Ɛksadɔso 23:25 - AHYERƐLƐ KRONGRON

²⁵ AWURADE ɛmɔ Nyameɛ yeɛ odi kyɛ ɛmɔsɔne ye ɔ, na ngoyira ɛmɔ aleɛ ne ɛmɔ nzue so, ná maye anwonyerɛ mafi ɛmɔ so.

Ɛksadɔso 23:25 Iomraidhean Croise

Edwein 103:3

Ye yeɛ ɔfa w’amumuyɛɛ amukoraa kyɛ wɔ ɔ, ye yeɛ ɔsa w’anwonyerɛ amukoraa ɔ;

Ɛksadɔso 15:26

Na Mose hane kyɛ, “Sɛ ekotie AWURADE wɔ Nyameɛ dwirɛ, ná ayɔ bɔ ɔsɔ ye nye, ná ali ye mmeraa dwirɛ ne ye ahyɛdeɛ mukoraati so a, ye de anwonyerɛ bɔ nde nguale Misraimfoɛ so ne, mengɔte nu biala ngogua wɔ so; ofikyɛ me ole AWURADE, wɔ safoɛ ne.”

Nworɛ Dwirɛhanɛniɛ 5:20

Sɔ sona ne ngɔma ye ngoa mmerɛ nwo adwenedwene ngɔtɔ ye so, ofikyɛ Nyameɛ ma ye asetena nu anigye odi ye ti.

Yesaya 33:16

ye yeɛ ɔkɔtena anwuro anwuro ɔ, nyɔbotaen afealeɛ nu kɔyɛ ye nwo waenbɔlɛ, ɔkɔmaa okonya ye noa aleɛ, na ye nzue ngɔbɔ ye.

Yesaya 33:24

Maen baa biala ngɔhã kyɛ, “Mafokyɛ.” Na bɛ bɔ bɛte maen ne anu ne, bɛkɔfa b’amumuyɛɛ bɛkɔhyɛ bɛ.

Yeremia 8:2

Bɛkɔfa bɛ bɛkɔsamo ɛhemɔ anyunu: eyia, ɛsraen ne nyameɛso abɔdeɛ amukoraa bɔ behurole bɛ dwirɛ, bɛsole bɛ, belili bɛ si, ná bɛhɔle bɛ berɛ abisa bɛsɔnene bɛ ne. Bɛngɔboaboa mmowue nemɔ anoa, yeɛ bengosie bɛ; bɛkɔyɛ kyɛ fofoɛ wɔ aseɛ so.

Daniel 1:15

Na eleburu ne dwuli nen, né bayɛ branoa tukutukuu batra mmerandeɛ amukoraa bɔ belili Nana aleɛ ne bie ne.

Lewitikɔso 11:44

Ofikyɛ me ole AWURADE ɛmɔ Nyameɛ; yiti ɛ́mɔte ɛmɔ anwo, ná ɛ́mɔyɛ krongron ofikyɛ nde krongron. Nnɛma ɛmɔfa kaka biala bɔ ɔtwe ye nwo ase begua ɛmɔ nwo fiɛ.

Lewitikɔso 26:3

“Sɛ ɛmɔdi m’ahyɛdeɛ so, ɛmɔyɛ me mmeraa dwirɛ nwo sotie, ná ɛmɔfa bɛyɔ adwuma nahorɛ nu a,

Malaki 3:10

Ɛ́mɔfa buru nu ngyɛmuɛ ko ne amukoraa bɛbra nekaa bɔ besie nningyein ne, amaa ɔnate so aleɛ awa m’awuro. Ɛ́mɔfa béso me bɛ́nea, sɛ mengobukye nyameɛso mboma mengɔma ɛmɔ a, sɛ mengohwie saleɛ ngogua ɛmɔ so ma ongobu ngɔfa so a, Asafo AWURADE noa dwirɛ ɛne.

Mateo 4:10

Yeɛ Yesu buale ye kyɛ, “Dwɔso berɛ kɔ dɔ, Satan! Ofikyɛ Bahyerɛ kyɛ, ‘Sɔne Awurade wɔ Nyameɛ, na ye ngome twe yeɛ so ye ɔ!’ ”

Deuteronomi 10:12

“Yiti afei, Yisrael, nzikyɛ yeɛ AWURADE wɔ Nyameɛ pena fi wɔ berɛ ɔ? Bɔ ɔpena ole kyɛ ekosuro AWURADE wɔ Nyameɛ, ná ɛkɔfa ye atee mukoraa so, ná ekohuro ye dwirɛ, ná ɛkɔfa w’ahone mukoraati ne wɔ kra mukoraati ɛkɔso AWURADE wɔ Nyameɛ ɔ,

Deuteronomi 10:20

AWURADE wɔ Nyameɛ yeɛ ɔsɛ kyɛ esuro ye ɔ; ye ngome twe yeɛ sɔne ye ɔ; ye yeɛ fa wɔ nwo bɔ ye ɔ, na ye dumaa yeɛ fa ta ndaen ɔ.

Deuteronomi 13:4

AWURADE ɛmɔ Nyameɛ ngome yeɛ ɔsɛ kyɛ ɛmɔdi ye si ná ɛmɔsuro ye ɔ. Ye mmeraa dwirɛ yeɛ ɔsɛ kyɛ ɛmɔdi so ɔ, na ye dwirɛ yeɛ ɔsɛ kyɛ ɛmɔtie ɔ. Ye yeɛ ɔsɛ kyɛ ɛmɔso ye ná ɛmɔfa bɛ nwo bɛbɔ ye ɔ.

Deuteronomi 6:13

Suro AWURADE wɔ Nyameɛ, ye yeɛ ɔsɛ kyɛ ɛso ye ɔ, na ye dumaa ngome yeɛ fa ta ndaen ɔ.

Deuteronomi 7:13

Okohuro wɔ dwirɛ, okoyira wɔ, na ɔkɔma wɔ boso kɔta pee. Okoyira wɔ kunu mmaa, w’aseɛ so aleɛ, w’aburoo ne wɔ nzaa ne wɔ ngoo, wɔ nandwie ne wɔ mmoaen kɔta pee; wɔ aseɛ bɔ ɔtale ye nwo ndaen hyirele wɔ nana mɔ kyɛ ɔkɔfa kɔma wɔ ne aso.

Deuteronomi 7:15

AWURADE kɔbɔ wɔ nwo waen kofi anwonyerɛ amukoraati nwo, na Misraim anwonyerɛ tɛɛ bɔ enwuni ye ne, ɔngɔma nu ko po ngɔbɔ wɔ. Nakoso bɛ bɔ bɛpɔ wɔ ne de, ɔkɔprapra anwonyerɛ nemɔ kogua bɛ so.

Yosua 22:5

Ɛ́mɔnea yé ná ɛ́mɔli mmeraa dwirɛ ne mmeraa bɔ AWURADE somvoɛ Mose hyehyɛ mane ɛmɔ ne aso: kyɛ ɛmɔhuro AWURADE ɛmɔ Nyameɛ dwirɛ, kyɛ ɛ́mɔli ye dwirɛ amukoraa so, kyɛ ɛ́mɔli ye mmeraa dwirɛ so, kyɛ ɛ́mɔfa bɛ nwo bɛbɔ ye, ná ɛ́mɔfa ɛmɔ ahone mukoraa ne ɛmɔ kra mukoraa bɛso ye.”

Yosua 24:21

Na maen ne buale Yosua kyɛ, “Daabi! AWURADE yeɛ yɛkɔso ye ɔ.”

Yosua 24:24

Na maen ne buale Yosua kyɛ, “AWURADE yɛ Nyameɛ yeɛ yɛkɔso ye ɔ, na ye dwirɛ so yeɛ yɛkoli ɔ.”

1 Samuel 12:20

Na Samuel sele maen ne kyɛ, “Nnɛma ɛmɔsuro. Ɛmɔayɔ amumuyɛɛ he amukoraa de, nakoso nnɛma ɛmɔyakyi AWURADE si lilɛ, na mmom odi kyɛ ɛmɔfa ɛmɔ ahone amukoraa bɛso AWURADE.

1 Samuel 12:24

Ɛ́mɔnea nningyein mbiri mbiri bɔ wayɔ wama ɛmɔ ɔ. Esurolɛ mmom yeɛ ɔsɛ kyɛ ɛmɔsuro AWURADE, ná ɛmɔfa ɛmɔ ahone amukoraa bɛso ye nahorɛ nu ɔ.

1 Samuel 7:3

Afei Samuel sele Yisrael awuro ama amukoraati kyɛ, “Sɛ ɛmɔ ahone nu paa yeɛ ɛmɔsa bɛba AWURADE berɛ a, nzaade ɔsɛ kyɛ ɛmɔye Amaenmaensofoɛ nyameɛ mɔ ne mmosoen Astarote befi ɛmɔ nu begyi begua. Ɔsɛ kyɛ ɛmɔtu ɛmɔ nwo besie berɛ bɔkɔɔ bɛma AWURADE, ná ɛmɔso ye ngome, na okole ɛmɔ kofi Filistifoɛ sa nu.”