Ɛksadɔso 23:31 - AHYERƐLƐ KRONGRON

³¹ Ngɔto wɔ wɛen ngofi Ɛpo Kɔkorɛ noa maa okoodwu Filistifoɛ mboanoa, fi ɛserɛ so kodwu asue Yufreti noa. Ofikyɛ ngɔmaa ɛmɔkoli aseɛ ne asofoɛ so ngonim, ná afoa bɛ afi wɔ nyunu.

Ɛksadɔso 23:31 Iomraidhean Croise

Gyenesise 15:18

Na sɔ kyẽa ne ala, AWURADE ne Abram yɛle apam, na ɔhane kyɛ, “Wɔ boso ama yeɛ méfa sɔ aseɛ he méma bɛ ɔ: ofi Misraim asue noa bɔ ɔkwaadwu asue piri Yufreti noa,

1 Ahemvo 11:2

Sɔ maen maen mɔ bɔ mmrasua nemɔ fi so ne, né AWURADE abɔ bɛ nwo kɔkɔ wahyire Yisraelfoɛ kyɛ, “Nnɛma ɛmɔgyigya so ama, yeɛ nnɛmɔmaa bɛ koso begyigya ɛmɔ; ofikyɛ bɛkɔlakalaka ɛmɔ maa ɛmɔkooli bɛ nyameɛ mɔ si.” Nakoso Solomon hɔle so hurole bɛ.

1 Ahemvo 20:13

Afei ngɔmhyɛlɛniɛ bie wale Yisrael hene Ahabo berɛ oosele ye kyɛ, “AWURADE nwa nyoo, ‘Anwu ɛlɔen kandinga he amukoraa? Tie, ngɔfa bɛ ngowura wɔ sa ɛnɛ, na ekonwu kyɛ me ole AWURADE.’ ”

1 Ahemvo 4:21

Né Solomon di hene wɔ ahennie amukoraa so, fi asue Yufreti kɔka Filistifoɛ aseɛ noa, maa ɔkɔ alaa kodwu Misraim wɛen so. Betuale toɔ bɛmane Solomon, na bɛsole ye mmerɛ bɔ ɔte ase amukoraa.

1 Ahemvo 4:24

Ofikyɛ maen maen amukoraa bɔ bɛwɔ asue Yufreti eyia atɔleɛ so, ofi Tifesa bɔ ɔkwaadwu Gasa, ɔne ahemvo amukoraa bɔ bɛwɔ Yufreti eyia atɔleɛ so ne, ye yeɛ né odi bɛ so ɔ; na onyane asomdwee maa ɔpɛle ye nwo bra yiale.

1 Ahemvo 8:65

Yiti sɔ mmerɛ ne, Solomon ne Yisraelfoɛ amukoraa, ofi Lebo Hamate bɔ ɔkwaadwu Misraim bɔnza ne anu, bɛbɔle dwaa kandinga belili aluolue ne wɔ AWURADE yɛ Nyameɛ nyunu ɛlɛsoo.

2 Aberɛso Dwirɛ 9:26

Né Solomon di ahemvo amukoraa so fi asue Yufreti kɔka Filisti aseɛ so bɔ ɔkwaadwu Misraim ɛwɛen so dɔ ne.

Edwein 72:8

Ma ye ahennie ɔtrɛ fi ɛpo ɔɔhã ɛpo, ofi asue ne ɔɔhã aseɛ noa.

Numeri 21:34

Nakoso AWURADE sele Mose kyɛ, “Nnɛsuro ye, ofikyɛ mafa ye mawura wɔ sa, ɔne ye mmenia amukoraa ne ye aseɛ amukoraa. Na kyɛbɔ ɛyɔle Amori hene Sihon bɔ né odi bia wɔ Hesebon ne, sɔ ala yeɛ ɛkɔfa kɔyɔ ye ɔ.”

Numeri 34:2

“Fa ahyɛdeɛ he ma Yisraelfoɛ ná ka kyire bɛ kyɛ, Sɛ ɛmɔkodwu Kanaan aseɛ ne aso a (Kanaan aseɛ bɔ ɔkɔyɛ ɛmɔ agyapadeɛ ne, ye wɛen mɔ ɛhe),

Deuteronomi 1:7

Ɛ́mɔtu ɛmɔ bo bɛ́toa ɛmɔ ateetulɛ ne aso, ná ɛmɔhɔ Amorifoɛ mmokaa aseɛ ne aso dɔ, ɔne mbɔtam berɛ mɔ: mekyire Araba ne anu, mmokaa aseɛ ne aso, ɔne kongonyi nemɔ anu, ngwaen dɔ aseɛ ne aso, mboanoa, Kanaanfoɛ aseɛ so ne Lebanon alaa bɔ ɔkwaadwu asue piri Yufreti noa ne.

Deuteronomi 1:8

Tie! Aseɛ bɔ maye masie berɛ mama ɛmɔ ne yeɛ ɔla ɛmɔ nyunu dɔ ne. Yiti ɛmɔhɔ bɛɛfa aseɛ bɔ me bɔbɔ AWURADE ndale ndaen ngyirele ɛmɔ nana mɔ Abraham, Yisake ne Yakob kyɛ ngɔfa ngɔma bɛ ne bɛ bosofoɛ bɔ bɛkɔwa nziɛ ye ne.’

Deuteronomi 11:24

Nekaa biala bɔ ɛmɔ gya kotia ne, ɔkɔyɛ ɛmɔ deɛ: ɛmɔ aseɛ kɔtrɛ kofi ɛserɛ so kɔɔhã Lebanon, fite asue Yufreti kɔɔhã eyia atɔleɛ ɛpo ne.

Deuteronomi 2:33

Na AWURADE yɛ Nyameɛ fale ye wurale yɛ sa, yɛhuhuni ye ne ye mma ne ye mmenia mukoraati.

Deuteronomi 2:36

Fite Aroye bɔ ɔwɔ Anɔn bɔnza ne noa dɔ, ɔne kuro bɔ ɔwɔ bɔnza ne anu ne, bɔ ɔkwaadwu Gileade ne, kuro biala nne berɛ bɔ yangora yanni so ngonim ɔ. AWURADE yɛ Nyameɛ fale nikyee biala wurale yɛ sa.

Deuteronomi 20:16

Nakoso maen maen hemɔ bɛ nguro bɔ AWURADE wɔ Nyameɛ ɔ́fa ma wɔ maa ɔyɛ w’agyapadeɛ nen, nnɛma nu nikyee biala bɔ nwomeɛ wɔ ye nu onya ngoa.

Deuteronomi 3:2

Nakoso AWURADE sele me kyɛ, ‘Nnɛsuro ye, ofikyɛ mafa ye ne ye lɔen amukoraati ne ye aseɛ mawura wɔ sa. Na nikyee bɔ ɛfa yɔle Amorifoɛ hene Sihon bɔ né ɔte Hesebon nen, sɔ ala yeɛ fa yɔ ye ɔ.’

Deuteronomi 6:19

ná wafoa wɔ pɔfoɛ mɔ amukoraati wafi wɔ nyunu, kyɛbɔ AWURADE hyɛle bɔ ne.

Deuteronomi 9:3

Yiti nwu ye ɛnɛ kyẽa ye kyɛ, AWURADE wɔ Nyameɛ yeɛ oli wɔ nyunu ɔkwaapɛ asue ɔ, na ɔte see bɔ ogye wuronyiwuronyi ɔ. Okoli bɛ so ngonim, ná wabrɛ bɛ ase wɔ wɔ nyunu; amaa ɔnate so afoa bɛ afi berɛ, ná ahũhũ bɛ ndɛndɛ so, kyɛbɔ AWURADE ahyɛ wɔ bɔ ne.

Yosua 1:4

Ɛmɔ aseɛ ne fite ɛserɛ ne aso ɔne Lebanon he, toonn bɔ ɔkwaadwu asue piri Yufreti ɔne Hitifoɛ aseɛ mukoraati bɔ ɔkwaadwu Ɛpo Piri ne wɔ eyia atɔleɛ bue nu dɔ.

Yosua 10:19

Nakoso ɛmɔ ngaa ne de, nnɛma ɛmɔgyina berɛ. Ɛ́mɔfoa ɛmɔ pɔfoɛ nemɔ, ná ɛ́mɔfite bɛ si béhuhu bɛ. Nnɛmɔma bɛnwati bɛkɔ bɛ nguro nemɔ anu, ofikyɛ AWURADE ɛmɔ Nyameɛ wafa bɛ wawura ɛmɔ sa.”

Yosua 10:8

Na AWURADE sele Yosua kyɛ, “Nnɛsuro bɛ, ofikyɛ mafa bɛ mawura wɔ sa; na bɛ nu ko po ngɔhora ngogyina wɔ nyunu.”

Yosua 13:6

Na Sidonfoɛ amukoraa bɔ bɛtete mmokaa aseɛ ne aso, fite Lebanon bɔ ɔkwaadwu Misrefote Maim ne, me bɔbɔ yeɛ ngɔfoa bɛ ngofi Yisraelfoɛ nyunu ɔ. Na wɔ de, kyekyɛ aseɛ ne ma Yisraelfoɛ maa ɔyɛ b’agyapadeɛ, kyɛbɔ mahyɛ wɔ kyɛ ɛyɔ ne ala.

Yosua 2:24

Na besele Yosua kyɛ, “Amba, AWURADE afa aseɛ ne amukoraa wawura yɛ sa. Ɔnate yɛ ti ahunundetelɛ atɔ aseɛ ne aso ama mukoraati so dada.”

Yosua 21:44

AWURADE bɔle bɛ atenaseɛ asomdwee nu wɔ aseɛ ne aso nekaa biala, kyɛbɔ ɔtale ye nwo ndaen hyirele bɛ nana mɔ ne. Bɛ pɔfoɛ amukoraa nu ko po wangora bɛ nyunu gyina, ofikyɛ AWURADE maa belili bɛ mukoraa so ngonim.

Yosua 23:14

“Kekesaala ye de, waha kãa né matoa me mbanyi mɔ. Na ɛmɔ ahone nu ne ɛmɔ ti anu de, ɛmɔ amukoraa bɛse kyɛ, nningyein paa bɔ AWURADE ɛmɔ Nyameɛ ɔfa hyɛle ɛmɔ bɔ ne, nu ko po nne berɛ bɔ wali ɛmɔ ngasi wɔ nu ɔ; ye mukoraa awa nu ama ɛmɔ, ko po anni ngasi.

Yosua 24:11

Na ɛmɔpɛle asue Yɔɔdan bɛwale Yeriko nen, Yerikofoɛ ne ɛmɔ hone. Sɔ ala yeɛ Amorifoɛ, Perisifoɛ, Kanaanfoɛ, Hitifoɛ, Gɛgasifoɛ, Hiwifoɛ ne Yebusifoɛ bɛ ne ɛmɔ hone ɔ. Na mvale bɛ nwurale ɛmɔ sa.

Yosua 24:12

Nzomane kotokuradu mɔ maa belili ɛmɔ nyunu, na bɛfoane Amorifoɛ ahemvo nyɔ nemɔ befili ɛmɔ nyunu. Nna wɔ ngrandɛ anaa w’agyaen yeɛ ɛfa yɔle sɔ ɔ.

Yosua 24:18

Na AWURADE foane maen maen amukoraa, yeɛ Amorifoɛ bɔ né bɛte aseɛ ne aso ne fili yɛ nyunu. Yiti yɛ koso yɛkɔso AWURADE, ofikyɛ ye yeɛ ɔte yɛ Nyameɛ ɔ.”

Yosua 24:8

Afei Amorifoɛ bɔ né bɛte Yɔɔdan si dɔ ne, mvale ɛmɔ male b’aseɛ so. Bɛ ne ɛmɔ hone, na mvale bɛ nwurale ɛmɔ sa. Ɛmɔfale b’aseɛ ne, na ngukuni bɛ mvili ɛmɔ nyunu.

Yosua 8:18

Na AWURADE sele Yosua kyɛ, “Buralɛ tendenn tworɔntworɔn bɔ otira wɔ sa nu ne, tengyɛ ye wɔ Aye so, ofikyɛ ngɔfa kuro ne ngowura wɔ sa.” Yiti Yosua tengyɛle buralɛ tendenn tworɔntworɔn bɔ otira ye sa nu ne wɔ kuro ne aso.

Yosua 8:7

na ɛmɔ koso, odi kyɛ ɛmɔfi nekaa bɔ ɛmɔtetɛ ne befite, ná ɛmɔkɔfa kuro ne; ofikyɛ AWURADE ɛmɔ Nyameɛ kɔfa kɔma ɛmɔ.

Yosua 9:7

Nakoso Yisraelfoɛ buale Hiwifoɛ nemɔ kyɛ, “Ebiaa né ɛmɔte bepingye yɛ; ɔkɔyɛ sɛɛ né yɛ ne ɛmɔ yayɛ apam?”

Maenbulɛfoɛ 1:4

Yuda abusua kure sili nu, na AWURADE fale Kanaanfoɛ ne Perisifoɛ wurale bɛ sa. Belili bɛ nu apee buru so ngonim wɔ Beseke.

Maenbulɛfoɛ 11:21

Yeɛ AWURADE Yisrael Nyameɛ fale Sihon ne ye mmenia amukoraa wurale Yisrael sa, na Yisraelfoɛ lili bɛ so ngonim. Yiti Amorifoɛ bɔ bɛ yeɛ né bɛte maen ne anu ne, Yisrael fale b’aseɛ amukoraa.

1 Samuel 23:4

Dawide bisale AWURADE bieku. Na AWURADE buale ye kyɛ, “Kɔ. Kɔ Keila, na ngɔfa Filistifoɛ ngowura wɔ sa.”