Ɛksadɔso 20:3 - AHYERƐLƐ KRONGRON

³ “Nnɛnya nyameɛ foforɛ biala ɛboka me so.

Ɛksadɔso 20:3 Iomraidhean Croise

1 Ahemvo 11:4

Ofikyɛ Solomon yɛle aworowaa ne, ɔye nemɔ mane ye adwene kakyili oolili nyameɛ foforɛ mɔ si, ná wanni nahorɛ wamma AWURADE ye Nyameɛ, kyɛbɔ ye baba Dawide de olili nahorɛ mane AWURADE ne.

Edwein 29:2

Animnyam bɔ ɔfata AWURADE dumaa ne, ɛ́mɔfa bɛ́ma ye; ɛ́mɔsɔne AWURADE wɔ animnyam krongron nu.

Edwein 73:25

Nwa yeɛ nne ye wɔ nyameɛso ɔ, sana wɔ ala? Yeɛ membena hwee wɔ aseɛ ye aso, sana wɔ ala.

Edwein 81:10

Me ole AWURADE wɔ Nyameɛ, bɔ ɔyele wɔ fili Misraim aseɛ so wale ne. Bukye wɔ noa nu hambonnwu, na ngɔfa nningyein ngowura ye tɛkyɛ.

Edwein 81:9

Onni kyɛ enya nyameɛ foforɛ biala wɔ wɔ nu; nnɛso maenmaensofoɛ nyameɛ biala.

Ɛksadɔso 15:11

O AWURADE, nyameɛ foforɛ nemɔ, bɛ nu nwa yeɛ ɔne wɔ bɛte pɛ ɔ? Nwa yeɛ ye krongronyɛlɛ totohyia te kyɛ wɔ ɔ, bɔ ye nwo yɛ suro wɔ ngonim nu, ná ɔyɛ anwanwadeɛ kyɛ wɔ ɔ?

Ɛksadɔso 20:23

Nnɛma ɛmɔfa ɛdwetɛ bɛyɛ nyameɛ foforɛ mɔ bɛboka me so, anaa sikaa kɔkorɛ bɛyɛ nyameɛ foforɛ mɔ bɛfa.

Ɛksadɔso 22:19

“Sona bɔ ɔne kaka kɔla nen, ɔsɛ kyɛ beku sɔ sona ne.

Ɛksadɔso 23:24

Nnɛbɔ wɔ ti ase ma bɛ mmosoen nemɔ, nnɛsɔne bɛ, yeɛ nnɛyɔ bɛ yɔleɛ ne bie. Na mmom sɛkyesɛkye bɛ bosoen nemɔ bɔkɔɔ, ná bubu bɛ bonima nemɔ nu gɔsɔgɔsɔ.

Ɛksadɔso 32:8

Atee bɔ ngyirele bɛ ne, bakwati ye ndɛndɛ so. Bahuro nikyee bafa bayɔ nandwie ba, bakoto ye, yeɛ babɔ afɔleɛ bama ye, na baha kyɛ, O Yisrael, wɔ nyameɛ mɔ bɔ bɛyele wɔ befili Misraim aseɛ so bɛwale ne ɛhe!”

Ɛksadɔso 34:14

Nnɛsɔne bosoen biala, ofikyɛ AWURADE bɔ ye dumaa ole Nungunɛ nen, ɔte Nyameɛ bɔ ɔtwe nungunɛ ɔ.

Yesaya 26:4

Ɛ́mɔfa ɛmɔ wora béwura AWURADE nu afebɔɔ, ofikyɛ AWURADE Nyameɛ ɔte afebɔɔ nyɔbotaen.

Yesaya 42:8

Me ole AWURADE, me dumaa ɛne, memva m’animnyam memma ebiala, yeɛ m’ayɛyelɛ koso, memva memma amoen mɔ.

Yesaya 43:10

AWURADE nwa nyoo, “Ɛmɔte m’adanzefoɛ, ɔne me somvoɛ bɔ maneanea nu maye ye ɔ, amaa ɔnate so ɛmɔanwu me ná ɛmɔale me bali, ná ɛmɔate ye bo kyɛ me ole Ye. Banyɔ nyameɛ biala bɔ olili me nyunu wale ɔ, yeɛ ebiala ngofi me si ngɔwa.

Yesaya 44:8

Nnɛma ɛmɔsuro, yeɛ nnɛma ɛmɔ kunu tete ɛmɔ! Aso manga mangyire ɛmɔ mammɔ ye nwo dawure fi tetetete? Na ɛmɔte m’adanzefoɛ. Aso nyameɛ bie wɔ berɛ boka me so hɔ ɔ? Nyɔbotaen biala nne berɛ; ebie nne berɛ bɔ mese ɔ.”

Yesaya 46:9

Ɛ́mɔkaye daa tete nningyein bɔ osisili ne, ofikyɛ me ole Nyameɛ, na ebiala nne berɛ ko, me ole Nyameɛ, na ebiala nne berɛ bɔ ɔte kyɛ me ɔ.

Yeremia 25:6

Na onni kyɛ ɛmɔkodi nyameɛ foforɛ mɔ asi bɛso bɛ bɛsɔne bɛ; yeɛ nnɛma ɛmɔfa ɛmɔ sa noa adwuma behu m’ahone maa mefɛ yaa, amaa ɔnate so mambrapra amaneɛ mangua ɛmɔ so.’

Yeremia 35:15

Mahɔ so masoma me somvoɛ ngɔmhyɛlɛfoɛ amukoraa wɔ ɛmɔ berɛ dee kyɛ, ‘Odi kyɛ ɛmɔ anu biala sakyera ye adwene wɔ ye bɔne atee nwo, ná ɔbɔ bra paa; na nnɛma ɛmɔkodi nyameɛ foforɛ mɔ si bɛso bɛ, amaa ɔnate so ɛmɔatena aseɛ bɔ mva mane ɛmɔ ne ɛmɔ nana mɔ ne aso. Nakoso ɛmɔanyɛ asoɛ bandie me dwirɛ.

Yeremia 7:9

Aso ɛmɔkowua, ɛmɔkoli awue, ɛmɔkɔsɛkye agyaa, ɛmɔkɔta ngondombo ndaen, ɛmɔkɔyera ɛyɛɛ bɛkɔma Baal, ɛmɔkoli nyameɛ foforɛ mɔ bɔ ɛmɔnze bɛ ɔ bɛ si,

Daniel 3:18

Nakoso Nana, sɛ wanne yɛ po a, yɛ́maa enwu ye kyɛ yɛngɔso wɔ nyameɛ nemɔ, yeɛ yɛngɔsɔne sikaa kɔkorɛ amoen bɔ agyina ne.”

Hosea 13:4

Nakoso ofi Misraim aseɛ so, me ole AWURADE wɔ Nyameɛ; onni kyɛ ɛso nyameɛ biala, sana me, na defoɛ biala nne berɛ, sana me.

Mateo 4:10

Yeɛ Yesu buale ye kyɛ, “Dwɔso berɛ kɔ dɔ, Satan! Ofikyɛ Bahyerɛ kyɛ, ‘Sɔne Awurade wɔ Nyameɛ, na ye ngome twe yeɛ so ye ɔ!’ ”

1 Korintofoɛ 8:4

Na ɔfa bosoen so aleɛlilɛ nwo de, yɛse kyɛ bosoen de, ɔtte huu wɔ wiase wa, na Nyameɛ te komapɛ twe.

1 Korintofoɛ 8:6

yɛ de, yɛse kyɛ Nyameɛ komapɛ twe yeɛ ɔwɔ berɛ ɔ. Ye ole Baba ne bɔ ɔbɔle nningyein mukoraa ná yɛ koso yɛte ase yɛma ye ne; yeɛ Awurade komapɛ twe yeɛ ɔwɔ berɛ ɔ, ye ole Yesu Kristo, bɔ ɔnate ye so bɛbɔle nningyein mukoraa ne, na yɛ koso ɔnate ye so yeɛ yɛte ase ɔ.

Ɛfesofoɛ 5:5

Ofikyɛ ɛmɔse ye dada kyɛ, adwamanbɔlɛniɛ anaa bra fiɛ bɔlɛniɛ anaa anyeboroborolɛniɛ (bɔ ɔte bosoensolɛniɛ) biala nne berɛ bɔ ole agyapadeɛ wɔ Kristo ne Nyameɛ ahennie ne anu ɔ.

Deuteronomi 5:7

“ ‘Nnɛnya nyameɛ foforɛ biala ɛboka me so.

Deuteronomi 6:14

Nnɛma ɛmɔdi nyameɛ foforɛ biala si; mmenia bɔ bapɛ ɛmɔ nwo bayia ne, nnɛma ɛmɔdi bɛ nyameɛ nemɔ nu biala si,

Deuteronomi 6:5

Fa w’ahone mukoraati, wɔ kra mukoraati, ɔne w’anwoserɛ mukoraati kuro AWURADE wɔ Nyameɛ dwirɛ.

Filipifoɛ 3:19

Bɛ yeɛ b’ayieleɛ te ɛsɛkyelɛ ɔ, bɛ nyameɛ ole bɛ ko, b’animguaseɛ nu yeɛ b’animnyam wɔ ɔ, na aseɛ so nningyein ngome yeɛ bɛdwene ye nwo ɔ.

Kolosefoɛ 2:18

Nnɛmɔma sona biala bɔ ɔpati brɛ ye nwo ase, bɔ ɔsɔne abɔfo mɔ, bɔ ɔnwa wanya nyekyire, bua ɛmɔ foɛ; ofikyɛ ye adwene mbaen yeɛ ɔfa tu ye nwo yɔ sɔ ɔ.

Nyekyire 19:10

Yeɛ mvale me nyunu mmutuli ase wɔ ye gya bo kyɛ mesɔne ye, nakoso osele me kyɛ, “Nea, nnɛyɔ sɔ! Ofikyɛ me koso nde ebiɛngo akoaa, wɔ ne eliɛma mɔ bɔ betira Yesu adanzeɛ ne anu ne. Sɔne Nyameɛ! Ofikyɛ Yesu adanzeɛ ne, ye ole ngɔmhyɛlɛ sunzum ne.”

Nyekyire 22:9

Na osele me kyɛ, “Nea, nnɛyɔ sɔ! Ofikyɛ me koso nde ebiɛngo akoaa, wɔ ne eliɛma mɔ ngɔmhyɛlɛfoɛ, yeɛ bɛ bɔ betira nwomaa he anu dwirɛ nu ne. Sɔne Nyameɛ!”

Maenbulɛfoɛ 6:10

Na nga ngyirele ɛmɔ kyɛ, ‘Me ole AWURADE ɛmɔ Nyameɛ; Amorifoɛ bɔ ɛmɔte b’aseɛ so ne, nnɛma ɛmɔsɔne bɛ nyameɛ mɔ.’ Nakoso ɛmɔandie me dwirɛ.”