛmɔsa bɛbadi AWURADE si a, bɛ bɔ bahye ɛmɔ aliɛma ne ɛmɔ mma mɔ nnure ne, bekonwu bɛ anwumvoin bɛkɔyakyi bɛ maa bekosa bɛkɔwa aseɛ ye aso. Ofikyɛ AWURADE ɛmɔ Nyameɛ ne, ɔdo mmenia na ɔse anwumvoin. Sɛ ɛmɔsa bɛba ye berɛ a, ongoli ɛmɔ ngasi.”

Nehemia 9:17

Bɛyɛle b’adwene kyɛ bengoli so, na anwanwadeɛ bɔ ɛyɔle mane bɛ ne, bangaye, na mmom bɛyɛle asoserɛ, yeɛ bɛyele sona maa ɔlale bɛ noa kyɛ besa bɛkɔ ngoaasolɛ nu wɔ Misraim. Nakoso ɛte Nyameɛ bɔ ɛfa bɔne kyɛ, ɛdo mmenia, yeɛ ɛse anwumvoin, w’ahone nhu ndɛ, wɔ ɔdɔ bɔ onni ngasi sone, na anye wɔ sa amvi bɛ bo.

Edwein 108:4

Ofikyɛ wɔ ɔdɔ bɔ onni ngasi ne, ye piri kɔ anwuro tra ewienu dɔ paa, yeɛ wɔ nahorɛlilɛ ne, okodwu munungum nemɔ anu dɔ.

Edwein 111:4

Wamaa bɛkaye ye anwanwadeɛ nnwumaa nemɔ; AWURADE do mmenia, na ɔse anwumvoin.

Edwein 111:8

Betimu berɛ afebɔɔ, kyɛ bɛ́fa atee bɔ ɔtengyɛ ná ɔte turoloo so beli so.

Edwein 112:4

Kanea pukye awosii nu ma teneneeniɛ; ɔdo mmenia, ɔse anwumvoin, yeɛ ɔtengyɛ.

Edwein 116:5

AWURADE do sona, ná ɔtengyɛ; amba, yɛ Nyameɛ se anwumvoin.

Edwein 138:2

Mebɔ me nu ase mefa me nye mekyire w’asɔneyɛɛ sua krongron ne, na mefa asennaa mema wɔ dumaa, ɔnate wɔ ɔdɔ bɔ onni ngasi ne wɔ nahorɛlilɛ ne ati; ofikyɛ apagya wɔ dumaa ne wɔ dwirɛ maa batra nikyee biala.

Edwein 145:8

AWURADE do mmenia, na ɔse anwumvoin; ye ahone nhu ndɛ, na ye ɔdɔ bɔ onni ngasi ne, ɔsone.

Edwein 146:6

Nyameɛ bɔ odi ye dwirɛ so afebɔɔ ne, ye yeɛ ɔbɔle anwuro ne aseɛ, ɛpo ne nu nningyein amukoraa ɔ.

Edwein 31:19

Ao, wɔ lolɛ bɔ ahyehyɛ ato berɛ ama bɛ bɔ besuro wɔ ne, ɔyɛ nwanwa soma! Bɛ bɔ bɛnwati bɛbafea wɔ nu ne, ye yeɛ ɛfa bɔ bɛ nwo waen bɔ adasa bɛ nye tua ɔ!

Edwein 57:10

Ofikyɛ wɔ ɔdɔ bɔ onni ngasi ne, ye piri kɔka ewienu dɔ paa, yeɛ wɔ nahorɛlilɛ ne, okodwu munungum nemɔ anu.

Edwein 86:15

Nakoso, ao AWURADE, ɛte Nyameɛ bɔ ɛse anwumvoin ná ɛdo mmenia ɔ; w’ahone nhu ndɛ, na wɔ ɔdɔ bɔ onni ngasi ne wɔ nahorɛlilɛ ne, ɔsone.

Edwein 86:5

Ao AWURADE, ɛte paa, na ɛfa bɔne kyɛ; wɔ ɔdɔ bɔ onni ngasi ne ɔsone ma bɛ bɔ besu bɛfrɛ wɔ ɔ.

Edwein 91:4

Ɔkɔfa ye ndɛkra kɔkata wɔ so, na ye ndaa ne abo yeɛ ekonya afealeɛ ɔ; ye nahorɛlilɛ ne te akokyɛm ne buralɛ ataadeɛ.

Ɛksadɔso 20:5

Nnɛkoto bɛ, yeɛ nnɛso bɛ; ofikyɛ me, AWURADE wɔ Nyameɛ ne, nde nungunɛ Nyameɛ, na meprapra seɛ mɔ bɛ bɔne nwo asohwenɛ megua bɛ mma mɔ so, maa okodwu aworɛ ndoatoasoɛ nza ne nna bɔ bɛpɔ me so.

Ɛksadɔso 22:27

ofikyɛ ye tena ala ɛne, bɔ ɔfa kata ye nwo hɔ ɛne. Nzu yeɛ ɔ́fa gurɔ ye nwo ɔla ɔ? Na sɛ osũ frɛ me a, ngotie ye, ofikyɛ mese anwumvoin.

Ɛksadɔso 33:19

Na AWURADE buale kyɛ, “Ngɔma me paayɛlɛ mukoraati kɔsẽ kɔpɛ nu wɔ wɔ nyunu, ná mabɔ me dumaa AWURADE ne wɔ wɔ nyunu. Ofikyɛ sona bɔ ngɔlo ye ne yeɛ ngɔlo ye ɔ, yeɛ bɔ ngonwu ye anwumvoin ne yeɛ ngonwu ye anwumvoin ɔ.

Anyandera 3:3

Nnɛma pɛpɛɛpɛyɛlɛ ne nahorɛlilɛ bɛpa wɔ nwo, kyekye fa ya wɔ kɔme, ná kyerɛ ye wɔ w’ahone nu.

Nworɛ Dwirɛhanɛniɛ 8:11

Na ɔnate kyɛ bɔne yɔleɛ nwo akatuaa ɔmma ndɛndɛ so ne ati, kuro sona ama bɔne yɔleɛ ali ye ti.

Yesaya 12:4

Na sɔ kyẽa ne, ɛmɔkose kyɛ, “Ɛ́mɔfa asennaa bɛ́ma AWURADE, ɛ́mɔbɔ ye dumaa, ɛ́mɔbɔ ye anwanwadeɛ ne dawure wɔ maen maen mɔ nu, ɛ́mɔbɔ ye dawure kyɛ ye dumaa ne te piri.

Yesaya 65:16

amaa ɔnate so ebiala bɔ ɔkɔhã saleɛ dwirɛ kɔma ye nwo wɔ aseɛ ne aso ne, ɔkɔfa nahorɛlilɛ Nyameɛ ne yeɛ okoyira ye nwo ɔ; yeɛ ebiala bɔ ɔkɔta ndaen wɔ aseɛ ne aso ne, ɔkɔfa nahorɛlilɛ Nyameɛ ne yeɛ ɔkɔta ndaen ɔ; ofikyɛ bɛ wora kofi amaneɛ bɔ ɔtole bɛ daa ne, na mabu me nye magua so.

Yeremia 32:18

wɔ bɔ ɛye wɔ ɔdɔ ali kyire mmenia apee apee, nakoso ɛprapra seɛ mɔ b’amumuyɛɛ nwo akatuaa gua bɛ mma mɔ so ɔ. Ao, Nyameɛ Piri, Tuminiɛ kandinga, ye dumaa ole Asafo AWURADE.

Yeremia 9:24

Na mmom ebiala bɔ ɔhoahoa ye nwo ne, odi kyɛ ɔhoahoa ye nwo kyɛ ole nimdeɛ, ná ɔse me kyɛ me ole AWURADE bɔ mefa ɔdɔ bɔ onni ngasi, ndɛenbualɛ turoloo ne nahorɛlilɛ yeɛ meyɛ me nningyein wɔ aseɛ ye aso ɔ. Na sɔ nningyein nemɔ yeɛ me nye gye bɛ nwo ɔ, AWURADE noa dwirɛ ɛne.”

Awuye 3:23

Ngyerɛmɔ biala ɔte foforɛ, wɔ nahorɛlilɛ te piri.

Yoel 2:13

Ɛ́mɔsunzua ɛmɔ ahone nu, na nna ɛmɔ ndaadeɛ nu ɔ, ná ɛ́mɔsa bɛbra AWURADE ɛmɔ Nyameɛ berɛ. Ofikyɛ ɔdo mmenia na ɔse anwumvoin; ye ahone nhu ndɛ, ye ɔdɔ bɔ onni ngasi ne ɔsone, na ɔsesã ye adwene ɔtwe bɔne nwo asohwenɛ sa.

Yona 4:2

Na ɔbɔle mbaeɛ bisale AWURADE kyɛ, “Ao AWURADE, mesrɛ wɔ, mmerɛ bɔ né nwɔ me maen nu ne, aso nna edwirɛ he yeɛ ngane ɔ? Ye sɔ ti yeɛ nwatili kyɛ ahaa mekɔ Tasise ne, ofikyɛ mese kyɛ ɛte Nyameɛ bɔ ɛdo mmenia ná ɛse anwumvoin ɔ, w’ahone nhu ndɛ, wɔ ɔdɔ bɔ onni ngasi ne ɔte piri, na ɛsesã w’adwene wɔ musue bɔ ɛbaafa ba ɔ nwo.

Mika 7:18

Nwa yeɛ ɔte Nyameɛ kyɛ wɔ, bɔ ɔfa amumuyɛɛ kyɛ, bɔ obu ye nye gua ye agyapadeɛ ngaa bɛ mmeraatolɛ so ɔ? Ɔmma ye yaafɛlɛ ndena berɛ afebɔɔ, ofikyɛ ye nye gye anwumvoinnwunɛ nwo.

Mika 7:20

Ɛkɔye nahorɛlilɛ ali kohyire Yakob, ɔne anwumvoinnwunɛ ali kohyire Abraham, kyɛbɔ ata ye nwo ndaen ahyire yɛ nana mɔ fi daa tete ne.

Nahum 1:3

AWURADE ahone onhu ndɛ, ye tumi te piri; na ongobua bɔ odi fɔ ɔ be le. AWURADE atee la mvrama bɔ ɔpɛ ye nwo, ɔne mvrama bɔ otu serɛserɛ ɔ nu, na munungum te ye gya bo mvuture.

Numeri 12:8

Ye de megyina ye nyunu me ne ye yɛdwudwo pefee; mendwudwo mengyire ye anyandera nu; na onwu kyɛbɔ AWURADE ye sue te ɔ. Nzu ati yeɛ ɛmɔanzuro kyɛ ɛmɔkodwudwo bekotia me somvoɛ Mose ɔ?”

Yohane 1:17

Mmeraa ne de, bɛnate Mose so yeɛ bɛfa bɛmane ɔ; na adom ne nahorɛ ne de, ɔnate Yesu Kristo so yeɛ bɛwale ɔ.

Romanfoɛ 2:4

Aso ɛmva Nyameɛ paayɛlɛ mmorosoɛ ne ye aboterɛ pee ne nyɛ hwee hɔ ɔ? Ɛnze kyɛ Nyameɛ paayɛlɛ ne ɔboka wɔ maa ɛsakyera w’adwene hɔ ɔ?

Deuteronomi 32:3

Ofikyɛ ngɔbɔ AWURADE dumaa dawure. Ɛ́mɔhã kyɛ yɛ Nyameɛ te piri!

Deuteronomi 4:31

Na ɔnate kyɛ AWURADE wɔ Nyameɛ te anwumvoinnwunɛ Nyameɛ ne ati, ɔngɔyakyi wɔ nu, yeɛ ongohu wɔ; na ɔne wɔ nana mɔ apam bɔ bɛyɛle, bɔ ɔfale ndaen foale so ne, ye wora ngofi.

Deuteronomi 5:10

Nakoso bɛ bɔ bekuro me dwirɛ, ná bedi me mmeraa dwirɛ so ne de, mekuro bɛ dwirɛ maa okodwu aworɛ ndoatoasoɛ apee apee so.

Yakobo 5:11

Ɛ́mɔtie, bɛ bɔ bemiane bɛ nye bɛfale amaneɛ nu ne, yɛbu bɛ kyɛ banya saleɛ. Yeɛ ɛmɔate Yob amaneɛnwunɛ nu animia ne, na ɛmɔanwu kyɛbɔ Awurade maa osi yiele ye ɔ, kyɛbɔ Awurade anwumvoinnwunɛ sone, ná osa le tema maa ɔbo so ɔ.