Ɛksadɔso 20:5 - AHYERƐLƐ KRONGRON

⁵ Nnɛkoto bɛ, yeɛ nnɛso bɛ; ofikyɛ me, AWURADE wɔ Nyameɛ ne, nde nungunɛ Nyameɛ, na meprapra seɛ mɔ bɛ bɔne nwo asohwenɛ megua bɛ mma mɔ so, maa okodwu aworɛ ndoatoasoɛ nza ne nna bɔ bɛpɔ me so.

Ɛksadɔso 20:5 Iomraidhean Croise

2 Samuel 21:1

Mmerɛ bie, ɛhɔen piri bie wale toonn afoɛ nza wɔ Dawide aberɛ so. Dawide fa tole AWURADE nyunu, na AWURADE buale ye kyɛ, “Mogya nwo foɛlilɛ la Sɔɔlo ne ye awuro ama so, ɔnate kyɛ ohuhuni Gibeonfoɛ.”

2 Samuel 21:6

maa bɛfa ye boso ama mmienzua nzoo bewura yɛ sa, ná yɛɛbɔ bɛ kɔme wɔ AWURADE nyunu, wɔ Sɔɔlo bɔ AWURADE neaneane nu yele ye ne ye kuro Gibea.” Na Nana Dawide hane kyɛ, “Ngɔfa bɛ ngɔma ɛmɔ.”

1 Ahemvo 19:10

Obuale kyɛ, “Matu me nwo masie berɛ kyɛ meko mema AWURADE Asafo Nyameɛ, ofikyɛ Yisraelfoɛ bahwi bafa w’apam ne aso, badwiri w’afɔleɛ bokyea mɔ bagua ase, yeɛ bele ngrandɛ bahũhũ wɔ ngɔmhyɛlɛfoɛ mɔ. Waha me ngome twe, na bɛpena me beku me.”

1 Ahemvo 21:29

“Anwu kyɛbɔ Ahabo wasi wabrɛ ye nwo ase wɔ me nyunu ɔ? Ɔnate kyɛ wabrɛ ye nwo ase wɔ me nyunu ne ati, mengɔma sɔ amaneɛ ne ngɔto ye mmerɛ bɔ ɔte ase ɔ; na mmom amaneɛ ne kɔwa Ahabo abusuafoɛ so wɔ ɔwa bɔ okoli ye bia ne ye aberɛ so.”

2 Ahemvo 17:35

Né AWURADE ne Yakob boso ama nemɔ bayɛ apam, na ɔmane bɛ ahyɛdeɛ kyɛ, “Nnɛma ɛmɔsɔne nyameɛ foforɛ mɔ, nnɛma ɛmɔkoto bɛ, nnɛma ɛmɔso bɛ, yeɛ nnɛma ɛmɔbɔ afɔleɛ bɛma bɛ.

2 Ahemvo 17:41

Yiti sɔ maen maen nemɔ sɔnene AWURADE de, nakoso besa bɛsole b’amoen mɔ bɔ base ɔ. Ɔbaadwu ɛnɛ ye, bɛ mma mɔ ne bɛ nnomaa mɔ, bɛtɛ yɔ kyɛbɔ bɛ nana mɔ yɔle ne ala.

2 Ahemvo 23:26

Nakoso ɛhe amukoraa si ne, AWURADE yaa piri bɔ né wafɛ ye wɔ Yuda so ne, AWURADE ahone andɔ nzue nu, ɔnate nningyein amukoraa bɔ né Manase wayɔ wafa wahu AWURADE ahone ne ati.

2 Ahemvo 5:18

Nakoso w’akoaa, sɔ nikyee komapɛ he anwo de, mesrɛ AWURADE kyɛ ɔ́fa ɔ́hyɛ me. Ye ole kyɛ, sɛ me mene Siria hene kɔ bosoen Rimon so kyɛ ɔkwaasɔne wɔ berɛ, ná ɔkã kyɛ ngɔmmoka ye, maa ye sɔ ti mebɔ me nu ase mesɔne Rimon a, sɛ mebɔ me nu ase mesɔne Rimon a, w’akoaa, mesrɛ AWURADE kyɛ sɔ nikyee he angome de ɔfa hyɛ me.”

2 Ahemvo 5:27

Ɔnate ye sɔ ti, Naaman kwata anwonyerɛ ne kɔte kɔha wɔ ne wɔ boso ama so afebɔɔ.” Yiti Gehasi fili Elisa nyunu berɛ hɔle bɔ né kwata anwonyerɛ ayɛ ye ma ye nwo ayɛ horaenn kyɛ asukɔtwea ɔ.

2 Aberɛso Dwirɛ 25:14

Amasia oohuhuni Edomfoɛ nemɔ bɔ ɔba ne, ɔsesale Sɛrefoɛ bɛ mmosoen mɔ wale, na oogyinagyinane bɛ fa yɛle ye mmosoen. Ɔsɔnene bɛ, na ɔyerale ɛyɛɛ mane bɛ.

2 Aberɛso Dwirɛ 7:19

“Nakoso sɛ ɛmɔyakyi me si lilɛ, ná ɛmɔanni me m’ahyɛdeɛ ne me mmeraa dwirɛ bɔ mafa mama ɛmɔ ne aso, ná mmom ɛmɔkɔso nyameɛ foforɛ biemɔ bɛsɔne bɛ a,

YOB NWOMAA NE 21:19

Ɛmɔnwa: ‘Bɔnefoɛ amumuyɛɛ nwo asohwenɛ ne, Nyameɛ boaboa ye noa gua berɛ ma ye mma mɔ.’ Na mesrɛ kyɛ, ótua ye bɔbɔ ye kerɛ ma onwu ye.

YOB NWOMAA NE 5:4

Asane li ye mma mɔ mvanvando, bebua bɛ ndɛengyea wɔ mbanyi nyunu, bɔ ebiala mbepɛ nne bɛ ɔ.

Edwein 109:14

Mesrɛ kyɛ AWURADE ɔkaye ye nana mɔ b’amumuyɛɛ wɔ ye nyunu, yeɛ nnɛmaa okyikyi oni bɔne fi berɛ.

Edwein 78:58

Ofikyɛ bɛfale b’asɔneyɛɛ nemɔ bewurale ye apue maa ɔfɛle yaa; na b’amoen nemɔ ati, Nyameɛ hwene bɛ nwo nungunɛ.

Edwein 79:8

Yɛ nana mɔ amumuyɛɛ ne, nnɛfa ye nwo ngyeleɛ kye yɛ, na nwu yɛ anwumvoin ndɛndɛ, ofikyɛ babrɛ yɛ ase bɔkɔɔ.

Edwein 81:15

Sɛ ahaa AWURADE pɔfoɛ mɔ bɛkɔkoto ye nyunu a, ahaa bɛ mmerɛ kɔyɛ afebɔɔ.

Ɛksadɔso 23:24

Nnɛbɔ wɔ ti ase ma bɛ mmosoen nemɔ, nnɛsɔne bɛ, yeɛ nnɛyɔ bɛ yɔleɛ ne bie. Na mmom sɛkyesɛkye bɛ bosoen nemɔ bɔkɔɔ, ná bubu bɛ bonima nemɔ nu gɔsɔgɔsɔ.

Ɛksadɔso 34:14

Nnɛsɔne bosoen biala, ofikyɛ AWURADE bɔ ye dumaa ole Nungunɛ nen, ɔte Nyameɛ bɔ ɔtwe nungunɛ ɔ.

Anyandera 8:36

nakoso bɔ ɔkɔyɔ bɔne kotia me ne de, ɔyɛ ye bɔbɔ ye kra aborɛ, ebiala bɔ ɔpɔ me ne, né ewue yeɛ okuro ɔ.”

Yesaya 44:15

Sɔ bakaa ne kakyi eyein ma sona fa sɔ see, ɔfa ebie kua see ɔto, ɔfa sɔ see ɔto paanoo, ɔfa ebie koso ɔyɛ bosoen ɔsɔne ye; na ɔfa bakaa ne ose amoen ɔkoto ye.

Yesaya 44:19

Na bɛ nu biala mva ngɔ adwenedwene nu, yeɛ olle nimdeɛ, anaa adwene biala bɔ ɔkɔmaa okobisa kyɛ, “Bakaa ne bue ne, nyerale ye see nu, nzusole see ne ndone paanoo, matoto naen wɔ so mali, aso odi kyɛ mefa ye ngaa ne meyɛ akyiwadeɛ nikyee anaa? Aso odi kyɛ mekoto bakaa kundunzii anaa?”

Yeremia 2:9

“Yiti ngɔhɔ so ngɔbɔ ɛmɔ kwaadu, na ngɔbɔ ɛmɔ boso ama mɔ koso kwaadu, AWURADE noa dwirɛ ɛne.

Yeremia 32:18

wɔ bɔ ɛye wɔ ɔdɔ ali kyire mmenia apee apee, nakoso ɛprapra seɛ mɔ b’amumuyɛɛ nwo akatuaa gua bɛ mma mɔ so ɔ. Ao, Nyameɛ Piri, Tuminiɛ kandinga, ye dumaa ole Asafo AWURADE.

Hesekiel 18:19

“Nakoso ɛmɔ de, ɛmɔnwa: ‘Nzu ati yeɛ baa onnya ye baba amumuyɛɛ nwo asohwenɛ ɔ?’ Sɛ baa ne ayɔ bɔ ɔte paa ne bɔ ɔtengyɛ, ná wali m’ahyɛdeɛ mukoraa so nahorɛ nu a, nahorɛ nu, okonya ngoa.

Hesekiel 18:2

“Sɔ anyandera he bɔ ɛmɔtaa bebu bɛfa Yisrael maen nwo ne, sɛɛ yeɛ ɛmɔkyire ɔ? Ɛmɔnwa: ‘Seɛ mɔ bali abrɛbɛ bisii, na mmaa mɔ yeɛ bɛ gye anya ɔ.’

Hesekiel 20:7

Na nzele bɛ kyɛ: Odi kyɛ ɛmɔ nu biala ogyi akyiwadeɛ nningyein bɔ ɛmɔ nye gye ye nwo ne ogua. Nnɛma ɛmɔfa Misraim mmosoen begua ɛmɔ nwo fiɛ. Me ole AWURADE ɛmɔ Nyameɛ ne.

Hesekiel 39:25

“Yiti AWURADE Nyameɛ nwa nyoo: Ngosa ngɔfa Yakob ngofi nnurehyelɛ nu ngɔwa, na ngonwu Yisrael awuro ama mukoraa anwumvoin, na ngɔhwe me dumaa krongron ne nwo nungunɛ.

Hesekiel 8:3

Ɔtengyɛle nikyee bie bɔ ye sue te asaa ɔ, ɔfa sɔle me ti nwiaa nu, na Sunzum ne mane me so hɔle anwuro ne ase b’afia, na ɔfale me wale Yerusalem wɔ nyekyire bɔ ofi Nyameɛ berɛ ɔ nu. Ɔfale me wale asɔneyɛɛ sua ne akunu dɔ anoa piri bɔ ye nye kyire sorɔ dɔ ne anyunu berɛ, nekaa bɔ nungunɛhwenɛ amoen bɔ ɔtwetwe nungunɛ ba ne ogyi ne.

Daniel 1:2

Na AWURADE fale Yuda hene Yehoakim wurale ye sa, bɔ Nyameɛ awuro berɛ nningyein ne biemɔ boka so ɔ. Ɔsesale nningyein ne wale ye bosoen awuro wɔ Sinari aseɛ so, na ɔfale nningyein ne ooguale ye bosoen awuro berɛ nekaa bɔ besie nningyein ne.

Daniel 3:18

Nakoso Nana, sɛ wanne yɛ po a, yɛ́maa enwu ye kyɛ yɛngɔso wɔ nyameɛ nemɔ, yeɛ yɛngɔsɔne sikaa kɔkorɛ amoen bɔ agyina ne.”

Lewitikɔso 20:5

ye de me bɔbɔ ngotu me nye ngosie sɔ sona ne ɔne ye abusuafoɛ so, na ngɔpɛ bɛ asue ngofi bɛ maen nu; sɔ sona ne ɔne mmenia amukoraa bɔ bali ye si bɛ ne ye baaso Moleke ne.

Lewitikɔso 26:1

“Nnɛma ɛmɔyɔ mmosoen, yeɛ nnɛma ɛmɔgyina amoen bɔ base anaakyɛ bonima biala bɛma bɛ nwo; nnɛma ɛmɔfa nyɔboɛ bɔ ɛmɔali so adwii bɛpenapena ɛmɔ aseɛ so bɛsɔne bɛ, ofikyɛ me ole AWURADE ɛmɔ Nyameɛ.

Lewitikɔso 26:29

Ɛmɔkohũhũ ɛmɔ mma mmienzua mɔ ɔne ɛmɔ mma mmrasua mɔ bekoli.

Nahum 1:2

Nyameɛ ɔtwe nungunɛ, na ɔte AWURADE bɔ ɔtɔ wereɛ ɔ. AWURADE tɔ wereɛ, na ye yaafɛlɛ te piri; AWURADE tɔ bɛ bɔ bekyi ye ɔ so wereɛ, na ye ahonehulɛ wɔ berɛ ma ye pɔfoɛ mɔ.

Numeri 14:18

‘AWURADE ahone nhu ndɛ, na ye ɔdɔ bɔ onni ngasi sone; ɔfa amumuyɛɛ ne mmeraatolɛ kyɛ, nakoso ɔmma sona bɔ odi fɔ ne, ɔmva ye nwo tɔtorɔtɔɔ; ɔprapra seɛ mɔ bɔne nwo asohwenɛ gua bɛ boso ama mɔ so, maa okodwu aworɛ ndoatoasoɛ nza ne nna so.’

Numeri 14:33

Na ɛmɔ mma mɔ de, bɛkɔyɛ mmoaenneafoɛ wɔ ɛserɛ so afoɛ aburanna. Na ɔnate kyɛ ɛmɔanne me banni ne ati, bekonwu amaneɛ toonn kɔpem kyɛ ɛmɔ nu sona bɔ ɔpɛ ye bo kowu kɔla ɛserɛ so ɔ.

Numeri 25:11

“Me yaa bɔ mvɛle ye wɔ Yisraelfoɛ so ne, Finehase bɔ ɔse ole ɔsɔfo Aarɔn awa Eleasa ne, wama m’ahone atɔ nzue nu. Ofikyɛ watu ye nwo wasie berɛ wagyina me gya nu wahwe bɛ nwo nungunɛ wama me. Ɔnate ye sɔ ti, mangũkũ Yisraelfoɛ mɔ wɔ me nungunɛhwenɛ nu.

Mateo 4:9

na osele ye kyɛ, “Sɛ ɛkɔkoto kɔsɔne me a, ahaa ngɔfa ɛhemɔ amukoraa ngɔma wɔ.”

Yohane 15:18

“Sɛ wiase pɔ ɛmɔ a, ɛ́mɔnwu ye kyɛ wali moa wapɔ me koraka yeɛ ɔpɔ ɛmɔ ɔ.

Yohane 7:7

Wiase ngora mbɔ ɛmɔ, nakoso me yeɛ ɔpɔ me ɔ, ofikyɛ medi adanzeɛ kyɛ ye yɔleɛ te bɔne.

Yohane 9:2

Na ye asuafoɛ nemɔ bisale ye kyɛ, “Rabi, nwa yeɛ ɔyɔle bɔne ɔ, biaa he anaa ye awofoɛ, bɔ ɔmaa ɔnate so bɛwole ye anyesiniwaaniɛ ye?”

Romanfoɛ 1:30

koowaabɔlɛ, bɛpɔ Nyameɛ, nduhoɛ, soentolɛ, anyeserɛ, anwokyerɛ, awofoɛ so asoserɛ, ɔne

Romanfoɛ 8:7

Ofikyɛ anwoɔnaen nu adwenedwene pɔ Nyameɛ, ɔngora mmerɛ ye nwo ase nwura Nyameɛ mmeraa bo, ɔngora nyɔ sɔ amba.

1 Korintofoɛ 10:22

Anaa yɛpena kyɛ yɛwura Awurade apue maa ɔtwe nungunɛ hɔ ɔ? Yɛbu ye kyɛ yɛ nwo yɛ se tra ye anaa?

Deuteronomi 32:21

Bɛsole bɔ nna Nyameɛ ahɔ ɔ maa ndwene ye nwo nungunɛ, na bɛfale bɛ mmosoen fiɛ nemɔ bɛhane me anyinga. Yiti me koso, ngɔfa mmenia mbaen bie bɔ nna maen ahɔ ɔ maa bɛkɔhwe ye nwo nungunɛ, na ngɔfa ngwaseafoɛ maen ngɔhã bɛ anyinga.

Deuteronomi 32:41

sɛ mesi me ngrandɛ nahanaha ne, ná me sa sɔ nu wɔ ndɛenbualɛ nu a, ngɔtɔ me pɔfoɛ mɔ so wereɛ, na bɛ bɔ bekyi me koso, ngotua bɛ so kerɛ.

Deuteronomi 4:24

Ofikyɛ AWURADE wɔ Nyameɛ ne, ɔte see bɔ ɔyera motoo ɔ, Nyameɛ bɔ ɔtwe nungunɛ ɔ.

Deuteronomi 5:10

Nakoso bɛ bɔ bekuro me dwirɛ, ná bedi me mmeraa dwirɛ so ne de, mekuro bɛ dwirɛ maa okodwu aworɛ ndoatoasoɛ apee apee so.

Deuteronomi 5:9

Nnɛkoto bɛ, yeɛ nnɛso bɛ; ofikyɛ me, AWURADE wɔ Nyameɛ ne, nde nungunɛ Nyameɛ, na meprapra seɛ mɔ bɛ bɔne nwo asohwenɛ megua bɛ mma mɔ so, maa okodwu aworɛ ndoatoasoɛ nza ne nna bɔ bɛpɔ me so.

Deuteronomi 6:15

ofikyɛ AWURADE wɔ Nyameɛ bɔ ɔne wɔ nate ne, ɔte nungunɛ Nyameɛ. AWURADE wɔ Nyameɛ kɔfɛ wɔ so yaa piri paa, na okohu wɔ kokyikyi wɔ boso kofi aseɛ ye aso.

Deuteronomi 7:10

Nakoso bɛ bɔ bɛpɔ ye ne de, otua bɛ so kerɛ maa bɛ boso yera. Ɔngyɛ ye nwo koraa, na otua bɛ bɔ bɛpɔ ye ne so kerɛ maa bɛ boso yera.

Yakobo 4:4

Agyaasɛkyelɛfoɛ! Ɛmɔnze kyɛ sɛ ɛmɔfa wiase abiɛngoɛ a, né ɛmɔpɔ Nyameɛ ɔ? Yiti ebiala bɔ okuro kyɛ ɔfa wiase abiɛngoɛ ne, ɔte Nyameɛ pɔfoɛ.

Yosua 23:16

AWURADE ɛmɔ Nyameɛ apam bɔ ɔhyehyɛ mane ɛmɔ ne, sɛ ɛmɔbu so, ná ɛmɔkɔso nyameɛ foforɛ biemɔ, ná ɛmɔkoto bɛ a, ye de AWURADE kɔfɛ ɛmɔ so yaa piri paa, na ɛmɔkowuwu ndɛndɛ bekofi aseɛ paa bɔ wafa wama ɛmɔ ne aso.”

Yosua 23:7

amaa ɛmɔamva ɛmɔ nwo bammɔ maen maen mɔ bɔ baha wɔ ɛmɔ nwo wa ye, amaa ɛmɔammɔ bɛ nyameɛ nemɔ dumaa, amaa ɛmɔamva bɛ banda ndaen, amaa ɛmɔanzo bɛ, ná ɛmɔangoto bɛ.

Yosua 24:19

Nakoso Yosua sele maen ne kyɛ, “Ɛmɔngɔhora ngɔso AWURADE, ofikyɛ ɔte Nyameɛ bɔ ɔte krongron ɔ. Ɔte nungunɛ Nyameɛ; na ɔngɔfa ɛmɔ mmeraatolɛ ne ɛmɔ bɔne ngɔhyɛ ɛmɔ.

Maenbulɛfoɛ 2:19

Nakoso sɛ sɔ maenbulɛniɛ ne wu pɛ, né basa bɛ si baabɔ bra tɛɛ bɔ ɔtra bɛ nana mɔ deɛ ne ɔ. Bekodi nyameɛ foforɛ mɔ si, bɛso bɛ ná bɛkoto bɛ. Bɛnyakyi bɛ yɔleɛ tɛɛ anaa b’asoserɛ ne anu biala.