Ɛksadɔso 18:8 - AHYERƐLƐ KRONGRON

⁸ Na Mose fale ɛhemɔ nwo amaneɛ bɔle ye sia bienzua ne: nningyein mukoraa bɔ ɔnate Yisrael ti AWURADE afa ayɔ Faro ne Misraimfoɛ, ɔne amaneɛ mukoraa bɔ Yisraelfoɛ nwuni ye wɔ atunu, yeɛ afei kyɛbɔ AWURADE si yele bɛ fili nu ɔ.

Ɛksadɔso 18:8 Iomraidhean Croise

Gyenesise 44:34

Méyɛ sɛɛ né masa mahɔ me baba berɛ wɔ aberɛ bɔ abɛɛmaa ne ɔbboka me so ɔ? Membena kyɛ menwu kyɛ edwirɛ tɛɛ bie kɔto me baba ɔ.”

Nehemia 9:32

“Yiti afei, yɛ Nyameɛ bɔ ɛte piri bɔ wɔ nwo yɛ suro, bɔ edi apam so ná ekyire ɔdɔ bɔ onni ngasi ɔ, amaneɛ amukoraa bɔ wato yɛ ne y’ahemvo, yɛ mbanyi mɔ, y’asɔfo mɔ, yɛ ngɔmhyɛlɛfoɛ, yɛ nana mɔ, ɔne wɔ mmenia amukoraa, ofi Asiria ahemvo mɔ aberɛ so bɔ ɔbaadwu ɛnɛ ye, nnebu ye nikyee ba.

Edwein 106:10

Yiti ɔpepɛ lele bɛ fili mmenia bɔ bekyi bɛ ɔ nemɔ sa nu, na olele bɛ fili pɔfoɛ nemɔ sa nu.

Edwein 106:8

Nakoso ɔnate ye dumaa ti, ɔpepɛ lele bɛ, amaa ɔnate so wala ye tumi kandinga ne ali.

Edwein 107:2

Bɛ bɔ AWURADE apepɛ ale bɛ ne, odi kyɛ bɛkã sɔ; bɛ bɔ wapepɛ wale bɛ wafi amaneɛ nu,

Edwein 66:16

Ɛmɔ amukoraa bɔ ɛmɔsuro Nyameɛ ɔ, ɛmɔbra beetie, na bɔ wayɔ wama me ne, ngɔhã ngohyire ɛmɔ.

Edwein 81:7

Esu frɛle me wɔ w’amaneɛnwunɛ nu, na mbepɛ nnele wɔ; nekaa bɔ agralaa wɔ wɔ mvealeɛ nu ne, berɛ yeɛ mmane wɔ mmuayɛɛ, na nzole wɔ neane wɔ Meriba asue anwo. Sela

Ɛksadɔso 15:16

Ahunundetelɛ ne ɛserɛ atɔ bɛ so; ɔnate wɔ tumi asaa ne ati, bayɛ dinn kyɛ nyɔboɛ, kɔpem kyɛ, O AWURADE, wɔ mmenia kɔpɛ nu kɔhɔ ɔ, kɔpem kyɛ mmenia bɔ ale bɛ ne kɔpɛ nu kɔhɔ ɔ.

Ɛksadɔso 15:6

O AWURADE, wɔ sa famaa ne te ngonim ne tumi, O AWURADE, wɔ sa famaa ne dworɔm pɔfoɛ ne.

Ɛksadɔso 16:3

Besele Mose ne Aarɔn kyɛ, “Sɛ AWURADE tumi maa yɛwuwuli Misraim aseɛ so a, ahaa ɔte paa. Berɛ de, yɛtenatenane naen kukue nwo yɛdidili yɛtele naen mane yɛ ko yili pambee. Nakoso ɛmɔafa yɛ baagua ɛserɛ so wa kyɛ bɛbaama ɛhɔen ku maen ye amukoraa.”

Ɛksadɔso 18:1

Midian sɔfo Yɛtro, bɔ ɔte Mose sia bienzua ne, ɔtele bɔ Nyameɛ ayɔ amukoraa ama Mose ne ye maen Yisrael, ɔne kyɛbɔ AWURADE asi aye Yisrael afi Misraim ɔ.

Ɛksadɔso 2:25

Nyameɛ neane Yisraelfoɛ nemɔ, na bɛyɛle ye anwumvo.

Ɛksadɔso 23:23

Na sɛ m’abɔfo ne di wɔ nyunu fa wɔ kodwu Amorifoɛ, Hitifoɛ, Perisifoɛ, Kanaanfoɛ, Hiwifoɛ ne Yebusifoɛ berɛ a, ngokyikyi bɛ boso bɔkɔɔ.

Ɛksadɔso 4:23

Na mekã mekyire wɔ kyɛ, “Ma mma ne ɔhɔ ɔɔsɔne me.” Na sɛ amma ye ate ma wangɔ a, ngohũ wɔ bamuɛbaa bienzua.’ ”

Ɛksadɔso 7:4

nakoso Faro ngɔtɛ ɛmɔ so. Ngɔfa me tumi ngɔhwe Misraim so, na ngɔfa asohwenɛ piri so ngɔye me lɔen, me mmenia Yisraelfoɛ, ngofi Misraim aseɛ so.

Ɛksadɔso 7:5

Na sɛ metengyɛ me sa wɔ Misraim so, ná meye Yisraelfoɛ mefi bɛ nu a, Misraimfoɛ konwu kyɛ me ole AWURADE.”

Numeri 20:14

Mose tuli ɛbɔfoɛ fili Kadese maa bɛhɔle Edom hene berɛ beesele ye kyɛ, “Eliɛma Yisrael nwa: Ɛse edwirɛ tɛɛ mɔ bɔ watoto yɛ ne amukoraa.