Ɛksadɔso 16:3 - AHYERƐLƐ KRONGRON

³ Besele Mose ne Aarɔn kyɛ, “Sɛ AWURADE tumi maa yɛwuwuli Misraim aseɛ so a, ahaa ɔte paa. Berɛ de, yɛtenatenane naen kukue nwo yɛdidili yɛtele naen mane yɛ ko yili pambee. Nakoso ɛmɔafa yɛ baagua ɛserɛ so wa kyɛ bɛbaama ɛhɔen ku maen ye amukoraa.”

Ɛksadɔso 16:3 Iomraidhean Croise

2 Samuel 18:33

Edwirɛ ne mane Nana Dawide wora bɔle. Na sua bɔ ogyi pambim ne aso ne, ɔfo hɔle nu oosuni. Ɔkɔ ne, né osũ kyɛ, “Yieee, mma Absalom, mma ye, mma Absalom! Ahaa maa nwu ma ɛtena ase e! Ao Absalom, mma ye, mma ye!”

YOB NWOMAA NE 3:1

Ɛhe asi ne, Yob bukyele ye noa nomale ye krakyẽa.

YOB NWOMAA NE 3:10

ofikyɛ wandua me ni awodeɛ ye noa ate, bɔ ɔnate so wamaa menwu amaneɛ ɔ.

YOB NWOMAA NE 3:20

“Sona bɔ ɔyɛ anwumvo ne, nzu ati yeɛ ɛma ye kanea, ná ɛma bɔ odi aworabɔlɛ onya ngoa ɔ?

Edwein 107:5

Ɛhɔen ne nzuhɔen huni bɛ, na bɛ kra botole wɔ bɛ nu.

Edwein 78:19

Bedwudwo betiale Nyameɛ kyɛ, “Aso Nyameɛ kɔhora kɔma yɛ aleɛ wɔ ɛserɛ so?

Edwein 78:25

Adasa mmaa belili abɔfo aleɛ; Nyameɛ mane bɛ aleɛ maa obuli bɛ so.

Ɛksadɔso 14:11

Na besele Mose kyɛ, “Asieleɛ mɔ nne Misraim hɔ ɔ, bɔ yiti yeɛ afa yɛ awa kyɛ yɛɛwuwu yɛgua ɛserɛ ye aso ye? Ɛɛyele yɛ fili Misraim ne, bɔ amaa wato yɛ hɔ ɛne?

Ɛksadɔso 17:3

Nakoso nzuhɔen huni mmenia ne wɔ berɛ, na bɛpenepenene bɛ komvi beguale Mose so. Bɛhane kyɛ, “Nzu ati yeɛ ɛɛyele yɛ fili Misraim ɔ, kyɛ ɛbaama nzuhɔen ku yɛ ne yɛ mma ne yɛ ngaka ɔ?”

Ɛksadɔso 2:23

Afoɛ pee pɛle nu, na Misraim hene wuli. Afei Yisraelfoɛ nwuni ngoaasolɛ nu amaneɛ piri paa; bɛbɔle awuye, na bɛ suɛ wɔ ngoaasolɛ nu ne dwuli Nyameɛ nyunu.

Ɛksadɔso 5:21

Na besele bɛ kyɛ, “Nyameɛ ɔ́nea ɛmɔ na óbua ɛmɔ ndɛen, ofikyɛ ɛmɔamaa yayɛ tɛɛ wɔ Faro ne ye mbanyi nyunu, na ɛmɔafa ngrandɛ bawura bɛ sa nu kyɛ behũ yɛ.”

Yeremia 2:6

Bammisa kyɛ, ‘AWURADE wɔ nisua? Ye bɔ ɔyele yɛ fili Misraim aseɛ so wale ne, bɔ olili yɛ nyunu fale yɛ fale ɛserɛ so, aseɛ pralaa ne ngumaa aseɛ so, wɔ aseɛ bɔ esue ndɔ wɔ so, bɔ so te awosii kabii ne, aseɛ bɔ ebiala mbɛ nu wɔ so, bɔ ebiala ɔtte so ne.’

Yeremia 42:14

bɛkã kyɛ, ‘Daabi, Misraim aseɛ so mmom yeɛ yɛkɔhɔ ɔ, na dɔ de, koɛ ngɔto yɛ, yɛngɔte totorobɛndo nga, yeɛ aleɛ nwo hɔen ngohũ yɛ, na dɔ yeɛ yɛkɔɔtena ɔ’ a,

Yeremia 44:17

Na mmom yɛkɔhɔ so yɛkɔyɔ nikyee biala bɔ yahã kyɛ yɛkɔyɔ ɔ: yɛkɔyera ayirefona yɛkɔma nyameɛso hemmaa, ná yabɔ anonneɛ afɔleɛ yama ye kyɛbɔ yɛ ne yɛ nana mɔ, y’ahemvo mɔ ne y’atitire mɔ yɛyɔle ye wɔ Yuda nguro ne Yerusalem mmorɔnoɛ mɔ so ne; ofikyɛ sɔ mmerɛ ne, né yɛnya aleɛ pee yɛdi, yɛnya ngɔsoɛ, na yande edwirɛ tɛɛ biala.”

Awuye 4:9

Bɛ bɔ bafa ngrandɛ bahũhũ bɛ ne, bɛte paa bɛtra bɛ bɔ ɛhɔen amaa bawuwu ɔ, bɔ bafɔ bayɛ kangenaen, ɔnate fieso aleɛ bɔ wabɔ bɛ ne ati.

Numeri 11:15

Sɛ sɔ yeɛ ɛfa di me de a, ye de ku me pɛen ko. Nakoso sɛ anya alo me de a, nnɛma aworabɔlɛ to me.”

Numeri 11:20

na mmom ɛmɔkoli ye bosome ko mumua, kɔpem kyɛ ɔkɔfa ɛmɔ bonyi anu, ná wabɔ ɛmɔ ɔ, ofikyɛ ɛmɔapo AWURADE bɔ ɔne ɛmɔ te ne, na ɛmɔabɔ awuye wɔ ye nyunu kyɛ, ‘Nzu ati po yeɛ yɛtu yɛfili Misraim ye?’ ”

Numeri 14:2

Na Yisraelfoɛ amukoraa bɛpenepenene bɛ komvi beguale Mose ne Aarɔn so. Maen ne amukoraa sele bɛ kyɛ, “Sɛ yɛwuwuli wɔ Misraim aseɛ so po a, ahaa ɔte paa! Sɛ yɛwuwuli wɔ ɛserɛ ye aso po a, ahaa ɔte paa!

Numeri 14:3

Nzu ati yeɛ AWURADE ɔfa yɛ ba aseɛ he aso maa yɛbatotɔ wɔ ngrandɛ noa ye? Yɛ ye mɔ ne yɛ mma mɔ kɔyɛ koɛ nu nzesadeɛ. Sɛ yɛsa yɛ si yɛkɔ Misraim a, aso ahaa ɔtte paa mma yɛ?”

Numeri 16:13

Aso ɔte edwirɛ baa kyɛ aaye yɛ afi aseɛ bɔ nyɔfonesue ne woɛ tengyɛ wɔ so ɔ so, kyɛ ɛbaahu yɛ wɔ ɛserɛ ye aso, bɔ yeɛ esa hyɛ yɛ so ɔ?

Numeri 16:41

Nakoso aleɛ hyene ne, maen ne amukoraati bɛpenepenene bɛ komvi beguale Mose ne Aarɔn so kyɛ, “Ɛmɔahu AWURADE mmenia.”

Numeri 21:5

Yisraelfoɛ dwudwole tiale Nyameɛ ne Mose kyɛ, “Nzu ati yeɛ ɛmɔaye yɛ bafi Misraim aseɛ so kyɛ yɛɛwuwu wɔ ɛserɛ ye aso ye? Ofikyɛ aleɛ ne nzue nne wa, na sɔ aleɛ tɛɛtɛɛ he abɔ yɛ.”

Asomafoɛ 26:29

Na Pɔɔlo buale kyɛ, “Sɛ ɔhale kãa oo, ɔhhale kãa oo, me de mesrɛ Nyameɛ kyɛ nna wɔ ngome, na mmom bɛ bɔ betie me ɛnɛ ye amukoraa koso kɔyɛ kyɛ me ala; sana ngɔnzɔngɔnzɔ bɔ ogua me ye yeɛ ɔbboka so ɔ!”

1 Korintofoɛ 4:8

Nna ɛmɔ ɔ! Ɛmɔ sa ahã bɔ ɛmɔpena ɔ dada! Ɛmɔanya bɛ nwo bayie. Ɛmɔakwati yɛ bayɛ bɛ nwo ahemvo! Me kunu a, ahaa ɛmɔte ahemvo amba, amaa yɛne ɛmɔ abɔ nu yali hene.

2 Korintofoɛ 11:1

Sɛ ɛmɔfa me ngwaseasɛm ne sɔ ala ma me a, ahaa mekuro. Mesrɛ ɛmɔ ala ɛmɔfa ye sɔ!

Deuteronomi 28:67

Aleɛ kye ngyerɛmɔ a, ɛkɔha kyɛ, ‘Me kunu a ahaa aleɛ adwo!’ yeɛ aleɛ dwo koso a, ɛkɔha kyɛ, ‘Me kunu a ahaa aleɛ ahye!’ ɔnate wɔ kunu bɔ ɔkɔtete wɔ, ɔne nningyein bɔ wɔ nye konwu ye ne ati.

Deuteronomi 8:3

Ɔmane ɛhɔen huni wɔ fa brɛle wɔ ase, na mana bɔ né ɛnze nikye horɛ, bɔ wɔ nana mɔ koso bɛnze nikye horɛ ne, ɔmane wɔ bie maa elili. Ɔyɔle sɔ, kyɛbɔ ɔkɔmaa ekonwu ye kyɛ, nna aleɛ ngome yeɛ ɔma sona nya ngoa ɔ, na mmom AWURADE noa nu dwirɛ biala yeɛ ɔma sona nya ngoa ɔ.

Yosua 7:7

Na Yosua sele kyɛ, “O, AWURADE Nyameɛ! Nzu ati koraa yeɛ ɛfale maen he pɛle asue Yɔɔdan ɔ, kyɛ ɛbaafa yɛ wura Amorifoɛ sa maa bekuku yɛ ɔ? Sɛ né yɛse po a, ahaa yɛhale Yɔɔdan si dɔ!